Make 1 - Seysyo No Tao

No kapangnanao na no nimanaktak a meyngaran si Yowani

¹ O Mapasaray a Ciriciring na ni Yeso Kizisto a Anak na ni Ama ta do to am oya o niyapoyapwan na.

² O panoyonoywan na so ciring ni Ama ta do to a tao a meyngaran so Isayya am maniring do nivatvatkan na vakong am, “Cita pala o yako tovoin a meylimwang no ciring ko an. Iya rana ori am mamanong nimo a meywadwad so rarahan mo.

³ Amyan so tao a omlololos do kabwan no nihakawan no tao a manci no, ‘Inyo rana am wadwadan nyo o rarahan no Panirsirngen ta, ikatazineng na rana no pangonongan na.’ ”

⁴ So niyan na ni Yowani do kabwan no nihakawan no tao a manaktak so tao a kapangnanao na. Maniring am, “Karwan nyo o peyraratenan nyo a kataktak ko jinyo. Ta ori o vonasan na sya ni Ama ta do to so raraten nyo.”

⁵ Aro tao a nimapo do peycyeylilyan na do Yotay a kado Yelosaleng a mangay do tangain na ni Yowani. Sira rana am ipanci da o raraten da. Am ori o nitaktakan na jira ni Yowani do ayo a meyngaran so Yotan.

⁶ Meyyayob si Yowani so niparing da a bobow no baka a kapeyyabtek na so kolit no baka a kakan na so zozon a kano maganinem a amyan do vahay no tapipi.

⁷ Maniring am, “O manownowjyan pa ka nyaken am mowyowyat pa ka nyaken. Si meylologod ko a omovay so bedbed no tokap na am abo pacicingayan ko jya.

⁸ Ranom o ko itaktak jinyo. Am iya rana am taktakan na inyo no Seyzi.”

⁹ Makarahan am mai si Yeso a apo do Nasale a ili a macinapnap do Cyadidi kataktak na ji Yeso ni Yowani do ayo a meyngaran so Yotan.

¹⁰ Meypapowpow si Yeso a apo do ranom am macita na o hanit a kacyangan. Makarahan am mangay maneyked jya o akmey hato rana Seyzi.

¹¹ Makarahan am maciralay o ciring na ni Ama ta do to apo do teyngato. Maniring am, “Imo rana am Anak ko imo a ko tey kaglaw. So sarayan ko nimo.”

¹² So ji na nimeyyahahai ni Yeso a nitovoy no Seyzi do kabwan no nihakawan no tao.

¹³ So niyan na dang so kasikapat (40) so araraw a littan ni Satan. So nipacizavoz na do omalalam do dang. Am keyyan no aro a tinsi a somidong sya.

Rarahen na ni Yeso o papat a ka mangahangahahap a tao

¹⁴ Aneban da si Yowani am mangay si Yeso do Cyadidi a meylimwang no Mapasaray a Ciriciring na ni Ama ta do to.

¹⁵ Maniring am, “Yarana makeykai o yana katalamozong ninyo ni Ama ta do to. Am ori o karwan nyo na do peyraratenan nyo a omanoyong do Mapasaray a Ciriciring na ni Ama ta do to.”

¹⁶ Mangonong si Yeso do pasalan no rako a meybebneng a ranom a ngaranan da Cyadidi am macita na o rarwa ka tao a mangahangahahap a meyngaran so Simong a kano kakteh na meyngaran so Antele a amzoyo no tawaz da.

¹⁷ Maniring si Yeso jira am, “Macilolo kamo jyaken, ta nanawen ko inyo. So icyakma nyoy mangahahap a mapanop so tao.”

¹⁸ Mamizing da am to da rana ngaroi o tawaz da macilolo ji Yeso.

¹⁹ Alikey pa o nyalaman na am macita na ni Yeso o anak na ni Sipitay a meyngaran so Yake a kano kakteh na si Yowani a rarwa a tomonod so nyayoma da tawaz do tatala da.

²⁰ Macita na sira ni Yeso am tawagan na sira. Makarahan am to da ngaroi o ama da kano lamlamsoy da do tatala da kapacilolo da ji Yeso.

Kovotan no kalamsoyan ni Satan a tao

²¹ Makaranes sira do ili do Cyapaynong am amyan si Yeso do peyneynozyan a mangnanao so tao do ipeywalam no tao.

²² Isavasavak da no makamizing so ciring na ni Yeso o ipangnanao na. Ta tey rako oyowyat na no ipangnanao na, do kapacitarek no ipangnanao na kano aro a mangnanao no iwawalam ni Ama ta do to a tao.

