2 कोरिन्थी 1 - राना थारु नयाँ नियम1 मए, पावल हमर बिश्वासी भइया तिमोथीसँग जा चिट्ठी लिखनडटो हओं। मए परमेश्वरकी इच्छासे ख्रीष्ट येशूको चुनो भओ चेला हओं। मए जा चिट्ठी कोरिन्थ सहरमे भए परमेश्वरको मण्डलीनके, और लगायत सारा अखैया परदेशमे भए सब पबित्र जनके लिखनडटो हओं। 2 मए प्राथना करत हओं, कि हमर दौवा परमेश्वर और प्रभु येशू ख्रीष्ट तुमके अनुग्रह करए और तुमके शान्ति महसुस कर्बाबए। सान्त्वनाको परमेश्वर 3 हमर प्रभु येशू ख्रीष्टको दौवा और परमेश्वरके प्रसंसा होए, जो करुणामय दौवा और हमके रोज सान्त्वना देन बारो परमेश्वर हए। 4 परमेश्वर हमर सब मेलके दुखमे सान्त्वना देतहए, ताकी हम फिर दुस्रेनके सान्त्वना दइ पामएं। जैसी परमेश्वर हमके सान्त्वना दइहए उइसी हम औरेनके सान्त्वना दइ सकत हएं। 5 काहेकी जो हम दुख भोगे हएं उइसी ख्रीष्ट दुख भोगी, उइसीयए ख्रीष्टद्वारा परमेश्वर हमके सान्त्वना देतहए। 6 अगर हम दुख पातहएं, तओ जा तुमरी सान्त्वना और उद्धारको ताहीं हए और अगर हम सान्त्वना पातहएं, तओ जा तुमरी सान्त्वनके ताहीं हए; जोको प्रभावसे तुम धिरजके साथ बे दुखके सहिलेत हओ, जौनके हम फिर सहात हएं। 7 और तुमर ताहीं हमर आसरा मजबुत हए। काहेकी हम जानत हएं, कि जैसी तुम हमर दुखमे सहभागी हओ, अइसियए हमर सान्त्वनामे फिर तुम सहभागी होबैगे। 8 हे मेरे बिश्वासी ददाभइयओ, हम एशिया परदेशमे भोगेभए दुखके बारेमे तुम पता पाबओ कहिके मए चाँहत हओं। काहेकी हम इत्नो जद्धा बोझसे दबे रहएं, कि हमर सहान बारो शक्तिसे फिर बहुत रहए, हियाँतककी हम बचंगे कहिके हमर आसरा फिर नाए रहिगओ रहए। 9 हम मरनडटे हएं कता हमके लागो रहए। हम अपने उपर नाए, पर मरे भएनके जिन्दा करन बारो परमेश्वर उपर हम आसरा करपामएं कहिके अइसो भओ रहए। 10 बा हमके मृत्युको भयानक खतरासे बचाइ हए, और बा हमके बचाबैगो। बाके उपर हम आसरा करेहएं, कि बा हमके फिरसे बचाबैगो। 11 और तुम फिर मिल्के प्राथना द्वारा हमके मदत कररहे हओ। अइसे प्राथना करत पेती हमर ताहीं चढाए भए बहुत प्राथनाके जबाफमे परमेश्वर हमके अनुग्रह करैगो और बहुत आदमी हमर ताहीं धन्यबाद देमंगे। पावल योजना बदली 12 हम गर्ब करत हएं, कि हमर बिबेक स्पष्ट हए। संसार और खास करके तुमर सँगको हमर सम्बन्धमे हम परमेश्वरसे आओ भओ पबित्रता और सत्यतामे चले हएं। जा मानब बुद्धिसे नाए, बल्कि परमेश्वरको अनुग्रहसे हए। 13 हम रोज तुमर ताहीं लिखत हएं, ताकी तुम पढके बुझ पाबओ। अभएतक तुम थोरीए बुझे रहओ पर अब मए आसरा करत हओं, कि तुम हमके पुरा रुपमे बुझैगे। 14 उइसीयए हमर प्रभु येशू लौटके आबैगो तओ तुम हमके पुरा रुपमे बुझैगे, और हम तुमर बारेमे घमण्ड करे हानी तुम फिर हमर बारेमे घमण्ड करपाबैगे। 15 तुम हमके बुझैगे कहिके मोके आसरा रहए, जहेमारे मए तुमके दुई चोटी भेँटनके आएके दोबर आशिष देन चाँहत रहओं। 16 मिर योजना जा रहए, कि मए माकेडोनिया परदेश जात पेती तुमके भेँटके जान और लौटके फिरसे तुमके भेँटन, और हुवाँसे यहूदिया परदेशको मिर यात्रामे तयारीके ताहीं तुम मिर मदत करैगे। 17 का मए अइसे करत पेती स्थिरता नाए दिखाओ? का मए अपनो योजना बनात पेती संसारके आदमीन कता अभए “हाँ-हाँ” और पिच्छु “नाए-नाए” कहान बारो हओं? 18 परमेश्वर बिश्वासयोग्य भओ हानी, हम तुमसे जो बात कहात हएं बो बात सदा दिन सच्चो हए। 19 काहेकी सिलास, तिमोथी और मए तुमर बीचमे परचार करोभओ परमेश्वरको लौंणा येशू ख्रीष्ट झुठो नाए हए। पर बामे रोज सच्चाई इकल्लो हए। 20 काहेकी परमेश्वरके सब प्रतिज्ञा ख्रीष्टमे पुरा होत हए। जहेमारे परमेश्वरके महिमाके ताहीं हम “आमेन” कहात हएं। 21 परमेश्वरए हमके तुमर सँग ख्रीष्टमे मजबुत बनाइ हए और हमके चुनी हए। 22 और बा हमर उपर अपन छाप लगाइ हए, और हमर ह्रदयमे बैनाके रुपमे पबित्र आत्मा दइ हए। 23 परमेश्वर मिर जा सच्चो बातको साक्षी हए, कि मए औरो चोटी कोरिन्थ सहरमे जाकेमारे नाए आओ काहेकी मए तुमके दुख देन नाए चाँहत रहओं। 24 हम तुमर बिश्वासके उपर हमर अधिकार जमान नाए चाँहत हएं। पर तुमर आनन्दके ताहीं तुमरे सँग मिलके काम करत हएं। काहेकी अपन बिश्वासमे तुम स्थिर हओ। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation