1 Joon 3 - Gooti Toolluro Yogalokwono

¹ Neya duu'nyulo. Nemi Nellunumiyago Gooti tool nemino kalo buuropino winodowodekono. Toro winodowodo su tov bwotonyokwono. Aga'no'gwowi Gooti tool nemino tov, “Oo moro kwoloraiyo tobuurogano,” nekudodowodo su tov aguto kuunodokwono. Toro te nevu gamoro kwoloraiyo kuvinono wimo'nodowadonogano. Toro kuvi kuruv kwako akavida'ai a'mwo abolo tono'gwowi nemino tov, Oo su ton Gooti toolluro kwoloraiyodeyo, kuudo miworovonekuma'dupudonogano. A'mwo abolo su ton Gooti toolluno kuudo kuunodo miyouroma'dupudo tovino tov nevu gamoro kwoloraiyo kunolluno kuruv kuudo miworovonekuma'dupudonogano.

² Miyobuuravoo, Krais tool aikomgu yere mabiyalo'noduke akaga nemoro lukomgu nyumo'nano tov kuu'maiyo toru'no miyainyunyokwenogano. Toro kuvi kuruv aro kuudo me'no youroma'dowadonogano. Oo nevu Gooti toolluro kwoloraiyo me'no wimo'nodowadonoldeyo. Toro tonol lukomgu Krais tool kuvinono abiyalo'no'ji toga Krais su toollu yiuno'no noonanoldeyo. Aki nevu me'no kwona'ji su to kwolbusuko nyumo'numwalanonoldeyo. Su toro tovino kuudo me'no youroma'dowadonogano.

³ Aki yiuwi'nokai a'mwo abolo Krais su toolluno sogwollo winodupudo ton aro kuudo yaullokweyogano. Krais kaiya'no pasudo puru'monodo kuruv migolamo'nodowodo su toolbusuko kubalno nevu kaiya'no pasudo puru'monodo kuruv nyugolamo'numwala'jo. A'mwo abolo Krais toolluno sogwollo winodupudo ton su toro kuudo yaullokweyogano.

⁴ Yiuwi'nokai a'mwo abolo ma'no ma'no mujeroungovla'mdupudo tono'gwowi Gooti toolluro loowo tovi kisuvolo wiyodupudogano. Neya duu'nyulo. Yiuwi'nokai ma'no ma'no pasudo ton Gooti toolluro loowo tovi kisuvolo wiyokweyogano.

⁵ Kevu aro kuudo me'no youroma'dupudogaikikono. Krais su toollu ma'no ma'no pasudo puru'monodo kuruv mauluuwollokwekono. Toro kuvi kuruv Krais su tool nemoro ma'no ma'no pasudo tovino'gwowi modukwopiyo'moneyokwe kuu'maiyo toru me'no abiyalo'nokaikono.

⁶ Toro te a'mwo pwol Krais toollu kuuno kuuguro'mwonyugovlawo'ji tool ma'no ma'no pasudo toorai mamjumovlaiyokwekono. Kevu a'mwo pwol ma'no ma'no pasudo kuuno mujeroungovla'mdowo'jure toollu kwonpi to'gwowi aro tovino wonomapinekono. Oo a'mwo su tool Krais toollu miyouroonoma'dowodoldeyo. Wonomapinekono.

⁷ Mi kwoloraiyobusukobuuravoo, a'mwo pworo kemi kuunano nyoukuu'naikudumwalpiyo. Toro kuvi kuruv aro kuudo to'gwowi jaurogaulo. A'mwo abolo pun pasudo idopto'nodo tonyu mujumovla'mdopure tovi wonopi kuudo youromapinogaikikono. Oo a'mwo abolo su ton Krais toolbusuko idopto'nodo wimo'nodupudodeyo. Kuudo youromapinogaikikono.

⁸ Toro kuvi kuruv a'mwo abolo puno'gwowi ma'no ma'no pasudo mujumovla'mdupudogano. Ma'no ma'no pasudo su tovi wonopi kuudo youromapinogaikikono. Oo a'mwo abolo su ton Satanyollurodeyo. Kuudo youromapinogaikikono. Su tov aro tovinokwono. Satanyol muudu'nodo togada'ai ma'no ma'no pasudo mujumelabino mujumelabino yodowo aga kuga kuruv kuuno mujumovla'mdowodekono. Aki Satanyolluro womdo mujumelabodowodo su tovi Gooti toolluro Kwolaiyo tool kaiyako mollounapiyo'moneyokwe kuu'maiyo toru me'no abiyalo'nokaikono.

⁹ Yiuwi'nokai a'mwo abolo Gooti toolluro kwoloraiyo me'no wimo'nodupudo ton ma'no ma'no pasudo mamjumovla'mdupudogano. Su toro tovino kavlo tov arokwono. A'mwo pwol ikulwiyo kuudosodowodo to'busuko kubalno Gooti tool gami kwoloraiyo tobuuravuro poowokalago tonyu gavnokweyolluro aiyokwe Kuullo tool me'no kuulumwallodowodekono. Toro kuulumwallodowodo tovino tov a'mwo abolo su ton ma'no ma'no pasudo mairoungovlaiyokwerogano. Aki a'mwo abolo Gooti toolluro kwoloraiyo me'no wimo'nodupudo tovino tov ma'no ma'no pasudo tooro ku'nono mamjumovla'mwalpinogano.

¹⁰ Kevu a'mwo abolo tonyuno Gooti toolluro kwoloraiyodukono oo Satanyolluro kwoloraiyoldukoneyokwe tovino kinodokwopiyomallo'moneyokwe tov kemoro pasudo tonyu'aro nokwo wonoma'mwalpinogaikikono. A'mwo abolo pun pasudo idopto'nodo ton mamjumovlapi tov Gooti toolluro a'mwo abolo mwimo'nodupudogano. Aki a'mwo abolo pun Jisasolluro a'mwo abolo pubuuraino kalo buuropino mwinpi kun kuruv Gooti toolluro a'mwo abolo mwimo'nodupudogano.

Nevu Jisasolluro a'mwo abolo pubuuraino kalo buuropino neya mollumwalano tovinokwono

¹¹ Muudu'nodo togada'ai kuuguudo su toro tovino yodekubwasodowore tovi kevu me'no kuu'nyajupogaikikono. Kuuguudo su tov arokwono. Nevu yiuwi'nokai tonol Jisasolluro a'mwo abolo nemi avalo nekullumo'nodupudo tobuuraino kalo buuropino neya amollogawano.

¹² Nevu Kenolluro soka to'busuko kubalno nyumwala'jo. Kenol Satanyolluro a'mwo kuunodo kwimo'nyajukekono. Toro tool kirovanyuvanyu pasudo ton amjumovlaiyajukekono. Toro kuvi kuruv gami gagwai'yago toolluro pasudo tono'gwowi idopto'nodo amjumovlaiyajukekono. Toro tovino tov Kenol a'mwo pasudo idopto'nodo amjumovlaiyajuko su toollu aromiyosokaikono.

¹³ Toro te mi avalobuuravoo, kwako akavida'ai a'mwo abolo ton kevu Jisasolluro a'mwo abolo tobuurekulluno suroguudo yaikuu'mwalpinogano. Suroguudo saikuupi su toga kevu kuudo kwolallo nyourukwapimwalpiyo.

¹⁴ Nevu Jisasolluro a'mwo abolo nemi nellugwai'yago nello'mwovobusuko nekullumo'nodupudo tobuuraino kalo buuropino nekullunodowodonogano. Nemoro kalo buuropino nekullunyo'moneyokwe pasudo su tovi yainyunowa'ji aro kuudo neya yau'mwalanonogano. Oo nevu bolnodo tovi akuuto tomuuda'ai me'no kuugollu'movowonogano. Me'no wuugollu'mo'mno sumawoneyokwe aiyo yiunokuudo mujomwekovlaiyo'moneyokwe tovino'gwowi akuuto tomuu me'no kuulomwalodowadonoldeyo. Kuudo neya yau'mwalanonogano. Toro kuvi kuruv a'mwo pwol kalo buuropino winyo'moneyokwe pasudo su tokwe mamolludowo'ji toolno'gwowi bolnodo tovi akuuto tomuu kuuno kuulomwalodowodekono.

¹⁵ Toro te a'mwo pwol gavuge avalo pubuuraino suroguudo sauro'ji su tool a'mwo romiyosokwe pwolbusuko imo'nyokwekono. Kevu aro tovino kuudo me'no youroma'dupudogaikikono. A'mwo romiyosokwe pwolluro poowokalago tovi anakuuto tomuu aiyo yiunokuudo mujomwekovlaiyo'moneyokwe tov ku'nono mauluuwollokweyokwono. Su toro tovino kuudo me'no youroma'dupudogaikikono.

¹⁶ Jisasol nemi nekullo'mwojo'moneyokwe gavnokwe toolluro aiyo tovi morubweno'no abolokaikono. Jisasolluro aboloka su tovi'aro gamoro kalo buuropino pasudo tovino anekuduuwallokaikono. Toro anekuduuwalloka tovino tov ne kunol kuruv Jisasolluro a'mwo abolo pubuurai wiyo'mwojo'moneyokwe nemoro aiyo mujomwekovla'mdowado kuruv aval'no neya morubwenumwalanonogano.

¹⁷ A'mwo pwol kwako akavida'ai kuto ivito ton kurukweyonyudeyo ado'ji su tool Jisasolluro a'mwo supto yodowo'jure pwekwoji kwono'ji tov neya wiyo'mwojonekono. Toro kuvi kuruv a'mwo su tool a'mwo supto yodowo'jure tekwojuno kalo mwinowo'ji mwiyo'mwojo'ji to'gwowi Gooti toolluro kalo buuropino winyo'moneyokwe pasudo tov a'mwo kuto ivitokwe su toollu kuuluuwo'dowodoldukono? Awiyo, Gooti toolluro kalo buuropino winyo'moneyokwe pasudo tov a'mwo mwiyo'mwojo'ji su toollu mauluuwo'dowodokwono.

¹⁸ Toro te mi kwoloraiyobusukobuuravoo, nevu a'mwo abolo pubuuraino kalo buuropino mollo'moneyokwe tov yiuno yogalo tokwe to'no aro nodumwala'jo. “Oo nuu gumino kalo buuropino anyunadopiyo.” Nemi mago tokwe to'no su toro nodumwala'jo. Toro kuvi kuruv nemi pasudo nebal'nodo tovi'aro to'gwowi kalo buuropino pasudo su tokwe neya amollogawano.

¹⁹ Nevu a'mwo abolo tobuuraino kalo buuropino kuvinono amolla'ji tov nevnokwenolluno aro kuudo nokwo youromaranonogano. Nevu nebal'no yogalo tovi kuvinono duumjunmwakuuwono. Kuudo su tokwe nevu Gooti toolluro sumdo tovi neya yomjodo'movlavogawano. Toro somjodo'movlawa'ji tov nemoro poowokalago tonyu jurogudo nokwo danekullumwojumwalonokwono.

²⁰ Toro kuvi kuruv pasudo punyuno nemoro poowokalago togai jul'nyo ibwosunyokwenogano. Toro kuvi kuruv Gooti toolno'gwowi nemi pi'mwono youronekuma'dowodekono. Toro tool nemoro poowokalago tonyuda'ai jul'nyo ibwosunodowado su tonyu uuwolo'mdowodekono.

²¹ Toro te mi ibwoto'nyobuuravoo, nemoro poowokalago ton jul'nyo mibwosuna'ji kuga kuruv aro kuudo to'no neya agudupolarogawano. Oo nevu Gooti toollu wobo toru wuuru'mallo'mo tovino luko miyodowadonogano.

²² Aki nevu noonyumwonyu pun mallo'moneyokwe tovino kuudogana'ji tov kuvinono nomaranonogano. Nevu gamoro yogalo adanekulloka tokwe'aro gamoro pasudo ilaiyo winodowodo tokwe'aro tonyu uumjunodowadonogano. Toro tovino tov nemoro kuudogana'ji su tonyu kuvinono nomaranonogano.

²³ Aki Gooti toolluro yogalo adanekulloka puruval arovakono. Nevu gamoro Kwolaiyo Jisas Kraisolluno yovo tovino kuudo neya uubweyogawano. Aki nemi adanekulloka puruv arokwono. Nevu Jisasolluro a'mwo abolo punyuno kalo buuropino neya amollogawano.

²⁴ Gooti toolluro yogalo adanekulloka su tovallu nevu kuumjuna'ji tonol Gooti toollu kuvinono uuguro'mwonyodowadonogano. Aki Gooti tool ne kunollu kuruv me'no nekuguro'mwonyodowodekono. Aki gamoro Kuullo anekullaboka tool nemoro poowokalago tonyu kuulonekumwalododekono. Toro kuulonekumwalodowodo su toollu'aro kuudo youroma'dowadonogano. Oo Gooti tool nevuge mwalodowadoldeyo. Kuudo youroma'dowadonogano.