Kooloosi 3 - Gooti Toolluro Yogalokwono

Nemoro aiyo yomjomwekovla'mwalano tov Krais toolluda'ai lokabodowodo tovinokwono

¹ Gooti tool Krais toollu muunyu kai'muuno aiyo aiko te amodukovomokailoka toga kevu kwollu uuguro'mwonyodupudo kugaikullu kuruv aval'no amodukovekumokailokaikono. Toro tovino tov kevu Gooti toolluro ago muunyu kai'muu wo'dupudo tonyuno mallo'moneyokwe womdo neya jogaulo. Gooti toolluro ago su tomuu Krais tool Gooti toolluro anato tomuuda'ai sia kig tovi mwalodowodekono.

² Kevu kweke me'no uuguro'mwonyodupudo togaikul noonyumwonyu kwako akavida'ai tonyuno kuudo nyau'mwalpiyo. Toro kugaikul kuruv Gooti toolluro ago muunyu kai'muu wo'dupudo tonyuno'gwowi kuudo neya duubwemovlavogaulo.

³ Kuudo neya jaullulo. Kemoro kwako akavida'ai amwallajupo tov me'no abollungopogaikikono. Toro kuvi kuruv kemoro aiyo nyomjomwekovla'mwalpino kuunodo to'gwowi Krais tooke yiulo kupuu'na'dowodokwono. Aki Gooti toollu me'no uuguro'mwonyodowodokwono.

⁴ Kemoro aiyo nyomjomwekovla'mwalpino su tov Krais toolluda'ai alokabokakwono. Toro te lukomgu Krais tool kuu'maiyo toru'no abiyalo'no'ji toga kevu Krais toollu me'no uuguro'mwonyodupudo kugaikul kuruv Krais su tooke gamoro bako bwotonyo tovi anakuuto tomuu kuu'maiyo toru'no nobiyalo'nupinogaikikono.

⁵ Toro te kevu kwako akavida'ai pasudo kuuno kuulaikwo'dupudo toorai neya joromiyosogaulo. Kwonyalo pasudo toorogai'aro kaiyako igolamo'nyo'mo toorogai'aro kwanyu sumdo kinuwiyo'mo toorogai'aro aki kirovanyuvanyu kiroungovlaiyo'mo kuudo toorogai'aro su toorai kevu manyu tomuu'aro neya domwalogaulo. Aki a'mwo pwolluro noonyumwonyu tonyuno magwesumdo kuruv nenuwimwalpiyo. Su tov aro tovinokwono. Guu a'mwo pwolluro kwako akavida'ai noonyumwonyu tonyuno magwesumdo ainuwibi su tov noonyumwonyu su ton gumi kuunano gooti toorobusuko gujumo'nopi kworai ilomoropiyabinekugono.

⁶ Yiuwi'nokai ma'no ma'no pasudo su tooraino Gooti tool surodo wuunodowodekono. Toro tovino tov a'mwo abolo kisuvolo wiyodupudo su tonyu gamoro kirumwallo tov kuvinono nobuuwi'mowonokwono.

⁷ Sumdomgu kevu a'mwo abolo Gooti toollu kisuvolo wiyodupudo su togai akuuto toru amwallajupogaikikono. Su toro toga kev kugaikul kuruv ma'no ma'no pasudo su toorai amjumovlaiyajupogaikikono.

⁸ Toro kuvi kuruv aga'no'gwowi kevu yiuwi'nokai ma'no ma'no pasudo su toorai neya domodukwopiyogaulo. Surodo'mo tokwe'aro mesubuuto kirowopiyo'mo tokwe'aro magu'nyo tokwe'aro bwolomorumwogapiyo'mo tokwe'aro kaiya'no yogalo toorogai'aro pasudo su toro toorai neya domodukwopiyogaulo.

⁹ Aki kemi avalo Jisasolluro a'mwo abolo tobuurai kuunano yogalo miyoukuu'nuudupinono. Su tov aro tovinokwono. Kevu youro uumdo tovi mollurolodukwopiyodupudo to'busuko kubalno kemoro kuudo uumdo toorogai'aro aki kuudo uumdo su tooravuro pasudo kworogai'aro toorai me'no amodukwopiyoporogano.

