Juan 18 - Tachi Ak'õre Pedea

Jesú jitadada

¹ Mãɨ ãarea jarak'ari Jesú ichi ome p'ɨrrɨapataɨrã Cedrón to chak'e k'ĩaria wãsidama. Arí ne uu ĩjũa basima. Jesú, ichi ome p'ɨrrɨapataɨrã ome mãmá wãsidama.

² Juda, chi Jesú jitapii bɨpa mãɨ ne uu ĩjũa k'awa basima, Jesú ichi ome p'ɨrrɨapataɨrã ome mãma bari k'ak'o minachia ará nɨbeepachi pẽra.

³ Mãɨpuru Judapa chok'ará romanepema papaká berã mãɨnepa chi Tachi Ak'õre te ot'eapataɨrã mãɨ ne uu ĩjũanea ateewãsima. Ãchi chi p'aarerã chi mãɨrã chaarearãpa mãɨnepa p'ariseorã pida Juda ome peesidama. Ãchia ĩpira, laap'ara mãɨnepa jiorro uru p'anasidama.

⁴ Mãɨne Jesupa ãarea ne mãɨyai k'awa bɨ pẽra ãchimá wãk'ari idisima: —Mãrapa ¿k'ai jɨrɨ p'anɨma?

⁵ Ãchia p'anoosidama: —Jesú Nazaredepema. Jesupa jarasima: —Mɨpɨ. Mãɨne Juda, chi Jesú jitapii bɨ ãchi ome basima.

⁶ Jesupa «mɨane» aside ãchi jĩitea tɨadak'ari, baewãsidama.

⁷ Maapae Jesupa mãicha idisima: —¿K'ai jɨrɨ p'anɨma? Ãchia mãicha p'anoosidama: —Jesú Nazaredepema.

⁸ Mãɨne Jesupa jarasima: —Mãɨ mɨane asima. Mɨ jɨrɨ p'anɨpɨra, nãɨ ẽpẽerã itu peet'ɨ.

⁹ Mãɨya jarasima ichia naena jarada pẽra: «Ak'õre, pɨa mɨá teadaɨrã aba pida atuaiwẽma». Ichia jarada jĩra piarã mãɨyasima.

¹⁰ Mãɨne Simón Pedropa k'ĩruuparí nek'o uru basima. Mãɨ ẽut'aak'ari chi p'aare minachia k'awa bɨ pae pari mimiaparí k'ɨɨrɨ juaraaripema oat'ut'aasima. Mãɨ t'ɨ̃ Malco apachidama.

¹¹ Mãɨ k'orea Jesupa Pedroa jarasima: —Pɨchi k'ĩruuparí nek'o yaase. ¿Mɨ mãɨ mĩai bɨwẽk'ãra, mɨ Ak'õrepa mɨ mĩapii bɨ jĩra?

Jesú Anasmá ateewãnana

¹² Maapae romanepema papaká bepa, ara ãchi poro chaarea bɨpa mãɨnepa chi Tachi Ak'õre te ot'eapataɨrãpa Jesú jitadak'ari jua bɨrasidama.

¹³ Jesú naa ẽpẽra Anás temá ateewãsidama. Anás Caip'á chãware pasima. Mãɨ ãyone Caip'á p'aare minachia k'awa bɨ pasima.

¹⁴ Ara mãɨ Caip'apa judiorã́ jara basima ẽpẽra aba judiorã ãareaɨrã k'orea piuit'a pia bɨma.

Pedropa Jesú unuk'aade ada

¹⁵ Mãɨne Jesú ome p'ɨrrɨapataɨrã Simón Pedro mãɨnepa abaɨ sida Jesú k'aade wãsidama. Chi Simón Pedro ome wãna p'aare minachia k'awa bɨpa k'awa basi pẽra ichi Jesú k'aade eda wãsima p'aare minachia k'awa bɨ te tudá.

