Yake 3 - Seysyo No Tao

Lila no tao

¹ Manga kakteh, ji nyo ngakdaya o kamimin nyo a mangnanao. Ta o mangnanao so tao am arakorako pa o oyyan na nira ni Ama ta do to, no si meyraraten sira, kano ji mangnanao a tao.

² Abo jyaten eya o jya nimalas so vazay. Am o tao a ji mapatwaw so marahet a ciring am manoyong o akman sang a abo so karatan, do kapakapzat na do lila na kano kataotao na.

³ O ta pangayan so ovid do ngongoy no baka am ipakataid ta do baka a omonot jyaten.

⁴ Naknakmen nyo pala o avang. Tana yarako o kavavang na yana pavyovyoten no rako a pagpag do karakwan no awa am yalikey saon o savilak na yasomavilak sya do na angangayan.

⁵ Yakman sang o lila ta tao. Tana yalikey am yateywara o na patwawen a ciring. Naknakmen nyo pala o apoy. Tana alikey o apoy a amlila am to na lanata pa o rako a kahasan.

⁶ O lila ta am akman rana so apoy. O lila rana ya am ney marahet na do peyvongvongwan ta. Ta yamapatwaw so akmey lila no apoy do kararatan a yamrahet so kangangay ta.

⁷ Katenngan no tao o makakaday a nyamamaog ni Ama ta do to a italamozong a yananawen. Kakwakwan no masosozi a omalalam a kano meyyasasalap a kano volay a kano amowamong a yada mananaoo.

⁸ Am o lila no tao am abo o makananao sya. So ikatey marahet no lila no tao a jyananao. So ikanoyong na akmey makawawakwak so tao.

⁹ Tamo anwanooden no lila ta si Ama ta do to a Panirsirngen ta. So tamo pangavayan no lila ta so tao a nyamamaog na ni Ama ta do to akman sya so kamamagenan.

¹⁰ Yasa ka ngoso ta o na yapwan no ta sarayan ni Ama ta do to, ta pangavayan so tao. Manga kakteh, taosya o kamirpirwa ta pa mapatwaw no lila ta so marahet.

¹¹ O atbod am ji voyog dang o makopad a kano maganinem a ranom.

¹² O acyai, manga kakteh, am ji meyyasi so vineveh. O vazacinok am ji meyyasi so anyoy. O attaw am ji voyog dang o matavang a ranom.

Apo do teyngato a teneng

¹³ Sino jinyo o yamateneng a tao. No si myan am apyapya o kapehbo na so nakem na a mapeyvazay so apiya vazay.

¹⁴ Am no si amyan do onowned nyo so manginanahet a kano masicyakaoya kano mararaten am ji kamo na mapazway so nakem. Taosya o kapakateneteneng nyo.

¹⁵ Ta o akman rana sang a teneng am beken a apo do teyngato, ta apo do tao do teyrahem. So ikamonganay na do karawan a kano kalamsoyan ni Satan.

¹⁶ O yanan na no manginanahet a kano mararaten am manoyong keyyan na do onowned da no meyzavozavoz a vazay a kano makakaday a raraten.

¹⁷ O apo rana do teyngato a teneng am o manma na vazay am ji meylimoteng so nakem. O tomonton am mapeypapya so onowned no tao. Apiya o nakem na do icyatatao na. Ji mapakarang so nakem. Mangarilaw so tao. Abo marahet do onowned na. Ji mapeycyakaban so tao. Ji mangalalas.

¹⁸ O makakaday a apiya vazay am akma ney asi no nipamowa a nanao ni Ama ta do to do onowned no tao a mapeypapya so onowned da kano icyatatao da.