Juan 10 - Tachi Ak'õre Pedea

Mɨ oveja ak'ɨparí chi pia bɨpɨ

¹ Mãɨ ewaride Jesupa jarasima: «Mɨa piarã jararuma: chi abaɨ oveja k'ãipataɨ ɨari eda wãepɨra, mãɨpari awaraɨ ɨari eda wãsira, mãɨ ẽpẽra mẽapemarã jĩra bɨpɨ mãɨnepa nechɨaparipɨ.

² Maamina chi k'ãipataɨde eda wãpataɨmá eda wãparit'a chi oveja ak'ɨparipɨ.

³ Mãɨ pae k'ãipataɨ ak'ɨparipa chi eda wãpataɨ ewaparima. Ovejapa ãchi ak'ɨparí pedea k'awa p'anɨma. Ãchicha t'ɨ̃k'oak'ari tajatá ateewãparima.

⁴ Jõma tajatá ateewãk'ari ãchi naa wãparima. Oveja ichi k'aade wãpatama ichi pedea k'awa p'anɨ pẽra.

⁵ Maamina ãchia chi ununak'at'a k'aade wãnak'ama, mãɨpari mĩrupatama mãɨ pedea atua p'anɨ pẽra».

⁶ Jesú ne jara bɨdepa mãɨya pedeasima maamina judiorãpa k'awadaé pasima k'ãre jara bɨt'a.

⁷ Mãɨpuru Jesupa nãɨya jarasima: «Mɨa piarã jararuma, chi oveja eda wãpataɨ mɨpɨ.

⁸ Mɨ chei naena chok'ará nechɨapataɨrã jĩra mãɨnepa mẽapemarã jĩra chepachidama. Maamina chi ovejarãpa ãchi pedea ĩjãanaé pasima.

⁹ »Mɨ chi eda wãpataɨpɨ. Chi mɨnepa eda wãru nemietaadepema k'aripaipɨ. Ne k'ɨ̃risiawẽa baipɨ, mãɨ ichia newẽa bɨ Tachi Ak'õrepa teai pẽra.

¹⁰ Chi nechɨaparí cheparima oveja chɨai k'orea, peai k'orea mãɨnepa atuapii k'orea. Maamina mɨ chesima ẽpẽerãpa chok'ae bai ara minachia uru p'ananamẽrá.

¹¹ »Mɨ oveja ak'ɨparí chi pia bɨpɨ. Chi oveja ak'ɨparí pia ichi oveja k'orea piui bɨma.

¹² Maamina abaɨpa erreara k'orea oveja ak'ɨ baipɨra, usa k'achia cherude chi oveja ameek'oak'ari ãyá mĩruwãipɨ. Oveja ichidiwẽ pẽra pia ak'ɨk'ama. Mãɨne usa k'achiapa oveja aba jitade cherude waapẽarã jĩichoapatama.

¹³ Mãɨ ẽpẽra mĩruwãparima abapuru erreara k'oreapuru oveja ak'ɨpari pẽra. Ichia k'ɨ̃risiak'ama oveja pia p'ananamẽrá.

¹⁴ »Mɨ oveja ak'ɨpari chi pia bɨpɨ. Mɨchidirã k'awa bɨma chi oveja ak'ɨparipa ichi oveja k'awa bɨ jĩra. Mãɨnepa mɨchidirãpa mɨ k'awa p'anɨma.

¹⁵ Ara mãɨ jĩra mɨ Ak'õrepa mɨ k'awa bɨma mãɨnepa mɨa mɨ Ak'õre k'awa bɨma. Mɨ mɨchi oveja k'orea piui bɨma.

¹⁶ Mɨa uru bɨma waapẽarã oveja nãɨ k'ãipataɨde p'anɨwẽ. Mãɨrã sida mɨa eda ateewãipɨ. Ãchia mɨ pedea ĩjãanaipɨ. Mãɨya ãareaɨrã ará p'ananaipɨ. Mãɨne ãchi ak'ɨparí aba bɨ baipɨ.

¹⁷ »Mɨ Ak'õrepa mɨ k'ɨ̃ria bɨma, ara mɨ itu peapii bɨ pẽra. Maapae mɨ mãicha chok'ae beeipɨ.

¹⁸ Mɨa mɨ itu itarpiepɨra mi ãpia pida mɨ p'ue peadaiwẽma, maamina mɨ piuipɨ ara mɨchia mãɨya k'ɨ̃ria bɨ pẽra. Mɨ piuk'ari ya mãicha chok'ae p'irabariipɨ. Mãɨ mɨ Ak'õrepa mɨá mãɨya oopisima».

¹⁹ Mãɨ pedea ũriutade judiorã mãicha ara ãchi awara awará pedea para p'aneesidama.

²⁰ Chok'araɨrãpa jarasidama: «Jãɨ ẽpẽrapa jaore mietá uru bɨma. Ichi k'ĩra piawẽa bɨma. ¿K'ãre k'orea ichi pedea ũrinaima?»

