Filipai 1 - Gooti Toolluro Yogalokwono

Kuuguudo muudu'nodo tovinokwono

¹ Nuu Poolonyugono. Nuuge'aro Timootiyeke'aro toonal Krais Jisasolluro ki'nato womdokwe wimo'nodowolonakono. Toro toonal kevu wagwolago Filipaida'ai yiuwi'nokai Krais Jisasolluro a'mwo abolo togaikullomno pas akav sokwollekwopiyamawolo. Kevu Gooti gavnokwe toolluro a'mwo abolo kuunodo me'no wimo'nodupudogaikikono. Aki kevu wagwolago Filipaida'ai Jisasolluro mollu'bwoto tovi a'mwono moduvomwallokwe toorekike'aro aki a'mwo diken womdokwe kworekike'aro yiuwi'nokai su toorekullomno pas akav sokwollekwopiyamwakuuwolo.

² Nemi Nellunumiyago Gooti tooke'aro nemi Aguto Jisas Kraiseke'aro tonumdalluro yasuwa'wino sugumaluko tovida'ai pun kemi nokwo ikubwemwalbullunonumdakono. Aki kemoro sumwoluko ton kavo wosungovlaiyo'moneyokwe nekullo'mwojumwalbullunonumdakono.

Poolol wagwolago Filipaida'ai Jisasolluro a'mwo abolo tonyuno subusu'nyogalo kuudoka tovinokwono

³ Nuu kemino kuudo kuuno you'movla'mdumdonyugono. Su toro yau'dumdo tovino mi Gooti toollu yiuwi'nokai toga, “Nenyoo,” to'no wuudodumdonyugono.

⁴ Aki kevu yiuwi'nokai togaikullo'mo buro'nyo buro'nyo subusu'nyogalo judo'no judo'nodo togai Gooti toollu wuudoganodumdonyugono. Aki subusu'nyogalo su toro wuudodumdo tovino ilaiyo bwotonyo yodumdonyugono.

⁵ Su tov aro tovinokwono. Kevu Jisasolluro kuuguudo sugudo tokwe bomomjodumoullo'moneyokwe mi nyo'mwojodupudogaikikono. Kuuguudo sugudo su tovi bomomjodumoullo'moneyokwe womdo su tovi muudu'no amaropo togada'ai yiuno aga'no kevu kuuno nyo'mwojodupudogaikikono. Toro togaikul moro avaiwomdokwe nyumo'nodupudogaikikono. Toro togaikulluno tov nuu kemino subusu'nyogalo wuudodumdo tovino ilaiyo to'no yodumdonyugono.

⁶ Aki aro kuudo tovi gudupola'dumdonyugono. Gooti tool kemi poowokalago tonyu anakuuto tomuu womdo sugudo muudu'no me'no aullokaikono. Toro tool kemi poowokalago tonyu akuuto tomuu womdo kuuno mujumovla'mwalonekono. Toro mujumovlavowo'ji iruko pullugwoji Jisas Kraisol aikomgu noolabwonekono. Toro kwolabwo'ji toga'no womdo mujumelabodowodo su tovi yiuno'no nyopiyonekono. Kuudo su toro tovino kuuno gudupola'dumdonyugono.

⁷ Kevu moro poowokalago tovi me'no kuulonumwalodupudogaikikono. Toro togaikulluno moro kuudo ilaiyo yau'dumdo su tov kuvi kuuno yau'dumdonyugono. Su tov aro tovinokwono. Nuu wuulo killo'mo ago tovi kuule'na'dumdoga'deyo oo kuuguudo sugudo tovi kworado duuwimwojo'moga'deyo aki kuu'maiyo toru moruudomollodumdoga'deyo kuga kuruv nuu Gooti toolluro yasuwa'wino sugumaluko tov me'no ma'dumdonyugono. Toro toonyuge kevu kubuurekul kuruv Gooti toolluro yasuwa'wino sugumaluko su tov me'no ma'dupudogaikikono.

⁸ Gooti toolluro sumdo tovi nuu nebal'no aro ikudumo'mokwono. Krais Jisasol kevu gamoro a'mwo abolo tobuurekulluno kalo winodowodekono. Aki toro tobuurekullomno nuu kemi nobekuru'mallo'mo nyunodowodonyugono.

⁹ Aki Gooti tool kemi aro ikullo'mwojono'moneyokwe nuu subusu'nyogalo wuudodumdonyugono. Nebal'no kuudo tokwe'aro yiuwi'nokai pi'mwo kuudo togai'aro ton kemi neya aullo'movaikwopiyogawono. Toro kuullo'movaikwopiyodowo'jure tokwe kevu a'mwo abolo tonyuno kalo buuropino mollopi aki muunyu toru'aro guureji nokwo ikullunumwalonogaikikono.

¹⁰ Aki kevu pasudo sugudo tollovaino yenyubworomaropi pi'mwono neya domolludo'movlavogaulo. Toro togaikullu Krais tool kooti yogalo duuwiyo'moneyokwe kwolabwo'ji toga kevu kaiya'no nonagutokwe to'no imo'nupinogaikikono. Kevu su toro sumo'nupi togaikulluno a'mwo pwolnodo kwol kuruv ku'nono mabwolomekumwogapiyawonekono.

¹¹ Aki ikulsulo ki'nodupudo to'busuko kubalno pasudo idopto'nodo pun yiuno Jisas Kraisollu'aro bodupudogano. Pasudo idopto'nodo su togai yomjomwekovlaiyo'moneyokwe kuudo tov kemoro poowokalago tovi neya aullo'movaikwopiyono. Kevu su toro tomgu'aro yomjomwekovla'mdopure togaikullu a'mwo abolo ton aikwonpi tov Gooti toollu yovo aguto wiyopi aki nyulomodomoropimwolapinogano.

Poolol wuulo killo'mo ago tovi ki'na'duke kuvi kuruv kuuguudo sugudo tov kuuno abomje'nugoullajuko tovinokwono

¹² Mi avalobuuravoo, kevu aro kuudo youromapino'moneyokwe nyunodowodonyugono. Mi wuulo killo'mo ago tovi aulomeranubweyopo kuvi kuruv nuu Gooti toolluro kuuguudo sugudo tokwe moruujo'moneyokwe tovi manuumjuku'dowodokwono. Toro kuvi kuruv mi ameranubweyopo su to'gwowi kuuguudo sugudo tov yere neya abomje'nugoulawoneyokwe tovino wiyo'mwojodowodokwono.

¹³ Toro te neya duu'nyulo. Nuu wuulo killo'mo ago tovi kuule'na'dumdo tovino kavlo tov Krais toollu uumjunodumdo tovida'ai to'no anyumo'nokakwono. Kavlo su toro tovino yiuwi'nokai a'mwo mollurogudo Sisa toolluro ago tovi duuwato moduvomwallokwe toorogai'aro aki yiuwi'nokai a'mwo gabovo toorogai'aro tooro kavlo su tovino kuudo me'no souromaroporogano.

¹⁴ Aki a'mwo mi avalo toorobusuko nyumo'nodupudo bwotonyago tooro moro wuulo kuule'na'dore su tovino me'no kuu'nyajuporogano. Toro wuu'nodopure toorai Gooti Aguto tool jurogudo aduuwimwojajukekono. Toro te aga'no'gwowi a'mwo su tooro Gooti toolluro yogalo tokwe guureji muunyu toru'aro moruujo'moneyokwe tovino luko mimwakoporogano.

¹⁵ A'mwo pworo nuvu Gooti toolluro womdokwe toonyuno kwekuullu kuudo tokwe'aro mi bwolomonumwogapiyo'mo kuudo tokwe'aro yau'dupudorogano. A'mwo su tooro Krais toolluno kuuguudo tov kuuno moruudodupudorogano. Aki a'mwo gabovo pworo ilaiyo kuudo tovida'ai to'gwowi Krais toolluno kuuguudo tov moruudodupudorogano.

¹⁶ A'mwo ilaiyo kuudo yau'dupudo su tooro mino kalo buuropino winodupudorogano. Toro winodupudo tovino tov kuuguudo sugudo tokwe moruudodupudorogano. Aki a'mwo su tooro mino aro kuudo yau'dupudorogano. Oo Poolol Krais toolluro kuuguudo sugudo tovi sobanyo mollodaiyo'moneyokwe womdo mujumaboduke tovino tov wuulo killo'mo ago tovi doule'na'mwallo. Kuudo yau'dupudorogano.

