1 थेसलोनिकी 3 - राना थारु नयाँ नियम

बिश्वासके ताहीं चिन्ता

¹ तभीमारे हम तुमके बिना देखे रहे नाए पाए। तओ हम एथेन्स सहरमे रुके रहान ठिक सम्झे।

² और तिमोथी जो ख्रीष्टको अच्छो समाचारमे हमर भइया, और परमेश्वरको सेवक हए, बोके तुमर ठिन पठाए, कि बो तुमके बिश्वासमे मजबुत करए; और तुमर बिश्वासके बारेमे तुमके प्रोत्साहित करनमे मदत करए।

³ ताकी कोइ जे दु:खके कारण डगमगाए नाए जाए। काहेकी तुम जानत रहओ, कि हमके दुख उठान पणैगो।

⁴ काहेकी पहिले फिर, जब हम तुमर ठिन रहएं, तओ तुमसे कहे करत रहएं, कि हमर उपर सतावट आबैगो, और अइसियए भओ हए, और तुम जानत फिर हओ।

⁵ तभीमारे जब मए जा जाने बिना रहो, कि तुम कैसे हओ, तओ परीक्षा करन बारो शैतान तुमर परीक्षा त नाए करी होए, और अइसो हुइहए कहेसे हमर मेहेनत बेकार हुइ जाबैगो कहिके मिर मनमे डर रहए। और अइसे नाए होए कहिके मए तिमोथीके तुमर बिश्वासको हाल जाननके ताहीं तुमर ठिन पठाओ हओं।

तिमोथी द्वारा उत्साहित

⁶ पर हबए तिमोथी जो तुमर ठिनसे हमरे हियाँ आएके तुमर बिश्वास और प्रेमको अच्छो समाचारको परचार करी। और जा बातके फिर सुनाइ, कि तुम रोज प्रेमसे हमके याद करत हओ, और हमके भेँटनके इच्छा करत हओ, जैसे हम फिर तुमके देखनकी इच्छा करे।

⁷ जहेमारे हे मेरे बिश्वासी ददाभइयओ, हम अपने सब कष्ट और दुखमे हम तुमर बारेमे सुनके उत्साहित भए हएं, कि तुम अभौफिर येशू ख्रीष्टमे बिश्वास कर रहेहओ।

⁸ तुम प्रभुमे मजबुत हओ कहिके पता पानो हमरे ताहीं नायाँ जीबन पाए कता हए।

⁹ तुमरी कारणसे हम हमरे परमेश्वरके अग्गु आनन्द मनात हएं। जाके ताहीं त परमेश्वरके हम जित्तो धन्यबाद दएसे फिर थोरी हए।

¹⁰ हम नियमित रुपसे लगातर बहुत प्राथना करत रहात हएं, कि तुमके फिरसे भेँट करन आए पामएं, ताकी प्रभु येशू ख्रीष्टमे औ जद्धा मजबुतमे बिश्वास करनमे तुमर मदत करपामएं।

मण्डलीके ताहीं प्राथना

¹¹ हम प्राथना करत हएं, कि हमर दौवा परमेश्वर और हमर प्रभु येशू ख्रीष्ट तुमसे भेँट करनके ताहीं डगर तयार करए।

¹² और हम प्राथना करत हएं, कि प्रभु येशू एकदुस्रेसे प्रेम करनमे तुमके मदत करए, जैसे हम तुमके प्रेम करत हएं उइसी प्रभुमे तुम एकदुस्रे सँग, और सब आदमीनके सँग प्रेम बढए। और प्रभु तुमर प्रेमके बढाबए, उत्नो बढाए देबए, कि जैसी हमर प्रेम तुमरमे हए।

¹³ हम प्राथना करत हएं, कि हामरो प्रभु येशू तुमर मनके मजबुत करए, कि जब हमर प्रभु येशू अपने सब पबित्र आदमीनके सँग लौटके आए तओ बे हमर दौवा परमेश्वरके अग्गु पबित्रतामे निर्दोष होमएं।