Vuu ɓɔɔ zang nwangsɛ Yɔhana 5 - Nyaa Shɔɔ Ɓɔɔ Laa a Ɓɛɛ

Zang a Jaa Mɛ̀ɛrɛ́ Laa, bannang

¹ A n zi labeenang ɓɔɔ kagn, ka nakn zang ɓɔɔ nwang ka yuu laa nwannang kpanti ɓɛɛ. Zang bèe vuu ka yeti nɛɛ biling piti a zang leng kati. Zang ɓang nyaa ɓiɓɛ nɛɛ lang nɔng manziti.

² A n zi zang nyaa shonang Laa ɓɔɔ ka lapa gbete ɓɔɔ lakɛ katɔ ɓɛɛ, mɛɛ nyaa ka lapa nabm kɔɔyi nɛɛ, “Wi daa naa ɓɔɔ wu tãlɛ lang keɓe, wu kãlɛ labeenang keɓe wiya?”

³ A zang ɓɔɔ kaa tɔ̀ɔ́gn kpang, ka lapa nɛɛ koo, nɛɛ koo rɛɛ suru zang ɓɔɔ ri vɔlɔ tɔ, ɓɔɔ daa naa ɓɔɔ wu puu labeenang kaɓa, wu gã vuu ɓɔɔ kagn kpang.

⁴ Ka ruu nɔngkɔ n kaa gbãng gbãng, ka ruu ɓɔɔ, zang ɓɔɔ kagn ɓɔɔ daa naa ɓɔɔ wu puu labeenang kaɓa, wu gã vuu ɓɔɔ zang bee gn kpang ɓɛɛ.

⁵ A zang bang gbete ka teteng rɛɛ zang bang bmati tu dɛ̃ɛti kaɓa, kɔɔ m nɛɛ, “Mɔɔ kaa kpang, zirɛ, yɔɔ ɓɔɔ zang ɓaa wu nɛɛ Zing, nwangnɛ teteng zang Yahuda ɓɔɔ ti zang bang zɔ̃ng Dawuda, ɓa yuu vuu piti tɔ. Daa naa ɓɔɔ wu tãlɛ lang ɓɔɔ zang ɓang labeenang kaɓa nɛɛ mani nɔng manziti kaɓa tɔ, wu puuyi.”

⁶ A n zi Jaa mɛ̀ɛrɛ́ shii ka nɔng laa nwannang kpanti naabm, a rɛɛ vuu dɛ̃ɛti ɓɔɔ suru bii ɓarɛ kagn kaɓa, nɛɛ zang bang bmati tu dɛ̃ɛti ri kiiri wu nyaa ka teteng. Jaa mɛɛrɛ bìí mɔɔ kɔɔ nɛɛ bɛ̀ɛ́ zang yée katɔ ka tĩng. Ta jee manziti, a jĩng ɓiɓɛ ti manziti. Rɛɛ jĩng manziti keɓe, ɓi rikɔ Suru Laa manziti ɓɔɔ zang shing ka dalɛ koo piti piti ɓɛɛ.

⁷ Jaa Mɛ̀ɛrɛ́ kaɓa daayi daa ta labeenang kaɓa nɛɛ nakn zang ɓɔɔ nwàng ka yuu laa nwannang kpanti ɓɛɛ.

⁸ A ɓɔɔ daa ta labeenang kaɓa tɔ, rɛɛ zang bang bmati tu dɛ̃ɛti kaɓa, ri tang nɛɛ gutu ka tĩng Jaa Mɛ̀ɛrɛ́ kaɓa. Zang kaɓa nandon, zang ɓu yiti vũngta ka naa, nɛɛ pii ɓɔɔ zang palɛ nɛɛ zinariya ɓɛɛ. Vuu ɓɔɔ a sɛ̃ɛ tɔ̃ɔ kagn ka yeti pii ka nyaa gaagaa. Vuu ɓɔɔ a sɛ̃ɛ tɔ̃ɔ keɓe, ɓi Laa gaanang rɛɛ zang Laa.

⁹ Ri gaa soo shɔɔ, ri kɔɔyi nɛɛ, “Mɔɔ daa naa tɔ, mɔɔ ta labeenang kaɓa, mɔɔ ti tãlɛ lang ɓɔɔ zang ɓang nɛɛ mani ɓɛɛ. Ka ruu ɓɔɔ, zang nyɔ mɔɔ vɔrɔ ka tĩng, a mɔɔ ta Laa yuu zang dɔɔli nɛɛ zĩi ɓaaɓɛ ɓɛɛ. Zang ɓɔɔ mɔɔ ta yuu ɓarɛ keɓe, ri nwangnɛ zɔ̃ng zang piti ka koo keɓe, nɛɛ nyaa ɓɔɔ ka koo piti, ri nwangnɛ tipi piti, a ɓɔɔ nɛɛ tipi rɛɛ kpanti ka bm bm.

¹⁰ Mɔɔ risi ri nɛɛ ri nwáng zang ɓɔɔ mɔkɔ kpanti ɓarɛ ɓɛɛ, a ri ti nwang zang ɓɔɔ ri dɔɔ vuu ka Gãa Laa ɓɔɔ ri palɛ Laa ɓuru shonang ɓɛɛ. Rikɔ roo kpanti ka koo keɓe.”

¹¹ A n shing jĩng n zi zang nyaa shonang Laa ɓɔɔ ri ka lapa ɓɛɛ, ri labang labang gaagaa daa ɓɔɔ zang gã ri kpang. A n ti tãa yee ɓarɛ. Ri shiiri, ri kiiri laa nwannang kpanti nɛɛ rɛɛ vuu dɛ̃ɛti ɓɔɔ suru bii ɓarɛ kagn ɓɛɛ, nyaa ka teteng.

¹² Ri gaa soo ri mɛɛ nyaa nabm nɛɛ, “Jaa Mɛ̀ɛrɛ́ ɓɔɔ bɛ̀ɛ́ zang nyɔ wu vɔrɔ ɓɛɛ, daa naa ɓɔɔ zang a wu naa vuu palɛnang tɔ, nɛɛ vuu naa, nɛɛ zũnang, nɛɛ kaka, nɛɛ bannang, nɛɛ dɔɔnang a ɓɔɔ zɔ̃ɔrɔnang.”

¹³ A n tãa yee rɛɛ vuu ɓɔɔ ningkãari, ka lapa nɛɛ koo keɓe, nɛɛ ɓɔɔ koo rɛɛ suru zang ɓɔɔ vɔlɔ tɔ ɓɛɛ, nɛɛ rɛɛ vuu piti ɓɔɔ ka yeti mii ɓɛɛ, ri gaa soo nandon, ri kɔɔyi nɛɛ, “Ruu dɔ̀ɔ nɔɔ zang ɓɔɔ nwang ka laa nwannang kpanti ta, a ɓɔɔ Jaa Mɛ̀ɛrɛ́. Ruu a ri bannang, ruu ti zãa ri. Zang wu zɔ̃ɔrɔ ri, naa vuu palɛnang wu nwang ɓɔɔ ɓarɛ gbinggbing.”

¹⁴ A rɛɛ vuu dɛ̃ɛti ɓɔɔ suru bii ɓarɛ kagn kaɓa, ri kasɛ nyaa nɛɛ, “Wu nwang nɔngkɔ.” Rɛɛ zang bang bmati tu dɛ̃ɛti kaɓa ri tang jong ka tĩng zang ɓɔɔ nwàng ka laa nwannang kpanti nɛɛ Jaa Mɛ̀ɛrɛ́ ri bang ri.