1 थेसलोनिकी 5 - राना थारु नयाँ नियमदुस्रो आगमनके ताहीं तयार रहानो 1 पर हे मेरे बिश्वासी ददाभइयओ, तुमके प्रभु येशू फिरके फिर्ता आबैगो करके बारेमे लिखन जरुरी नाए हए। 2 काहेकी तुमके पता हए, कि जैसे रातमे चुट्टा अचानक आत हए, उइसीयए प्रभु येशू फिरसे लौटके आबैगो। 3 जब आदमी कहात होमंगे, “शान्ति हए, और हम सुरक्षामे हएं,” तओ बो समय अचानक बे आदमी बणे दुखको महसुस करंगे, जा अइसियए इक्बरी हुइहए जैसी कोइ एक गरबबती स्त्रीके इक्बरी व्यथा लागजात हए। और बे बो बडो दुःखसे बचनाए पामंगे। 4 पर हे मेरे बिश्वासी ददाभइयओ, तुम त अंधियारोमे नाए हओ, कि प्रभुको फिरसे लौटके आनको दिन तुमर उपर चुट्टा हानी अचानक तुमर बिना तयारीको आएजाए। 5 काहेकी तुम, दिन और उजियारोके सन्तान हओ। रात और अंधियारोसे हमर कोइ सम्बन्ध नाए हए। 6 जहेमारे हमके गैर-बिश्वासीन कता सोतए रहाए नाए पणत हए, कहुँ अइसो नाए होए प्रभुक आन बारो दिन हम बिना तयारीके पाएजाएं। पर हमके जगे रहान पणत हए और अपनए सचेत होन पणत हए। 7 काहेकी सोन बारे रातमे सोत हएं, और दारु पिइके नसा होन बारे रातएमे नसा होत हएं। 8 पर हम दिनके सन्तान हएं जहेमारे हम अपनएके नियन्त्रणमे करएं। बिश्वास और प्रेमके लगाएलेओ, जो उइसीए हमर रक्षा करत हए जैसेकी लोहोके बनेभए कबच एक सैनिकके रक्षा करत हए। और हमके जा आसरा हए, कि हम सदाकालको दण्डसे बचीगए हएं, और हमके मुक्ति मिलिगओ हए। और जा आसरा बहे टोप कता हए, जो एक सिपाहीके रक्षा करत हए। 9 काहेकी परमेश्वर हमके जाकेमारे नाए चुनी, कि अपने दिक्कसे हमएं दण्ड देबए। बल्कि हम अपने प्रभु येशू ख्रीष्टके द्वारा उद्धार पानके ताहीं छानेगए हएं। 10 येशू ख्रीष्ट हमरे ताहीं जाकेमारे मरो, कि चहुँ हम जिन्दा होमएं या चहुँ हम मरएं, जब प्रभु येशू लौटके आबैगो हम हमेसा बाके सँग रहिपामएं। 11 जहेमारे तुम एकदुस्रेके उत्सहा देबओ, और एकदुस्रेके मजबुत बनाओ, जैसेकी तुम अइसो करत फिर हओ। आखिरी शिक्षा 12 हे मेरे बिश्वासी ददाभइयओ, हम तुमसे बिन्ती करत हएं, कि जौन तुमर ताहीं बहुत मेहेनत करत हएं, और प्रभुमे तुमर अगुवा हएं, और तुमके सल्लाह देत हएं, उनके आदर करओ। 13 और जो कुछ तुमर ताहीं करत हएं, बहेमारे उनको बहुत आदर करओ, और उनके बहुत प्रेम करओ, और एक-दुस्रेमे मेलमिलापसे रहाओ। 14 और हे मेरे बिश्वासी ददाभइयओ, हम तुमसे बिन्ती करत हएं, कि जो आदमी अल्छी हएं, उनके चेतावनी देओ। बे आदमीनके उत्सहा देओ, जो डरपोक हएं, जो बिश्वासमे कमजोर हएं उनके मदत करओ, सबके सँग सहनशीलता देखाओ। 15 जा याद करओ, कि कोइसे फिर खराबको बदला खराब नाए करए; बल्कि तुमके हमेसा एकदुस्रेके ताहीं और सबके ताहीं भलो काम करनके कोसिस करन पणो। 16 सब दिन खुसी राहओ। 17 निरन्तर प्राथना करतए राहओ। 18 सब परिस्थितिमे धन्यबाद देओ, काहेकी तुमर ताहीं ख्रीष्ट येशूमे परमेश्वरको इच्छा जहेहए। 19 पबित्र आत्माको कामके मत् रोकओ। 20 परमेश्वरके द्वारा आदमीनके उपर करोगओ भबिष्यबाणीके अस्वीकार मत् करओ। 21 सब सन्देशको जाँच करओ। जा जाननके ताहीं, कि बे भबिष्यबाणी परमेश्वरके घेनसे हए या नाए हए। अच्छे सन्देशके स्वीकार करओ और पालन करओ। 22 सब मेलके खराबीसे दुर रहाओ। समापन प्राथना और आशीर्वाद 23 शान्ति देन बारो परमेश्वर तुमके पुरा रुपसे पबित्र बनाए; तुमर पुरो आत्मा, प्राण और शरीर हमर प्रभु येशू ख्रीष्ट दुबारा लौटके नाए आनतक निर्दोष और सुरक्षित बचे रहाओ। 24 तुमके बुलान बारो परमेश्वर सच्चो हए। जहेमारे, कि परमेश्वर तुमके पबित्र होनके ताहीं बुलाइ हए, कहेसे परमेश्वर तुमके पबित्र होनमे लायक फिर बनाबैगो। 25 हे मेरे बिश्वासी ददाभइयओ, हमरे ताहीं प्राथना करओ। 26 सब बिश्वासी ददाभइयनके प्रेमसे एकदुस्रेके नमस्कार करओ। 27 मए तुमके प्रभुमे हुकुम देत हओं, कि जा चिट्ठी सब बिश्वासी ददाभइयनके सुनाए देओ। 28 हमर प्रभु येशू ख्रीष्टको अनुग्रह तुमर सँग होतए रहाबए। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation