2 कोरिन्थी 11 - राना थारु नयाँ नियमपावल और झुठे चेला 1 तुम उनके स्वीकार करत हओ जो अपनो प्रसंसा अपनए करत हएं और मए आसरा करत हओं, कि अगर मए थोरी मुरख कता काम करत हओं कहेसे तुमए मोके सहान पणैगो। 2 मए तुमसे उइसी प्रेम करत हओं, और तुम्रो चिन्ता करत हओं जैसे परमेश्वर करत हए। मए तुमके तुमर एकए इकल्लो लोगाके रुपमे रहो ख्रीष्टमे सौँपनको बाचा करो हओं। मए तुमके बाको पबित्र लुल्हीनके रुपमे देन चाँहत हओं। 3 पर जैसे शैतान साँपके रुपमे अपनी चलाँकीसे पहिले बैयर हव्वाके छली, उइसीयए ख्रीष्ट घेनको तुमर निष्कपट और बाको सेवासे तुमर बिचार भ्रममे पणहएं कि कहिके मोके डर लागो हए। 4 कोइ आएके, तुम हमर द्वारा परचार करोभओ येशू बाहेक और दुस्रो येशूके परचार करे कहेसे, वा तुम पाए भए आत्मा बाहेक और दुस्रो आत्मा ग्रहण करे कहेसे, वा तुम उत्सहापूर्वक पाए भए अच्छो समाचार बाहेक और दुस्रो कोइ अच्छो समाचार ग्रहण करे कहेसे, तुम बो शिक्षा ग्रहण करके गल्ती करैगे। 5 अगर बे अपनएके सबए येशूसे चुनेभए चेलनसे महान भओ कता ब्यबहार और काम करत हएं कहेसे मए फिर अपनएके उनही कता असल सोँचंगो। 6 मए सिपालु वक्ता नाए होएसे फिर मोएमे ख्रीष्ट और अच्छो समाचारके बारेमे ज्ञान हए। मए मिर ज्ञान बे सबए बातमे दिखाओ हओं जौन मए सिखो हओं। 7 मए तुमर बीचमे परमेश्वरको अच्छो समाचार सेँतएमे परचार करके अपनएके नम्र करो, ताकी तुमर सम्मान होए। का मए अइसो करके कुछ पाप करो? 8 मए दुस्रे मण्डलीनसे योगदान स्वीकार करो, ताकी मए बिना कोइ किमतसे तुमर सेवा करपाओं। बोके लुट मत् कहाबओ! 9 तुमर सँग रहत पेती जब मोके रुपैयाको अभाव पणो रहए मए कोइको बोझ नाए भओ, काहेकी माकेडोनिया परदेशसे आएभए बिश्वासी ददाभइया मिर अभाव पुरा करदइं। तभीमारे कोइ किसिमसे तुमर उपर बोझ पणहए कि कहिके मए अपनएके रोको, और पिच्छु आन बारो दिनमे फिर रोकंगो। 10 मए पक्का हओं, कि ख्रीष्टको सत्य मोएमे हए, और अखैया परदेशके इलाकाके कोइसे मए रुपैया नाए लैगओ हओं, जा बातमे गर्ब करनसे मोके कोइ नाए रोक पएहए। 11 मए तुमर रुपैया काहे नाए लैगओ? का मए तुमके प्रेम नाए करके अइसो करो? परमेश्वर जानत हए मए तुमके प्रेम करत हओं। 12 मए तुमसे सहयोग नाए लेमंगो ताकी मए उनके रोक पामओं, जौन जा बातमे घमण्ड करनके ताहीं एक मौका ढुणत हएं कि परमेश्वरके ताहीं उनको काम हमर काम कता हए। 13 काहेकी अइसे आदमी सच्चे चुनेभए चेला नाए हएं पर बे छल काम करन बारे हएं, और ख्रीष्ट येशूसे चुनेभए चेलानके भेष लैके नेँगन बारे इकल्ले हएं। 14 और जा कोइ अचम्मोको बात नाए हए, काहेकी शैतान फिर परमेश्वरको महिमित स्वर्गदूतके भेष लैके धोखा दइ रहए। 