Juan 4 - Tachi Ak'õre Pedea

Jesú Samariadepema wẽra ome pedeada

¹ Mãɨ ewaride p'ariseorãpa ũrisidama Jesupa Juan k'aepẽra ẽpẽerã minachia atepe uru bɨt'a mãɨnepa porochoa bɨt'a.

² (Piarã Jesupa ẽpẽerã porochoak'a pasima. Ichi ome p'ɨrrɨapataɨrãpuru porochoapachidama).

³ P'ariseorãpa mãɨ ũrinana Jesupa k'awada pẽra Judea tuade bada Galilea tuadea mãicha wãsima.

⁴ Maamina Galileadea pai k'orea Samaria tuade eda wãi basima.

⁵ Wãrune Samariade bɨ p'uuru Sicar apataɨmá pasima. Mãɨ p'uuru Jacopa ichi warra Josea teada ĩjũa k'ait'a bɨma.

⁶ Mãma Jacó yooro k'oropidade pania joe ũu bɨ basima. Jesú minachia p'ɨrrɨa bɨdepa sẽk'ari, mãɨká suak'abari beesima. Mãɨpara ɨmat'ip'a pa basima.

^7-8 Chi Jesú ome p'ɨrrɨapataɨrã p'uurudea chik'o atade wãnoosidama. Mãɨya bɨde wẽra Samariadepema pania joede chesima. Jesupa mãɨ wẽrá jarasima: —Mɨá pania tease.

⁹ Mãɨne wẽrapa Jesua jarasima: —Mɨ Samariadepema wẽrapɨ. ¿K'ãre k'orea pɨ judiopa mɨá pania idi bɨma? Ichia mãɨya jarasima judiorãpa Samariadepemarã k'ɨ̃rianak'a pẽra.

¹⁰ Jesupa p'anoosima: —Tachi Ak'õrepa teai bɨt'a pɨa k'awarupara mãɨnepa k'aipa jãɨ pania idi bɨt'a k'awarupara, pɨa mɨá pania idii pasima. Maapae mɨa chi chok'ae bapiparí pania teai pasima.

¹¹ Wẽrapa jarasima: —Pɨa ¿k'ãrepa pania joeima? Nãɨ yooro k'orodade pania joe ũu bɨt'a eudu bɨma. Mãɨ chok'ae bapiparí pania ¿pɨa sãma joeima?

¹² Tai chõarãenapema Jacopa nãɨ yooro k'orodade pania joe ũu bɨt'a tai pae ameesima. Nãɨnepema to bapachima. Ichi warrarãpa mãɨnepa ichi ãnimararã pida topachidama. ¿Mãɨyara pɨ Jacó k'aepẽra chi atepe bɨk'ãra?

¹³ Jesupa p'anoosima: —Abaɨpa nãɨ pania toipɨra, mãicha opisia baipɨ.

¹⁴ Maamina chi mɨa tea bɨ pania torut'a waa opisia baiwẽma. Chi mɨa tea bɨ pania ichide ewaricha wea baipɨ mãɨnepa Tachi Ak'õre ome ewaricha ichi chok'ae baipɨ.

¹⁵ Mãɨne wẽrapa jarasima: —Mãɨya bɨpɨra mãɨ pania mɨá tease waa opisia baemaapa, mãɨnepa waa nãma pania joede che baemaapa.

¹⁶ Mãɨ k'orea Jesupa jarasima: —Pɨ k'ima t'ɨ̃ne wãk'ari nãmá chet'ɨ.

¹⁷ Wẽrapa jarasima: —Mɨ k'ima nea bɨma. Jesupa jarasima: —Pɨa piarã jara bɨma, pɨa k'ima newẽane a bɨma.

¹⁸ Piarã pɨa k'ima joesoma uru basima. Mãɨnepa chi pɨa nãɨ ewaride uru bɨt'a, mãɨ pɨ k'imawẽma. Pɨa jara bɨ piarãpɨ.

¹⁹ Mãɨ k'orea wẽrapa jarasima: —Mɨmá pɨ Tachi Ak'õre pari pedeaparit'u jãɨya bɨma.

