1 थेसलोनिकी 1 - राना थारु नयाँ नियमशुभकामना 1 मए पावल, सिलास और तिमोथीके घेनसे जा चिट्ठी थेसलोनिके सहरमे रहान बारे मण्डलीके ताहीं लिखरहे हएं। जो दौवा परमेश्वर और प्रभु येशू ख्रीष्टसे सम्बन्धित हए। मए प्राथना करत हओं, कि परमेश्वर तुमर उपर अनुग्रह करए और शान्ति देबए। थेसलोनिके सहरके बिश्वासीनके ताहीं धन्यबाद 2 हम तुम सबके ताहीं परमेश्वरके धन्यबाद देत हएं और रोज प्राथना करत पेती फिर तुमके सम्झे करत हएं, 3 जब हम अपनो दौवा परमेश्वरसे प्राथना करत हएं, तओ हम बे कामके याद करत हएं जो तुम बिश्वासके कारण करत हओ। और दुस्रेनके उपर प्रेम दिखानके ताहीं जो कडी मेहेनत तुम करत हओ, और तुम सतावट सहे करत हओ काहेकी तुम प्रभु येशू ख्रीष्टको लौटनको आसरा कर रहेहओ। 4 और हे मेरे बिश्वासी ददाभइयओ, तुमके जा बात पता होबए, कि परमेश्वर आदमीनके प्रेम करत हए। परमेश्वर तुमके अपनो बनानके ताहीं चुनी हए। 5 काहेकी हमर येशू ख्रीष्टके बारेमे सच्चो अच्छो समाचार तुमर ठिन केबल बोलिमे नाए आओ, पर पबित्र आत्माके शक्तिसे पुरा रुपमे पक्का हुइके आओ हए। तुमके पता भओ हए, कि जब हम तुमर सँग रहएं तओ हमर जीबन कैसो रहए। 6 जैसे तुम ब्यबहार करत हओ बोमे तुम हमरे हानी और परमेश्वर हानी नमुना बने। आफतमे फिर तुम पबित्र आत्माको दओ भओ अच्छो समाचार आनन्दके सँग लए। 7 हियाँतककी माकेडोनिया परदेश और अखैया परदेशमे सब बिश्वासीके बीचमे तुम एक नमुना बने। 8 काहेकी तुमर हियाँसे केबल माकेडोनिया परदेश और अखैया परदेशमे इकल्लो प्रभुको बचन नाए सुनाओ गओ, पर हर ठाउँमे जहाँ हम जात हएं, हुवाँ हम आदमीनके, परमेश्वरमे भओ तुमर बिश्वासके बारेमे हमके बतात पात हएं। जहेमारे, हम दुस्रे जनैनके तुमर बारेमे कुछ फिर बतानको जरुरी नाए हए। 9 काहेकी बे आदमी दुस्रे जनैनके बतात हएं, कि जब हम तुमर ठिन आए तओ तुम कैसे हमर स्वागत करे। और जा फिर बतात हएं, कि कैसे तुम मूर्तिपुजाके छोडके परमेश्वर घेन घुमे, ताकी तुम जिन्दा और सच्चो परमेश्वरके सेवा करओ। 10 और परमेश्वरको लौंणाके स्वर्गसे फिरसे लौटके आनको आसरा करत रहाबओ जौनके परमेश्वर मरो भओ मैसे जिन्दा करी, अर्थात् येशूके, जो परमेश्वरको आन बारो क्रोधसे बचात हए। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation