Luke 22 - Samtao1 ခမ်းခီးအန်းမု့ပသခါပွဲဟက်လားဖျောင်းအားပိုင်လားဖေ့ခါးမွန်းလားဖျောင်းတေဟာ။ 2 မု့ဂျူးပုရောဟိတ်ဟဲ့ဆလားကေလားတိပါးခွမ်အေးကေလားပိုဟမ်းဖကျောင်းစီးရောဟက်စောခါးတိပို။ 3 ခမ်းခီးအန်းခွမ်ကျိုင်ဟွင်ဆစ်စော်ပိုင်ဟဲ့ဟိုင်းတိမု့ယုဒရှကာရုတ်အားဟာညက်လေ့တိုးဟွင်အွန်း။ 4 ခမ်းခီးအန်းမု့ယုဒဟဲ့ဂျူးပုရောဟိဟိုင်းဖျောင်းတိနိင်ထမ်ဟဲ့အေးဖျောင်းတေဖကျောက်အေးလားရောစိးရောခါလေတိတီးပေးနယ်ကျူးပိုတိုင်တိပိုလာနော်။ 5 ကေကောမန်းမီမန်းမွန်ဟဲ့လားကာပတ်ယုဒကေကောတို့လုံးတိပို။ 6 ယုဒကောတိုလုံးခွမ်အေးကေတိလားအွေန်လားဗေ့ဖကျောက်ကေကောကွေ့အာမိုင်ဟဲ့ဂျေ့။ 7 ခမ်းခီးအန်းပွဲခါမွန်းအန်းဖျောင်းအေးလားရောမာသခါဟက်အေးကောပိုဟမ်းတဲ့ဟဲ့သန်ကောဖျောင်းအေး။ 8 ဟော့ဟက်ဖကျောက်လားတိပေတရုဟဲ့ယောဟန်အေးလားဟိုင်းပွဲအန်းဟဲ့အေးလားဆွမ်လွန်ထားအွန်ဆာ။ 9 ကေကောလားဖကျောက်စိးကာအေးတေးကာသမီလို့ 10 ဖကျောက်လားပေးလေ့တိမွန်တိနယ်ပေးကောညိုခွမ်တပိုင်ကမ်းအိုးဟဲ့ဟွင်ကောအားလပ်ပေး။ဟော့ခဲဟွင်ဟဲ့ဟွင်လေတိညာဟွင်ကောလေဟော့ဟွင်ဆာ။ 11 ဟော့နယ်လားတိကျောင်းညာဆလားနယ်လားဆွမ်းပဲန်းမွန်ခွမ်ကျိုင်လာဗေ့အေးပိုဆွမ်တလိုဟဲ့ဟာနယ်အွေန့်တအွေန့်ကာအူးတိုင်းသမီနယ်။ 12 တနန်းဟော့ဟက်ကျောင်းညာကောကော့ပေးဟိုးတလုံးဟဲ့လားပြကာဟော်သပေးအားထောင်း။တိနိင်ဟောအမ်းလာရောပွဲတေးအွန်းဆာ။ 13 ခမ်းခီးအမ်းမု့ပေတရုဟက်ယောဟန်ကေကောလီလားအန်းရောမွန်ခါးလားဖကျောက်ဟိုင်တေအွန်းပွဲအားဟာညက်လေးပိုင်။ 14 ဖျောင်းဝေးလားအေးဖကျောက်ခွမ်းမွေးခွမ်ကျိုင်ပါးစာပွဲတိဆာ။ 15 ခမ်းခီးအန်းဖကျောက်လားသိကေနာမ်အူးပို့ခေ့စေ့အန်းဟဲ့တိပါးပွဲအန်းအူးစိးဆွမ်းမွန်းပေးအူးကွေးဖိုးသ။ 16 အူးလားသပေး။နာမ်ပွဲလာလေဖကျောက်နယ်ဆွတ်တိုင်ဟိုင်းနန်းဟိုင်းနဲ့ဟဲ့ခွမ်ဟွင်အူးပိုနနမ်ညောင်းဖျောင်းအူးနယ်ငတီလားပိုအွေန်တိပါးပွဲလာနော်ဟာ။ 17 ခမ်းခိးအမ်းဖကျောက်တွေဖခါတိဟဲ့တင်းပါးတွေဖအန်းဟဲ့မယ်ပိုပေးဆာ။ 18 အူးလားသပေး။အားလေ့ဖကျောက်နမ်ကျောင်းလိပြအူးကောညိုတိုးအာငူဟာလာလနော်။ 19 တွေခါမွန်ဟဲ့တင်ပါးတိဖကျောက်ဟဲ့တွေခါးမွန်ဟဲ့မယ်ခွမ်ကျိုင်ဟွင်လားဟဲ့ခါးမွန်းအန်းနယ်အူးကာပေးလားပဲန့်တိုအူးကွယ်ဂျေ့မာနာ။မွန်းခါးနယ်ထီးသအူးဟဲ့ပန်းစာ။ 