22 أيث-كورينث 1 - ثريفيث 2020

¹ ثَبْرَات-أَ زَّايِي نش بُوْلُس إِݣ يدْجَان ذ اَرَّسُوْل ن عِيْسَى لْمَسِيح س ڒْخَاضَر ن أَربِّـي، أَكِذِي ؤُمَاثْنغ تِيْمُوْتَاوُس. تَارِيغ إِ جْمَاعث ن ڒْمُوْمِنِين ن أَربِّـي يِنِّي يدْجَان ذِي ثنْدِينْت ن كُوْرِينْث ذ مَارَّا ڒْمُوْمِنِين صَّالِحِين عَاوذ إِݣ يدْجَان ذِي لْإِقْلِيم ن ؤُخَايَا اَمن-ثكْمَاڒ.

² أَكِذْوم يِيڒِي اَرْضَا ذ ڒْهْنَا زِي أَربِّـي بَابَاثْنغ ذ عِيْسَى لْمَسِيح سِيذِيثْنغ.

صّْبَر ذِي تَمَارَا

³ أَذ يتْوَابَرك أَربِّـي بَابَاس ن سِيذِيثْنغ عِيْسَى لْمَسِيح. نتَّا عَاوذ ذ بَابَاس ن اَرَّحْمث ذ نتَّا ذ أَربِّـي إِݣ يتْعَاوَان مَارَّا يوْذَان.

⁴ ئِتْعَاوَان-اَنغ ذِي مَارَّا تَمَارَا نّغ حمَا نشِّين س ومْعَاوَان-أَ إِي زِي ذَانغ يتْعَاوَان أَربِّـي نْزمَّر أَ نْعَاون يِنِّي يدْجَان ذِي كُڒ تَمَارَا.

⁵ لِأَنَّا مَامّش اَعدّب ن لْمَسِيح يتنْفيَّاض-د يتَاذَاف ذِي ثُوْذَارْث نّغ اَمنِّي عَاوذ س لْمَسِيح يتنْفيَّاض-د ومْعَاوَان نّغ.

⁶ مڒَا نتْوَازيَّار نشِّين اَقَا مَانَاينِّي بَاش كنِّيو اَذ تْوَاعَاوْنم بَاش اَذ تْوَاسْنجّْمم. مڒَا نتْوَاعَاون نشِّين اَقَا مَانَاينِّي بَاش عَاوذ اَذ تْوَاعَاوْنم كنِّيو. أَقَا اَمْعَاوَان-أَ يتَارو-د ذَايْوم يجّن ن صْبَار خْمِي تْعدَّابم س مِين نتْعدَّاب نشِّين.

⁷ لْأَمَال نّغ عْلَاحْسَاب كنِّيو يجْهذ. أَقَا نسّن مَامّش ثْشَرّْشم ذِي تَمَارَا نّغ، أَمنِّي عَاوذ نسّن اَذ تْشَرّْشم ذݣ ومْعَاوَان نّغ.

⁸ آي أَيثْمَا، نخْس اَذ تسّْنم تَمَارَا إِي خَانغ يكِّين ذِي لْإِقْلِيم ن آسْيَا. تُوْغَا نتْوَازيَّار اَطَّاس نشِّين، أَزيَّار نِّي تُوْغَاث كْتَار زِي جّهذ نّغ وَار نْزمَّر اَزَّايس نصْبَر حتَّا وَامِي نفْقذ لْأَمَال بَاش أَ ندَّر.

⁹ وَاه، نْحسَّا ذݣ يِيخف نّغ بلِّي نتْوَاحْكَام س ڒْموْث. يوْقع مَانَاينِّي بَاش وَار نتْعوِّيڒ شَا خ يِيخف نّغ، أَ نْعوّڒ خ أَربِّـي ونِّي إِي د يسْنكَّارن يِنِّي يمُّوْثن.

^10-11 ئِسنْجم-اَنغ-د زݣ يِجّن ن ڒْموْث ذ ثَعفَّانْت أُو نتَّا عَاذ اَقَا يسنْجَام-اَنغ. نْتݣّ ذَايس لْأَمَال نّغ بلِّي عَاذ اَذَانغ يسنْجم وَامِي كنِّيو ذَانغ تْعَاوَانم س ثْࢲَادْجِيث نْوم. ثُمَّا اَطَّاس ن يِوْذَان اَذ سْݣَعّْذن صُّوْت نْسن غَار أَربِّـي اَث شكَّرن خ لْبَرَكَا نِّي إِي ذَانغ غَا يُوْش خْمِي إِي غَا ثسْتَاجب اَطَّاس ن ثْࢲَادْجِيث نْسن خَانغ.

