1 थेसलोनिकी 4 - राना थारु नयाँ नियम

पबित्रताके ताहीं बुलावट

¹ हे मेरे बिश्वासी ददाभइयओ, निष्कर्षमे जा हए, कि हम प्रभु येशू ख्रीष्टके नाउँमे तुमसे बिन्ती और आग्रह करत हएं कि अइसे तरिकासे जीबन जीइबओ, जो परमेश्वरके खुसी करत हए, जैसे हम तुमके सिखाए हएं। तुम पहिलीयएसे जा तरिकासे जीइत हओ, और हम तुमके अइसे करनके ताहीं औ जद्धा प्रोत्सहान करत हएं।

² काहेकी तुम जानत हओ, कि जा हुकुम प्रभु येशूके घेनसे आओ हए।

³ परमेश्वरको इच्छा जा हए, कि तुम पबित्र बनओ अर्थात् तुम व्यभिचार मत् करओ।

^4-5 तुम सब परमेश्वरके नाए चिनन बारे औरे आदमीको करो हानी शरीरको खराब इच्छामे नाए बल्कि पबित्र हुइके अपनी बैयरसँग इज्जतसे जीबन जीइनके जानन पणत हए।

⁶ अइसे करके, तुमके अपने बिश्वासी भइयाके बिरुद्धमे पाप नाए करन चाहो, काहेकी प्रभु येशू बोके दण्ड देबैगो, जो अइसे मेलके सब काम करत हएं; जैसेकी हम तुमसे पहिले सफासे कहिदए रहएं और शिक्षा फिर दए रहएं।

⁷ काहेकी परमेश्वर हमके अशुद्ध जीबन जीइनके ताहीं नाए, पर पबित्र जीबन जीइनके ताहीं बुलाइ हए।

⁸ जहेमारे जो जे नियमके अनुसार जीइनसे इन्कार करत हए, बो आदमीनके नाए पर परमेश्वरके नियमके इन्कार करत हए, जो अपनो पबित्र आत्मा तुमके देतहए।

प्रेम और काम

⁹ पर बिश्वासी ददाभइया उपरको प्रेमके बारेमे जा जरुरी नाए हए, कि मए तुमर बारेमे लिखओं; काहेकी एक-दुस्रेके प्रेम करनो तुम अपनए परमेश्वरसे सिखे हओ।

¹⁰ और तुम पहिलीयएसे अपने सँगी बिश्वासीके उपर अपनो प्रेम दिखाए हओ, जो माकेडोनिया परदेशमे हर ठिहा रहात हएं, पर हे मेरे बिश्वासी ददाभइयओ, हम तुमसे बिन्ती करत हएं, कि प्रेममे औ बढतए जाओ।

¹¹ औ जैसे हम तुमके बिन्ती करे कता, तुम एक शान्तिको जीबन जीइबओ। और अपनो-अपनो काममे ध्यान देओ और अपने हातसे मेहेनत करओ।

¹² ताकी बे आदमी जो बिश्वास नाए करत हएं, बे देखएं कि तुम हर दिन कैसे ब्यबहार करत हओ, और देखके तुमके आदर करएं। तओ तुमके अपन जरुरतके पुरा करनके ताहीं कोइमे निर्भर नाए होन पणैगो।

प्रभुको लौटके आन बारो दिन

¹³ हे मेरे बिश्वासी ददाभइयओ, हम चाँहत हएं कि तुम जा जान लेबओ कि बे बिश्वासीनके सँग का होबैगो जो पहिलीए मरिगए हएं। ताकी अइसो नाए होबए, कि तुम फिर दुस्रे गैर-बिश्वासी आदमीन कता शोक करओ। काहेकी उनके आसरा नाए हए, कि बे मरनके बाद फिरसे जिन्दा हुइ जामंगे।

¹⁴ काहेकी अगर हम बिश्वास करत हएं, कि येशू मरो, और जीइउठो। तओ अइसियए परमेश्वर उनके फिर, जो येशूमे बिश्वास करतए मरिगए हएं, परमेश्वर उनके येशूके सँग लौटाएके लाबैगो।

¹⁵ काहेकी हम प्रभु येशूको बचनके अनुसार तुमसे जा कहात हएं, कि हम जो जिन्दा हएं, और जब तक प्रभु येशू फिरसे लौटके नाए आबए, तबतक बचे रहामंगे। जो मरिगए हएं, उनके प्रभुसे भेँटनसे पहिले बे बासे नाए मिल पएहएं।

¹⁶ काहेकी प्रभु येशू अपनए स्वर्गमे उतरैगो; बो समय आदमी उँचो अबाजमे हुकुम देत सुनंगे, आदमी एक प्रधान स्वर्गदूतके मस्कत सुनंगे और आदमी एक स्वर्गदूतके परमेश्वरको तुरही बजात सुनंगे। और जो ख्रीष्टमे बिश्वास करतए मरिगए हएं, बे पहिले जीइ उठंगे।

¹⁷ तओ हम जो जिन्दा और बचे रहामंगे, हम फिर उनके सँग बादर उपर उठाए लैजामंगे। और हमर भेँट बादरमे प्रभु येशूसे हुइहए; और बो समयसे हम सदादिन प्रभुके सँग रहामंगे।

¹⁸ जहेमारे जे बातसे तुम एकदुस्रेके उत्सहा दए करओ।