Juan 7 - Tachi Ak'õre Pedea

Jesú ũpẽarãpa ichide ĩjãanaé pada

¹ Mãɨya nak'ari Jesú Galilea tuade p'ɨrrɨa nipasima. Judea tuadea wã k'ɨ̃riaé pasima judiorã chi minachia k'awa p'anɨrãpa peadayá oo p'anasi pẽra.

² Mãɨ judiorã te chak'ede p'anapataɨ arapaapataɨ ewari k'ait'a pa baside,

³ Jesú ũpẽarãpa ichiá jarasidama: —Nãmapema wãse Judeadea chi jãmapema pɨchi ome p'ɨrrɨapataɨrãpa mãɨ pɨchia ne oo bɨt'a ununamẽrá.

⁴ Chi ẽpẽerãpa ichi k'awapii k'ɨ̃ria bɨpɨra ne mẽra ooiwẽa bɨma. Pɨa ẽpẽerãpa ne p'ue oodak'apɨ́ oo bɨt'a ãareaɨrã taade oose, ãchia pɨ k'awadamẽrá.

⁵ Mãɨya jarasidama ãchia pida ichide ĩjãanak'a pada pẽra.

⁶ Mãɨne Jesupa ãchiá jarasima: —Mɨ wãi ewari waidi pawẽma, maamina mãrapa k'ɨ̃riautade p'ue wãnai p'anɨma.

⁷ Nãɨ ĩjũanepemarãpa mãra k'ĩramá p'anɨwẽma. Maamina mɨt'a k'ĩramaa p'anɨma, ãchia nemietá oopataɨ mɨa mietaade a jara bɨ pẽra.

⁸ Wãt'ɨ mãɨ arapaapataɨ ewari oo p'anɨmá. Mɨ waidi wãiwẽma mɨ wãi ewari waidi ará pawẽ pẽra.

⁹ Mãɨya jarak'ari Galilea tuade beesima.

Arapaapataɨ ewari oomaa p'anɨmá Jesú wãna

¹⁰ Mãɨne Jesú ũpẽarã mãɨ arapaapataɨ ewari oomaa p'anɨmá wãsidama. Mãɨya nak'ari Jesú wãsima. Maamina k'ĩup'ea wãsima ẽpẽerã́ k'awapidaemaapa.

¹¹ Judiorã chi minachia k'awa p'anɨrãpa mãɨ arapaapataɨ ewaride ichi ara mãma jɨrɨ p'anasidaɨde, nãɨya idipachidama: «¿Jãɨ Jesú sãma bɨma?»

¹² Mãɨne chok'ará arí p'anɨrãpa Jesú k'orea wawaria pedeapachidama. Waapẽarãpa jarapachidama: «Ichi ẽpẽra pia bɨpɨ», maamina waapẽarãpa jarapachidama: «Mãɨyawẽma; ẽpẽerã seaparipɨ».

¹³ Maamina judiorã chi minachia k'awa p'anɨrã wap'ea p'anɨ pẽra mi ãpia pida Jesú k'orea jĩk'ua pedeadak'a pasima.

¹⁴ Mãɨ arapaapataɨ ewari estarik'a pak'ari mãɨ ooutade Jesú Tachi Ak'õre te minachia bɨdea wãk'ari tajataria jaratea beesima.

¹⁵ Mãɨya bɨde chi mãma nɨbada judiorãpa k'ãre k'awa k'ɨ̃risiadaé pasima. Nãɨya jarasidama: «¿Mãɨ ẽpẽra sãmaasã́ minachia k'awa bɨma, k'art'a atua bɨpa?»

¹⁶ Mãɨne Jesupa ãchiá jarasima: —Mɨa jaratea bɨ mõrewẽma, mãɨpari mɨ peedadepɨ.

¹⁷ Chi Tachi Ak'õrepa k'ɨ̃ria bɨt'a ooi k'orea bɨpa k'awaipɨ chi mɨa jaratea bɨt'a Tachi Ak'õrenepa cherut'a wa mɨa mɨchi k'ɨ̃risiadepa jaratea bɨt'a.

¹⁸ Abaɨpa ara ichi k'ɨ̃risiadepa pedea bɨpɨra mãɨya oo bɨma ẽpẽerãpa ara ichi k'orea pia pedeadamẽrá. Maamina abaɨpa k'ɨ̃ria bɨpɨra waapẽarãpa chi ichi peeda k'orea pia pedea bɨpɨra, mãɨpa piarãpẽa pedea jaraparima; sea jarak'ama.

