2 تيموتاوس 3 - ثريفيث 2020

¹ فَا لَابُد يتْخصَّا اَذ تْفهْمذ بلِّي ؤُسَّان ينݣُّوْرَا اَذ يڒِين قصْحن.

² قَا يوْذَان اَذ تخْسن يخف نْسن، أَذ تخْسن تْمنْيَاث، أَذَايْسن يِيڒِي تَّكبُّر، أَذ سمْغَارن يخف نْسن، أَذ سِّيوْڒن اَوَاڒ وَار يحْڒِين خ أَربِّـي. وَار تْطِيعِين شَا إِ لْوَالِدِين نْسن، وَار تْشكَّرن حَدّ، وَار تِيڒِين شَا صْفَان،

³ وَار ذَايْسن تِيڒِي ڒمْحِبّث، وَار سمّْحن شَا إِ يِوْذَان، أَذ قَّارن ڒْبَاطڒ، وَار حكّْمن شَا خ يِخف نْسن، أَذ منْغن اَم ڒُوْحُوْش، وَار تْحِبِّين شَا مِين يدْجَان ذ اَصبْحَان،

⁴ أَذ زّنْزن اَيثْمَاثْسن، أَذ ݣّن ثِمسْڒَايِين بْڒَا ڒَعْقڒ، أَذ ؤُفّن س نْفَاخث، أَذ حِبّن شهْوث نْسن وَار تْحِبِّين شَا أَربِّـي،

⁵ أَذ ݣّن يخف نْسن عبّْذن أَربِّـي وَلَكِن نكَّرن جّْهذ نّس. ئِوْذَان-أَ، أَوْݣّْوج خَاسن.

⁶ يرْيَازن-أَ ذ يِيْنَا إِي د يسْنُوْقُوْبن ثُوْذْرِين اَم يبُّوْعن تَاذْفن بَاش اَذ سَيْطَرن خ ثمْغَارِين إِي ذِي ثدْجَا نِيّث تْعمَّارنْت س ڒْمُعْصِيَاث تْوَاشمَّاثنْت س وَاطَّاس ن لْأَنْوَاع ن شَّهَوَاث.

⁷ ڒبْدَا تسْڒَانْت غَار تَّعْلِيم وَلَكِن عمَّارْص اَذ اَوْضنْت اَذ سّْننْت لْحَقِيقَا.

⁸ مَامّش يَانِيس ذ يَامْپْـرِيس نِّي تْعَارَّاضن إِ مُوْسَى، أَمنِّي عَاوذ ؤُڒَا ذ يرْيَازن-أَ تْعَارَّاضن إِ لْحَقِيقَا. ڒَعْقُوْرَاث نْسن عوّْجن، لْإِيمَان نْسن يخْوَا.

⁹ وَلَكِن يرْيَازن-أَ وَار تِيوْضن شَا مَانِي. قَا اَذَاسن ثوْقع مَامش ذَاسن ثوْقع إِ يَانِيس ذ يَامْپْـرِيس نِّي، ثُوْبُوْهْڒِيَا ن يرْيَازن-أَ اَذ د تْمظْهَار إِ مَارَّا يوْذَان.

لْمِثَال نِّي يتِيشّ اَرَّسُوْل بُوْلُس إِ تِيمُوْتَاوُس

¹⁰ وَلَكِن شك ثسّْنذ مْلِيح تَّعْلِيم ينُو ذ وبْرِيذ ن ثُوْذَارْث ينُو ذ لْغَرَض ينُو ذ لْإِيمَان ينُو ذ تَّاسِع ن ڒْخَاضَر ينُو ذ ڒمْحِبّث ينُو ذ صّْبَر ينُو

¹¹ ذ وعدّب ينُو ذ تَمَارَا ينُو. ثسّْنذ مِين ذَايِي يوقْعن ذِي ثنْدِينْت ن وَانْطَاكْيَا ذ إِكُوْنْيَا ذ لِيْسْتْرَا ذ مِين تْوَاعدّْبغ ذݣ يمُوْشَان نِّي. إِنَّمَا، ئِسفْڒث-اَيِي-د سِيذِيثْنغ زِي مَارَّا مَانَاينِّي.

¹² ذ صَّح، مَارَّا ونِّي إِي يرزُّوْن اَذ يعِيش س لْإِيمَان يدْجَان ذِي عِيْسَى لْمَسِيح قَا اَذ يتْوَاعدّب.

¹³ أَمَّا يرْيَازن يعفَّانن ذ يرْيَازن يشمَّاثن نِثْنِي اَذ ارْنِين ذِي ثُوْعُوْفّْنَا وَاهَا، نِثْنِي اَذ شمّْثن اَذ تْوَاشمّْثن.

¹⁴ شك لَّا، ارْنِي ذِي مِين ذَاش سْڒمْذن ذ مِين ش يسقْنَاعن مِينْزِي ثسّْنذ يِنِّي إِي ذَاش يسْڒمْذن مَانَاينِّي.

¹⁵ أَقَا زِي ثمْࢲِي نّش ثسّْنذ عَاوذ ثِيْرَا يدْجَان مُقدّْسِين زمَّرنْت اَش د اَرّنْت ذ مِيغِيس عْلَاحْسَاب مَامش إِي غَا ثْنجْمذ س لْإِيمَان نِّي يدْجَان ذِي عِيْسَى لْمَسِيح.

¹⁶ أَقَا مَارَّا ثِيْرَا مُقدّْسِين ؤُسِينْت-يد زِي أَرُّوْح ن أَربِّـي، نفّْعنْت حمَا اَزَّايْسنْت نْسڒْمذ اَزَّايْسنْت ننْهَا اَزَّايْسنْت نْصحّح اَزَّايْسنْت نْربَّا عْلَاحْسَاب صُّلْح.

¹⁷ حمَا اَرْيَاز ن أَربِّـي اَذ يِيڒِي يوْجذ اَذ يَاف يذبَّر-اَس س قَاع ثِمسْڒَايِين عْلَاحْسَاب كُڒ ڒْخذْمث ذ ثَصبْحَانْت.