Vuu ɓɔɔ zang nwangsɛ Yɔhana 9 - Nyaa Shɔɔ Ɓɔɔ Laa a Ɓɛɛ

¹ A zang nyaa shonang Laa ɓɔɔ ka lapa ɓɛɛ, ɓɔɔ daa kaa maani ɓɛɛ, jee gboo ɓiɓɛ. A n zi sang ɓɔɔ watɛ ka koo nɛɛ lapa ɓɛɛ. A zang a wu saka ɓɔɔ wu puu too ɓɔɔ dii ɓiɓɛ kagn kpang nɛɛ mani ɓɛɛ.

² A puu nyaa too, nyaa kɔ doo naa ɓee, zĩiri nwangnɛ mɔɔ kɔɔ nɛɛ waa ɓɔɔ shaa bang. Zĩiri kaɓa, zuu làa dɔ̃ɔ gbete, zang zi laa takpang, nɔng tɔ̀ɔ kaa nɛɛ laagɛ̃.

³ Zɔɔrɔ dɔɔli ri nwangnɛ yeti zĩiri kaɓa, ri arɛ ri zuu tipi nandon. A zang a ri naa nɛɛ ri ta zang naa ɓɔɔ gbuuri ta zang ɓɛɛ.

⁴ Zang kɔɔ ri nɛɛ, ri pálɛ̀ rɛɛ wisi nɛɛ vuu ɓɔɔ takɛ ka tipi nɛɛ rɛɛ laa vuu ɓɔɔ kpang. Zang nɛɛ ri ta ɓarɛ shɔnzang ɓɔɔ zang ɓang vuu ɓɔɔ zang zi nung kagn nɛɛ ri zang Laa ka nyaating ɓarɛ kpang kɔ shɛ̃ɛning.

⁵ Zang a ri naa nɛɛ ri nyɔkɔ zang kaɓa vɔrɔ kpang. Zang nɛɛ ri dang ri jĩng shala maani kɔ nwani. Jĩng dannang kaɓa kɔng naa ɓɔɔ gbuuri nɛɛ ta zang tɔ, kɔng zang ɓɛɛ.

⁶ Ka shala maani keɓe, shɔnzang ri kãa vɔrɔ nɛɛ tɔ̀ɔ, ri wɔ ka jĩng dannang kaɓa, a ri ĩi vɔrɔ kaa takpang. Zang ri wàá vɔrɔ katɔ a vɔrɔ nyɔ ri kaa takpang.

⁷ Zɔɔrɔ kaɓa ri ta bii naa gbantang ɓɔɔ zang kpalɛ ri bii nɛɛ ri daa ka nyaa sĩiri ɓɛɛ. Vuu ɓɔɔ ri hãa ka yuu nwang lapoo yuu kpanti ɓɔɔ zang palɛ nɛɛ zinariya ɓɛɛ. Waa nyaating ɓarɛ nwàng ɓɔɔ shɔnzang.

⁸ Suuyuu ɓarɛ bee naa suuyuu zang soro, tãri ɓarɛ ti wɔng naa ɓɔɔ zing.

⁹ Ri zùu danggn ɓarɛ nɛɛ saka, a nasãng ɓarɛ kaa nyaa nabm naa kɛkɛ sĩiri tanang ɓɔɔ gbantang ri gɔ̃kɔ ri daa nɔng nyaa sĩiri ɓɛɛ.

¹⁰ Ri takɛ dãng, shɔng kagn naa ɓɔɔ rɛɛ gbuuri. Náa ɓɔɔ zang a ri nɛɛ ri dang zang jĩng shala maani keɓe, ka dãng ɓarɛ keɓe kɔ.

¹¹ Kpanti rɛɛ zɔɔrɔ keɓe, ɓi zang nyaa shonang Laa ɓɔɔ gãng jĩng ka too ɓɔɔ dii kagn kpang kaɓa. Zang ɓaa nung ɓiɓɛ nɛɛ nyaa zang Yahudi nɛɛ Abadɔng, ka nyaa zang Heleni zang ɓaa wu nɛɛ Apoliyɔng, dĩiri nung keɓe ɓi, “Zang ɓɔɔ lasɛ vuu ɓɛɛ.”

¹² Wee kɔ jĩng dannang bang ɓɔɔ tĩng shɔɔnang ɓɛɛ, jĩng dannang bang ɓɔɔ naa a ɓɛɛ yaa kaa ziti.