²⁰ Tai chõarãenapemarãpa nãɨ eyade Tachi Ak'õrea pia pedeapachidama, maamina mãra judiorãpa jarapatama Jerusalenepuru ichiá pia pedeadai p'anɨma. ¿Sãma wãnai p'anɨma Tachi Ak'õrea pia pedeadai k'orea?

²¹ Jesupa p'anoosima: —Mɨa jara bɨt'a ĩjãase. Ewariaba nãɨ eyade mãɨnepa Jerusalene pida Tachi Ak'õrea pia pedeade wãnaiwẽma.

²² Mãra Samariadepemarãpa Tachi Ak'õrea pia pedeapatamina ichi atua p'anɨma. Tai judiorãpa ichi k'awa p'anɨma, judiorãnepa Tachi Ak'õrepa sãmaasã́ ẽpẽerã k'aripapari k'awapi bɨ pẽra.

²³ Maamina ewari chei bada chesima. Idiapae Tachi Ak'õrepa k'ɨ̃ria bɨma ẽpẽerãpa ãchi bemãɨpa pia pedeadait'a ichi Jaoredepa mãɨnepa piarã k'awa p'anɨnepa. Aba mãɨya ichiá arí pia pedeadaipɨ.

²⁴ Tachi Ak'õre jaorepɨ. Mãɨpuru ẽpẽerãpa ichiá pia pedea k'ɨ̃ria p'anɨpɨra mãɨya oodai p'anɨma ichi Jaoredepa mãɨnepa piarã k'awa p'anɨnepa.

²⁵ Chi wẽrapa jarasima: —Mɨa k'awa bɨma Tachi Ak'õrepa Tachi K'aripaparí teai jarada piarã cheit'a. Ichi cherude tachiá ne ãarea k'awapiipɨ.

²⁶ Mãɨpuru Jesupa jarasima: —Mɨ, chi pɨ ome pedea bɨt'a, mãɨpɨ.

²⁷ Mãɨya bɨde Jesú ome p'ɨrrɨapataɨrã p'uurudepa jĩitea chesidama. Ãchia k'awa k'ɨ̃risiadaé pasima Jesú wẽra ome pedeamaa beesideepuru. Maamina abaɨ pida Jesua ididaé pasima «¿K'ãre k'ɨ̃ria basit'a?» wa «¿K'ãarea wẽra ome pedea basit'a?»

²⁸ Maapae wẽrapa ichi chok'o ameek'ari p'uurudea wãsima. Chek'ari ẽpẽerã́ jarasima:

²⁹ —¡Ak'ɨde wãt'ɨ, chi mɨa ununa ẽpẽra! Ichia mɨá jarasima mɨa ne ãarea naena oodat'a. ¿Mãɨ Tachi Ak'õrepa Tachi K'aripaparí teai jaradawẽk'ãra?

³⁰ Ara mãɨne ẽpẽerã p'uurudepa wãsidama Jesú bɨmá.

³¹ Mãɨmisa Jesú ome p'ɨrrɨapataɨrãpa ichiá chichupuria idi p'aneesidama nek'omẽrá.

³² Maamina Jesupa jarasima: —Nek'oiwẽma, mɨa chik'o mãrapa atua p'anɨt'a uru bɨma.

³³ Chi ichi ome p'ɨrrɨapataɨrãpa ara ãstu idi para beesima: —¿Abaɨpa chik'o enemeesik'ãra?

³⁴ Mãɨpuru Jesupa ãchiá jarasima: —Mɨmá, chi mɨ Peedapa oopi bɨ ãarea oo bɨt'a, mãɨt'u mɨ chik'o jĩra bɨma.

³⁵ Mãrapa jarapatama: “Waidi jedek'o k'ĩmari pawẽa bɨma ne uu ĩjũa chauda baai k'orea”. Maamina mɨa jararuma: ak'ɨt'ɨ, ẽpẽerã mɨmá cheutat'a, ne uu ĩjũa chauk'ari, ya baapata jĩra bɨma.

³⁶ Ne uu ĩjũa baadai ewari chesima. Ne uu ĩjũa baauta jĩra mãra mimianaipɨ ẽpẽerãpa mɨne ĩjãanamẽrá. Mãɨya ãchi Tachi Ak'õre ome ewaricha chok'ae p'ananaipɨ. Chi ne uu ĩjũa baaparí arapaaparima ichia erreara jitai bɨ pẽra. Ara mãɨ jĩra mãra arapaadaipɨ ẽpẽerãpa mɨne ĩjãauta k'orea. Chi ne uu ĩjũa baaparí chi ne uuparí ome arapá p'ananaipɨ.

