1 कोरिन्थी 9 - राना थारु नयाँ नियमचुनेभए चेलनको अधिकार 1 जो कुछ मए करन चाँहत हओं, बोके करनके ताहीं मए स्वतन्त्र हओं। मए चुनो भओ चेला हओं, मए हमर प्रभु येशूके देखो हओं। तुम प्रभुके ताहीं बनाए गए मिर सेवाको परिणाम हओ। 2 अगर अन्य आदमी जा स्वीकार नाए करत हएं, कि मए प्रभु येशूको चुनो भओ चेला हओं, तओ तुम बिश्वासी भइयनके जाके स्वीकार करन चाहो। काहेकी मए बहे हओं जो तुमर ठिन अच्छो समाचार लैके आओ रहओं। तुम प्रभु येशूमे बिश्वास कर रहेहओ, जासे साबित होत हए, कि मए बाको चुनो भओ चेला हओं। 3 जो आदमी मिर चुनो भओ चेला होनको अधिकारमे प्रश्न करत हएं, उनके ताहीं जहे मिर जबाफ हए। 4 मोके और बारनाबासके, चुनो भओ चेला होनके कारण अधिकार हए, कि तुमसे खान-पिनके ताहीं आर्थिक मदत प्राप्त करएं। 5 काहेकी अन्य चुनेभए चेला और प्रभु येशूके भइया, याकूब और यहूदा और पत्रुस केफास, अपनी बिश्वासी बैयरनके अपने सँग लैजात हएं। जब बे यात्रा करत हएं, तओ मेरे ठिन फिर जा अधिकार हए। 6 मोके और बारनाबासके फिर अन्य येशूसे चुनेभए चेला कता आर्थिक मदत प्राप्त करनको अधिकार हए और अपनुवए मदतके ताहीं काम करनके जरुरी नाए हए। 7 कोइ फिर सैनिक जो सेनामे काम करत हए अपनो तलफसे अपनए नाए तिरत हए। कोइ कभी फिर अंगुर खाए बिना एक अंगुरको बारी नाए लगात हए। कोइ फिर आदमी दुध पिइके बिना, भेंणीनको रेखदेख नाए करत हए। 8 मए केबल आदमीको बिचारके आधारमे नाए कहेरहो हओं। और नियम कानुन फिर जहे बात कहात हए। 9 मोशाको नियम कानुनमे फिर जा लिखो हए, “तुमके बर्धाको मुँहुँमे मोखरी नाए बाँधन चाहो जो पैरा हटानके ताहीं पैरी गाँहत हएं।” का तुमके लगत हए कि जा केबल बर्धाके बारेमे इकल्लो परमेश्वरके चिन्ता हए? नाए। 10 जा खास करके हमरे ताहीं कहात हए। हाँ, हम्रुए ताहीं लिखोगओ, काहेकी खेत जोतन बारे कोइ आसरा करके खेत जोतत हएं और खेतमे पैरासे दाना अलग करबान बारो फसलको कुछ भाग पानके आसरा त जरुर धरैगो। 11 हम तुमके परमेश्वरको सन्देशको परचार करेहएं। बेहीं आदमी कता जो पेण लगात हएं, हम तुममे परमेश्वरको सन्देशके बोए हएं। जहेमारे तुमए ताहीं जा सही हए कि तुम हमके हमर दैनिक जरुरतनके ताहीं देओ। 12 काहेकी तुम अन्य आदमीनके आर्थिक मदत करे जौन तुमर बीच परचार करी, नेहात्तओ बारनाबास और मए जाको औ फिर जद्धा लायक हएं। काहेकी हम तुमर ताहीं चुनेभए चेला रहएं। हबएतक, हम मैसे कोइ फिर जा बातमे जोर नाए दओ, कि तुम हमके बे चीजके देओ जो हमके तुमसे चाहो रहए। पर जा छोडके, हम कुछ फिर सहनके ताहीं तयार रहएं, ताकी हम ख्रीष्टके बारेमे अच्छो समाचारमे बिश्वास करनसे कोइके फिर बाधा नाए डारएं। 13 का तुम नाए जानत हओ, कि मन्दिरमे काम करन बारे आदमीनके मन्दिरसे अपनो खानु मिलत हए? हाँ, जो आदमी बेदीमे बलि देत हएं, उनके बहे बलि करो भओ मैसे हिस्स मिलत हए। 14 अइसियए प्रभु फिर आज्ञा दइ हए, कि उनको रोजी रोटी बे आदमीनसे होनचाहो जो अच्छो समाचार सुनत हएं। 15 लेकिन मए इन मैसे एकफिर अधिकार इस्तमाल नाए करो। मए जा चिट्ठी जाकेमारे नाए लिखरहो हओं, कि तुम अब मेरे ताहीं कुछ करओ। नाए! बिरकुल नाए! मेरे ताहीं मरनो अच्छो हुइहए! काहेकी कोइ फिर मोके जा बातको घमण्ड करनसे नाए रोक सकत हए, कि मए अपनो खयाल अपनए रक्खत हओं। 16 अगर मए अच्छो समाचार परचार करत हओं, तओ जामे मोके घमण्ड करनको कोइ हक नाए हए; काहेकी जा त मोके येशू ख्रीष्टसे सौँपो गओ जिम्मेदारी हए; और अगर मए अच्छो समाचार नाए सुनामङगो तओ मोके समस्या होबैगो। 17 मए जा अच्छो समाचार परचार करंगो कहेसे मोके इनाम मिलैगो। पर अगर जामे मिर कोइ इच्छा नाए हए, लेकिन अगर परमेश्वर मोके जा जिम्मेदारी दइ हए, तओ मए इनामको का आसरा कर सकत हओं? मए कोइ फिर इनामको आसरा नाए कर सकत हओं। 18 तओ फिर मिर कौनछो इनाम हए? जा, कि अच्छो समाचार परचार करनमे मए ख्रीष्टको अच्छो समाचार सेँतए-मेँत करदेओं; हियाँतककी अच्छो समाचारमे जो मिर अधिकार हए, बोके मए पुरो रितिसे काममे लाओं। सब आदमीनको सेवा 19 जाको मतलब जा हए, कि मए आदमीनको आज्ञापालन करनके ताहीं मजबुर नाए हओं। सिर्फ जहेमारे, कि बे मोके तलप देत हएं। तहुँफिर मए हर कोइको नोकर बनिगओ हओं ताकी मए जद्धासे-जद्धा आदमीनके ख्रीष्टमे बिश्वास करनके ताहीं लाओं। 20 यानिकी, जब मए यहूदीनके सँग हओं, तओ मए उनके ख्रीष्टमे लानके ताहीं एक यहूदी कता रहात रहओं ताकी जद्धासे-जद्धा आदमीनके ख्रीष्टमे बिश्वास करनके ताहीं लाओं। जब मए बे आदमीनके सँग रहओं जो यहूदी नियम कानुनके मानत हएं, तओ मए फिर बो नियम कानुन कता रहात रहओं। हियाँतककी, मोके नियम कानुनके माननके जरुरत नाए हए। मए अइसे जहेमारे करो ताकी मए बे आदमीनके ख्रीष्टमे लाए पामओं, जो नियम कानुनके अधीनमे हएं। 21 उइसीयए, जब गैर-यहूदीनके सँग काम करत हओं, तओ मए एक गैर-यहूदी कता रहात हओं। ताकी उनके जीत पामओं। लेकिन मोके पता हए, कि मए परमेश्वरको नियम कानुनके बिना रहे करत रहओं। काहेकी मए ख्रीष्टको नियम कानुनके पालन करत हओं। 22 जब मए बे आदमीनके सँग होत हओं जौनको बिश्वास कमजोर हए, तओ उनके बरोबर ब्यबहार करत हओं। ताकी मए उनके ख्रीष्टके पिच्छु चलनमे मदत करपामओं। मए सब आदमीनके ताहीं सब कुछ बनो हओं, कि कोइन-कोइ रितिसे, कोइ कुछ आदमीके उद्धार करबाए पामओं। 23 और मए सब कुछ ख्रीष्टके बारेमे अच्छो समाचारके परचार करनके ताहीं करत हओं, ताकी मोके अच्छो समाचारमे प्रतिज्ञा करेगए आशिषको हिस्सा दओजाए सकए। बिश्वासीको दौड 24 उइसीयए हमके बे सब कुछ करन चाहो जोमे हम परमेश्वरके खुसी कर सकत हएं। ताकी हम बो इनाम पाए सकएं, जो परमेश्वर भबिष्यमे देबैगो। 25 जो आदमी दौडमे हिस्सा लेन चाँहत हए, बे पहिले अभ्यास करत हएं और अपने इच्छाके अपने नियन्त्रणमे करत हएं। बे अइसो जाकेमारे करत हएं, ताकी जीत सकएं और आदर पाए सकएं। उनके आदर करनके ताहीं पत्तनसे बने माला देत हएं, जो लम्बो समय तक नाए रहात हए। पर हम जो बिश्वास येशू ख्रीष्टमे करत हएं बोसे आदर पामंगे, और जो आशिष बा हमके देबैगो हमेसाके ताहीं रहाबैगो। जहेमारे हमके अपने चहानामे भुलन नाए पणत हए। 26 जहेमारे मए ख्रीष्टियन जीबन एक खास उदेश्यके साथ जीइत हओं। जैसे एक मुक्का मारन बारो, दुस्रेके शरीरमे व्यर्थमे नाए मारत हए पर अपने बिरोधीके शरीरमे मारत हए। उइसीयए मए अपनो ख्रीष्टियन जीबन एक खास उदेश्यके साथ जीइत हओं। 27 मए अपनो शरीरके काबु करत हओं, ताकी मए दुस्रेनको खराब अभिलाषन्के अनुसार नाए चलओं। कहुँ अइसो नाए होए, कि मए जो दुस्रेनके अच्छो समाचारको परचार करत हओं, और मए अपनए इनाम नाए पामओं। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation