1 تيموتاوس 4 - ثريفيث 2020

ڒُوْصِيَاث ن اَرَّسُوْل بُوْلُس إِ تِيمُوْتَاوُس

¹ فَا يقَّار أَرُّوْح يقدّْسن نِيشَان بْڒَا شّكّ ذݣ وُوْسَّان-أَ ينݣُّوْرَا اَذ سمْحن شَا ن يِوْذَان ذِي لْإِيمَان نِيشَان اَذ ݣّن اَرَّاي إِ جْنُوْن يغدَّارن ذ مِين سڒْمَاذن شَّيَاطِين.

² أَذ يِيڒِي مَانَايَا س نِّفَق ن يرْيَازن يسْخَرِّيقن، ضَّمِيڒ نْسن صَافِي يحَرق مَامش إِي ث يحَرق يجّن ن وَارْشم ن وُوْزّڒ يسّشْمَاضن.

³ نِثْنِي اَذ سْبدّن يوْذَان بَاش وَار مدْجْشن شَا، قَّارن-اَسن عَاوذ قَا شَا ن لْمَكْلَاث ممْنُوْع اَثنْت شّن. وَلَكِن لْمَكْلَاث نِّي يخْڒق-يثنْت-يد أَربِّـي اَثنْت نقْبڒ نشِّين إِݣ يتَامْنن نسّن لْحَقِيقَا.

⁴ قَا مَارَّا مِين د يخْڒق أَربِّـي ذ اَصبْحَان. مڒَا نقْبڒ-يث نشِّين س شُّكر اَتَاف وَار ذَايس مِين غَا نْعِيفّ.

⁵ أَقَا مَانَايَا يحدْجڒ حَلَال عْلَاحْسَاب اَوَاڒ ن أَربِّـي ذ ثْࢲَادْجِيث.

⁶ ثِمسْڒَايِين-أَ مڒَا ثسْبيَّانذ-ثنْت-يد إِ أَيثْمَاثْنغ اَذ تِيڒِيذ شك ذ يجّن ن وخدَّام ذ اَصبْحَان ن عِيْسَى لْمَسِيح، أَذ تِيڒِيذ تْوَاربِّيذ س وَاوَاڒن ن لْإِيمَان ذ تَّعْلِيم نِّي اَصبْحَان إِي ثْذفَّارذ شك.

⁷ فَا اَوْݣّْوج شك خ ثْحُوْجَا نِّي يدْجَان ضد لْإِيمَان إِي تْعَاوَاذنْت ثْوسُّوْرَا وَاهَا، ستْرِينَار يخف نّش عْلَاحْسَاب لْإِيمَان.

⁸ مڒَا ثسْتْرِينَارذ يخف نّش س اَرِّيَاضَا، أَذ تَاوِيذ يجّن ن اَرْبَاح اَش ينفّع شْوَايْت. مڒَا ثسْتْرِينَارذ س لْإِيمَان، أَذ تَاوِيذ يجّن ن اَرْبَاح اَش ينفّع إِ ثْمسْڒَايِين مَارَّا. لْإِيمَان-أَ يوْعذ-يش عْلَاحْسَاب ثُوْذَارْث-أَ يدْجَان ڒخُّو ذ ثنِّي إِي د غَا يَاسن.

⁹ أَوَاڒ-أَ ذَايس تِّقث أُو لَابُد اَذ يتْوَاقْبڒ يكْمَاڒ.

¹⁰ خ مَانَايَا نشِّين نْخدّم نربّڒ لِأَنَّا نݣَّا لْأَمَال نّغ ذِي أَربِّـي يدَّرن ونِّي يسنْجَامن مَارَّا يوْذَان خَاصَّتَان ذ يِنِّي يتَامْنن.

¹¹ ثِمسْڒَايِين-أَ تْوصَّا خَاسنْت شك سڒْمَاذ-يثنْت.

¹² وَار تجَّا حَدّ اَش يسحْقَر عْلَاحْسَاب ثمْࢲِي نّش. لَّا، شك لَابُد اَذَاسن تِيڒِيذ إِ ڒْمُوْمِنِين ذ لْمِثَال عْلَاحْسَاب اَوَاڒن نّش ذ ثِيشْرِي نّش ذ ڒمْحِبّث نّش ذ لْإِيمَان ذ ڒصْفِيّث.

¹³ حتَّا ٱڒ د غَا يَاسغ نش سْخدَّام يخف نّش مْلِيح س ثْغُوْرِي ن لْكُتُب ذ وحدّث ذ وسڒْمذ.

¹⁴ وَار تْفرَّاط شَا ذِي لْقُدْرَا نِّي إِي ذَاش يمُّوْشن عْلَاحْسَاب اَوَاڒ نِّي اَصبْحَان إِي خَاش نَّان لْأَنْبِيَا وَامِي اَيْرَاو ن يمقّْرَانن ن جْمَاعث ن ڒْمُوْمِنِين سرْسن خَاش يفَاسّن نْسن.

¹⁵ طبّق ثِمسْڒَايِين-أَ، سلّم-اَسنْت يخف نّش قَاع بَاش اَذ ࢲرن مَارَّا يوْذَان نَّجَاح نّش.

¹⁶ خْزَر ذِي ثُوْذَارْث نّش ذ ثْمسْڒَايِين إِي ثْسڒْمَاذذ، ارْنِي ذَايْسنْت. لِأَنَّا مڒَا ثݣِّيذ مَانَايَا اَذ تسْنجْمذ يخف نّش ذ يِنِّي إِي ذَاش يتْسْڒَان.