¹⁷ Toro kuvi kuruv a'mwo mi bwolomonumwogapiyo'mo kuudo yau'dupudo gabovo toorono'gwowi kevnokwero ilomoropunyu kuudo tokwe'aro kwekuullu kuudo tokwe'aro yauropi Krais toolluno kuuguudo sugudo tokwe moruudodupudorogano. Kemoro su toro moruudodupudo tovino kavlo tov ilaiyo'maiyo. Aki a'mwo su tooro nuu wuulo killo'mo ago tovi kuule'na'dumdo tekwonyu kaiyako purukwe'aro yanyugollo'mo to'no winodupudorogano.

¹⁸ Kemoro mi kaiyako yanyugollo'mo winodupudo su tov aguto'maiyo. Toro kuvi kuruv a'mwo su tooro Krais toolluno moruudodupudo su to'gwowi agutokwono. A'mwo su tooravuro moruudodupudo tovino kavlo tov kaiya'nodo'mdukono oo ilaiyo'mdukoneyokwe su tovalluno mi aguto manyumo'nodubulovakono. Toro kuvi kuruv yiuwi'nokai puuto go'no go'nodo tomgu'aro uumjunopi kuruv yiuno Krais toolluno amoruudupi su to'gwowi nuu ilaiyo yodumdonyugono. Nebalokwono, su toro tovino moro poowokalago kuunodo tokwe ilaiyo to'no mujumovla'mwalmonyugono.

Poolol aiyo kuuno amwalo'ji toga Filipaida'ai Jisasolluro a'mwo abolo tonyu wiyo'mwojo'mo kwinyajuko tovinokwono

¹⁹ Neya duu'nyulo. Nuu aro tovino kuudo me'no souroma'mwakonyugono. Kevu Gooti tool mi nonyo'mwojumwalono'moneyokwe tovino subusu'nyogalo wuudumovla'mdupudogaikikono. Toro wuudumovla'mdopure tovida'ai Jisas Kraisolluro Kuullo tool mi nonyo'mwojumwalonekono. Toro nonyo'mwojodowo'jure tovi'aro nokwo mollurolovonuwapiyononyugono.

²⁰ Toro toonyu aro tov anyumo'noneyokwe tovino sogwollo kinodumdonyugono. Nuu Aguto toolluro sumdo tovi wogulo yowo'gallunyo'moneyokwe pasudo puru'monodo kuruv nyumwalmiyo. Aga kugake'aro lukomgu kugake'aro kuruv yiuwi'nokai toga nuu Krais toollu yovo aguto wiyo'moneyokwe tovino luko nyumwalmiyo. Toro kuvi kuruv yiuwi'nokai toga Krais tool yovo aguto to'no neya ma'mwalonekono. Nuu aiyo mwalo'miyo'mdeyo oo abolmiyo'mdeyo kuruv moro kulako akakwe yiuwi'nokai pasudo molludo'movla'mdo'mure tovida'ai Krais tool yovo aguto to'no neya ma'mwalonekono.

²¹ Kuudo aro tov mi nuwo'dowodokwono. Nuu kwako akavi kuuno amwalmi toga Krais uuguro'mwonyodumdo tooke mujomwekovla'mwalmonyugono. Aki nuu abolmi kuruv moro mujomwekovla'mdumdo su tovi nuuwolowonokwono.

²² Nuu moro kulako akakwe kuuno amwalmi tov Gooti toolluro womdo tovi yodo'mure tovida'ai ikulsulo kuuno ki'nugovla'mwalmonyugono. Toro te nuu kwako akavi kuuno mwallo'mo'mdeyo oo nobollo'mo'mdeyo tovalluda'ai puruvi adado yenyubworoma'monyudukono? Nuu su toro tovalluda'ai puvino kuudo miyau'mwakono.

²³ Yiuwi'nokai kuudo su toval moro kuudo tovi guureji ki'nonumokavla'mdubulovakono. Nuu kwako akavi wuugollu'movo'mi Krais tooke mujomwekovlaiyo'mo nyunodowodonyugono. Krais tooke mujomwekovlaiyo'mo su tov kwako akavi kuuno amwalmi tovi muunyu toru'aro uuwolo'mdowodokwono.