¹⁰ Toro modukwopino sumaveyokwe kevu a'mwo abolo muuduko togaikulbusuko sumo'nopogaikikono. Aki kemoro kuudo kun kuruv youro muuduko mollosodupudo to'busuko kubalno me'no amollosopogaikikono. Aki kevu Gooti kemi saikuukwolloka toolluno kuudo muuduko pugai'aro kuuno youroma'dupudogaikikono. Gooti su toolluno kuudo youroma'dupudo tovi'aro kevu gavubusuko imo'nugelabiyo'moneyokwe Gooti tool yiuwi'nokai toga kemi aiyo aiko te yokwollaikubweyodowodekono.

¹¹ Toro tovino tov nemida'ai pwol Grikoldeyo oo Juuwoldeyo oo Juu tooravuro miyawosunodupudoldeyo oo lakulkulako do'nodowodoldeyo oo lakulkulako mado'nodowodoldeyo oo gabovo yogaljo dodowodoldeyo oo pumuuda'aiyoldeyo oo ki'nato womdo yodowodoldeyo oo ki'nato tovida'ai me'no birolo'nugolokwodowodoldeyo yiuwi'nokai go'no go'nodo su ton aguto'maiyo. Toro kuvi kuruv aguto to'gwowi yiuno Krais tookono. Krais su tool gamoro yiuwi'nokai a'mwo abolo tonollu me'no kuulonekumwalodowodekono.

Nevu Jisasolluro a'mwo abolo tonol pasudo sugumaluko tollovai neya mollosumwalano tovinokwono

¹² Gooti tool gamoro a'mwo abolo kuunodo wimo'nyo'moneyokwe kemi me'no ajaikubweyokaikono. Toro togaikulluno kalo buuropino winyokwekono. Toro tovino tov kevu youro mollosodupudo to'busuko kubalno pasudo akanyu neya domollosogaulo. Kemi poowokalago tokwe a'mwo abolo tonyuno kalo mamwonyo'mo pasudo togai'aro a'mwo abolo tonyu ilaiyo to'no igollo'mo pasudo togai'aro bwolomoropinyo'mo pasudo togai'aro kavo molludo'movlaiyo'mo pasudo togai'aro jul'nyo baiki'mo'mdowo'jure kuga kuruv womdo mimwogapiyo'moneyokwe pasudo togai'aro pasudo su toro tonyu kevu neya domollosogaulo.

¹³ Aki a'mwo abolo kaiyako yaikullugolodopure tonyu kevu sumwoluko su'mno yere mwimo'nupinono. Aki a'mwo pwol kemi yogalo adaikurugolo'ji tov kevu jul'nyo su tovi modukwopiyopi aki aiko te kuudo nyau'mwalpiyo. Kuudo neya jaullulo. Aguto tool kemoro ma'no ma'nodo tonyu modukwopiyo'no aki aiko te kuudo miyou'movla'mdowodekono. Su toro to'busuko kubalno a'mwo abolo pun kemi kaiyako saikullugolpi tov kevu aki aiko te kuudo nyou'movla'mwalpiyokwe tov jul'nyo su tonyu neya domodukwopiyogaulo.

¹⁴ Yiuwi'nokai pasudo su tonyu uuwolo'mdowodo pasudo puruv nooso. Su tov a'mwo abolo tonyuno kalo buuropino neya domollogaulo. Pasudo su tov youro to'busuko kevu neya domollosogaulo. Toro te kevu a'mwo abolo pwolno puru'monodo togaikul kalo buuropino kuvinono amollupi tov pasudo su tov kemi wuulo to'busuko aval'no nomoweyaikubweyonokwono. Toro moweyaikubweyodowo'jure tovida'ai kevu ilaiyo to'no guro'mwonyopi pi'mwono nokwo yomjomwekovla'mwalpinogaikikono.

¹⁵ Aki Krais tool gamoro sumwoluko kavo wosunyo'moneyokwe tov me'no ikullabodowodekono. Toro te sumwoluko kavo wosunyo'moneyokwe su tov kemoro poowokalago tonyu mido neya mollekumwalmwalonokwono. Aki Gooti tool kemi me'no adekumarokaikono. Su toro adekumaroka tov aro tovino'mokwono. Kevu kulako puru'monodo to'busuko imo'nodupudo togaikul sumwoluko kavo wosunyo'moneyokwe adekumarokaikono. Aki yiuwi'nokai toga Gooti toollu, “Nenoloo,” neya duudumovlavogaulo.

