1 تيموتاوس 5 - ثريفيث 2020

ڒُوْصِيَاث إِ تِيمُوْتَاوُس عْلَاحْسَاب ڒْمُوْمِنِين

¹ وَار نهَّا شَا يجّن ن ؤُوسَّار س ڒقْسَاحث؛ لَّا، سِيوڒ اَكِذس اَم بَابَاش. ئِحنْجِيرن اݣّ-يثن اَم اَيثْمَاش.

² ثِوسُّوْرَا اݣّ-يثنْت اَم يمَّاثَاش. ثِحنْجِيرِين اݣّ-يثنْت اَم سُوْيْثْمَاش س يِجّن ن وُوْڒ يصْفَا.

³ وقَّر ثَاجَّاڒِين إِݣ يدْجَان ذ ثَاجَّاڒِين ذ صَّح.

⁴ شُوْف، ثَاجَّاڒْث نِّي مڒَا غَارس يحنْجِيرن نِغ ذ اَيَّاون اَتَاف ذ نِثْنِي إِي ت غَا يعَاوْنن اَذ ڒمْذن ذ اَمزْوَارُو اَذ سْخدّْمن لْإِيمَان نْسن اَك لْعَئِلَا نْسن اَذ اَرّن ڒْخِير إِ لْوَالِدِين نْسن. أَقَا مَانَايَا يَارْضَا خَاس أَربِّـي.

⁵ قَا ثَاجَّاڒْت ن صَّح ثنِّي وَار غَار يدْجِي حَدّ اَقَا ذ نتَّاث يتݣّن لْأَمَال نّس ذِي أَربِّـي تْغِيمَا تدْعَا أَربِّـي تتَّار-اَس دْجِيڒث ذ نْهَار.

⁶ وَلَكِن ثنِّي يتْعِيشن ذِي شّهْوث وَاهَا، قَا نتَّاث ثمُّوْث وَاخَّا ثدَّر.

⁷ ثِمسْڒَايِين-أَ تْوصَّا-ثنْت بَعْدَا شك بَاش اَذ قِّيمن يِوْذَان بْڒَا ڒْعِيب.

⁸ شُوْف، ونِّي وَار يتْذبِّيرن خ ڒحْبَاب نّس خَاصَّتَان خ لْعَئِلَا نّس اَتَاف نتَّا ينْكَر لْإِيمَان، ونِّي وَار يُوْمِينن قَاع اَتَاف حْسن زَّايس.

⁹ وَار تجَّا ؤُڒَا ذ يشْتن اَذ تْسجّل اَك ثَاجَّاڒِين غَار لْمُعَاوَنَا إِلَّا مڒَا غَارس زِي ستِّين يسݣّْوُوْسَا اَڒ ثْسَاونْت، إِلَّا مڒَا تُوْغَا غَارس يجّن ن ورْيَاز وَاهَا.

¹⁰ لَابُد اَذ تِيڒِي مَعْرُوْفَا س لْحَسَانَاث نّس يعْنِي مڒَا ثربَّا ثَارْوَا نّس، تْرحَّاب س ينوْجِيون، ثْسِيڒِيذ يضَارن ن صَّالِحِين، تْعَاوَان يِنِّي يتْزيَّارن، ثْذفَّار مَارَّا ثِمسْڒَايِين ثِصبْحَانِين.

¹¹ فَا ثَاجَّاڒِين ثِمزْيَانِين وَار ثنْت تْسجَّال شَا عْلَاحْسَاب لْمُعَاوَنَا. نِثنْتِي خْمِي غَا ثذْفَارنْت شّهَاوَاث نْسنْت كْتَار زِي لْمَسِيح اَتَاف رزُّوْنْت اَذ مڒْشنْت.

¹² أَمُّو اَذ تْوَاحكْمنْت مِينْزِي سمْحنْت ذِي لْوَعذ نْسنْت إِي ݣِّينْت ذ اَمزْوَارُو.

¹³ عَاوذ اَذ ذوْڒنْت ذ ثِمعْݣَازِين ݣُّوْرنْت زِي ثَدَّارْث غَار ثدَّارْث تݣّنْت فَرْق-شّْغڒ. مَاشِي ذ ثِمعْݣَازِين وَاهَا، تْعَاوَاذنْت ڒخْبُوْرَاث تَاذْفنْت ذِي شّْغُوْرَاث ن مِيدّن قَّارنْت ثِمسْڒَايِين وَار يتْخصَّا شَا اَذ تْوَانَّانْت.