²⁴ Toro kuvi kuruv nuu kemi ikullo'mwojo'moneyokwe kwako akavi kuuno amwalmi tov ilaiyokwono.

²⁵ Su toro tovino nuu kuudo noullo maullo miyou'movla'monyugono. Toro toonyu kemi ikullo'mwojo'moneyokwe kwako akavi kuuno mwalmonyugono. Aro tovinokwono. Kemoro Krais toolluno kuudo uubweyodupudo tovi kuuno yogullumwojekwapiyo'moneyokwe nuu kevuge nomwalmonyugono. Aki kemoro kuudo uubweyodupudo su tovino kemi poowokalago togai ilaiyo neya ipureyokwe kuvino kuruv nuu kevuge nomwalmonyugono.

²⁶ Toro te nuu su toro tomgu'aro ikullo'mwojodumdo toonyu aiko te abekuru'ma'mi toga kevu Krais Jisasolluno yovo tovi nyulomodomoropimwolapinogaikikono.

Filipaida'ai Jisasolluro a'mwo abolo ton tagunyo ma'dopure su tobuurai Gooti tool ilaiyo to'no sugollajuko tovinokwono

²⁷ Kevu aro neya jogaulo. Krais toolluro kuuguudo sugudo tovino wuuduuwallo'moneyokwe kemoro pasudo tov pi'mwono to'no neya domjumovlavogaulo. Kemoro pasudo toro amjumovlapi tov nuu nobaikwonmonyudukono oo mabaikwonmonyudukoneyokwe tovino kuudo miyau'mwakono. Toro kuvi kuruv kemino kuuguudo pun kuu'numi toga aro kuudo nokwo yaikuu'mwalmonyugono. Oo a'mwo abolo judo'no judo'nodo su ton jurogudo da'mdupudodeyo. Aki yiuwi'nokai su ton kuudo puru'mono to'no yau'dupudodeyo. Toro ton kuuguudo sugudo tokwe moruujo'moneyokwe avaiwomdo yodupu imgu amgu sobanyo molluulnoda'mdupudodeyo. Toro yodopure tovida'ai a'mwo abolo pun kuuguudo sugudo su tovino kuudo nokwo uubwepinogano. Toro tovino'mo womdo su tovi guureji yodupudodeyo.

²⁸ Aki aro kuudo yaikuu'mwalmonyugono. Oo a'mwo abolo su ton ikomago pworavuro surugolpi kuvino kuruv luko miyodupudodeyo. Kuudo yaikuu'mwalmonyugono. Kevu luko miyodupudo su togaikullu ikomago tooro aikwonpi tov kevnokweraino kuu'maiyo toru'no aro wuuduuwallonorogano. Kevu du'muudo tomuuno novlapino'mo toorekikono. Toro kuvi kuruv kemino'gwowi avalo toga aro tovino ikuduuwallonokwono. Gooti tool kemi ma'no ma'nodo tovuro kirumwallo tovida'ai nobomollurolovekumokalokwonogaikikono. Su toro tovino ikuduuwallonokwono.

²⁹ Neya duu'nyulo. Gooti tool yasuwa'wino to'busuko aro tov ikubweyodowodekono. Kevu Krais toollu kuudo uubweyo'moneyokwe tovino to'no ajaikubweyokalmaiyo. Toro kuvi kuruv kevu gamino kuudo uubweyopi aki tagunyo ton noma'mwalpino'moneyokwe ajaikubweyokaikono. Tagunyo amo'movlapi su tovi'aro Krais tool yovo aguto noma'mwalonekono.

³⁰ Sumdomgu nuu kwonyu kuruv tagunyo su toorogai molo to'busuko yodore tovino kevu me'no anuwonyajupogaikikono. Aki aga kuga kuruv tagunyo su toorogai molo kuuno mujumovla'mdore tovino me'no kuu'numwakopogaikikono. Moro aikudumo su tov aro tovinokwono. Aga kev kugaikul kuruv nuvubusuko molo su tovi aval'no amjumovla'mwakopo tovinokwono.