15 उइसो हुइहए कहेसे शैतानके सेवक फिर परमेश्वरके अग्गु धर्मी सेवकके भेषमे देखा पणनो अचम्मोकी बात नाए हए। आखिरमे बिनके अपनो कामको फल भोगनए पणैगो। पावलके बहुत कष्ट 16 मए फिरसे कहात हओं, मोए कोइ फिर मुरख नाए सम्झए। पर तुम अइसे सम्झत हओ कहेसे फिर मुरखए कता मोके स्वीकार करओ, ताकी मए फिर कुछु घमण्ड करपामओं। 17 नेहात्तओ घमण्ड करन बारो बात करके मए मुरखए बात मस्कनडटो हओं। जा प्रभुके द्वारा मस्कन लगाओ भओ बात नाए हए। 18 बहुतसे जा संसारके आदमीन कता घमण्ड करेके कारणसे मए फिर घमण्ड करत हओं। 19 तुम अपनए इत्नो बहुत बुद्धिमानी भए हओ, कि खुसीसाथ मुरखन्के सहात हओ। 20 काहेकी अगर कोइ आदमी तुमके कमैया बनातहए, या तुमर सँग भओ सब चीजके लैजात हए, या तुमरसे फाइदा उठात हए, या धाक लगात हए, या तुमर मुँहुँमे थप्पड लगात हए कहेसे फिर तुम सहात हओ। 21 का तुम सोँचत हओ, कि मए उइसो नाए करेके कारणसे मए लज्जित हओं? पर कोइ कुछु बातमे घमण्ड करत हए कहेसे, मए फिर बे बातमे घमण्ड करत हओं। हाँ, मए मुरख कता बोलरहो हओं। 22 का बे हिब्रू हएं? मए फिर हिब्रू हओं। का बे इस्राएल देशके हएं? मए फिर इस्राएल देशको हओं। का बे अब्राहामके सन्तान हएं? मए फिर अब्राहामके सन्तान हओं। 23 का बे ख्रीष्टके सेवक हएं? मए ख्रीष्टको औ अच्छो सेवक हओं। पागल कता मए बत्कात रहत हओं। मए उनसे कहुँ जद्धा बन्दी बनाओ गओ हओं, अनगिन्ती पिटो गओ हओं, अक्सर मेरे प्राण संकटमे पणे हएं। 24 पाँच चोटी यहूदी अगुवनको हातसे उन्चालिस कोर्रा पाओ। 25 तीन चोटी मोके लठ्ठीसे मारीं। एक चोटी पत्थरसे मारीं। तीन चोटी, मए चढो भओ जहाज ध्वस्त भओ। एक दिन और एक रात मए समुन्दरएमे बिताओ हओं। 26 मिर घरिघरि करोभओ यात्रामे मए नदीयाके जोखिममे पणो, डाँकुनके जोखिममे, अपनुवए जातिके आदमीनके जोखिममे, गैर-यहूदीनके जोखिममे, सहरके जोखिममे, जंगली इलाकाको जोखिममे, समुन्दरको जोखिममे, झुठे बिश्वासी ददाभइयनसे आन बारो जोखिममे। 27 बहुत मेहेनत करो और दुख सहो, और मए कैयौं रात नाए सोओ, भुँखेमे और प्यासेमे, बारम्बार भोखमरीमे, ठण्डी और नंगतामे पणो। 28 और औ बातके अलाबा सबए मण्डलीनको फिक्रीको बोझ मिर उपर हए। 29 जब कोइ कमजोर होतहए कहेसे मए फिर कमजोर महसुस करत हओं। जब कोइ पापमे पड्जात हए तओ मए बहुत परेसान होत हओं। 30 मोके गर्ब करनए पणहए कहेसे, मए अपनो कमजोरी दिखान बारो बातमे गर्ब करंगो। 31 परमेश्वर, हमर प्रभु येशूको दौवा, जो सदासर्वदा धन्यको हए, बा जानत हए, कि मए नाए ठगत हओं। 32 दमस्कस सहरमे अरितस राजाको बडो हाकिम मोके पकणनके ताहीं दमस्कस सहरमे घेरा लगाए रहएं। 33 पर दिबालको एक झ्यालसे डोकामे धरके मोके तरे गिराए दइं, बहेमारे मए बडो हाकिमके हातसे बचके निक्रो। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation