Yakubu 5 - Nyaa Shɔɔ Ɓɔɔ Laa a Ɓɛɛ

Zang shàarɛ̀ zang ying nyaa

¹ Zang ying nɔɔ ɓaa shoo nɔ́ɔ tãayi. Nɔɔ kaayi nɔ́ɔ ti ɓaa nyaavaa ka ruu jĩng dannang bang ɓɔɔ naa a ka yuu manɛ ɓɛɛ.

² Vuu naa manɛ pũng kina, fɔ̃ɔrɔ manɛ tuuru ti shaa kina,

³ a zinariya nɛɛ azurufa manɛ sisaa ti shaa kina. Sisaa keɓe kɔ naa nwang vuu ɓɔɔ kɔɔ ruu ka yuu manɛ ɓɛɛ. Ti naa shaa yɔpɔ bii manɛ naa waa. Nɔɔ kpálɛ̀ saka manɛ kaa làa ɓɔɔ koo waa nyaa tɔ ɓɛɛ.

⁴ Nɔɔ shu zang ɓɔɔ kpalɛ vuu shaanang manɛ ɓɔɔ ka jaa manɛ kpang. Ka ruu nɔngkɔ, ri kaa Kpanti Laa nyavɔ kana, a Laa ɓɔɔ mãa vuu piti, ti tãa nyavɔ ɓarɛ tɔ.

⁵ Nɔɔ nwàng manɛ ka koo keɓe nɔɔ tãa tĩnang nɔɔ sháa vuu tɔ, nɔɔ ɔ̃rɛ naa napo ɓɔɔ gã diki ɓɔɔ zang naa yele ri kagn ɓɛɛ.

⁶ Nɔɔ dɔng zang tɔ̃ɔ ruu, a nɔɔ nyɔ ri vɔrɔ. Ri shii bàng nɛɛ nɔɔ kpang.

Danggn mãnang nɛɛ Laa gaanang

⁷ Ka ruu nɔngkɔ manzung, n kɔɔ nɔɔ, nɔɔ mã danggn kagn, nɔɔ gã diki ɓɔɔ Kpanti Yeesɔ gbãayu ɓɛɛ. Nɔɔ zi zang ɓɔɔ ri lang jaa ɓɛɛ. Ri gã vuu ɓɔɔ ri ɓaa ka tipi ɓɛɛ, mii tĩng shɔɔnang nɛɛ mii ɓɔɔ gɔɔ nyaa wu arɛ. Mã danggn sasak diki ɓɔɔ wu kpalɛ vuu shaanang ka jaa ɓiɓɛ a nɛɛ mani.

⁸ Nɔɔ mã danggn dɔɔ nɔngkɔ. Nɔɔ shing gn kagn, ka ruu ɓɔɔ, diki ɓɔɔ Kpanti Yeesɔ a kagn a naabm tɔ ɓɛɛ.

⁹ Manzung nɔ́ɔ gɔ̃ɔrɔ yee ka yuu zɔɔ kpang, ka ruu ɓɔɔ zang nɛɛ jɛ̃ɛ nɔɔ ruu ɓɛɛ. Zang ɓɔɔ naa jɛ̃ɛ ruu rúu, kɔ shii tɔ ka nyaa gãa ɓee.

¹⁰ Manzung, nɔɔ kpaa danggn zang nyaa shonang Laa ɓɔɔ ri rang yee Laa ɓɛɛ. Ri dang jĩng, a ri ti mã danggn ɓɛɛ. Nɔɔ mã danggn doo naa ɓɔɔ ri mã ɓɛɛ kɔ.

¹¹ Rùu ɓaa ri ɓuru kaa nɛɛ zang ɓɔɔ Laa a ri tĩnang tãanang ɓɛɛ, ka ruu danggn ɓɔɔ ri mã gbãng gbãng ɓɛɛ. Nɔɔ tãa ruu Ayuba tɔ, naa ɓɔɔ wu mã danggn ka laa ɓɔɔ wu dang jĩng ɓɛɛ. Nɔɔ ti tãa tɔ naa ɓɔɔ Laa naa shing jĩng dannang ɓiɓɛ nwǎng wu vuu tɔ̃ɔ ɓɛɛ. Niizang, sisĩng Laa nwãa kpang, gn ɓuru kɔng wu katɔ.

¹² Manzung, vuu ɓɔɔ ɓa weɓe nandon keɓe. Nɔɔ nɛɛ tɔɔ nɔɔ palɛ vuu ɓɔɔ, nɔ́ɔ tũng vuu kpang. Nɔ́ɔ tũng vuu nɛɛ nung Laa kpang. Nɔ́ɔ ti tũng vuu nɛɛ nung koo keɓe kpang. Nɔ́ɔ tũng vuu nɛɛ nung vuu ɓɔɔ kpang tingkiring. Nɔɔ nɛɛ kasɛ ruu katɔ, nɔɔ kasɛ nyaa nɛɛ, “Nn” nɔɔ di nyaa ka nɔngkɔ. Nɔɔ nɛɛ ti bɛ̃ɛ ruu katɔ, nɔɔ kasɛ nyaa nɛɛ “Kpang”, nɔɔ di nyaa ka nɔngkɔ. Ka ruu ɓɔɔ, Laa nɛ̀ɛ́ jɛ̃ɛ nɔɔ ruu nɛɛ nɔɔ palɛ vuu shi kpang tɔ ɓɛɛ.

Laa Gaanang Danggn Shinnang

¹³ Zang ɓɔɔ kagn ka teteng manɛ dang jĩng ya? Wu gaa Laa. Zang ɓɔɔ kagn tãa ɓi tĩnang ya? Wu gaa soo, wu dɔɔ Laa nɛɛ mani.

¹⁴ Zang ɓɔɔ kagn teteng manɛ vuu palɛ wu katɔ ya? Wu ɓaa nyaa ka zang bang bang gãa Laa, ri gaa wu Laa. Ri tũuru wu nung ka bii nɛɛ nung Kpanti Yeesɔ Kirisi.

¹⁵ Naa zang gaa Laa, zang shing danggn kagn waasɛ̃, Laa gaanang keɓe shing kɔnang katɔ wu yaa zang nɔng. Laa wu ti a wu kaka bii. Naa palɛ doo vuu shi kpang, Laa yaa wu gbalang vuu shi kpang keɓe katɔ.

¹⁶ Ka ruu nɔngkɔ, nɔɔ kɔɔ zɔɔ vuu shi kpang manɛ katɔ, nɔ́ɔ gaa zɔɔ Laa, tɔɔ nɔ́ɔ valɛ. Laa gaanang zang ɓɔɔ ɓi zang tɔ̃ɔ ka tĩng Laa palɛ vuu bang bang dɔɔli.

¹⁷ Iliya doo shɔnzang naa rukɔ. Gaa Laa, nɛɛ mii wu a kpang. Mii ti á kpang saa taati nɛɛ shala mangbete.

¹⁸ A ti naa gaa Laa tɔkn, mii naa a tɔkn a vuu naa takɛ ka tipi tɔkn.

¹⁹ Rɛɛ manzung, zang gbete ka teteng manɛ nɛɛ yaa gbalang ɓɔɔ niizang, a zang ɓɔɔ nɛɛ sɔɔrɔ wu tɔkn,

²⁰ nɔɔ zi ka yeti manɛ nɛɛ, zang ɓɔɔ shing zang ɓɔɔ palɛ vuu shi kpang, wu yaa gbalang vuu shi kpang ɓɔɔ wu palɛ ɓɛɛ, ta yuu zang kaɓa tɔ nɛɛ naa vɔrɔ. Laa ti yàá zang ɓɔɔ palɛ vuu shi kpang kaɓa gbalang vuu shi kpang ɓɔɔ wu palɛ dɔɔli ɓɛɛ katɔ.