Yakubu 4 - Nyaa Shɔɔ Ɓɔɔ Laa a Ɓɛɛ

Vuu koo kasɛnang

¹ Ɓu vi shing nɔɔ, nɔɔ haa nyaa, a nɔɔ ti gaa nyaa nɛɛ zɔɔ viya? Wu rɛ̃rɛnang ɓɔɔ nɔɔ rɛ̃rɛ ka yuu vuu ɓɔɔ nɔɔ kasɛ ɓɛɛ kɔ, waa zɔɔ ka yeti manɛ kpang ya?

² Nɔɔ kasɛ vuu, a nɔɔ walɛ kpang, ka ruu nɔngkɔ, nɔɔ nyɔ zang vɔrɔ. Nɔɔ shíng ka yeti manɛ nɛɛ vuu keɓe nɛɛ nwàng ɓɔɔ manɛ, a nɔɔ walɛ kaa takpang, ka ruu nɔngkɔ, nɔɔ gaa nyaa a nɔɔ ti ta sĩiri. Nɔɔ walɛ vuu ɓɔɔ nɔɔ kasɛ ɓɛɛ kpang, ka ruu ɓɔɔ, nɔɔ gàa ka naa Laa kpang ɓɛɛ.

³ Nɔɔ nɛɛ ti gaa tɔ, a nɔɔ kpang, ka ruu ɓɔɔ, nɔɔ gàa ka gbalang shi kpang ɓɛɛ. Tɔ̀ɔ, nɔ́ɔ daa vãlɛ ka nɔng vuu ɓɔɔ nɔɔ kasɛ ɓɛɛ.

⁴ Nɔɔ zi kpang nɛɛ naa nɔɔ yi wusang nɛɛ vuu koo keɓe nɔɔ nwang naa zang ɓɔɔ palɛ dũndũng ɓɛɛ kpang ya? Zang keɓe nwang ɓi kaa zang ɓɔɔ gaa nyaa nɛɛ Laa ɓɛɛ. Ka ruu nɔngkɔ, zang ɓɔɔ nɛɛ kasɛ ruu koo keɓe risi yuu ɓiɓɛ kaa zang ɓɔɔ gaa nyaa nɛɛ Laa ɓɛɛ.

⁵ Nɔɔ kɔɔ ɓu nɛɛ, Labeenang Laa kɔ̀ɔ waati nɛɛ, “Suru bii ɓɔɔ Laa shingnɛ nɛɛ wu nwang ka yeti ɓuru, kaa sũnyaa dɔɔli” ya?

⁶ Làá kɔ álɛ ruu tɔ̃ɔ ɓiɓɛ dɔɔli nɛɛ ruu dung wu nɛ mani. Ka ruu nɔngkɔ, labeenang Laa kɔɔyi tɔɔ, “Laa kasɛ ruu zang ɓɔɔ tuu yuu ɓiɓɛ ɓi jong kpang, a á zang ɓɔɔ tuu yuu ɓiɓɛ kpang, tɔ̃̀ɔ́ ɓiɓɛ.”

⁷ Ka ruu nɔngkɔ, a Laa yuu ɓaaɓɛ. Mɔɔ táarɛ́ yuu nɛɛ suru shi kpang, yuu ditɔ wu yaa mɔɔ.

⁸ A ka bii Laa naabm, tɔɔ wu ti a jong ka bii ɓaaɓɛ naabm. Ɓɔɔ nɔɔ zang ɓɔɔ nɔɔ pálɛ̀ vuu shi kpang, nɔɔ yaa vuu shi kpang palɛnang ta. Nɔɔ ti kɔ̃sɔ yeti manɛ nɔɔ zang ɓɔɔ nɔɔ ta yeti ziti ɓɛɛ.

⁹ Yeti manɛ wu lasɛ ta kati, nɔɔ kaa nyavɔ. Tabɛ̀ɛ́ manɛ wu raa kaa nyavɔ. Tĩnang ɓɔɔ nɔɔ tãa ɓɛɛ, wu raa kaa yeti lasɛnang, ka ruu vuu shi kpang ɓɔɔ nɔɔ palɛ ɓɛɛ.

¹⁰ Risi yuu ɓaaɓɛ naa mɔɔ wu vuu ɓɔɔ kpang, ka tĩng Kpanti Laa, tɔɔ Kpanti Laa wu a mɔɔ bannang kati.

Nɔ́ɔ Jɛ̃ɛ zɔɔ ruu kpang

¹¹ Manzung, nɔ́ɔ rang yee shi kpang ka yuu zɔɔ kpang. Zang ɓɔɔ nɛɛ rang yee shi kpang ka yuu zang ɓɔɔ dũng doo Laa kɔ, a ti dɔng wu ruu, rang yee shi kpang ka yuu nyaa dannang Laa a ti tuu yuu ɓiɓɛ naa wu ɓa nyaa dannang Laa katɔ. Mɔɔ nɛɛ tɔɔ, mɔɔ ɓa nyaa dannang Laa katɔ, mɔɔ ɓáa zang ɓɔɔ palɛ vuu ɓɔɔ nyaa dannang Laa kɔɔ ɓɛɛ kpang. Mɔɔ ɓaa zang ɓɔɔ ɓa nyaa dannang Laa katɔ ɓɛɛ.

¹² Zang ɓɔɔ dang nyaa a ti jɛ̃ɛ zang ruu ɓi gbete kɔ nwani, wukɔ Laa. Nɛɛ kasɛ tɔ, wu ta yuu ɓuru. Nɛɛ ti kasɛ kpang, wu nyɔ ruu vɔrɔ. A mɔɔ ɓaa kaa wi mɔɔ jɛ̃ɛ zang ɓɔɔ dũng doo Laa kɔ ruu wiya?

Nɔ́ɔ pálɛ̀ naa nɔɔ zi vuu tɔ piti kpang

¹³ Nɔɔ ɓaa shoo ka ruu mɛɛ, nɔɔ zang ɓɔɔ nɔɔ kɔ̀ɔ́ nɛɛ, “Nɛɛ lɛɛkɔ kpang, ɓuru ruu daa ka gari keɓe nɛɛ gari kaɓa, ruu daa nwang ka nɔng saa gbete, ruu mãlɛ́ vuu, ruu ti hooro ɓɔɔ, tɔ̀ɔ, ruu gisi vuu naa ɓuru kati ɓɛɛ.”

¹⁴ Nɔɔ ti zi vuu ɓɔɔ ɓuru atɛ ɓɛɛ kpang. Suru bii manɛ nwang naa viya? Nɔɔ nwang manɛ naa miisĩ́ng ɓɔɔ kpaa nɛɛ gãndi nyaa kɔ doo naa, sãtɛ tɔ ɓɛɛ.

¹⁵ Nɔɔ kɔ̀ɔ manɛ nɛɛ “Laa nɛɛ kasɛ tɔɔ, ruu nwang doo ningkãari, rùu palɛ vuu keɓe nɛɛ vuu kaɓa.”

¹⁶ Ɓɔɔ kãntang keɓe nɔɔ lakɛ jĩng, a nɔɔ rang ruu bang bang ka yuu manɛ. Ruu bang bang ɓɔɔ nɔɔ kɔɔrɔ ka yuu manɛ naa weɓe ɓi vuu shi kpang.

¹⁷ Ka ruu nɔngkɔ, zang ɓɔɔ nɛɛ zi vuu tɔ̃ɔ naa ɓɔɔ wu nɛɛ palɛ, a nɛɛ palɛ kpang, palɛ ɓi vuu shi kpang.