1 تيموتاوس 3 - ثريفيث 2020

يِنِّي يتْرَايَّان خ جْمَاعث ن ڒْمُوْمِنِين

¹ أَقَا يجّن ن وَاوَاڒ ذَايس تِّقث يعْنِي ونِّي يرزُّوْن اَذ يِيڒِي ذ اَرَّايس ن جْمَاعث قَا يرزُّو يجّن ن ثْمسْڒَايْث ذ ثَصبْحَانْت.

² فَا اَرَّايس ن جْمَاعث مَاشِي اَم يِجّن ن بْنَاذم إِي تْعيَّابن يِوْذَان. أُو لَابُد اَغَارس ثِيڒِي يجّن ن ثمْغَارْث وَاهَا. أُو لَابُد اَذ يحْكم خ يِيخف نّس اَذَايس يِيڒِي لْمَعْقُوْل ذ لْإِحْتِرَام اَذ يتْرحَّاب زݣ ينوْجِيون اَغَارس ثِيڒِي ثْزمَّار اَذ يسڒْمذ يوْذَان.

³ ئِتْخصَّا وَار يتݣّ شَا لْمَدلَّا ن سّكْرَا، وَار يشِّيث شَا اَذ يِيڒِي تْرَانْكِيڒ. ئِتْخصَّا وَار يتْمنْغِي شَا س وَاوَاڒ، وَار يظمّع شَا ذِي تْمنْيَاث.

⁴ أَذ يِيڒِي ذ يجّن ن بْنَاذم إِݣ يحكّْمن خ ثدَّارْث نّس مْلِيح، تْطَاعَان-اَس يحنْجِيڒن نّس تْسذْحَان-ث.

⁵ إِيوَا بْنَاذم-أَ مڒَا وَار يسِّين شَا اَذ يحْكم خ ثدَّارْث نّس، مَامّش إِي غَا يݣّ اَذ يتْرَايَا خ جْمَاعث ن ڒْمُوْمِنِين ن أَربِّـي؟

⁶ أَرَّايس-أَ، مَاشِي يَالَّاه إِي يسْڒم اَذ يُوْفّ س تَّكبُّر خ ڒْخذْمث-أَ اَذ يوْضَا ذِي لْعُقُوْبَا نِّي ن إِبْڒِيس.

⁷ أُو لَابُد عَاوذ اَث وقَّرن يِنِّي يدْجَان ن بَارَّا وَار يدْجِين شَا ذ ڒْمُوْمِنِين بَاش وَار خَاس تْعيِّيبن شَا يِوْذَان وَار يوطِّي شَا ذِي ثخْشبْث نِّي ن إِبْڒِيس.

⁸ أَمنِّي عَاوذ يمْسخَّارن أُو لَابُد اَذ يڒِين مْوقّرِين اَغَارْسن يِيڒِي وَاوَاڒ، أَتَاف وَار سسّن شَا اَطَّاس ن شّْرب وَار ظمّْعن شَا ذِي ڒوْسخ ن دُّنشْت-أَ.

⁹ ئِمْسخَّارن-أَ يتْخصَّا لَابُد اَذ طّْفن ذِي ڒْمَعْنَا ينُوْفَّرن ن لْإِيمَان س يِجّن ن ضَّمِير يصْفَا.

¹⁰ ذ اَمزْوَارُو اَذ تْوَاجَرّْبن. مڒَا وَار ذِنِّي شَان ن ثْمسْڒَايْث ضذ نْسن، أَتَاف اَذ ذوْڒن ذ يمْسخَّارن.

¹¹ أَمنِّي عَاوذ ثِمْغَارِين يتْخصَّا اَذ يڒِينْت مْوقّرِينْت وَار ذَايْسنْت تِيڒِي شَا نَّمِيمَا اَذ حكّْمنْت خ يِيخف نْسنْت اَذَايْسنْت ثِيڒِي تِّقث ذِي مَارَّا ثِمسْڒَايِين.

¹² ئِمْسخَّارن يتْخصَّا أُو لَابُد اَذ يڒِين ذ يرْيَازن ن يِجّن ن ثمْغَارْث وَاهَا، أَذ حكّْمن خ يحنْجِيرن ذ ثُوْذْرِين نْسن مْلِيح.

¹³ أَقَا يمْسخَّارن إِݣ يخدّْمن مْلِيح اَذ ربْحن إِ يِيخف نْسن يجّن ن دَّرَجَا ذ ثَصبْحَانْت ذ يِجّن ن تِّقث ذِي لْإِيمَان نْسن إِݣ يدْجَان ذِي عِيْسَى لْمَسِيح.

سَّبَاب ن ڒُوْصِيَاث-أَ ن اَرَّسُوْل بُوْلُس

¹⁴ ثِمسْڒَايِين-أَ تَارِيغ-ثنْت-يد إِ شك، نش تْمنِّيغ اَغَارش د اَسغ ذغْيَا.

¹⁵ مڒَا طوّْلغ اَطَّاس وَار ذِنِّي د ؤُسِيغ شَا، أَتَاف اَذ تسّْنذ شك مَامش إِي غَا سُوْݣُوْرن يِوْذَان يخف نْسن ذِي ثدَّارْث ن أَربِّـي يعْنِي جْمَاعث ن ڒْمُوْمِنِين ن أَربِّـي يدَّرن ذ نتَّاث إِي يدْجَان ذ اَپِـيلَار ذ دْسَاس ن لْحَقِيقَا.

¹⁶ أُو بْڒَا شّكّ مشْحَاڒ ثدْجَا ذ ثَمقّْرَانْت ڒْمَعْنَا ينُوْفَّرن ن لْإِيمَان: نتَّا، ذ بْنَاذم إِي د يمظْهَارن، ذ أَرُّوْح إِي خَاس يشهْذن. نتَّا، ذ لْمَلَائِكَاث إِي ذَايس يخْزَرن، ذ ڒݣْنُوْس إِي زَّايس يتْوَابشَّرن. نتَّا، ذِي دُّنشْت-أَ يِنِّي إِي زَّايس يُوْمْنن، ذ لْعَظَمَا ن وجنَّا إِي ث يقبْڒن.