¹³ A zang nyaa shonang Laa ɓɔɔ ka lapa ɓɛɛ, ɓɔɔ daa ka mangbete jee gboo ɓiɓɛ. A n tãa yee nwangnɛ yeti jée dɛ̃ɛti, ɓɔɔ ka yuu paa nɔng ɓɔɔ zang dɔɔ Laa vuu kagn ɓɔɔ zang palɛ nɛɛ zinariya ɓɛɛ, ɓɔɔ bɛ̀ɛ́ ka tĩng Laa ɓɛɛ.

¹⁴ Yee kaɓa kɔɔ zang nyaa shonang Laa ɓɔɔ ka lapa ɓɔɔ jee gboo ɓɛɛ nɛɛ, “Yaarɛ rɛɛ zang nyaa shonang Laa ɓɔɔ ka lapa, ɓɔɔ dɛ̃ɛti kaɓa ɓɔɔ zang mãlɛ ri ka nyaa rang Yufireti ɓɛɛ naa ta.”

¹⁵ Rɛɛ zang nyaa shonang Laa dɛ̃ɛti kaɓa bɛ̀ɛ́ zang mã ri ka nɔng kaɓa nɛɛ ri gã làá keɓe, nɛɛ diki keɓe, nɛɛ shala keɓe, nɛɛ saa keɓe. Tɔ̀ɔ, zang yaa ri naa kati ri nyɔkɔ zang tìng gbete vɔrɔ, naa zang basɛ zang koo tìng taati ɓɛɛ.

¹⁶ Zang sɔɔja ɓarɛ ɓɔɔ ri vang ɓarɛ gbantang ɓɛɛ, zang kɔɔ m nɛɛ ri labang labang, laa maani dakn ziti.

¹⁷ Wee naa ɓɔɔ n zi rɛɛ gbantang bìí, ka vuu ɓɔɔ zang tusu ɓɛɛ. Zang ɓɔɔ ri vãlɛ gbantang bìí ri hãa saka ɓɔɔ zuu ri danggn ɓɛɛ, ta bii nwɛ̃ɛri naa waa, a ɓɔɔ ta bii naa bii sãmbong, a ɓɔɔ ta bii naa mii rong. Rɛɛ gbantang, ri takɛ yuu naa ɓɔɔ zing. Waa nɛɛ zĩiri nɛɛ vuu ɓɔɔ ta bii naa mii rong, nwangkɛ nɛɛ nyaa ɓarɛ.

¹⁸ Rɛɛ kɔnang taati kɔ nwangkɛ nɛɛ nyaa rɛɛ gbantang ɓee, waa nɛɛ zĩiri nɛɛ vuu ɓɔɔ ta bii naa mii rong ɓɛɛ, ri nyɔ̀kɔ̀ shɔnzang tìng gbete nɛɛ wukɔ, naa zang basɛ shɔnzang ɓɔɔ koo tĩng taati ɓɛɛ.

¹⁹ Kaka rɛɛ gbantang kaɓa, ɓi ka nyaa ɓarɛ nɛɛ dãng ɓarɛ. Dãng ɓarɛ nwang naa sɔkɔ, ri ta yuu kagn. Ri shing zang nyaa vuu waa nɛɛ wukɔ.

²⁰ A zang ɓɔɔ kɔnang kaɓa nyɔkɔ ri vɔrɔ kpang, ri kɔ̃sɔ yeti ɓarɛ kpang. Ri yi tĩng, ri bang ɓarɛ doo rɛɛ suru shi kpang nɛɛ rɛɛ vaka ɓɔɔ ri palɛ nɛɛ naa ɓarɛ ɓɛɛ. Ri palɛ vaka ɓɔɔ nɛɛ zinariya, ɓɔɔ nɛɛ azurufa, a ɓɔɔ nɛɛ saka nwɛ̃ɛri ɓɛɛ. Ri palɛ ɓɔɔ nɛɛ tari, a zang sèe ɓɔɔ nɛɛ laa. Vuu keɓe ri rang yee kpang, ri ti tãa nɔng kpang, a ri ti ra kpang.

²¹ Zang kaɓa ri kɔ̃sɔ yeti, ri yaa zang nyɔkɔnang vɔrɔ, nɛɛ nvaa shaanang nɛɛ dũndũng palɛnang a ɓɔɔ shɔngɓɔ ɓɔɔnang ɓarɛ kpang.