1 तिमोथी 3 - राना थारु नयाँ नियमअगुवनको योग्यता 1 जा एक सच्ची कहानी हए, कि जो मण्डलीको रेखदेख करन बारो अगुवा होन चाँहत हए कहेसे बो अच्छो कामको इच्छा करत हए। 2 जहेमारे जा जरुरी हए, कि एक मण्डलीमे एकसे जद्धा अगुवा होमंगे, और मण्डलीके रेखदेख करन बारे अगुवामे दोष नाए होन पणो, और बोको एकए बैयर होन पणो, शान्तसे ब्यबहार करन पणो, अच्छो चालचलन होन बारो, आदमीनके द्वारा आदर करोजान बारो, बो अपनो घरमे पाहुननके स्वागत करनके ताहीं तयार होन पणो, और बो परमेश्वरको सन्देश अच्छेसे सिखानमे सक्षम होन पणो। 3 बो एक दरोहा आदमी या अइसो आदमी नाए होन पणो जो हमेसा लडतए रहात हए। पर बो दयालु और शान्त स्वाभावको आदमी होन पणो। और बाद-बिबाद करन बारो नाए होए और धनको लालची नाए होबए। 4 बोके अपन परिवारको रेखदेख और बन्दोबस्त अच्छेसे करन पणो और अपने बालकनके सिखान पणो, कि बे सब बातमे आदरसे बोको आज्ञाके पालन करएं। 5 एक आदमी जो अपनो परिवारको बन्दोबस्त करन नाए जानत हए, कहेसे बो नेहात्तओ जा फिर नाए जानत हए, कि परमेश्वरको मण्डलीके रेखदेख कैसे करोजाए। 6 बो बिश्वासमे मजबुत होन पणो, अगर बिश्वासमे मजबुत नाए हुइहए, तओ हुइ सकत हए, कि बो घमण्डी हुइजाए और फिर बोके बहे सजाय मिलैगो जो शैतानके मिलो रहए। 7 मण्डलीको रेखदेख करन बारे मण्डलीसे इकल्लो नाए, बल्कि मण्डलीसे बाहेर फिर आदर पाओभओ होन पणत हए। अइसो हुइहए कहेसे आदमीनके अग्गु बोको बेज्जत नाए हुइहए, और शैतानको फन्दामे नाए पणैगो। मण्डलीनको सेवा करन बारे 8 उइसी करके मण्डलीको सेवा करन बारे, अइसो लोग होन पणो जौनके आदमी आदर करएं, इमान्दार होबए, दारु पिन बारे आदमी नाए होन पणो, और एक अइसो आदमी नाए होन पणो जो धन पानके ताहीं जो फिर करत हए। 9 उनके ठिन शुद्ध बिबेक होन पणो जब बे जा बातमे बिश्वास करतए रहात हएं, कि परमेश्वर जो शिक्षा प्रकट करीहए बो शिक्षा सच्चो हए। 10 जब कोइ मण्डलीको सेवाके ताहीं चुनो जातहए, तओ पहिले उनके जा साबित करनदेओ कि उनके ठिन सही गुण हए या नाए हए, अगर उनमे कोइ फिर दोष नाए निक्रए कहेसे बे मण्डलीको सेवकको काम करएं। 11 अइसियए मण्डलीको सेवा करन बारेनकी बैयर सम्मानको लायक होन पणत हए; और दुस्रेनके बारेमे खराब बात बत्कान बारी नाए होबए, पर शान्त तरिकासे ब्यबहार करन बारी होबए, ताकी उनके उपर हर चीजमे भरोसा करपामएं। 12 मण्डलीको सेवा करन बारे आदमीनके अपनी बैयरके अग्गु बफादार होन पणो, अपने बालकनके सँगए-सँग अपने परिवारके और बाँकी सब परिवारको बन्दोबस्त करत होए और उनको रेखदेख करत होए। 13 काहेकी जो मण्डलीको सेवकको काम अच्छेसे करडारत हएं, कहेसे बे आदमीनसे आदर पात हएं, और बे ख्रीष्ट येशूमे अपने बिश्वासके बारेमे बणे सहासके सँग बत्काए लेत हएं। जीबनको रहस्य 14 मए जा चिट्ठी लिखतए, फिरसे मए तुमसे जल्दीए भेँट करन आसरा करत हओ। पर मए जे सब बात जहे कारणसे लिखत हओं, 15 कि अगर मए आनमे देर करदेमओं कहेसे, हम जौन जिन्दा परमेश्वरके मण्डली हएं, हमके परमेश्वरको परिवारको सदस्यके रुपमे अपन जीबन कैसे जीइन पणत हए कहिके तए जानजैए। जैसे घरको जग और खम्मा घरके सहारा देत हए और बोके मजबुत बनाए रखात हए, उइसीयए मण्डलीके बिश्वासी सच्चो शिक्षाके सहारा देत हएं और मजबुत बनाए रहात हएं। 16 बिना कोइ शंखाके हम जा बातके कहे सकत हएं कि, परमेश्वरसे प्रकट करेभए सन्देश पुरा रुपसे सच्चे हएं, अर्थात् ख्रीष्ट एक आदमीके रुपमे प्रकट भओ, बाके पबित्र आत्माके द्वारा परमेश्वरको लौंणाके रुपमे साबित करोगओ, स्वर्गदूत बाके देखीं, येशूसे चुनेभए चेला हर ठिहा बाके बारेमे जति-जातिनके अच्छो समाचार सुनाइं, संसार भरके आदमी बाके उपर बिश्वास करीं, और परमेश्वर बाके स्वर्ग उपर उठाए लैगओ। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation