Galesiya 1 - Gooti Toolluro Yogalokwono

Poololluro kuuguudo muudu'nodo tovinokwono

¹ Nuu kuurotokwe Poolonyu pas akav sokwollaikubwemono. Nuu kuurotokwe imo'nyo'moneyokwe tov kwako akavida'ai a'mwo pworavuro ato tovida'ai ajanubweyoponyumaiyo. Aki kwako akavida'ai a'mwo pwollu'aro kuurotokwe sumo'nonyumaiyo. Toro kuvi kuruv Jisas Kraisol gavnokwe tooke'aro gami Ganumiyago Gooti tooke'aro tooral ajanubweyolonyugono. Gooti su tool Jisasol me'no aboloka toollu aiyo aiko te amodukavoka tookono.

² Yiuwi'nokai akawaida'ai Jisasolluro a'mwo abolo ton nuuge mwalodupu nevu pas akav Galesiyada'ai Jisasolluro mollu'bwoto go'no go'nodo togaikullomno aikwopiyamawono.

³ Oo nemi Nellunumiyago Gooti tooke'aro Aguto Jisas Kraiseke'aro tooral yasuwa'wino sugumaluko tov kemi nokwo ikubwemwalbullunorakono. Aki kevu sumwoluko kavo wosunmwalpino'moneyokwe kuruv kemi nokwo ikubwemwalbullunorakono.

⁴ Nemi Nellunumiyago Gooti tool agasuro nevu kirovanyuvanyu kuumwiyokwe kwako mwalodowado akalluda'ai nobomollurolovonekumokalokwiyo'moneyokwe ilaiyo kwinyajukekono. Toro winodowodo tovi Jisasol kuvinono uumjunyuno sumaiyokwe nemoro ma'no ma'nodo tonyu mobiyodukwopiyo'moneyokwe tov gavnokwe tool morubweno'no abolokaikono.

⁵ Oo yiuwi'nokai tonol Gooti su toolluno yiunokuudo neya ilomoropimwolowanonogano. Nebalokwono.

Kuuguudo sugudo gabovo puruv nonaguto tovinokwono

⁶ Nuu kemino morumoukuropi sumwakonyugono. Moro su toro amorumoukuropiyadokwo tov aro tovinokwono. Gooti tool Krais toolluro yasuwa'wino sugumaluko tovi'aro kemi me'no adekumarokaikono. Toro kuvi kuruv kevu Gooti su toollu yere molluduvolno yodupu puuto gabovo puvino, Oo kuuguudo sugudo'mdeyo, dodupu kuvi kuumjunmwakopogaikikono.

⁷ Toro kuvi kuruv puuto gabovo kuumjunmwakopo su tov kuuguudo sugudo'maiyo. A'mwo pworo Krais toolluno nebaikuuguudo tovi moruguunyumwojodupu kemi kuunano soukuu'naikudadokwoporogano. Su toro youkuu'naikudodopure tovi kevu kuumjunmwakopogaikikono.

⁸ Neya duu'nyulo. Nevu kuuguudo sugudo kuunodo tokwe amodekumollowonogano. Toro tovino tov nevudeyo oo Gooti toolluro ago muunyu kai'muuda'ai ensel pwoldeyo toonol kuuguudo gabovo tokwe nomodekumolla'jo. A'mwo pwolnodo kwol kuruv kuuguudo gabovo tokwe amodekumollo'ji su tool du'muudo tomuuno yiunokuudo yovlawonekono.

⁹ Nuu sumdomgu me'no aikudumo tovi aga aki aiko te aro ikudumo'monyugono. Kevu kuuguudo sugudo kuunodo tovi ilaiyo me'no amollomaropogaikikono. Toro togaikullu a'mwo pwol kuuguudo gabovo pumgu'aro tokwe amodekumollo'ji su tool du'muudo tomuuno yiunokuudo yovlawonekono.

¹⁰ Kuudo neya jaullulo. Moro su toro aikudumo tov a'mwo abolo ton mino ilaiyo amollonumapureyokweyo'mo'maiyo. Toro kuvi kuruv nuvu yiuno Gooti toolluno'gwowi ilaiyo igollo'moneyokwe womdo wiyodumdekwonyugono. Nuu a'mwo abolo tonyu ilaiyo igollo'mo kuudo sauro'mujuko'mno'juki nuu Krais toolluro womdokwe kuunodo mwimo'no'mujukekwonyugono.

Poolol kuurotokwe kuunodo sumo'noka tovino kuu'maiyo adodoluwosoka tovinokwono

¹¹ Mi avalobuuravoo, kuudo neya jaullulo. Nuu kuuguudo sugudo me'no amodekumollo su tov kwako akavida'ai a'mwo pworavuro kuudo tovida'ai aboka'maiyo.

¹² Kwako akavida'ai a'mwo pwolnodo kwol kuruv kuuguudo sugudo su tokwe mi manubweyokaikono. Aki a'mwo pwolnodo kwol kuruv kuuguudo sugudo su tovino miyodonubwasokaikono. Toro kuvi kuruv Jisas Kraisolno'gwowi mi biyanyulo'nyuno sumaiyokwe kuuguudo sugudo su tovino sodonubwasokaikono.

¹³ Kevu moro aiyogasuro somjomwekovlaiyajo tovino me'no wuu'nodupudogaikikono. Aiyoga nuu Juu tooravuro lootuu tovi guureji kuumjunyajo toga Gooti toolluro mollu'bwoto tonyu kaiyako sugollajonyugono. Toro toonyu mollu'bwoto su tovi kaiyako mollounapiyo'mo womdo bwotonyo sajonyugono.

¹⁴ Aki nuu Juu tooravuro lootuu pasudo tonyu muunyu toru'aro guureji kuumjunyajonyugono. Toro toonyu mi avalo Juu nyunyokwo toorai kuuwoleyajonyugono. Su tov aro tovinokwono. Nuu nemi nellukweyago tooravuro pasudo tonyu guurejuno kinamjo'mo tov kaveno miyajonyugono. Toro kwonyu kuruv guureji kuunodo kuumjunyajonyugono.

¹⁵ Toro kuvi kuruv mi nyuneyago tov yere miyonuma'duke kugada'ai Gooti tool gamoro kuunodo wimo'nyo'moneyokwe mi me'no ajanubweyokaikono. Toro janubweno sumaiyokwe gavnokweyolluro yasuwa'wino sugumaluko nekubweyodowodo tovi'aro adonumarokaikono.

¹⁶ Toro donuma'no sumaiyokwe gamoro Kwolaiyo toolluno kuu'maiyo toru'no adodolukuuranubweyokaikono. Toro adodolukuuranubweyoka su tov aro tovino'mokwono. Nuu a'mwo abolo Juu tooravuro miyawosunodupudo tonyu akuuto tomuu mwalo'mi Gooti toolluro Kwolaiyo toolluno kuuguudo sugudo tokwe moruudomollumwalmo'moneyokwe tovinokwono. Aki su toro anyuduuwalloka toga mi danumul'mwojo'moneyokwe nuu kwako akavida'ai a'mwo pwolnodo kwollu kuruv yere mavlavonyugono.

¹⁷ Aki su toro toga sumdomguda'ai Jisasolluro kuurotokwe kworai kuruv wuuru'mallo'moneyokwe wagwolago Jeruusalem'no milanyugono. Toro kwonyu kuruv su toro toga nuu kwako Arebiya tomuuno avlavonyugono. Toro plaino sumoneyokwe lukomgu Damaskos'no aikomgu sulaga'movanyugono.

¹⁸ Toruda'ai kworomo pullapullu me'no bawino sumaiyokwe toga nuu Pitallu wuuru'mallo'moneyokwe wagwolago Jeruusalem'no sulanyugono. Toro ilno sumoneyokwe Pitaike amwallajuuwolonyugono. Su toro mwalno sumawoleyokwe iruko 15-pela tobuul anuwolo'nokanyugono.

¹⁹ Toro kuvi kuruv su toro toga nuvu Jisasolluro kuurotokwe gabovo pworai mwononyugono. Yiuno nemi Aguto toolluro gagwai'yago Jemsolluno kuuru'maronyugono.

²⁰ Neya duu'nyulo. Gooti tool sumdo muugonanuwo'duke tovino tov moro yogalo sokwollaikubwemo akan kuunano'maiyo.

²¹ Toruda'ai lukomgu nuvu proovins Siriyake Silisiyake tomuuno avlavonyugono.

²² Aki su toro toga kwako Juudiyada'ai Krais toolluro mollu'bwoto go'no go'nodo tonyuda'ai a'mwo abolo ton mino kuudo kuuno miyanuullajupogano.

²³ Mino tov a'mwo abolo punyuro puu'yogalo to'no dodopure tovida'ai aro kuu'nyajupogano. “Oo a'mwo nemi kaiyako sanekullugollajuko su tool muudu'nodo toga nemoro kuudo uubweyodowado tovi mollounapiyo'mo womdo sajukekono. Toro kwol kuruv aga'no'gwowi nemoro kuudo uubweyodowado su to kuvino moruudomollodowodekono.” Puu'yogalo su toro tovino to'no kuu'nyajupogano.

²⁴ Toro te a'mwo abolo su ton Gooti toolluro mi me'no anyoka su tovi wuu'nyuno sumaveyokwe Gooti toolluno yovo tovi sulomoropiyapogano.