¹⁴ إِذن، خْسغ ثَاجَّاڒِين ثِمزْيَانِين اَذ مڒْشنْت اَذ د جّنْت يحنْجِيرن اَذ سُوْݣُوْرنْت ثَدَّارْث نْسنْت مْلِيح وَار تجِّينْت بُو شَان لْفُرْصَا إِ ڒْعَذُو اَخَاسنْت يسِّيوڒ س ڒْعِيب.

¹⁵ مِينْزِي ذِنِّي ڒبْعَاض صَافِي فّْغنْت اَبْرِيذ ذْفَارنْت شِّيطَان.

¹⁶ ثَمْغَارْث ذ ڒْمُوْمْنَا مڒَا تِيڒِينْت اَكِذس شَان تَاجَّاڒِين اَذَايْسنْت تْهِيلَّا أُو لَابُد اَكِذس قِّيمنْت اَخَاسنْت ثْذبَّر. ثِيْنَا، مَاشِي ذ جْمَاعث ن ڒْمُوْمِنِين اَخَاسنْت تَرْبُو؛ لَّا، أَذ تَرْبُو غِير خ ثِنِّي يدْجَان ذ ثَاجَّاڒِين حْذَاجنْت ذ صَّح.

¹⁷ ئِمقّْرَانن ن جْمَاعث ن ڒْمُوْمِنِين يِنِّي يتحْكَامن مْلِيح أُو لَابُد اَثن تْوقَّرم ذ ضُوْبْلِي، خَاصَّتَان يِنِّي يخدّْمن اَطَّاس ذݣ وحدّث ذ وسڒْمذ.

¹⁸ أَقَا لْكِتَاب يقَّار: وَار ذَاس تݣّ بُو ثَشْمَانْت إِ ؤُفُوْنَاس نِّي يتْصَرْوَاثن. أَقَا عَاوذ اَخدَّام غَارس ڒْحَقّ اَذ يتْخَاڒس.

¹⁹ وَار قبّڒ شَا تُّوْهْمث ضد إِ ؤُمقّْرَان ن جْمَاعث ن ڒْمُوْمِنِين إِلَّا مڒَا ذِنِّي ثْنَاين نِغ ثْڒَاثَا ن ڒشْهُوْذ تَهَامن-ث.

²⁰ ئِمقّْرَانن إِݣ يعصَّان نْهَا-ثن شك زَّاث إِ مَارَّا يوْذَان بَاش ينِّي ينّغْنِي اَذ ݣّْوْذن بَعْدَا.

²¹ أَقَا عڒْمغ-اَش زَّاث إِ أَربِّـي ذ عِيْسَى لْمَسِيح ذ لْمَلَائِكَاث يتْوَاخْضَرن قَا لَابُد اَذ تݣّذ ثِمسْڒَايِين-أَ بْڒَا مَا ٱذ تݣّذ ڒْفَرْز اَك شَان حَدّ بْڒَا مَا ٱذ تݣّذ عَاوذ س وُوْذمَاون.

²² ئِفَاسّن نّش وَار تْقدْجِيق شَا اَثن تْسرْسذ خ شَان حَدّ، وَار شَرّش شَا ذِي ڒْمُعْصِيَاث ن مِيدّن. قِّيم شك ثصْفِيذ.

²³ وَار سسّ شَا اَمَان وَاهَا، سو عَاوذ ذْرُوْس ن وَامَان وضِيڒ عْلَاحْسَاب ثَكْرِيشْت نّش ذ ڒهْرَاشَاث إِي ش يڒقّْفن.

²⁴ شَا ن ڒْمُعْصِيَاث ن يرْيَازن تْوَامظْهَارنْت-يد تِيزْوَارنْت-يد إِ لْعِقَاب نْسن، وَلَكِن ڒْمُعْصِيَاث ن يرْيَازن نّغْنِي اَخَاسن د خضْڒنْت منْبَعْد.

²⁵ أَمُّو عَاوذ شَان ن لْحَسَانَاث تْوَامظْهَارنْت-يد، عَاذ شَان ن لْحَسَانَاث نّغْنِي وَار زمَّرنْت شَا اَذ قِّيمنْت تْوَانُوْفَّرنْت.