Vuu ɓɔɔ zang nwangsɛ Yɔhana 2 - Nyaa Shɔɔ Ɓɔɔ Laa a Ɓɛɛ

Nyaa ɓɔɔ zang shòng zang ɓɔɔ ri dũng Laa ka gari Afisa ɓɛɛ

¹ A zang ɓɔɔ n zi wu kaɓa, kɔɔ m nɛɛ, “Bèe zang nyaa shonang Laa ɓɔɔ ka lapa ɓɔɔ gãng jĩng ka zang Laa ɓɔɔ ri ka gari Afisa ruu keɓe. Mɔɔ kɔɔ wu nɛɛ: Wee ruu ɓɔɔ nwang nɛɛ nyaa zang ɓɔɔ yiti sang manziti ka nakn ɓiɓɛ ɓɛɛ, ɓɔɔ rakɛ ka teteng rɛɛ vuu manziti ɓɔɔ zang palɛ nɛɛ zinariya zang shĩili waa zàáng sɔɔ kagn ɓɛɛ.

² N zi shonang ɓɔɔ nɔɔ pálɛ̀ ɓɛɛ tɔ, naa ɓɔɔ nɔɔ palɛ shonang nɛɛ kaka manɛ, a nɔɔ ti mã danggn ɓɛɛ. N ti zi naa ɓɔɔ nɔɔ kasɛ kpang nɛɛ zang ɓɔɔ ri palɛ vuu shi kpang, ri nwàng ka teteng manɛ kpang tɔ. Nɔɔ ti gãsɛ rɛɛ zang ɓɔɔ ri suu sèé ri tuu yuu ɓarɛ naa ri zang shonang Yeesɔ tɔ, a nɔɔ ti ĩiyi, ri suu ɓarɛ sèé waati.

³ N zi tɔ nɔɔ mã danggn tɔ, nɔɔ dang jĩng tɔ dɔɔli, ka ruu nung mɛɛ, a nɔɔ ti yaa gn naa kpang.

⁴ A vuu shi kpang ɓɔɔ nɔɔ pálɛ̀ keɓe, nɔɔ kasɛ m tɔ̀ɔ́ naa ɓɔɔ nɔɔ kasɛ m tĩng shɔɔnang ɓɛɛ kpang.

⁵ Ka ruu nɔngkɔ, nɔɔ kpaa danggn zɔ̃ng nwannang ɓɔɔ nɔɔ nwang ka tĩng ɓɛɛ ta, nɔɔ kɔ̃sɔ yeti, nɔɔ gaayu vuu ɓɔɔ nɔɔ pálɛ́ ka tĩng ɓɛɛ palɛnang tɔkn. Naa nɔɔ kɔ̃sɔ yeti nɔɔ yaa vuu shi kpang ɓɔɔ nɔɔ palɛ keɓe kpang, n a ditɔ ka bii manɛ. N naa tuu vuu ɓɔɔ nɔɔ shĩili waa zàáng sɔɔ manɛ kagn ɓɛɛ, n daa nɛɛ mani.

⁶ A vuu kagn gbete ɓɔɔ n dɔɔ nɔɔ ka yuu ɓiɓɛ ɓɛɛ, nɔɔ bɛ̃ɛ rɛɛ vuu shi kpang ɓɔɔ rɛɛ zang ɓɔɔ zang ɓaa ri nɛɛ zang Nikola ri palɛ ɓɛɛ katɔ, naa ɓɔɔ n bɛ̃ɛ dòo katɔ kɔ ɓɛɛ.

⁷ Zang ɓɔɔ shoo ɓiɓɛ nɛɛ kagn, wu ɓaayi wu tãa vuu kɔ Suru Laa kɔɔ rɛɛ zang ɓɔɔ ri dũng Laa ɓee. Zang ɓɔɔ nɛɛ mã danggn nɛɛ ɓa vuu gãsɛnang yuu, n naa yaa wukɔ, wu shaa jĩng laa ɓɔɔ ra ka laa ɓɔɔ a zang suru bii ɓɔɔ waa nyaa kpang, ɓɔɔ ta ka yeti jaa ɓɔɔ Laa shĩili ɓɛɛ.”

Nyaa ɓɔɔ zang shòng zang ɓɔɔ ri dũng Laa ka gari Simina ɓɛɛ

⁸ A kɔɔ m tɔkn nɛɛ, “Bèe zang nyaa shonang Laa ɓɔɔ ka lapa ɓɔɔ gãng jĩng ka zang Laa ɓɔɔ ri ka gari Simina ruu keɓe, mