1 तिमोथी 4 - राना थारु नयाँ नियमझुठे शिक्षा देन बारे गुरुनसे होसियार 1 पर पबित्र आत्मा प्रष्टसे कहात हए, कि आखिरी समयमे कुछ आदमी ख्रीष्टको सन्देशमे बिश्वास नाए करंगे। बे भुतनके सन्देशमे बिश्वास करंगे जो उनके भणकात हए, और बे झुठो सन्देशमे बिश्वास करंगे जो भुतके घेनसे आत हए। 2 बे झुठे आदमीनको कपटीके कारण अइसे झुठे सन्देशके सिखात हएं। जैसे तत्तो लोहा लैके जलो भओ खालके कोइ महसुस नाए होत हए। उइसी बे जा बातके जानत नैयाँ, कि बे ठिक करत हएं कि गलत करत हएं। 3 बे झुठे आदमी सिखात हएं, कि बेहा करनो और कोइ-कोइ मेलको खानु खान गलत हए। पर परमेश्वर जा सब खानु बिश्वासीनके ताहीं बनाइ हए, जो परमेश्वरके धन्यबाद दइके खानु खानको सच्चो सन्देशके जानत हएं। 4 काहेकी परमेश्वरसे बनोगओ, हर चीज अच्छो हए, और कोइ चीज हर मेलको खानु खानके परमेश्वरके ताहीं ग्रहणयोग्य हए। पर परमेश्वरके धन्यबाद दइके बोके स्वीकार करन पणत हए। 5 काहेकी परमेश्वरको बचन और प्राथनासे जा ग्रहणयोग्य हुइजात हए। ख्रीष्टको उत्तम सेवक 6 अगर तए सब बिश्वासी ददाभइयनके लगातार जे बातको शिक्षा देतए रएहए कहेसे तए ख्रीष्ट येशूको एक अच्छो सेवक ठहिरैगो। और परमेश्वर तोके बिश्वास और अच्छो शिक्षाके माध्यमसे तालिम देबैगो, जौन शिक्षाके तए पालन करो हए। 7 झुठे कहानीमे समय बर्बाद मत् करीए, जो कहानी परमेश्वरके सम्मान नाए देत हएं। और तए परमेश्वरको दओ भओ जीबन जीइनके ताहीं अपनएके लगातार तालिम दिए। 8 काहेकी शरीरको तालिमसे थोरी दिनके ताहीं फाइदा होत हए, पर भक्तिपूर्ण जीबन सब बातके ताहीं फाइदा होत हए, काहेकी जा जीबनमे और आन बारो जीबनमे तए बहे जीबनके पाबैगो, जोको वादा परमेश्वर करीहए। 9 जा एक सच्ची कहानी हए, और हर तरिकासे माननको लायक हए। 10 हम जा जीबन पानके ताहीं संघर्ष करत हएं और कडी मेहेनत करत हएं काहेकी हम जिन्दा परमेश्वरमे आसरा करत हएं जो सब आदमीनको मुक्तिदाता हए, और खास करके उनको मुक्तिदाता हए, जो बामे बिश्वास करत हएं। 11 बिश्वासीनके जे आदेशके बारेमे शिक्षा दे और जे बातमे जोड दे, कि बे शिक्षाके पालन करएं। सेवकाईमे ध्यान देनो 12 अइसो ब्यबहार कर, कि कोइ फिर तोके हेल्हा नाए करपाबए काहेकी तए जवान हए। तेरो बोलो जान बारे शब्दमे, तेरो ब्यवहारमे, दुस्रेके उपर तेरो प्रेममे, ख्रीष्टमे तेरो बिश्वासमे और तेरो पबित्र जीबनसे तोके एक नमुना बनन पणैगो। ताकी बिश्वासी आदमी तिर अनुसरण कर पामएं। 13 जब तक मए हुवाँ नाए पुगंगो तबतक तए बिश्वासीनके ताहीं पबित्र-शास्त्रके बडो अबाजसे पढनके ताहीं, उत्सहा देनके ताहीं और पबित्र शास्त्रको मतलब बुझनके ताहीं समय निकार। 14 बहे बातके याद कर, जब मण्डलीको अगुवाको समुह अपन हात तिर उपर धरी रहएं और परमेश्वर उनके तिर खास योग्यताके बारेमे बतानके ताहीं सन्देश दइ रहए। बो योग्यताके हेल्हा मत् करए। 15 जे बातनके होसियारसे तालिम कर और अपनएके उनमे पुरा समर्पित कर। ताकी हर कोइ जा देख पाबए, कि तए अपनो बिश्वासमे बढरहो हए। 16 जाके बारेमे होसियार रहो, कि तए कैसे रहात हए, और का सिखात हए। जे बातनमे स्थिर रहो, काहेकी अगर अइसो करतए रहो, तओ तेरे द्वारा परमेश्वर अपनए तोके और तेरे बात सुनन बारेनके फिर न्यायसे बचाबैगो। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation