2 تيموتاوس 1 - ثريفيث 2020

لْمُقَدِّمَا

¹ نش ذ بُوْلُس ذ يجّن ن اَرَّسُوْل ن عِيْسَى لْمَسِيح س ڒْخَاضَر ن أَربِّـي عْلَاحْسَاب لْوَعذ نِّي إِي ذَانغ يوْعذ خ ثُوْذَارْث نِّي يدْجَان ذِي عِيْسَى لْمَسِيح.

² تَارِيغ ثَبْرَات-أَ إِ تِيْمُوْتَاوُس ونِّي إِي يدْجَان اَم ممِّي يعِيزّن خَافِي. أَكِذش يِيڒِي اَرْضَا ذ ڒهْنَا ذ اَرَّاحْمث زِي أَربِّـي بَابَاثْنغ ذ عِيْسَى لْمَسِيح سِيذِيثْنغ.

³ تْشكَّرغ أَربِّـي ونِّي عبّْذغ زِي ڒجْذُوْذ ينُو س يِجّن ن ضَّمِير يصْفَان. تتَّارغ-اَس إِ أَربِّـي خَاش دْجِيڒث ذ نْهَار بْڒَا مَا ٱذ بدّغ.

⁴ خْمِي تْفكَّرغ ذݣ يمطَّاون نّش يتطّف-اَيِي-د يجّن مزْڒِي اَش ࢲرغ حمَا اَذ عمَّرغ س ڒفْرَاحث.

⁵ عقْڒغ خ لْإِيمَان نّش بْڒَا نِّفَاق ونِّي يدْجَان ذ اَمزْوَارُو ذِي حنَّاش لْوِيزَا ذ يمَّاش أَنِيسَا. ڒخُّو تيّْقغ ذ صَّح بلِّي اَقَاث ذَايش ؤُڒَا ذ شك.

لْقُدْرَا نِّي إِي يُوْشَا أَربِّـي إِ تِيمُوْتَاوُس

⁶ خ مَانَايَا اَش فكَّرغ بَاش اَذ تْسنْهزّذ لْقُدْرَا نِّي إِي ذَايش يدْجَان زِي أَربِّـي عْلَاحْسَاب وَامِي خَاش سرْسغ يفَاسّن ينُو.

⁷ أَقَا أَربِّـي وَار ذَانغ يُوْشِي شَا يجّن ن اَرُّوْح ن ثِيݣّْوْذِي؛ لَّا، قَا يُوْشَا-ٱنغ-د يجّن اَرُّوْح ن جّْهذ ذ ڒمْحِبّث ذ ڒحْكَام خ يِيخف نّغ س ڒَعْقڒ.

⁸ إِذن وَار تْسذْحَا شَا اَذ تْشهْذذ خ سِيذِيثْنغ نِغ خَافِي نش إِي يدْجَان ذ اَمحْبُوْس عْلَاحْسَاب نتَّا؛ لَّا، قبّڒ اَعدَّاب نِّي يدْجَان عْلَاحْسَاب لْإِنْجِيل، س جّْهذ ن أَربِّـي.

⁹ ئِسنْجم-اَنغ يڒَاغَا-يَانغ-د س يِجّن ن ؤُڒَاغِي مُقدّس. وَار ذَانغ د يڒَاغِي شَا عْلَاحْسَاب لْحَسَانَاث نّغ؛ لَّا، ئِڒَاغَا-يَانغ-د عْلَاحْسَاب لْغَرَض نّس نتَّا ذ اَرْضَا نّس إِي ذَانغ د يُوْشَا ذِي عِيْسَى لْمَسِيح قْبڒ مَا ٱذ تبْذَا ڒْوقْث ن دُّنشْت-أَ قَاع.

¹⁰ أَرْضَا-يَا قَا يمظْهَار-د ڒخُّو وَامِي د يمظْهَار عِيْسَى لْمَسِيح ونِّي إِي ذَانغ يسنْجَامن ونِّي يسْبطّْڒن ڒْموْث. ڒخُّو س وفُوْس ن لْإِنْجِيل يُوْوِي-د ثُوْذَارْث غَار نُّوْر ذ ثنِّي وَار يفنِّين شَا.

¹¹ عْلَاحْسَاب لْإِنْجِيل-أَ تْوَاخْضَرغ نش اَذ بشَّرغ اَذ يڒِيغ ذ اَرَّسُوْل ذ يجّن ن ؤُمْسڒْمَاذ.

¹² خ سَّبَاب-أَ نش قَا تْعدَّابغ خ مَارَّا ثِمسْڒَايِين-أَ ثِيْنَا وَلَكِن وَار تْسذْحِيغ شَا، نش سّْنغ ونِّي إِي زِي ؤُمْنغ. تيّْقغ نتَّا يزمَّر اَذ يحْضَا لْأَمَانَا نِّي إِي كِذس جِّيغ حتَّا ٱڒ نْهَار نِّي اَنݣَّارُو.

¹³ مثّل تَّعْلِيم نِّي نِيشَان إِي ثسْڒِيذ زَّايِي، أَكِذس إِي غَا يِيڒِي يجّن ن لْإِيمَان ذ يِجّن ن ڒمْحِبّث إِي يدْجَان ذِي عِيْسَى لْمَسِيح.

¹⁴ حْضَا ثَمسْڒَايْث نِّي إِي ذَاش يجَّا ذ لْأَمَانَا، حْضَا-ت س أَرُّوْح يقدّْسن إِي ذَايْنغ يزدّْغن.

لْمِثَال ن ؤُمَاثْنغ وَانِيْسْفُوْر

¹⁵ شك ثسّْنذ بلِّي مَارَّا يِنِّي يدْجَان ذِي لْإِقْلِيم ن آسْيَا سمْحن ذَايِي ؤُڒَا ذ فِيْخُوْلُوْس ذ هِيْرْمُوْجِيْنُوْس.

¹⁶ أَذ يبَرك سِيذِي أَربِّـي ڒحْبَاب ن ؤُمَاثْنغ وَانِيْسْفُوْر، أَطَّاس ن ثْوَاڒَاثِين يسرْتَاح-اَيِي وَار يسذْحِي شَا خ سْنَاسڒ ينُو.

¹⁷ لَّا، نتَّا وَامِي يدْجَا ذِي ثنْدِينْت ن رُوْمَا يرزُّو خَافِي اَطَّاس اَڒ وَامِي إِي ذَايِي يُوْفَا.

¹⁸ أَث يجّ سِيذِيثْنغ حمَا اَذ يَاف اَرَّاحْمث زِي سِيذِي أَربِّـي ذِي نْهَار نِّي اَنݣَّارُو. شك عَاوذ ثسّْنذ مشْحَاڒ ن ثْوَاڒَاثِين إِي ذَايِي يعَاون ذِي ثنْدِينْت ن ؤُفَسُوْس.