1 أيث-سلونيك 5 - ثريفيث 2020

يُوْم نِّي ن سِيذِيثْنغ

¹ فَا آي أَيثْمَا، وَار نْتحْذِيجِي شَا اَذَاوم نْتَارِي خ لْأَوْقَات نِغ ذ تَّوَارِيخ.

² أَقَا ثسّْنم مْلِيح بلِّي يُوْم ن سِيذِيثْنغ اَذ د يَاس اَم د يُوْسَا يج وشفَّار س دْجِيڒث.

³ أَتَاف خْمِي غَا يِنِين يِوْذَان اَقَا ذِنِّي لْأَمَان ذ ضّْمَان ڒخْدّنِّي اَخَاسن د يهْوَا يجّن ن لْخَرَاب ذغْيَا اَمشْنَاو مَامش د يتَاس ڒحْڒِيق ن ثَارْوَا إِ ثمْغَارْث يتَارْون. أَتَاف وَار زمَّرن نِثْنِي اَذ اَروْڒن.

⁴ وَلَكِن كنِّيو آي أَيثْمَا، وَار ثدْجِيم شَا ذِي ثَادْجسْت بَاش يُوْم نِّي اَخَاوم د يخْضڒ اَم يِج وشفَّار.

⁵ لَّا، كنِّيو مَارَّا ذ ثَارْوَا ن ثْفَاوْث ذ يحنْجِيرن ن نْهَار. وَار ندْجِي شَا ذ ثَارْوَا ن دْجِيڒث نِغ ن ثَادْجسْت.

⁶ إِذن، وَار نْتطّص شَا اَم يِوْذَان نّغْنِي، ئِتْخصَّا أَ نِيڒِي نْفَاق اَغَارْنغ يِيڒِي ڒَعْقڒ.

⁷ شُوْف، يِنِّي يتطّْصن، تطّْصن س دْجِيڒث. يِنِّي يتْغلَّان س شّْرب، تْغلَّان س دْجِيڒث.

⁸ نشِّين لَّا، نشِّين ذ ثَارْوَا ن نْهَار، أَغَارْنغ يِيڒِي ڒَعْقڒ. أَ نݣّ ثْجِيلِيت نِّي ن ڒحْذِيذ يدْجَان نتَّاث ن لْإِيمَان ذ ڒمْحِبّث. أَ نݣّ لْكَاسْك نّغ يدْجَان نتَّا ذ لْأَمَال ن ؤُفكِّي.

⁹ قَا وَار ذَانغ يخْضَر شَا أَربِّـي بَاش اَخَانغ يكّ وغْضَب؛ لَّا، قَا يخْضَر-اَنغ بَاش أَ ننْجم س وفُوْس ن سِيذِيثْنغ عِيْسَى لْمَسِيح.

¹⁰ نتَّا يمُّوْث خَانغ بَاش أَ ندَّر اَكِذس وَاخَّا نشِّين نْفَاق نِغ نطّص ذݣ ونْضڒ.

¹¹ فَلِيهَذَا تْشجَّاعث اَيَاوْيَا تْعَاوَانث اَيَاوْيَا مَامّش تݣّم ڒخُّو.

ڒُوْصِيَاث ثِنݣُّوْرَا

¹² فَا آي أَيثْمَا، نقَّار-اَوم وقَّرم يِنِّي يخدّْمن جَارَاوم إِݣ يدْجَان خَاوم نهَّان-كنِّيو.

¹³ ؤُشم-اَسن يجّن ن لْقِيمَا ثمْغَر س ڒمْحِبّث نْوم عْلَاحْسَاب ڒْخذْمث نْسن. إِڒِيم عَاوذ ذِي ڒهْنَا اَك وَايَاوْيَا.

¹⁴ آي أَيثْمَا، نْهَاث يِنِّي يتْبَاعن فَرْق-شّْغڒ، شجّْعث يِنِّي يتفْشِيڒن، عَاوْنث يِنِّي يتضْعِيفن، صبَّارث اَك مَارَّا.

¹⁵ أَرّم-د ڒْبَاڒ نْوم، ئِتْخصَّا ؤُڒَا ذ يجّن وَار يتْخدْجِيس شَّرّْ س شَّرّْ نّغْنِي؛ لَّا، ڒبْدَا رزُّوْث مِين يدْجَان ذ اَصبْحَان جَارَاوم ذ جَار يِوْذَان مَارَّا.

¹⁶ فَرْحم ڒبْدَا،

¹⁷ تتَّارم إِ أَربِّـي بْڒَا مَا ٱذ تْبدّم،

¹⁸ شكَّرم-ث ذِي مَارَّا ثِمسْڒَايِين. لِأَنَّا ذ مَانَايَا إِݣ يتْرَاجَا أَربِّـي زَّايْوم ذِي عِيْسَى لْمَسِيح.

¹⁹ وَار تْسخْسَايم شَا أَرُّوْح يقدّْسن.

²⁰ وَار تْسحْقَارم شَا اَوَاڒن نِّي إِي عڒْمن يِوْذَان زِي أَربِّـي قَّارن-ثن.

²¹ لَّا، ميّْزث مَانَاينِّي مَارَّا. طّْفث ذِي مِين يدْجَان ذ اَصبْحَان؛

²² أَݣّْوْجث خ مَارَّا مِين يدْجَان ذ اَعفَّان.

²³ أَربِّـي نّغ ن ڒهْنَا اَكنِّيو يسِّيصْفَا ذݣ يِيخف نْوم قَاع. بُوْحْبڒ نْوم ذ ڒَعْمَر نْوم ذ دَّات نْوم اَذ قِّيمن كمْڒن بْڒَا ڒْعِيب اَڒ د غَا يَاس سِيذِيثْنغ عِيْسَى لْمَسِيح.

²⁴ ونِّي إِي ذَاوم د يتْڒَاغَان ذَايس تِّقث، ذ نتَّا إِي كنِّيو غَا يسِّيوْضن غَار مَانَايَا.

²⁵ آي أَيثْمَا، تَّارم إِ أَربِّـي خَانغ.

²⁶ سدْجْمث خ مَارَّا اَوْمَاثن س يِجّن ن سْڒَام يصْفَا.

²⁷ تْوصِّيغ-كنِّيو زَّاث إِ سِيذِيثْنغ حمَا اَذ تْغَرم ثَبْرَات-أَ إِ وَاوْمَاثن مَارَّا.

²⁸ أَكِذْوم يِيڒِي اَرْضَا ن سِيذِيثْنغ عِيْسَى لْمَسِيح.