¹⁹ Moisepa ichia bɨdat'a mãrá teasima. Maamina mãrapa mãɨ ichia bɨda ĩjãanak'ama. ¿K'ãre k'orea mãrapa mɨ peadayá oo p'anɨma?

²⁰ Mãɨne ẽpẽerãpa idisidama: —¿K'aipa pɨ pea k'ɨ̃ria bɨma? ¿Jaore mietá pɨ k'ak'uade bɨpa mãɨya k'ɨ̃risiapi bɨk'ãra?

²¹ Jesupa p'anoosima: —Mɨa mimianak'apɨ́ ewaride ne ununak'á be aba ooda k'orea mãrapa k'awa k'ɨ̃risiadaé pasima.

²² Maamina mãra sida mimianak'apɨ́ ewaride ne oopatama. Ɨmɨk'ĩra k'ak'ua tauchaapatama Moisepa bɨda jĩra. (Piarã mãɨ oopataɨ Moisedepa cheé pasima, mãɨpari mãra chõarãenapemanepa chesima).

²³ Moisepa bɨda oodai k'orea mãrapa mimianak'apɨ́ ewaride pida warra chak'e k'ak'ua tauchaapatama. Mãɨ mãra ¿k'ãre k'orea mɨ ome k'ĩruu p'anɨma mimianak'apɨ́ ewaride ẽpẽra jɨpa beepida k'orea?

²⁴ Mãrapa unu p'anɨ k'orea piawẽa pedearãt'ɨ, mãɨpari chi piarãpẽa k'awadak'ari pia pedeat'ɨ.

¿Jesú chi Tachi Ak'õrepa Tachi K'aripaparí teai jarada?

²⁵ Mãɨne chi eda Jerusalenepemarãpa ara ãstu idi para beepachima: «¿Nãɨt'u jɨrɨ p'anɨwẽk'ãra peadai k'orea?

²⁶ Ak'ɨt'ɨ, ichi nãma ãareaɨrã taade pedea bɨma. Maamina mi ãpia pida ichiá ne jaradawẽa p'anɨma. ¿Chi minachia k'awa p'anɨrãpa k'ɨ̃risia p'anɨk'ãra ichi chi Tachi Ak'õrepa Tachi K'aripaparí teai jaradat'a?

²⁷ Maamina tachia k'awa p'anɨma ichi sãmapemat'a. Tachi Ak'õrepa Tachi K'aripaparí teai jarada cherude mi ãpia pida k'awadaiwẽma ichi sãmãɨpa cherut'a».

²⁸ Mãɨne Jesupa Tachi Ak'õre te tuda jaratea bɨde jĩk'ua jarasima: —Piarã mãrapa mɨ unupatama mãɨnepa sãmapemat'a k'awa p'anɨma. Maamina mɨ ara mɨchidepa chewẽa bɨma, mãɨpari mɨ chi piarã jaraparipa mɨ peesima. Mãrapa ichi k'awadawẽa p'anɨma.

²⁹ Mɨa ichi k'awa bɨma, ichidepa cheda pẽra. Ara ichiapuru mɨ peesima.

³⁰ Mãɨ k'orea ãchia Jesú jita k'ɨ̃ria p'anasidama, maamina mi ãpia pida jitadaé pasima ichi ewari ará pawẽa bada pẽra.

³¹ Mãɨne ãareaɨrãpa ichide ĩjãasidama. Mãɨya jarasidama: —Tachi Ak'õrepa Tachi K'aripaparí teai jarada cherude ¿nãɨ ẽpẽrapa oo bɨ k'aepẽra ẽpẽerãpa ne p'ue oodak'apɨ́ atepe ooik'ãra?

P'ariseorãpa Jesú jitadai k'orea p'anana

³² P'ariseorãpa k'awasidama ẽpẽerãpa Jesú k'orea wawaria pedea p'anɨt'a. Mãɨ k'orea ãchia mãɨnepa chi p'aarerã minachia k'awapataɨrã pida Tachi Ak'õre te ot'eapataɨrã peesidama Jesú jitade wãnamẽrá.

³³ Mãɨya p'anɨne Jesupa ẽpẽerã́ jarasima: —Mɨ mãra ome tãaraa baiwẽma. Mãɨya bak'ari mɨ peedamá wãipɨ.

³⁴ Mãrapa mɨ jɨrɨdaipɨ maamina ununaiwẽma. Mɨ wãrumá mãra p'ue wãnaiwẽma.