20 ဟော့ဟက်ပဲန်းဟဲ့ဖကျောက်တွေဖဟဲ့အာငူနယ်ပဲန်းနားဟဲ့လားတိကေလာနော်။ 21 ဟောဟဲ့အားကေလားအပ်ကာအူးတပိုင်တိနယ်မားနိုင်ငေါ်ခေါ့အူးနန်းနယ်။ 22 ပဲန်ခွမ်ဖကျောက်ကွေးခါတိစကျမွန်ဟွင်ပိုဟိုင်းဟဲ့အားကေစခါလီးဟွင်တိနယ်ပဲန်းခွမ်ကွေးမိုးခါမာသိဆာ။ 23 ဟော့ဟက်ခွမ်ကျိုင်တိုင်တိပိုဖြောင်မွေလားရောလာနော်တိုင်တိပိုတိဆာ။ 24 ခမ်းခီးအမ်းခွမ်ကျိုင်တိုင်တိနိင်အေးနယ်မွန်ထောင်းလေးပိုင်ဟက်တပိုင်ဟက်တပိုင်ခိကေလာနော် 25 ဖာကျောက်လားခွမ်ထောင်နိင်ရုံးအားကေအွေန်ခေါ်ကေအန်ခွမ်ထောင်းနညက်ညက်ကောဟွင်ကောစိးဆီးကာကေကောဟွင်ပဲန်းခွမ်ညက်ထင်ဟက်ကောနယ်ပဲန်းခွမ်ထောင်းညက်လေးပိုင်စိးကာကေအူးလာနော်၊ 26 ဟော့ဟက်ပေးအန်းတိရောဟောဟွင်။တိနိင်ပေးပေးကောညက်ခိဟွင်ပဲန်းခွမ်ညက်ဟဲ့ခွမ်ထောင်ပေးတိနဲ့ကျန်ခိဟဲ့အွေန်တယူပိုင်။ 27 တိပါးစာပွဲဆွမ်းပန်းလွန်ငေါ်ဟဲ့အားကေသေးကာပေးဆွမ်ဟဲ့အားအွေန်အရေးယိုင်လေးပိုင်။အားကေငေါ်စားပွဲအန်းကျန်ထောင်းလေးပိုင်တိ။ဟော့ဟက်အူးနယ်မွန်းခါအွေန်တိတမ်းခေပေးဟဲ့မွန်းခါးသေးခါးဆွမ်းခါးပန်းခါတိပေးတိ။ 28 ပေးနယ်နမ်အန်းညက်လေ့တာအူးဟဲ့အူးပိုခေ့ပိုင်ပေးနယ်အွေန့်မွန်အူးကျိုင်တိ။ 29 ပန်းဖကျောက်အိးပေါ်အူးဟွင်ကောကေအူးနဟဲ့အူးကောမွန်းခါးကေပေန 30 ပေးနယ်ပိုအွေန့်တိမွန်ဖာဟဲ့ပိုငေါ်မွန်းအူးစာပွဲဟဲ့ငေါ်တိတိုအူးဟဲ့ခွမ်အစ္စရေးဆစ်စော်ပီးအေးလားပိုန။ 31 ရှိမုန်၊ရှိမုန်လာညက်စာခွမ်ရောကူးဟွင်ကောကျန်လေ့ငေါ်ဂျေ့ဟဲ့အန်းညက်ကောတပေးတပိုင်ခပ်အေ့ကျန်နမ်တိဆာ။ 32 ဟောဟက်ဖိုးအေးနယ်ပိုရူးဖကျောက်ဟဲ့ပိုတင်းပါးတိဆာ။မီခိပိုဟဲ့အက်အန်းဟဲ့အီးအိုင်မိကောဟဲ့ခွမ်ကျိုင်မီကောစိးကာကေခီမြောင်ဟဲ့စိးကာကေဖတ်အေးခမ်းနားဖကျောက်။ 33 ဟောဟက်မု့ပေတရုလားဖကျောက်အူးနယ်မွန်းဖကျောက်တိထောင်ကောရောမွာ၊ဟဲ့ဂျေ့ကောရောမာဟာဟဲ့ဖိုးအူးနယ်သေးအွေန့်ဟဲ့ကယ်လားဟော့မီအန်းတိနယ်။ 34 ဖကျောက်လားပေတရုအူးလားတိမီ။စိးအန်းနမ်ယောင်ကြောင်လာအော်မီနယ်ကျန်ညန်းအူးဟဲ့မိလားလာနော်အွိုင်းပေါ်။ 35 