Joona 4 - Gooti Toolluro Yogalokwono

Gooti tool Niniveda'ai a'mwo abolo tonyu kaiyako muubweyoka tovino Joona'wol surodo kuunoka tovinokwono

¹ Gooti Yawel a'mwo abolo tonyu maromiyebuuropiyoduke tovi Joona'wol muugona'no sumaiyokwe ilaiyo mwino'no surodo'mo sokaikono.

² Toro tool ilaiyo mibwosuno'no Gooti Yawellu subusu'nyogalo aro kuudokaikono. “Oo Gooti Yaweloo, nuu mi wagwolago kuunodo toruda'ai yere muugollu'mo'mdore toga gumino aro kuudo me'no sourogumallajonyugono. Guu Gooti tooku a'mwo abolo tonyuno kalo buuropino winodumdekugono. Aki guu a'mwo abolo tonyuno kalo mamwonyodumdekugono. Aki toro tooku kirumwallo'mo kuudo sau'bi kweku kuruv sogwollo wino'bi kuudo muuduko tov yere yaullokwekugono. Toro tooku a'mwo abolo tonyu kaiyako yere maromiyobuuropiyokwekugono. Toro sourogumallajonyugono. Aki nuu gumino aro kuudo me'no saguullajonyugono. Niniveda'ai a'mwo abolo tonyu kaiyako migolonoldeyo. Su toro kuudo yaguurono Tasis'no lukado avlavonyugono.

³ Toro te guu Niniveda'ai a'mwo abolo tonyu aromiyebuuropiyo'bujuko'mno'juki nuu ilaiyo nokwo subwosuno'mujukonyugono. Toro kuvi kuruv guu a'mwo abolo su tonyu maromiyebuuropimado to'gwowi gumoro kalo buuropino kwinadokuudo su tovino nuu ilaiyo mibwosunodum surodo anuunadopiyo. Toro te Gooti Yaweloo, aga guu nokwo romiyanubwebinekwonyugono.” Kuudokaikono.

⁴ Joona'wol toro kuudoka kuvi kuruv Gooti Yawel aro kuudokaikono. “Gumoro surodo aguunadopiko su tov kavlomaiyo tovida'ai aguunadopiyo.” Kuudokaikono.

⁵ Gooti Yawel toro wuujuno sumaiyokwe Joona'wol wagwolago tovida'ai bolokwo'no imgu kuujo tool sulopiyamoka tomgu uuwo'no du'gurolo'mo ago pwekwo amodosokaikono. Toro modosuno sumaiyokwe ago su tekwoji kuulomwalo'no wagwolago Ninive tovi amuugonorabiyajukekono. Toro muugonorabodowo aro kuudo saullajukekono. Wagwolago su tovida'ai a'mwo abolo ton kaiyako nomapinodukono oo mamapinodukono? Kuudo souromuugonorabiyajukekono.

⁶ Toro youromuugonoraboduke toga kuujo tool guureji wuudoduke tekwo ilaiyo mibwosunyajukekono. Toro toollu wiyo'mwojo'moneyokwe Gooti Yawel kuuwo'agokwe wuulo puruv sovroubweyokaikono. Kuuwo'agokwe wuulo su tov bila'no sumaiyokwe Joona'wolluro kuulomwaloduke du'gurolago tovi bu'duvolomaro'no du'gurolo kwiyajukokwono. Toro te Joona'wol kuuwo'agokwe wuulo su tovino ilaiyo bwotonyo sokaikono.

⁷ Toro kuvi kuruv iruko aikomguda'ai tollugwoji lomwo iru'mago toga kuuwo'agokwe wuulo su tovi mulebuuronopiyo'moneyokwe Gooti tool auropiyo pwollu amoropiyabokaikono. Auropiyo su tool kuuwo'agokwe wuulo tovi amulebuuronopiyoka toga kuuwo'agokwe wuulo su tov yiunokuudo abuukuropiyokakwono.

⁸ Toro buukuropino sumaiyokwe kuujo tool me'no abwoladoka toga Gooti tool du'muujudokwe dolo puruv sovrowosokaikono. Dolo su tov kuujo tool sulopiyamoka tomuuda'ai bo'no sokakwono. Toro yoduke toga kuujo tool guureji adokaikono. Toro doduke toga Joona'wolluro mido tov miguunoguuno ibwosunyuno sumaiyokwe kuruwiyo bollo'mo sokaikono. Toro ino sumaiyokwe kuuwo'agokwe wuulo abuukuropiyoka tovino surodo'mo tool aro adokaikono. “Oo nuu aiyo kuuno mujomwekovlaiyo'mo manyunadopiyo. Toro tekwonyu abolmi tov ilaiyokwono.” Adokaikono.

⁹ Toro adoka toollu Gooti tool aro kuudokaikono. “Guu kuuwo'agokwe wuulo abuukuropimoka tovino surodo aguunadopiko tov ilaiyo'maiyo.” Toro kuudoka kuvi kuruv Joona'wol kuudokaikono. “Awiyo, moro surodo anuunadopiko akav ilaiyokwono. Aki surodo su tov bwotonyo kuunodo anuunadopiko tovino tov nuu yiuno'no bollo'mo anyunadopiyo.” Kuudokaikono.

¹⁰ Toro kuudoka toollu Gooti Yawel aro kuudokaikono. “Kuuwo'agokwe wuulo abuukuropimoka su tov surakuuto pullugwoji yere bila'dowo aki surakuuto pullugwoji yere abuukuropimokakwono. Kuuwo'agokwe wuulo su tovi gumoro womdo yodore tovida'ai mabila'moka kuvino kuruv guu kalo bwotonyo agujunadopiko tov ilaiyo'maiyo. Guu Niniveda'ai a'mwo abolo tobuuraino kalo agujunowo'jujuko kweku kuruv kalo magujunadopiyo.

¹¹ Toro tooku a'mwo abolo su tobuuraino kalo magujunadopiko kuvi kuruv nuu toonyuno'gwowi kalo bwotonyo nyunodowodonyugono. Aki wagwolago bwotonyo su tovi kwoloraiyo tobuuro 120,000 tovi uuwolenodo tomgu'aro kuulomwalodupudogano. Kwoloraiyo su tobuuro sugudo yo'mo'mdeyo oo ma'no ma'no yo'mo'mdeyo tovino kuudo maiyobuurogano. Aki a'mwo abolo tobuuravuro ibesa'aiyo wuulo ki'duvolodupudo bwotonyago tooro wagwolago su to kuvi mwalodupudorogano. Toro te nuu yiuwi'nokai Niniveda'ai mwalodupudo tobuuraino kalo buuropino nyunodowodo toonyuno guu surodo'mo mibinono.” Gooti Yawel Joona'wollu toro kuudokaikono.