Yakubu 2 - Nyaa Shɔɔ Ɓɔɔ Laa a Ɓɛɛ

Nyaa shaarɛnang ka yuu vuu palɛnang, gn dang gbete

¹ Manzung, nɔ́ɔ palɛ vuu dang gbete kpang. Ka ruu ɓɔɔ, nɔɔ shing danggn tɔ ka bii kpanti Yeesɔ Kirisi ɓɔɔ zang a wukɔ bannang ɓa zang piti ɓɛɛ.

² Naa zang ɓɔɔ a ka nɔng ɓɔɔ nɔɔ kpalɛ yuu, nɛɛ jaa saa naa ɓɔɔ zang palɛ nɛɛ tari ɓɔɔ kɔlɔ katɔ, ɓɔɔ zang ɓaa nɛɛ Zinariya, ka naa ɓiɓɛ, a hãa fɔ̃ɔrɔ tɔ̃ɔ ka bii. A zang ɓɔɔ ɓi zang ying kpang hãa sɛ̃ɛ fɔ̃ɔrɔ ka bii nɛɛ ti a jong.

³ A nɔɔ yee zang ɓɔɔ hãa fɔ̃ɔrɔ tɔ̃ɔ laa ka bii. Nɔɔ kɔɔ wu nɛɛ, “Arɛ mɔɔ nwang ka nɔng tɔ̃ɔ keɓe.” A nɔɔ kɔ̀ɔ zang ɓɔɔ ɓi zang ying kpang ɓɔɔ hãa sɛ̃ɛ fɔ̃ɔrɔ ka bii ɓɛɛ nɛɛ, “Shii nɛɛ kaaɓa,” nɔɔ nɛɛ kɔ̀ɔ wu nɔngkɔ kpang, nɔɔ kɔ̀ɔ́ wu nɛɛ, “Nwang ka tipi ka nɔngkɔ.”

⁴ Nɔɔ nɛɛ palɛ tɔ naa weɓe, nɔɔ palɛ vuu gn dang gbete. Nɔɔ jɛ̃̀ɛ zang ruu tɔ shi kpang.

⁵ Manzung ɓɔɔ n kasɛ nɔɔ dɔɔli ɓɛɛ, nɔɔ ɓaa shoo. Laa zɔ̃ng zang ɓɔɔ ri zang ying kpang, ɓɔɔ ri ka koo keɓe, nɛɛ ri nwang zang ying ka danggn ɓɔɔ ri shing ka bii Laa ɓɛɛ. Shing ri tɔ, ri walɛ vuu ɓɔɔ Laa tɔɔ wu shing zang ɓɔɔ ri kasɛ ruu ɓiɓɛ katɔ ka ɓɔɔ wu roo kpanti ɓɛɛ.

⁶ Nɔɔ risi zang ɓɔɔ ri zang ying kpang naa vĩi. Wu zang ying kɔ ri dang nɔɔ jĩng kpang ya? Wu rikɔ ɓaa nɔɔ nyaavaa kpang ya?

⁷ Wu rikɔ kɔɔrɔ ruu shi kpang ka yuu núng tɔ̃ɔ Yeesɔ kɔ zang ɓaa nɔɔ nɛɛ mani ɓɛɛ kpang ya?

⁸ Nɔɔ nɛɛ dũng nyaa dannang Laa ɓɔɔ ka yeti labeenang ɓiɓɛ. Wukɔ tɔ̃ɔ. Nyaa dannang Laa ɓɔɔ tɔɔ, “Nɔɔ kasɛ zang naa ɓɔɔ nɔɔ kasɛ yuu manɛ ɓɛɛ,”

⁹ Nɔɔ nɛɛ pálɛ̀ vuu gn dang gbete, nɔɔ palɛ vuu shi kpang tɔ. Nɔɔ ti palɛ vuu shi kpang tɔ, ka ruu ɓɔɔ nɔɔ ta nyaa dannang Laa katɔ ɓɛɛ.

¹⁰ Zang ɓɔɔ nɛɛ dũng nyaa dannang Laa nandon tɔ̃ɔ tɔ̃ɔ, a naa ta gbete, nwang ɓi kaa naa ɓɔɔ ta nandon ɓɛɛ.

¹¹ Ka ruu ɓɔɔ, Laa ɓɔɔ kɔɔyi nɛɛ, “Mɔɔ roo nɛɛ soro zang kpang.” Wukɔ ti kɔɔyi nɛɛ, “Mɔɔ nyɔ zang vɔrɔ kpang.” Mɔɔ nɛɛ roo nɛɛ soro zang kpang, a mɔɔ nyɔ zang vɔrɔ katɔ, mɔɔ ta nyaa dannang tɔ.

¹² Ka ruu nɔngkɔ, n kɔɔ nɔɔ, vuu ɓɔɔ nɔɔ kɔɔ ɓɛɛ, nɔɔ palɛ doo nɔngkɔ. Danggn wu ning nɔɔ kpang, lee ɓɔɔ Laa naa jɛ̃ɛ ruu rúu ditɔ ka naa ɓɔɔ ruu dũ̀ng nyaa dannang ɓiɓɛ ɓɔɔ ta yuu ɓuru katɔ ɓɛɛ.

¹³ Ka ruu ɓɔɔ, gn kɔng Laa kpang, ka nɔng ɓɔɔ wu jɛ̃ɛ zang ɓɔɔ gn zang kɔ̀ng wu ɓi kpang ɓɛɛ. Zang ɓɔɔ gn zang kɔng wu katɔ, naa zirɛ nɛɛ gn zang ɓɔɔ kɔng Laa ɓa ruu ɓɔɔ wu dɔng zang ɓɛɛ katɔ.

Zang wu tusu danggn shinnang nɛɛ shonang ɓɔɔ wu palɛ ɓɛɛ

¹⁴ Manzung, zang ɓɔɔ nɛɛ kɔɔyi nɛɛ wu shing danggn tɔ ka bii Laa, a pálɛ̀ shonang ɓɔɔ Laa kasɛ ɓɛɛ kpang, danggn shinnang keɓe nwǎng wu viya? Ta yuu ɓiɓɛ katɔ ya?

¹⁵ Naa zang ɓɔɔ dũng doo Laa kɔ, zang varɛ, kɔ́ ɓɔɔ soro, fɔ̃ɔrɔ ɓɔɔ wu hãa ka bii kagn kpang. Vuu shaanang ɓɔɔ wu ti shaa lɛɛkɔ kpang.

¹⁶ A zang gbete ka teteng manɛ kɔɔ wu nɛɛ, “Laa wu yi mɔɔ naa kagn mɔɔ walɛ fɔ̃ɔrɔ nɛɛ vuu shaanang,” a nɔɔ a wu vuu ɓɔɔ wu kasɛ ɓɛɛ kpang, nɔɔ pálɛ̀ ɓu vuu tɔ̃ɔ ya?

¹⁷ Ka ruu nɔngkɔ, danggn shinnang ka bii Laa ɓi doo nɔngkɔ, mɔɔ nɛɛ palɛ shonang ɓɔɔ tusu zang nɛɛ mɔɔ shing danggn ka bii Laa kpang, danggn shinnang ɓaaɓɛ nwang mɔɔ vuu ɓɔɔ ɓi kpang.

¹⁸ Zang ɓɔɔ kɔɔ ɓi nɛɛ, “Zang keɓe shing ɓi danggn ka bii Laa, a zang kaɓa palɛ ɓi vuu ɓɔɔ Laa kasɛ ɓɛɛ.” N kasɛ wu nyaa nɛɛ, “Zang ɓɔɔ zunung danggn shinnang katɔ, ka bii Laa a palɛ vuu tɔ̃ɔ kpang ya? N tusu mɔɔ nɛɛ n shing danggn ka bii Laa ka vuu ɓɔɔ n palɛ ɓɛɛ.”

¹⁹ Nɔɔ shing danggn tɔ, nɛɛ Laa ɓi gbete kɔ nwani. Wukɔ tɔ̃ɔ, Suru shi kpang ri zi tɔ kɔ doori, bii káa ri vɔrɔ kagn.

²⁰ Zang ɓɔɔ zũng kpang kiɓi, mɔɔ zi kpang nɛɛ danggn shinnang nɛɛ tusu bii nɛɛ shonang ɓɔɔ wu palɛ ɓɛɛ kpang, nwang ɓi waati kpang ya?

²¹ Danggn dabang ɓuru Ibirayi ɓɔɔ nwang zang tɔ̃ɔ ka tĩng Laa ka ruu shonang ɓiɓɛ wu ning nɔɔ kpang. Ibirayi tɔɔ wu dɔɔ jaa gbete ɓiɓɛ Ishaaku ka yuu nɔng ɓɔɔ zang dɔɔ Laa vuu vaa kagn ɓɛɛ.

²² Nɔɔ zi ka vuu ɓɔɔ Ibirayi palɛ keɓe kɔɔ nɛɛ shonang nɛɛ danggn shinnang ka bii Laa daa kaa nyaa gbete. Shonang Ibirayi kɔ shingnɛ danggn shinnang ɓiɓɛ daa kaa nyaa kiiri.

²³ Vuu keɓe nwang naa ɓɔɔ zang bee ka yeti Labeenang Laa ɓɛɛ. Zang beeyi nɛɛ, “Ibirayi shing danggn ka bii Laa, a Laa ta wu nɛɛ wu ɓi zang tɔ̃ɔ ka tĩng ɓiɓɛ. A zang ɓaa wu kaa nɛɛ wusang Laa.”

²⁴ Mɔɔ zi tɔ waa, shɔnzang nwáng zang tɔ̃ɔ ka tĩng Laa nɛɛ shonang jong. Wu nɛɛ danggn shinnang kɔ shɛ̃ɛning kpang.

²⁵ Rahab jaa soro ɓɔɔ bɛ̀ɛ́ rakɛ wàázaa palɛ doo nɔngkɔ. Nwang zang tɔ̃ɔ ka tĩng Laa doo ka vuu shonang kɔ. Ka ɓɔɔ ta zang nyaa shonang ɓɔɔ zang shong ri nɛɛ ri zili tipi Jeriko, a shing ri zanti kaa nɛɛ gbalang ɓɔɔgn nɛɛ tɔɔ ri wɔ kati ɓɛɛ.

²⁶ Ka ruu nɔngkɔ, naa ɓɔɔ Suru nɛɛ ka bii kpang, bii ɓi kaa vɔrɔ. Mɔɔ nɛɛ palɛ shonang ɓɔɔ tusu zang nɛɛ mɔɔ shing danggn ka bii Laa kpang, danggn shinnang ɓaaɓɛ vɔ ɓi doo katɔ kɔ.