ခမ်းခီးအမ်းဖကျောက်လားခွမ်ကျိုင်အူးနယ်လားတိပေးခါပေါင်ပတ်ဟဲ့ဟိုးခပ်ကာပေးတွေဟိုင်းဟဲ့နမ်အူးပွဲလီပေးနယ်တွေခါမယ်ခါမန်ဟိုင်းနော်တိုင်းတိကေဟဲ့ခွမ်ကျိုင်လားမြောင်တွေဟိုင်းခါမာဟာ။ 36 ဟောဟက်ဖကျောက်လားမာနိုင်ကွေးပတ်ကောတွေဟိုင်းခါဖောင်းကောတွေဟိုင်းသပေးတွေးလာငါကောမန်ခါမယ်ခါမန်ဟဲ့လာဝိုင်လာငါဆာ။ 37 အူးလားသပေး။ဟွင်နယ်လားခီးအူးပဲန်းကွမ်းမု့ရာဇဝတ်ဟဲ့သဲန်းအွန်းတိနိင်ပဟဲ့လားပဲန်းအေးဂျေ့လားတိကေလာနော်။ 38 ဟောဟက်ခွမ်ကျိုင်လားဖကျောက်နဆာ။သအေးကွေးလာငါလာအိုင်ထင်လားထင်လနော်ဟဲ့ဖကျောက်လားပိုလာဂျေ့။ 39 ခမ်းခီးအန်းဖကျောက်ရော်စိးရောအွန်းဟွင်ကောဟိုင်တိမုသလွင်နန်း။ခွမ်ကျိုင်ဟွင်ကောဟောခဲဟွင်ဟိုင်း။ 40 ဖျောင်းတနိင်းဟဲ့ဖကျောက်လားခွမ်ကျိုင်စိးကာပေးလေ့ခါးညက်ဟဲ့ပေတင်းပါးဆာ၊လားတိကေလာနော်။ 41 ခမ်းအန်းဖကျောက်လားတိနိင်ပေးတွေစာမူစာနဲ့ဟက်ဟိုင်းပါဆာငိုင်လေးအန်းမာနတ်ဟဲ့ခူခေါင်။ 42 အိုဖကျောက်၊ဖကျောက်ကွေးဖိုးညက်တိနယ်တအူးအန်းညက်အမ်းတိကာပန်းတအူးအမ်းတိမွန်ခါလားအူးဟဲ့ဟွင်တောတင်းပါးလာနော်၊ 43 ဟောဟက်တိမွန်ခမ်းမု့နတ်ဒေဝါတပိုင်ဖျောင်းနန်းကာကမ်လန်းကျိုင်းဖကျောက်။ 44 ဖကျောက်နယ်ပိုဆေ့မိုင်မာဆူးဟွင်ကောအွန်းဆာတိညက်ညက်ဟဲ့တင်းပါးဟဲ့တိတိုဖကျောက်ခူအိုးကွေးလီမွန်းနားခုတိတိုပါးခါသေးတိဆာ။ 45 ဖကျောက်တင်းပါးလာနော်ဟဲ့အေးတိခွမ်ကျိုင်ဟွင်ဖြောင်ဟဲ့ခွမ်ကျိုင်ကေကောမွေဟဲ့အီအွေန်နန်းဖကျောက်ညိုး၊ 46 ဖကျောက်လားခွမ်ကျိုင်မပေးအီမွန်တိုးဟဲ့တပိုင်စ်းအန်းညက်လေ့တိကေဟဲ့တင်ပါးဆာ။ 47 ဖကျောက်လားလနော်ဟောဟက်တိခွမ်ကျိုင်ဟွင်ဆစ်စော်ပိုင်တပိုင်မုယုဒတပိုင်တိပါးခွမ်အေးဟွင်နဟဲ့ကော်အေးတိတမ်နားဖကျောက်ဟဲ့ဟွင်နယ်စိးဟွမ်းဟွင်နဟဲ့အေးတေဟွင်။ 48 ဖကျောက်လားမိနယ်တဟွင်စခါလီတင်နော်။ 49 ခွမ်ကျိုင်ဟွင်တပိုင်ညိုအားလေအန်းဖကျောက်အေးနယ်သကေပိုတွေလာငမ်ဟဲ့ပိုအန်းတိကေနော်။ 50 ခမ်းခီးအန်းဂျူးပုရောဟိတ်ခွမ်ထောင်တပိုင်ဟော့ခီးဟွင်အန်းတပိုင်တွေလာငမ်ဟဲ့မတ်တေတီးရိုးဟွင်ဖခါးတိငဟဲ့ကူ။ 51 ဖကျောက်နယ်လားလာအန်ခွန်းဂျေ့အားဟာရိုးတူအန်းခွမ်ကျိုင်ဟွင်တွေတီးဟွင်ဟဲ့ပီးရိုးဟွင်အဲ့ကာမွန်းအားဖီးမြောင်။ 52 