¹⁶ Maamina Pedro eda wãpataɨ tajataria beesima. Mãɨpuru chi ichi ome wãna, chi p'aare minachia k'awa bɨpa k'awa bada tajatá wãsima. Chi eda wãpataɨ ak'ɨparí wẽra ome pedeak'ari Pedro eda ateewãsima.

¹⁷ Mãɨ wẽrapa Pedroa idisima: —¿Pɨ sida Jesú ome p'ɨrrɨapariiwẽk'ãra? Pedropa p'anoosima: —Mɨwẽma.

¹⁸ Mãɨne p'aare minachia k'awa bɨ pae pari mimiapataɨrãpa mãɨnepa Tachi Ak'õre te ot'eapataɨrãpa t'ɨpɨ uruapisidama k'õresã́ nɨbɨ pẽra. T'ɨpɨ ik'idá bai nɨp'aneesidama k'ãnai k'orea. Ichiaba Pedro ãchi ome t'ɨpɨ k'ãmaa basima.

Anaspa Jesua minachia ɨt'aa chiidida

¹⁹ Maapae p'aare minachia k'awa bɨpa Jesua minachia idisima ichi ome p'ɨrrɨapataɨrã k'orea mãɨnepa ichia jarateada k'orea.

²⁰ Mãɨne Jesupa p'anoosima: —Mɨ ãareaɨrã k'ĩrari jĩp'a pedea basima. Mɨa jaratea basima tachi ará pedeapataɨ techa mãɨnepa Tachi Ak'õre te eda, tachi judiorã ãarea ará chedak'ari pedeapatamá. Mi ãpia pida mẽra jaraé pasima.

²¹ ¿K'ãre k'orea mɨá mãɨ idi bɨma? Mãɨpari mɨ pedea ũrinaanarã́ idise, ãchia mɨa jarateadat'a k'awa p'anɨẽra.

²² Jesupa mãɨya jararude Tachi Ak'õre te ot'eapataɨrãnepema aba ichi k'ait'a badapa Jesú k'ĩtarramá p'ek'ari jarasima: —¿Jãɨya p'anoo bɨk'ãra chi p'aare minachia k'awa bɨa?

²³ Jesupa p'anoosima: —Mɨa k'achia pedeasipɨra, jarase mɨa k'ãre k'achia pedeasit'a. Maamina pia pedeasipɨra, pɨa ¿k'ãre k'orea mɨ p'esima?

²⁴ Maapae Anaspa Jesú jua bɨra bɨt'a Caip'amá peesima, ichi p'aare minachia k'awa bɨ pẽra.

Pedropa mãicha Jesú unuk'aade ada

²⁵ Mãɨmisa Pedro wapida bai nɨbasima, t'ɨpɨ k'ãi k'orea. Mãɨne ẽpẽerãpa ichiá idisidama: —¿Pɨ sida jãɨ ẽpẽra ome p'ɨrrɨapariiwẽk'ãra? Pedropa mẽra jarasima: —Mɨwẽma.

²⁶ Mãɨne chi p'aare minachia k'awa bɨ pae pari mimiaparí abaɨpa Pedroa idisima: —¿Mɨa pɨ ichi ome ne uu ĩjũane unué pasik'ãra? Mãɨpa chi Pedropa k'ɨɨrɨ t'ɨat'uda chi ẽpẽra mãɨnepema pasima.

²⁷ Pedropa mãicha mẽrasima. Ara mãɨya jararude et'erre pirusima.

Jesú Pilato k'ĩrari bada

²⁸ Maapae tap'ededa Jesú Caip'á tedepa romanepema chi poro chaarea bɨ chi te minachia bɨdea ateewãsidama. Chi Jesú ateewãnana judiorã mãɨ te Pretorio apataɨde eda wãnaé pasima ãchi eda wãsidara Tachi Ak'õre k'ĩrari piawẽa p'aneenai pẽra. Ichi k'ĩrari pia p'anana k'ɨ̃ria p'anasidama Egitodepa wãnana k'ɨ̃risiapataɨ ewari chik'o k'odai k'orea.

