Psalm 70 - Pennsylvania Dutch Bible

Da 70. Psalm. En Gebayt Fa Hilf

Zumm foah-singah. En Psalm fumm Dawfit fa en ohdenkes.

¹ Dummel dich, oh Gott, un mach mich frei; kumm kshvind, oh Hah, un helf miah.

² Loss selli es mich doht macha vella sich shemma, un mach si fashtatzt sei. Loss selli es miah evil vinsha zrikk gedrayt sei un fashohmd sei.

³ Dray selli zrikk es sawwa, “Aha! Aha!” veil si sich shemma missa.

⁴ Loss selli es dich sucha sich froiya un froh sei; loss selli es dei saylichkeit leeva immah sawwa, “Gott soll hohch glohbt sei.”

⁵ Avvah ich binn shvach un habb noht; kumm kshvind zu miah, oh Gott. Du bisht mei hilf un machsht mich frei, oh Hah, voaht nett.