ခမ်းခီးအန်းဖကျောက်လားလဗေ့ဟွင်အေးဖျောင်းခွမ်ဂျူးပုရောဟိတ်ခွမ်ထောင်ဟဲ့ခွမ်ဟွင်ဟဲ့ခွမ်ဂျုးကေကောတွေလာငမ်ဟဲ့ခိုးမတ်ပေးတွေအေး။ 53 အူးကျန်စညင်အွေန့်တိနိင်ထမ်မတ်ပေးအေးဗေ့သအူး။ဟောဟက်မားနိင်နယ်လဲ့ပေးအန်းညက်သပေးအန်းညက်ဟဲ့ကာသပေးတိဆာ။ 54 ခမ်းခီးအန်းကေနယ်ဗေဖကျောက်ဟဲ့အပ်ကာတိခွမ်ထောင်းမုပုရောဟိတ်ဟဲ့ပေတရုကောစမောဟိုင်းဟောခဲကေခေး။ 55 တိနိင်ဝိုင်အားအော်ကေခိုင်ငမ်းအွေန့်နန်းပေတရုကောအေးအွေန့်ခေါကေနန်းခေ့။ 56 ခွမ်အီးဗေ့တပိုင်ညိုပေတရုငမ်ဟွင်နယ်တွေတီးဟွင်ဟဲ့စသဟွင်ဟွင်နယ်ပန်းခွမ်ဖကျောက်တပိုင်။ 57 ဟောဟဲ့ပေတရုကောလားအီးဗေ့အန်းညန်ဟွင်ဟ။ 58 ထန်းလေးခွမ်တပိုင်ညိုပေတရုမီနယ်ပဲန်းအားပွဲကေဂျေမာနာလားထင်လနော်ဟဲ့ပေတရုကောလားအူးနယ်ကျိုင်အားပွဲဟွင်ဟ။ 59 တိုးပေါပိုတနာလီအားအော်ပိုင်တိုးပိုင်လားထင်ဟွင်နယ်ပဲန်းခွမ်းဂါလိလဟဲ့ပဲန်းခွမ်ဖကျောက်ဂျေ့မာနလာထင်လနော်။ 60 ဟောဟက်ပေတရုကောလားမြောင်ပေးလားခါမာအူးညန်ဟာ။လားလနော်ဟဲ့အက်လာအော်။ 61 ဟောဟက်ဖကျောက်ဖတ်နပေတရု။ဟဲ့ပေတရုကောဖကျောက်လားအွန်စိးအန်းနမ်အက်ညောင်းလာအော်မိနယ်လားလသအူးဟဲ့မီလာလလာနော်အိုင်းပေါဟဲ့မီကာခိပိုမြောင်။ 62 လီခါနော်ဟဲ့ယာတဟွင်တိဆာ။ 63 တိဖကျောက်စခါလီးတင်ဟဲ့ခါညာတင်ဟဲ့တောထင်။ 64 ငမ်ဖကျောက်ကောတွေဖော်ဟဲ့ပေါ့အွန်းဟဲ့သမီနယ်မွန်တောသမီိအော်နဆာလားလနော် 65 စခါလီးဟွင်အိုင်းအော်ပိုဂျေ့ဖကျောက်ဟဲ့စခါလီးဟွင်ဟဲ့လားထင်။ 66 ကေသငိုဟဲ့ခွမ်းဂျူးပုရောဟိတ်ခွမ်ဟဲ့မာလာကေဟဲ့ခွမ်ဂျုးကေကောလားပွဲဟွင်လီဟဲ့တိုင်ဖကျောက်ခါမယ်ခါမန်တိဆာ။ကေကောတိဖကျောက် 67 မိနယ်ပဲန်းခွမ်ကျွယ်မေရှိယနော်၊အမ်းကျိုင်းလားမြောင်ဆာဟောဟက်ဖကျောက်လားအူးလားသပေးကောပေးယွန်းဟာ။ 68 အူးတိုင်းတိပေးကောပေးလားမြောင်ဟာ၊ 69 ဟောဟက်မားနိင်ဟိုင်းအူးနယ်စိမ်းဟဲ့အားဟွင်ကွေးစိမ်းဟဲ့အွေန့်ဖခါတိငမ်ဟွင်ဟဲ့ငေါ်ဟဲ့အူးပိုနဟဲ့လားတိကေလာနော်။ 70 ဟောဟဲ့ကေနယ်တိုင်ဟွင်မီနယ်ပဲန်းကွမ်းဖကျောက်နော်ဟဲ့ဖကျောက်လားမွန်ခါလားပေးဂျေ့မာနာ။ 71 ကေကောလားဟွင်နယ်လားဟဲ့ကယ်ဟဲ့အေးပိုမန်းဟဲ့အေးလိုတိလာညက်အန်းစိးပိုဂျေ့။ |
This translation of the Samtao Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.