²⁹ Mãɨpuru Pilato ãchimá tajatá wãk'ari idisima: —Nãɨ ẽpẽra, chi mãrapa nepɨra pará bɨade a p'anɨpa ¿k'ãre nemietá oosima?

³⁰ Ãchia p'anoosidama: —Nãɨpa nemietá oodaépara taipa ichi pɨmá ateewãnaiwẽ pasima.

³¹ Mãɨpuru Pilatopa ãchiá jarasima: —Mãrapa ichi ateewãnak'ari ak'ɨt'ɨ ara machi leypa jara bɨ jĩra. Mãɨne judiorãpa jarasidama: —Taipa ne p'ue oodak'ama, ẽpẽra peapidai k'orea. Mãra Romanepemarãpuru p'ue peapidai p'anɨma.

³² Ara chi judiorãpa mãɨya pedeasidama Jesupa naena jara bada jĩra. Ichia jara basima sãmaasã́ piui bɨt'a.

³³ Maapae Pilato mãicha tede eda wãsima. Jesú eda ateewãpik'ari idisima: —¿Pɨ piarã judiorã poro jũra jɨ̃parí jɨ̃ bɨk'ãra?

³⁴ Jesupa p'anoosima: —¿Pɨa mãɨ idi bɨk'ãra pia k'awai k'orea, wa idi bɨma waapẽarãpa pɨá mɨ k'orea mãɨya jarasida pẽra?

³⁵ Mãɨ k'orea Pilatopa jarasima: —¿Mɨ judiok'ãra? Ara pɨ p'uurudepemarãpa mãɨnepa chi p'aarerã chi mãɨrã chaarearãpa pɨ mɨmá enemeesidama. ¿Pɨa k'ãre oosima ãchia mãɨya oodamẽrá?

³⁶ Jesupa p'anoosima: —Mɨ ẽpẽerã mɨ juade ua bɨmina mɨ p'uuru nãɨ ĩjũanepemawẽma. Nãɨ ĩjũanepema padapara mɨ ẽpẽerã mɨ k'orea k'ĩruunai pasima judiorã́ mɨ jitapidaemaapa. Maamina mɨ p'uuru nãɨ ĩjũanepemawẽma.

³⁷ Mãɨpuru Pilatopa jarasima: —¿Mãɨya bɨpɨra piarã pɨ poro jũra jɨ̃parí jɨ̃ bɨk'ãra? Jesupa p'anoosima: —Ãjã, pɨa mãɨya jara k'ɨ̃ria bɨpɨra, mɨ ẽpẽerã ãchi poro jũra jɨ̃parí jɨ̃ bɨpɨ. Maamina mɨ nãɨ ĩjũanea chesima chi piarãpẽa pedea jarateai k'orea. Jõma chi piarãpẽa k'ɨ̃ria p'anɨpa mɨ pedea ĩjãapatama.

³⁸ Mãɨne Pilatopa idisima: —¿K'ãrema mãɨ piarãt'a? Mãɨya jarak'ari Pilato mãicha tajatá judiorãmá wãk'ari jarasima: —Mɨa unuwẽma nãɨ ẽpẽra nepɨra pará bɨt'a.

Jesú peadai k'orea jaradada

³⁹ Maamina Egitodepa wãnana k'ɨ̃risiapataɨ ewari parude, ãyocha mãrapa oopata jĩra, chi eda jɨ̃a nɨbɨdepema aba k'ẽet'aapipatama. ¿Mãrapa k'ɨ̃ria p'anɨk'ãra mɨa nãɨ judiorã poro jũra jɨ̃parí jɨ̃ bɨ k'ẽet'ait'a?

⁴⁰ Mãɨne ãchia biadak'ari p'anoosidama: —Jãɨwẽma. ¡Barrabat'u k'ẽet'aase! Mãɨ Barrabá nechɨaparí mietá pasima.