1 तिमोथी 2 - राना थारु नयाँ नियम

आराधनाके बारेमे शिक्षा

¹ सबसे पहिले मए जा कहात हओं, कि बिन्ती, प्राथना, निबेदन और धन्यबाद सब आदमीनके ताहीं करे जामएं।

² राजनके ताहीं और बे सब आदमीनके ताहीं प्राथना करओ जो सरकारी अधिकारमे हएं, ताकी बे हमके शान्ति और सुरक्षासे रहानमे मदत करएं, ताकी हम परमेश्वरके आराधना करपामएं और दुस्रेनसे हमेसा ठिक ब्यबहार करएं।

³ सब आदमीके ताहीं अइसे प्राथना करन सही हए, और हमके उद्धार देन बारो परमेश्वर जाके स्वीकार करत हए।

⁴ परमेश्वर चाँहत हए, कि सबके सच्चाईको ज्ञान होबए, और बे आदमी मुक्ति पामएं।

⁵ काहेकी सिरफ एकए परमेश्वर हए, जो परमेश्वर और आदमीनके बीचमे मेलमिलाप करबाए सकत हए। बा येशू ख्रीष्ट हए, जो एक आदमीके रुपमे जनम लइ।

⁶ ख्रीष्ट पाप और मृत्युकी शक्तिसे मोल तिरके छुटानके ताहीं अपनएके बलिदान करदइ। बाको मृत्युके द्वारा परमेश्वर सही समयमे सबुत दइ, कि बा चाँहत हए, कि सब आदमी बचाए जामएं।

⁷ जहेमारे परमेश्वर मोके अच्छो समाचारको परचारक और एक चुनो भओ चेला होनके चुनी। बा मोके गैर-यहूदीनके बिश्वासको सच्चो सन्देश सिखानके ताहीं चुनी। मए नाए ठग रहो हओं; मए सच्चो बात कहात हओं।

मण्डलीनके बैयर और लोगके आदेश

⁸ मए चाँहत हओं, कि हर ठिहा जब तुम परमेश्वरको आराधना करनके ताहीं जमा होत हओ, तओ बे लोग जो पबित्र जीबन जीइत हएं अपने हातके उठाएके बिना दिक्क और बिना बिबाद करे प्राथना करएं।

⁹ अइसियए मए चाँहत हओं, कि बिश्वासी बैयरनके फिर ठिक तरिकासे लत्ता पैंधन पणो, अइसे लत्ता, कि जो तारिफको लायक हए, और स्वीकारको लायक हए; जैसे बे अपने बारके बनात हएं बोसे अपने घेन आकर्षित नाए करएं, और नए त सोनो, मोती और महिंगो लत्तासे,

¹⁰ पर जाके अलाबा, उनके दुस्रे आदमीनके ताहीं अच्छे काम करके अपनएके सुथ्री बनानके घेन लगन पणत हए। काहेकी परमेश्वरको भक्ति करन बारी बैयरके ताहीं जहे अच्छो हए।

¹¹ जब लोग बिश्वासीनके सिखात होमएं, तओ सब बैयरके चुपचाप और सम्मान पुर्वक रहिके सुनन और सिखन चाहो।

¹² मए बैयरनके, लोग आदमीनके शिक्षा देनके या उनके उपर अधिकार करनके अनुमति नाए देत हओं। जब तुम आराधनाके ताहीं इकट्ठा होत हओ, तओ बैयरनके चुप रहानके चाहो।

¹³ मए अइसे जाकेमारे कहीरहो हओं, काहेकी परमेश्वर पहिले आदम (लोग) के बनाइ और बोके पिच्छु हव्वा (बैयर) के बनाइ।

¹⁴ दुस्रो कारण हए, आदम और जहे बैयर हव्वा रहए जौनके साँप धोखा दइ, नाएकी आदमके। और अइसियए हव्वा परमेश्वरको नियमके तोडी।

¹⁵ पर परमेश्वर बालकाके जनम देनके द्वारा बैयरनके बचाए लेबैगो, जब तक बे लगातार ख्रीष्टमे बिश्वास करतए रएहएं, एकदुस्रे आदमीसे प्रेम करत रएहएं, और शुद्ध और ठिक तरिकासे ब्यबहार करतए रएहएं।