²¹ Maamina waapẽarãpa jarasidama: «¡Chi ẽpẽra jaore mietá uru bɨpa mãɨya pedeak'ama! ¿Jaore mietapa tau p'ãrio bea pia unupiparik'ãra?»

Judiorãpa Jesú itu bɨdada

²² Mãɨ k'õresã́ ewari parude judiorãpa Jerusalene arapaapataɨ ewari oo p'anasidama. Mãɨya oopachidama Tachi Ak'õre Te ichi pae awara bɨdada k'ɨ̃risiadai k'orea.

²³ Tachi Ak'õre te ãpɨtea p'ɨrrɨapataɨde Jesú p'ɨrrɨa basima. Mãɨ p'ɨrrɨapataɨ Salomoneane apachidama.

²⁴ Mãɨya bɨde judiorãpa Jesú jũranak'ari idisidama: —Waa ¿sãapae pɨa taiyá pɨ k'orea k'ɨ̃risia k'awapiwẽa uru baima? Pɨ Tachi Ak'õrepa Tachi K'aripaparí teai jaradapɨra, taiyá jĩp'a jarase.

²⁵ Jesupa p'anoosima: —Mɨa mãrá jarasima maamina ĩjãanawẽa p'anɨma. Jõma chi mɨ Ak'õre t'ɨ̃ne oo bɨpa mɨ k'orea pia k'awapi bɨma.

²⁶ Maamina mãrapa ĩjãanak'ama, mɨ ovejarãwẽ pẽra.

²⁷ Mɨ ovejarãpa mɨ pedea k'awa p'anɨma. Mɨa ãchi k'awa bɨma. Mãɨpuru ãchi mɨ k'aade wãpatama.

²⁸ Mɨa ãchi Tachi Ak'õre ome ewaricha chok'ae bapiparima. Ãchi atuadaiwẽma mãɨnepa mi ãpia pida mɨ juadepema p'ue ẽemarinaiwẽma.

²⁹ Mɨ Ak'õrepa ãchi mɨá teasima. Ichi ãareaɨrã k'aepẽra chi choma bɨma. Abaɨ pida ãchi mɨ Ak'õre juadepema p'ue ẽemarinaiwẽma.

³⁰ Mɨ, mɨ Ak'õre ome aba p'anɨma.

³¹ Mãɨpuru judiorãpa mãicha mawara jitasidama ichi bat'a peadai k'orea.

³² Mãɨne Jesupa jarasima: —Mɨ Ak'õrenepa minachia nepia mãrá unupisima. ¿Chi sãkɨɨ nepia ooda k'orea mɨ mawarapa bat'a peadaima?

³³ Judiorãpa p'anoosidama: —Taipa pɨ mawarapa bat'adaiwẽma nepia oo bɨ k'orea, mãɨpari bat'adaipɨ pɨ ẽpẽrat'u bɨmina, mãɨ Tachi Ak'õreane a bɨ k'orea. Mãɨpa pɨa Tachi Ak'õrenepema k'achia pedea bɨma.

³⁴ Jesupa jarasima: —Mãra Moisepa bɨdade nãɨya bɨ bɨma: “Mɨa jarasima mãra tachi ak'õrerãpɨ”.

³⁵ Tachia k'awa p'anɨma Tachi Ak'õre pedea ewaricha piarãt'a. Tachi Ak'õrepa mãɨ ẽpẽerã́ “Mãra tachi ak'õrerãane” asira,

³⁶ ¿k'ãre k'orea jara p'anɨma mɨa ichidepema k'achia jarasiade a p'anɨma, mɨa abapuru ichi Warraade a bɨẽra? Tachi Ak'õrepa mɨ ara ichi pae bɨsima mãɨnepa nãɨ ĩjũanea peesima.

³⁷ Mɨ Ak'õrepa oo bɨt'a mɨa oowẽa bɨpɨra, mɨ pedea ĩjãarãt'ɨ.

³⁸ Maamina ichia oo bɨt'a mɨa oo bɨpɨra, mɨa jara bɨ k'orea mãrapa ĩjãanawẽa p'anɨmina mɨa oo bɨt'a k'orea ĩjãat'ɨ. Mãɨya mãrapa piarã k'awadaipɨ mɨ Ak'õre mɨ ome bɨ mãɨnepa chi mɨ Ak'õre mɨ ome bɨt'a.

³⁹ Mãɨne ãchia mãicha Jesú jita k'ɨ̃ria p'anasidama, maamina wãsima.

⁴⁰ Mãɨya nak'ari Jesú mãicha Jordán k'ĩrari wãsima Juan chi Porochoaparipa naa ẽpẽerã porochoa badamá. Jesú mãma beesima.

⁴¹ Mãɨya bɨde chok'ará ẽpẽerã ichimá wãpachidama. Ãchi tuaba nãɨya jarapachidama: «Juanpa ẽpẽerãpa ne p'ue oodak'apɨ́ ooé pasima maamina ãarea ichia nãɨ Jesú k'orea jarada piarãpɨ».

⁴² Mãma chok'araɨrãpa Jesude ĩjãasidama.