2 Tesaloonaika 1 - Gooti Toolluro Yogalokwono

¹ Pas akav nuu Poolonyuge'aro Sailaseke'aro Timootiyeke'aro toonol kevu wagwolago Tesaloonaikada'ai Jisasolluro mollu'bwoto togaikullomno sokwollekwopiyamawono. Kevu nemi Nellunumiyago Gooti tooke'aro Aguto Jisas Kraiseke'aro tooralluro a'mwo abolo togaikullu aro adekwopiyamawono.

² Nemi Nellunumiyago Gooti su tooke'aro Aguto Jisas Kraiseke'aro tooral yasuwa'wino sugumaluko tov kemi aikubweyoga'bulo. Aki kevu sumwoluko kavo to'no wosunmwalpino'moneyokwe kuruv nokwo aikubweyoga'bulo. Su toro adekwopiyamawono.

Tesaloonaikada'ai Jisasolluro a'mwo abolo ton tagunyo ma'dupudo kun kuruv Krais toolluno kuudo kuubweyopo tovi guureji agudupolallajupo tovinokwono

³ Nemi avalobuuravoo, kemoro Gooti toolluno kuudo uubweyodupudo tokwe'aro imgu amgu kalo buuropino ingovla'mdupudo tokwe'aro tovalluno kuudo yaikuu'dowadonogano. Kemoro pasudo su toval gullumovla'mno gullumovla'mno yodubul bwotonyo imo'nodubulovakono. Kevu su toro yomjomwekovla'mdupudo togaikulluno yiuwi'nokai toga Gooti toollu, “Nenoloo,” to'no wuudumwalano'monogano.

⁴ Kemoro su toro yomjomwekovla'mdupudo tonyuno nevu ilaiyo yodowa yiuwi'nokai Gooti toolluro mollu'bwoto go'no go'nodo tonyu kemino aro ilomodomoropiyodowadonogano. “Oo a'mwo kuudo muubweyodupudo pworo Tesaloonaikada'ai Jisasolluro mollu'bwoto tobuurai kaiyako igolodopure tovida'ai tagunyo ton mo'movla'mdupudobuurogano. Toro kun kuruv kemoro Krais toolluno kuudo uubweyodupudo tovino'gwowi guureji to'no gudupola'dupudogano.” Kemino su toro dodowadonogano.

Gooti tool yiuwi'nokai buro'nyo buro'nyo pasudodeyo tonyu pi'mwono jainyubworowo'ji domdukuurosodowodo tovinokwono

⁵ Kemoro guureji gudupola'dupudo su tov aro tovino kuu'maiyo toru'no nekuduuwallodowodokwono. Gooti tool yiuwi'nokai a'mwo abolo tonyuro pasudo tonyu pi'mwono jainyubwollokwekono. Su tov aro tovinokwono. Kevu aguto kig Gooti toolluro mido mollomwalo tomuu mwallo'moneyokweyogaikikono. Toro togaikullu a'mwo pworo kaiyako yaikullugolodupudorogano. Toro yaikullugolodopure kuvi kuruv kevu Gooti toolluro mido mollomwalo su tovi kuvinono noulomwallo'moneyokwe yovrowosungelabodupudogaikikono.

⁶ Toro kuvi kuruv kemi kaiyako yaikullugolodupudo su tooraino'gwowi Gooti tool kaiyako nyugolonekono. Gooti toolluro su toro so'ji tov kuvi kuuno yonekono.

⁷ Aki Aguto Jisasol Gooti toolluro ago tomuuda'ai kuu'maiyo toru'no nobiyalo'nonekono. Toro abiyalo'no'ji toga kemoro tabunyuwuulo mo'movla'mdupudo su tonyu Gooti tool nomodukwopiyonekono. Su toro amodukwopiyo'ji toga kevu yiuno paiko to'no ibwosungovla'mwalpinogaikikono. Aki ne kwonollu kuruv aval'no nonekullonekono. Aki Aguto Jisasol toro abiyalo'no'ji su toga gami ensel jurogudo kuunodo toorogai mokwolabowo'ji widuko bomjonugelodowo'jure tokwe wolabwonekono.

⁸ Su toro kwolabwo'ji toga a'mwo abolo Gooti toolluno kuudo muubweyodupudo togai'aro a'mwo abolo nemi Aguto Jisasolluno kuuguudo sugudo tovi muumjunodupudo togai'aro su tonyu kirumwallo tokwe kaiyako nyugolonekono.

⁹ Su toro tonyuro kirumwallo mapino tov arokwono. A'mwo abolo su ton nemi Aguto Jisasolluro sumdomago tokwe'aro gamoro jurogudo sugumaluko tokwe'aro tovallu manyu tomuu'aro yomuudeyomwalpinogano. Aki toro tonyu yiunokuudo nomollounapiyonekono. Kirumwallo su tovuro danyu'nyuwuulo tovi yiunokuudo nyubwosungovla'mwalpinogano.

¹⁰ Aguto tool iruko su tollugwoji kwolabwo'ji toga gamoro kuunodo wimo'nyo'moneyokwe kuudo uubweyodupudo tono'gwowi yovo aguto wipinekono. Aki toro toolluno ilaiyo bwotonyo mollomapinekono. Kev kugaikul kuruv nemoro kuuguudo kuu'maiyo toru adodoluvaikubweyowo tovi kuudo me'no kuubweyopogaikikono. Toro togaikulluno tov ilaiyo aval'no mollomapinekono.

¹¹ Toro te Gooti tool kemi aikullo'mwojoneyokwe nevu subusu'nyogalo aro wuudoganodowadonogano. “Oo nemi Gootoloo, guu a'mwo abolo Tesaloonaikada'ai ton guvnokwekujuro tomgu'aro neya yomjomwekovlapino'moneyokwe me'no adomarodogano. Toro ton kuvinono bilodukovimo'nyo'moneyokwe guu jurogudo neya doduuwimwojogawono. Aki a'mwo abolo su ton sugupasudo yo'mo winodopure tonyu kuvinono uumjunpino'moneyokwe neya duuwiyo'mwojogawono. Aki a'mwo abolo su tobuuravuro kuudo gubweyodupudo tovida'ai yiuwi'nokai womdo tonyu kuvinono yo'moneyokwe guu jurogudo duubweyogawono.” Nevu Gooti toollu kemino subusu'nyogalo su toro wuudoganodowadonogano.

¹² Nemoro subusu'nyogalo dodowado su tov aro tovinokwono. Nemi Gooti tooke'aro Aguto Jisas Kraiseke'aro tooralluro yasuwa'wino sugumaluko tollovo nekubwemwalbullunorakono. Toro ikubweyodo'bule tovi'aro kevu nemi Aguto Jisasolluno yovo tov muunyu toru'aro nokwo ilomoropimwolapinogaikikono. Aki kevu Jisasollu me'no uuguro'mwonyodupudo togaikulluno tov yovo aguto noma'mwalpinogaikikono.