Psalm 23 - Pennsylvania Dutch Bible

Da 23. Psalm. Da Hah Unsah Shohf-Heedah

En Psalm fumm Dawfit.

¹ Da Hah is mei shohf-heedah, ich habb goah kenn noht.

² Eah lost mich anna leiya in greeni vayt, eah fiaht mich an's frish vassah.

³ Eah gebt mei sayl neiyi grefta. Eah fiaht mich in di rechta pawda, fa da sayk funn sei nohma.

⁴ Un even vann ich deich da deef, dunkel shadda fumm doht lawf, dann feich ich mich nett, veil du bei miah bisht. Dei shtokk un shtekka drayshta mich.

⁵ Du risht en dish fa mich fannich mei feinda; du salbsht mei kobb mitt ayl. Mei kobli lawft ivvah.

⁶ Goodes un bamhatzichkeit zayld bei miah sei mei layva lang, un ich bleib im Hah sei haus fa'immah.