Vuu ɓɔɔ zang nwangsɛ Yɔhana 7 - Nyaa Shɔɔ Ɓɔɔ Laa a Ɓɛɛ

Zang gã zang Isirela

¹ A knti weɓe, n zi rɛɛ zang nyaa shonang Laa ɓɔɔ ri kaa lapa ɓɛɛ dɛ̃ɛti, ri shiiri ka nyaa kãngkãng koo. Ri nɔɔ jasung ɓɔɔ nɛɛ wu ra nɛɛ nɔng kaɓa ɓɛɛ, nɛɛ tɔ̀ɔ, ri rà kaa takpang ka tipi, nɛɛ yuu rɛɛ waapo, a ɓɔɔ ka yuu laa ɓɔɔ ka koo ɓɛɛ.

² A n zi zang nyaa shonang Laa ɓɔɔ ka lapa ɓɛɛ gbete a nɛɛ paa ɓɔɔ laa nwang nɛɛ mani ɓɛɛ. Yiti vuu ɓɔɔ Laa ɓɔɔ ɓi ningkãari ɓang ka bii vuu, zang zi vuu ɓiɓɛ nung kaa gn ɓɛɛ. A mɛɛ nyaa nabm, ɓaa nyaa ka rɛɛ zang nyaa shonang Laa ɓɔɔ ri ka lapa ɓɛɛ dɛ̃ɛti kaɓa, ɓɔɔ Laa a ri naa tɔ nɛɛ ri dang tipi nɛɛ waapo jĩng ɓɛɛ.

³ A kɔɔ ri nɛɛ, “Nɔ́ɔ dang rɛɛ tipi nɛɛ waapo, nɛɛ laa, jĩng gn kpang. Ruu ɓǎng rɛɛ zang shonang Laa ɓuru vuu ɓiɓɛ doo ka nyaating ka gbongkarɛ.”

⁴ A n tãayi, zang gã rɛɛ zang kaɓa, ɓɔɔ zang nyaa shonang Laa ɓɔɔ ka lapa ɓang ri vuu ka nyaating ɓɛɛ. Zang ri nandon, labang dakn laa maani tu laa ziti tu dɛ̃ɛti. Ri nwangnɛ teteng zɔ̃ng zang Isirela nandon.

⁵ Zang ɓang zang labang dakn kopi tu ziti ka teteng zɔ̃ng zang Yahuda. Zang labang dakn kopi tu ziti ka teteng zɔ̃ng zang Rubeng, zang labang dakn kopi tu ziti ka teteng zɔ̃ng zang Gaadi.

⁶ Zang labang dakn kopi tu ziti ka teteng zɔ̃ng zang Ashaa, zang labang dakn kopi tu ziti ka teteng zɔ̃ng zang Nafitali, a zang labang dakn kopi tu ziti ka teteng zɔ̃ng zang Manase.

⁷ Zang labang dakn kopi tu ziti ka teteng zɔ̃ng zang Simiyon, zang labang dakn kopi tu ziti ka teteng zɔ̃ng zang Leevi, a zang labang dakn kopi tu ziti ka teteng zɔ̃ng zang Isaka.

⁸ Zang labang dakn kopi tu ziti ka teteng zɔ̃ng zang Zebuluna, zang labang dakn kopi tu ziti ka teteng zɔ̃ng zang Yusufu, a zang labang dakn kopi tu ziti ka teteng zɔ̃ng zang Biliyaminu.

Zang dɔɔli ri bang Laa

⁹ Ka knti vuu keɓe, n shing jĩng, a n zirɛ zang ri kpalɛ yuu zingkãng zingkãng, daa naa gãnang kpang. Ri nwangnɛ teteng zɔ̃ng zang piti, nɛɛ nɔng piti ka koo keɓe, a ɓɔɔ nyaa ɓɔɔ ka koo piti. Ri shiiri ka tĩng laa nwannang kpanti ka nɔng ɓɔɔ Jaa Mɛ̀ɛrɛ́ kagn ɓɛɛ. Ri hã̀lɛ̀ fɔ̃ɔrɔ puru, a ri ti yiti nasãng laa nung manja ka naa.

¹⁰ Ri nandon, ri mɛɛ nyaa ka lapa nabm nɛɛ, “Ɓi Laa ɓuru ɓɔɔ nwang ka yuu laa nwannang kpanti nɛɛ Jaa Mɛɛrɛ rikɔ ta yuu ɓuru.”

¹¹ A rɛɛ zang nyaa shonang Laa ɓɔɔ ri ka lapa nandon, ɓɔɔ ri shiiyi ri kiiri rɛɛ zang bang bmati tu dɛ̃ɛti nɛɛ vuu dɛ̃ɛti ɓɔɔ suru bii ɓarɛ kagn kaɓa nyaa ka teteng ɓɛɛ, ri tang nɛɛ gutu ka tĩng laa nwannang kpanti a ri bang Laa.

¹² Ri kɔɔrɔ nɛɛ, “Ruu kasɛ tɔ, dɔ̀ɔnang nɛɛ bannang, nɛɛ zũnang nɛɛ zã̀anang nɛɛ zang sennang, nɛɛ naa vuu palɛnang nɛɛ kpanti roonang, ɓi ɓɔɔ Laa ɓuru gbinggbing. Wu nwang nɔngkɔ.”

¹³ A zang bang gbete hɛ̃ɛ m nɛɛ, “Zang kɔ ri hãlɛ fɔ̃ɔrɔ puru ɓee, mɔɔ zi ri nung tɔ ya? Mɔɔ ti zi nɔng ɓɔɔ ri alɛ nɛɛ mani tɔ ya?”

¹⁴ A n kasɛ wu nyaa nɛɛ, “Dabang, ɓi mɔkɔ zirɛ.” A kɔɔ m nɛɛ, “Wee ɓi rɛɛ zang ɓɔɔ ri wɔ nɛɛ jĩng dannang bang kaɓa ɓɛɛ, a ri sɔɔ fɔ̃ɔrɔ ɓarɛ kaa nɛɛ zĩi Jaa Mɛ̀ɛrɛ́, a tu kaa puru shãa shãa.”

¹⁵ Ka ruu nɔngkɔ, “Ri shii ka tĩng laa nwannang Kpanti Laa ri bang wu nɛɛ zĩi nɛɛ laagɛ̃ ka yeti Gãa ɓɔɔ zang bang wu kagn ɓɛɛ. Zang ɓɔɔ nwang ka yuu laa nwannang kpanti yiti ri katɔ, wu gãng jĩng ka ri, tɔ̀ɔ, vuu ɓɔɔ wu lee ri naa kaa tɔ̀ɔ́ bii kpang.

¹⁶ Nyɔkɔ nyɔ ri takpang, sutu ti mãa ri takpang. A laa ɓɔɔ túu ɓɛɛ, nyɔ ri bii takpang.

¹⁷ Ka ruu ɓɔɔ, Jaa Mɛ̀ɛrɛ́ ɓɔɔ ka nɔng laa nwannang kpanti gãng jĩng katɔ ka ri ɓɛɛ. Sɔ̀ɔ ri tĩng, atɛ ri ka rang mii ɓɔɔ a zang suru bii ɓɔɔ waa nyaa kpang ɓɛɛ. Laa ti naa àlɛ́ ri miiri nandon ka jĩng ɓarɛ.”