¹⁶ Krais toolluno kuuguudo sugumaluko tov kemoro yiuwi'nokai anakuuto tomuu neya kuullo'movaikwopimwalonokwono. Toro togaikul Jisasolluro a'mwo abolo tobuurai Gooti toolluro pi'mwo kuudo ikullabodowo'jure togai neya yodubwasopi dodumul'mwojogaulo. Kemoro poowokalago tonyu Gooti toollu, “Nenoloo,” wuujo'moneyokwe tov neya kuulaikwo'mwalonogaikikono. Toro kuulaikwo'dowo'jure toga kevu dato puruvapuruv tomgu'aro dodomwalogaulo. Dato pun Gooti toolluro yogalokwe buukiyo tovi wo'dupudogano. Aki dato pun Gooti toollu ilomoropiyo'moneyokweyogano. Aki dato pun Gooti toolluro Kuullo tool ikubweyodowodogano. Dato su toro togai kevu neya dodomwalogaulo.

¹⁷ Aki kevu buro'nyo buro'nyo yogalo jo'mo'mdeyo oo womdo yo'mo'mdeyo kemoro yiuwi'nokai amjumovlapi su ton yiuno Aguto Jisasolluro yovo tovi'aro neya domjumovlavogaulo. Aki Jisasollu'aro kevu gami Ganumiyago Gooti toollu, “Nenoloo,” nokwo wuudumovla'mwalpinogaikikono.

Jisasolluro a'mwo abolo tonumdotavuro yomjomwekovla'mwalpino tovinokwono

¹⁸ Abolo me'no yoma'nodupudo togaikul kemi kwolo toorai dolago tomuu neya domwalogaulo. Su tov Aguto toolluro sumdo tovi kuvi kuuno uumjunmwalpinogaikikono.

¹⁹ Aki a'mwo me'no yoma'nodupudo toorekul kemi abolo tonyu kaiyako nyugolmwalpiyo. Toro kworekul kuruv kemi abolo su tonyu kalo buuropino to'no neya domollogaulo.

²⁰ Kwoloraiyo togaikul kemi tellunumiyago telluneyago tonyu yiuwi'nokai toga neya duumjunogaulo. Su tov aro tovinokwono. Kwoloraiyo tobuurekul kemi kuunum kwolabolo tonyu uumjunyo'moneyokwe pasudo su tovino Gooti Aguto tool ilaiyo winyokwekono.

²¹ Aki kwoloraiyo su tobuuro burawo bwotonyo nyumo'nupiyokwe tovino tov kevu kuunumiyago toorekul kwoloraiyo su tobuurai kaiyako nyugolmwalpiyo.

A'mwo abolo ki'nato womdokwe tobuuro Gooti toollu ilaiyo igollo'moneyokwe womdo neya imwalpino tovinokwono

²² Kevu a'mwo abolo ki'nato womdokwe togaikul kemi kwako akavida'ai mido mollomwalokwe tooravuro yiuwi'nokai ikudodopure tonyu neya duumjungovlavogaulo. Kevu kwako akavida'ai a'mwo su toorai ilaiyo igollo'moneyokwe a'mwo su tooro yiuno kemi muugonaikwo'dopure toga'no nuumjunmwalpiyo. Toro kugaikul kuruv yiuwi'nokai toga Aguto toollu dolago tomuu mwalopi kemi poowokalago kuunodo togai womdo tov pi'mwono jogaulo.

²³ Toro te buro'nyo buro'nyo womdo supi tov a'mwo toorai ilaiyo igollo'moneyokwe to'no nyumwalpiyo. Toro kugaikul kuruv Aguto toolluno'gwowi kwollu ilaiyo igollo'moneyokwe kemi poowokalago kuunodo togai womdo guureji jogaulo.

²⁴ Kevu Krais toolluro womdo yodupudo togaikul aro tovino kuudo nyau'mwakovo. Aguto tool gamoro kwoloraiyo tobuurekullu ikullabiyo'moneyokwe me'no sovrowosungiko tollovo mubiyo to'busuko kuvinono nekullabwonekono. Aki kevu womdo wiyodupudo togaikulluro mido mollomwalokwe kuunodo su tool Krais tool kwekono.

²⁵ Toro te a'mwo pwol ma'no ma'no so'ji tov gamoro ma'no ma'nodo su tovuro mubiyo kuunodo tov nomaronekono. Su tov aro tovinokwono. Gooti tool gamoro kooti yogalo tovi yiuno avalo pworaino kuu'dello tomgu'aro majainyubwollokwekono. Toro tovino tov Gooti toolluro ajainyubworo'ji su tovida'ai a'mwo ma'no ma'nodokwe toorai nuubiyonekono.