²³ No kanang am amyan so kovotan no kalamsoyan ni Satan a tao a mai do peyneynozyan.

²⁴ Maniring a amlololos am, “Imo a Yeso a tao do Nasale am ikongo mo kakzeben jyamen. Mo yamen balinasen? Ko imo katenngan. Imo am na nitovoy imo no Tao do to a tey yapya so nakenakem a tao.”

²⁵ Am ori o nioyyan na nya ni Yeso. Maniring am, “Ji ka meyzezyak. Pakowbot rana do kataotao na.”

²⁶ Makarahan am mina to na pazikzika o tao ang no komovot jya a kalololos na kapakowbot na rana do tao ang.

²⁷ Isavasavak da no aro a tao. Am ori o nipeysingsingkad da manci no, “Asyo o akman sya vazay. Abo pa o akman sya nimamizing ta a nanao. Asyo oyowyat na ori yato makavozwaw so kalamsoyan ni Satan ang. Na to ngamiznga pa no kalamsoyan ni Satan o ciring na ang.”

²⁸ Ori o nipeyrengarengayan da rana do ngaran ni Yeso do Cyadidi.

Niwakwakan na sira o meykeyngeyngen a tao

²⁹ Karwan na o peyneynozyan ni Yeso am mangay do vahay da Simong a kani Antele. Macita ni Yake a kani Yowani am macihza sira mangay.

³⁰ Ikongo do paingwaten na o icyarwa na mavakes ni Simong, am ori o to na ngirai. Makaranes si Yeso am ipanci da ji Yeso o ingingnen no mavakes ang.

³¹ Ori o nyangay na tomita sya ni Yeso. Makarahan am pinanan na o lima na keyvangon na sya. Am ji na rana nipaingwat. Am ori o nipeyvangon na rana tomaotao sira.

³² Somipsip rana o araw do makoyab am yai da no aro a tao o meykeyngeyngen a tao a kano kovotan no kalamsoyan ni Satan a tao do tangain ni Yeso.

³³ So nikalovot no tao do ili a nimai. Ori o nipanicit da no aro a tao do pangengneban.

³⁴ Makarahan am iwakwakan na rana sira o meykeyngeyngen a tao ni Yeso a kapya da rana. O komovot do tao a kalamsoyan ni Satan am nivozwaw na sira ni Yeso. Ji na mya sira o kalamsoyan ni Satan a meyzezyak, ta katenngan da o yapwan no oyowyat ni Yeso.

No kapeylimwang na ni Yeso no Mapasaray a Ciriciring do Cyadidi

³⁵ Ji pazngang do ikadwa na araw am mayokay si Yeso a kangay na do kabwan no tao a meynozi.

³⁶ O meyngaran so Simong a kano kararay na am kalahen da si Yeso.

³⁷ Makala da am maniring sira am, “Abo yaji ngala jimo.”

³⁸ Maniring si Yeso am, “Mangay tamo do teyhesa ka ili, ta ipeylimwang ko do dang o Mapasaray a Ciriciring na ni Ama ta do to, ta ori o ko nyai do karawan.”

³⁹ Makarahan am nikakaday ni Yeso o peyneynozyan do Cyadidi a peylimwangan no ciring na ni Ama ta do to a kavozwaw na so komovot do tao a kalamsoyan ni Satan.

Niwakwakan ni Yeso o omlabyab so kolit a tao

⁴⁰ Amyan so asa ka tao a omlabyab so kataotao a mangay do tangain ni Yeso a meylilitod a mapasyasi jya. Maniring am, “No si apyahen mo am jyabo kaji na apyan no kataotao ko a.”

⁴¹ Ikarilaw na ni Yeso. Am ori o niparapongan na so lima na jya. Maniring am, “Ko apyahen. So na rana ikapya no kataotao mo.”

⁴² Ji nimeyyahahay o kataotao na mapya.

⁴³ So nitovoyan na rana sya ni Yeso. O nipakoyokoy na pa jya am,

⁴⁴ “Ji mo meylimwangan do tao an. Angay rana pacittan do mapatanatanang so nakem ta si Ama ta do to a kavalivaliw na so kataotao mo a kapangozay mo na do iwawalam ni Moyse a mapatanang so nakem mo si Ama ta do to. So anoyngan da jimo no tao a nimapya rana so kataotao.”

⁴⁵ Am makowbot o tao ori am to na rana meylimwangan do aro a tao. Am ori o ji na rana nimangai do ili ni Yeso. So niseysan na do siri no ili da. Ta jyates sira o aro a tao do peycyeylilyan na mangay komala sya.