أَرَّسُوْل بُوْلُس يئَجّل زِّيَارَا نّس غَار كُوْرِينْث

¹² أَقَا نشِّين نْتفْتَخَر زِي ضَّمِير نّغ يعْنِي يشهّذ بلِّي نُوْيُوْر مْلِيح ذِي دُّنشْت-أَ خَصَّاتَن اَكِذْوم س يِجّن ن نِّيّث ذ وُوْڒ يصْفَان زِي أَربِّـي. وَار يدْجِي بُو س يِجّن ن ڒفْهَامث ن دُّنشْت-أَ؛ لَّا، س يِجّن ن اَرْضَا ن أَربِّـي.

^13-14 شُوْف، كُڒ ثَمسْڒَايْث إِي ذَاوم د نْتَارِي ذِي ثبْرَات-أَ ثْزمَّرم اَت تْغَارم اَذَاس ثْفهْمم. أُو وَاخَّا وَار ذَانغ تفْهِيمم شَا ڒخُّو ذِي مَارَّا ثِمسْڒَايِين، نش تْمنِّيغ اَذَانغ ثْفهْمم مْلِيح بَاش اَزَّايْنغ تفْتَخَرم ذِي نْهَار نِّي ن سِيذِيثْنغ عِيْسَى مَامّش اَزَّايْوم نْتفْتَخَر نشِّين.

¹⁵ أُو س لْإِفْتِخَر-أَ تُوْغَا رزُّوْغ ذ اَمزْوَارُو اَغَارْوم د ݣّغ يجّن ن زِّيَارَا حمَا اَذَاوم دُوْبْلِيغ لْبَرَاكَا.

¹⁶ يعْنِي تُوْغَا رزُّوْغ اَخَاوم د كّغ خْمِي غَا رَاحغ غَار لْإِقْلِيم ن مَاسِدُوْنْيَا، منْبَعْد اَغَارْوم د عقْبغ زِي مَاسِدُوْنْيَا بَاش اَذَايِي ثْعَاوْنم اَذ سَفَرغ غَار ثْمُوْرْث ن يَهُوْذِيَا.

¹⁷ وَامِي تُوْغَا نش تْخطَّاطغ اَذ ݣّغ مَانَاينِّي، مَا ذوّْڒغ ذݣ وَاوَاڒ وَاهَا؟ نِغ مَا تْخطَّاطغ اَم يِجّن ن بْنَاذم ن دُّنشْت-أَ وَاهَا، يعْنِي اَذ ينِيغ وَاه-وَاه نِغ لَّا-لَّا ذِي نّفْس ن ڒْوقْث؟

¹⁸ أَم أَربِّـي ذَايس تِّقث نتَّا، نشِّين عَاوذ قَا اَوَاڒ نّغ إِ كنِّيو وَار يدْجِي بُو ذ وَاه اَكذ لَّا.

¹⁹ لِأَنَّا مِّيس ن أَربِّـي يعْنِي عِيْسَى لْمَسِيح نْبشَّر-يث جَارَاوم نش ؤُڒَا ذ سِيلَاس ؤُڒَا ذ تِيْمُوْتَاوُس. لْمَسِيح وَار يدْجِي بُو ذ وَاه اَكذ لَّا، نتَّا يدْجَا ڒبْدَا ذ <وَاه> أُو صَافِي.

²⁰ لِأَنَّا نتَّا ذَايس إِي يقَّار أَربِّـي <وَاه> إِ مَارَّا ثِمسْڒَايِين إِي يعَاهذ أَربِّـي. س مَانَايَا زِي عِيْسَى نقَّار <آمِين> إِ لْعَظَمَا ن أَربِّـي.

^21-22 أَربِّـي نتَّا إِي ذَانغ يسْبدّن مْلِيح اَكِذْوم ذِي لْمَسِيح. ئِخْضَر-اَنغ يضْبع-اَنغ س طَّبَاع نّس يُوْشَا-ٱنغ أَرُّوْح نّس يݣِّي-ث ذݣ وُوْڒَاون نّغ اَم يجّن ن تّسْبِق.

²³ إِيوَا تتَّارغ إِ أَربِّـي اَذ يِيڒِي نتَّا ذ شَّاهذ ينُو قَا نش تُوْغَا رزُّوْغ اَخَاوم حِينّغ وَامِي ؤُݣِيغ اَغَارْوم د اَسغ غَار كُوْرِينْث.

²⁴ لِأَنَّا وَار يدْجِي بُو نتْحكّم خ لْإِيمَان نْوم؛ لَّا، نْخدّم اَكِذْوم بَاش اَذ تْفَرْحم. أَقَا س لْإِيمَان نْوم إِي ثْبدَّام نِيشَان.