³⁷ Tachia jarapataɨ piarãpɨ: “Abaɨpa ne uui bɨma mãɨnepa abaɨpa baai bɨma”.

³⁸ Ara mãɨ jĩra mɨa mãra peesima waapẽarãpa uudada baadamẽrá. Ãchia minachia sẽnak'ari uudaadat'a mãrapa baa p'anɨma.

³⁹ Chok'ará Samariadepemarã mãɨ p'uurude p'anapataɨrãpa Jesude ĩjãasidama, wẽrapa nãɨya jarada pẽra: «Ichia mɨá jarasima mɨa ne ãarea naena oodat'a».

⁴⁰ Samariadepemarã Jesumá chedak'ari chichupuria idisidama ãchi ome beemẽrá. Maapae Jesú ãchi p'uurude ewari ume beesima.

⁴¹ Ichia jaratea bɨde mãɨ awara chok'araɨrãpa ĩjãasidama.

⁴² Ãchia wẽrá jarasidama: —Taipa abapuru pɨa jarada k'orea ĩjãa p'anɨwẽma, mãɨpari ĩjãa p'anɨma ichia jaratea bɨ ũrinana pẽra. Taipa k'awasidama ichi piarã nãɨ ĩjũanepemarã k'aripaparit'a.

Jesupa Galileade warra jɨpa beepida

⁴³ Samariade ewari ume bak'ari Jesú Galilea tuadea wãsima.

⁴⁴ Mãɨ naena ichia jarasima Tachi Ak'õre pari pedeaparí ara ichi tuadepemarãpa ichi wap'eadak'at'a.

⁴⁵ Jesú Jerusalene baside Galileadepemarã sida tuanasidama Egitodepa wãnana k'ɨ̃risiapataɨ ewari oodai k'orea. Mãma Jesupa ẽpẽerãpa ne p'ue oodak'apɨ́ oo bɨ unusidama. Mãɨ k'orea ichi Galileadea cheside ichiá pia chesiade asidama.

⁴⁶ Galilea tuade bɨde Jesú mãicha Caná p'uurudea wãsima ichia naena pania uvaba papidamá. Mãɨmisa Capernaum p'uurude chi poro jũra jɨ̃parí jɨ̃ bɨ pae mimiaparí minachia k'awa bɨ basima. Mãɨ warra k'ɨdade basima.

⁴⁷ Mãɨne ichia ũrisima Jesú Judeadepa Galilea tuadea chesit'a. Ara mãɨne Caná p'uurudea wãsima Jesú bɨmá. Chek'ari chichupuria idisima ichi warra k'ɨdade piumaa bɨt'a jɨpa beepide wãmẽrá.

⁴⁸ Jesupa ichiá jarasima: —Mãrapa ẽpẽerãpa ne p'ue oodak'apɨ́ ununaepɨra mɨa jara bɨde ĩjãanaiwẽma.

⁴⁹ Maamina chi ẽpẽrapa jarasima: —Mɨ Chipari, mɨ warra piui naena isapea wãnama.

⁵⁰ Jesupa jarasima: —Tiidá wãse. Pɨ warra jɨpa beesima. Chi ẽpẽrapa ĩjãana pẽra ara mãɨne wãsima.

⁵¹ Tiidá cherude chi ichi pae pari mimiapataɨrãpa pia pedeadak'ari jarasidama: —Pɨ warra jɨpa beesima.

⁵² Mãɨne ichia idisima: —¿Sãapae mãɨya jɨpa beesima? Ãchia p'anoosidama: —Noena ɨmata baarea paside chi k'ɨamia tuusima.

⁵³ Mãɨne chi ak'õrepa k'awasima ara mãɨ horade Jesupa pɨ warra jɨpa beesiade a basit'a. Mãɨpa ichia mãɨnepa ichi tiidapemarã pida Jesude ĩjãasidama.

⁵⁴ Jesú Judeadepa Galileadea jĩitea cherude ẽpẽerãpa ne p'ue oodak'apɨ́ oo basima. Mãɨ chi bari k'ak'o umãarea ooda pasima.