Vuu ɓɔɔ zang nwangsɛ Yɔhana 8 - Nyaa Shɔɔ Ɓɔɔ Laa a Ɓɛɛ

Jaa Mɛ̀ɛrɛ́ tãa lang ɓɔɔ daa kaa manziti ɓɛɛ

¹ Ka knti ruu keɓe, Jaa Mɛ̀ɛrɛ́ tãa lang ɓɔɔ daa kaa manziti ɓɛɛ, a zang voo nyaa kaa lapa selele, daa nung minti bmati tu kopi katɔ.

² A n zi rɛɛ zang nyaa shonang Laa ɓɔɔ ri ka lapa ɓɛɛ ɓɔɔ manziti kaɓa, ɓɔɔ ri shiiri ka tĩng Laa ɓɛɛ, a zang, a zang ɓu gboo ka naa.

³ A zang nyaa shonang Laa ɓɔɔ ka lapa ɓɔɔ gbete, arɛ naa shii ka nɔng ɓɔɔ zang dɔ̀ɔ Laa vuu kagn ɓɛɛ. Yiti waka ɓɔɔ zang palɛ nɛɛ zinariya ka naa. A zang ɓɔɔ arɛ naa a wu vuu ɓɔɔ a sɛ̃ɛ tɔ̃ɔ ɓɛɛ dɔɔli. Nɛɛ wu dɔɔyi nɛɛ gàanang rɛɛ zang Laa, ka tĩng laa nwannang kpanti. Ka yuu nɔng ɓɔɔ zang dɔ̀ɔ́ Laa vuu kagn ɓɔɔ zang palɛ nɛɛ zinariya ɓɛɛ.

⁴ A dɔɔ waa ka vuu ɓɔɔ a sɛ̃ɛ tɔ̃ɔ kaɓa, a zĩiri ɓiɓɛ gaayu paa seenang, a daa kaa lapa nɛɛ Laa gàanang zang Laa, ka bii Laa.

⁵ A zang nyaa shonang Laa ɓɔɔ ka lapa ɓɛɛ kaɓa, see waa nɛɛ nɔng ɓɔɔ zang dɔɔ Laa vuu kaɓa, a tɛ̃ɛ ka waka ɓɔɔ zang palɛ nɛɛ zinariya ɓɛɛ kaɓa, a tasɛ ka koo. Ɓɔɔ wu tasɛ, shala mɛɛyi, a shala ti mangnɛ, a tipi ruutu.

Zang nyaa shonang Laa ɓɔɔ ri ka lapa ɓɛɛ, ri gaayu gboo jeenang

⁶ A ka knti vuu keɓe, rɛɛ zang nyaa shonang Laa ɓɔɔ ri ka lapa, manziti, ɓɔɔ zang ɓu yiti gboo ka naa kaɓa ɓɛɛ, ri kpalɛ bii gboo jeenang kati.

⁷ Zang nyaa shonang Laa ɓɔɔ ka lapa ɓɔɔ tĩng shɔɔnang jee gboo ɓiɓɛ, a nyaa kɔ doo naa ɓee, mii takong nɛɛ waa ri nwɛ̃ɛtɛ zɔɔ nɛɛ zĩi vuu a zang vang ri ka tipi. A tĩng gbete ka teteng koo ɓɔɔ zang basɛ tĩng taati ɓɛɛ, waa shaayi. A naa zang basɛ rɛɛ laa ɓɔɔ ri ka tipi tĩng taati, waa shaa tĩng gbete, a waa shaa wisi bɛbɛtɛ jong nandon.

⁸ A zang nyaa shonang Laa ɓɔɔ ka lapa ɓɛɛ, ɓɔɔ ɓang ɓɔɔ tĩng shɔɔnang, jee gboo ɓiɓɛ. Zang ɓɔɔ tuu vuu ɓɔɔ nwang kɔpɔ bang ɓɔɔ waa shaa kana ɓɛɛ, a tasɛ ka yeti waapo.

⁹ Naa zang basɛ waapo tìng taati, mii tìng gbete raa zĩi. Vuu ɓɔɔ ka yeti waapo nandon naa zang basɛ ri tìng taati, ɓɔɔ tìng gbete, ri vɔlɔ. A tìng gbete ka teteng rɛɛ laana ɓɔɔ nandon ri shaarɛ.

¹⁰ A zang nyaa shonang Laa ɓɔɔ ka lapa ɓɛɛ, ɓɔɔ daa kaa taati ɓɛɛ, jee gboo ɓiɓɛ. A sang bang watɛ nɛɛ lapa, waa shaa kagn naa zang mang waa ka wisi. A watɛ ka rang, nɛɛ rɛɛ sɔlɔng mii dang gbete, naa zang basɛ ri tìng taati ɓɛɛ.

¹¹ (Zang ɓaa sang bìí nɛɛ Lanang.) Mii tìng gbete la kaa tɔ, a zang dɔɔli ɓɔɔ ri ɓoo mii, ri vɔlɔ ka ruu lanang ɓiɓɛ.

¹² Zang nyaa shonang Laa ɓɔɔ ka lapa, ɓɔɔ daa kaa dɛ̃ɛti ɓɛɛ, jee gboo ɓiɓɛ. A tìng gbete ka teteng tìng taati ɓɔɔ zang basɛ làa, nɛɛ shala nɛɛ rɛɛ sang ɓɛɛ, ri tɔɔyi. Tìng gbete ɓɔɔ laagɛ̃ nɛɛ ɓɔɔ nɔng zĩi yakɛ kpang.

¹³ N shing jĩng a n zi gangong tãa ka lapa, n tãayi mɛɛ nyaa nabm kɔɔyi nɛɛ, “Ayìi rang, jĩng dannang kagn yuu manɛ, zang ɓɔɔ ri nwalɛ ka koo ɓɛɛ. Naa zang jee rɛɛ gboo ɓɔɔ yaa knti, kɔ̀ rɛɛ zang nyaa shonang Laa ɓɔɔ ri ka lapa ɓɔɔ ri yaa taati, ri kpalɛ bii jeenang ɓa ɓɛɛ.”