³⁵ Mãɨ k'orea judiorã chi arí berãpa ara ãchi tuaba jara tuanasidama: —¿Sãmá wãi pẽra tachia ichi waa ununaiwẽane a bɨma? ¿Griegodepemarã tuadea wãik'ãra judiorã jãma berã́ jarateai k'orea?

³⁶ ¿K'ãre k'orea ichia mãɨya jara bɨma: “Mãrapa mɨ jɨrɨdaipɨ maamina ununaiwẽma”? Mãɨnepa ¿k'ãre jara bɨma “Mɨ wãrumá mãra p'ue wãnaiwẽma”?

Pania chok'ae bapiparí k'orea bɨda

³⁷ Mãɨ arapaapataɨ ewari oo p'anɨne chi k'aadeapema ewari chi choma bɨt'a basima. Mãɨ ewaride Jesú bai nɨbeek'ari jĩk'ua pedeasima: —Chi abaɨ opisia bɨpɨra mɨmá chese, maapae pania chok'ae bapiparidepema tose.

³⁸ Tachi Ak'õre pedeade jara bɨma abaɨpa mɨne ĩjãaipɨra pania chok'ae bapiparí ara ichidepa to jĩra wea baipɨ.

³⁹ Jesupa makɨɨdepa k'awapisima chi ichide ĩjãautapa Tachi Ak'õre Jaore atadait'a. Mãɨ ewaride Tachi Ak'õre Jaore waidi chewẽa basima Jesú waidi pajãnea wãwẽa badadeepuru.

Ẽpẽerãpa Jesú k'orea awara awará pedea tuanana

⁴⁰ Mãɨ pedea ũrisidaɨde arí p'anɨrãpa jarasidama: «Piarã nãɨ ẽpẽra Tachi Ak'õre pari pedeaparí chi minachia k'awa bɨ chei badapɨ».

⁴¹ Mãɨnepa waapẽarãpa jarasidama: «Ichi Tachi Ak'õrepa Tachi K'aripaparí teai jaradapɨ». Maamina waapẽarãpa jarasidama: «Mãɨyawẽma. ¿Tachi Ak'õrepa Tachi K'aripaparí teai jarada Galileadepa cheik'ãra?

⁴² ¿Tachi Ak'õre pedeade jara bɨwẽk'ãra ichi Davidepa cheit'a? ¿Daví p'uuru Belenepa chei bɨwẽk'ãra?»

⁴³ Mãɨya Jesú k'orea ara ãchi k'ak'awá p'anasima.

⁴⁴ Chi eda waapẽarãpa ichi jita k'ɨ̃ria p'anasidama, maamina mi ãpia pida jitadaé pasima.

Judiorã chi minachia k'awa p'anɨrãpa Jesude ĩjãanawẽa p'anana

⁴⁵ Chi Tachi Ak'õre te ot'eapataɨrã jĩitea chedak'ari, p'ariseorã mãɨnepa p'aarerã chi mãɨrã chaarearãpa ãchiá idisidama: —¿K'ãre k'orea ichi enemeenaé pasima?

⁴⁶ Mãɨne ãchia p'anoosidama: —Abaɨ pida jãɨ ẽpẽra jĩra pedeak'ama.

⁴⁷ Mãɨ k'orea p'ariseorãpa jarasidama: —¿Mãɨya bɨpɨra ichia mãra sida seasik'ãra?

⁴⁸ ¿Tai p'ariseorãpa, wa waapẽarã chi chaarearã pida ichide ĩjãa p'anɨk'ãra?

⁴⁹ Chi ichide ĩjãa bepa Moisepa bɨda atua p'anɨma. Ãchi Tachi Ak'õrepa ɨtɨaipɨ.

⁵⁰ Mãɨne Nicodemo ãchi ome basima. Ichi Jesumá naena teamasi pedeade wã bada pasima. Ãchiá jarasima:

⁵¹ —Maamina ¿Moisepa bɨdade jara bɨk'ãra tachia paritua ẽpẽra p'ue ɨtɨadait'a, ichi pedea ũrinai naena? ¿Ichia ooda naa k'awadai p'anɨwẽk'ãra?

⁵² Ãchia p'anoosidama: —¿Mãɨyara pɨ Galileadepemak'ãra? Tachi Ak'õre pedea minachia eda jara base. Mãɨne pɨa k'awaipɨ abaɨ pida Tachi Ak'õre pari pedeaparí Galileadepa chewẽt'a.

⁵³ [Mãɨya tuananak'ari ãareaɨrã ãchi techa wãsidama.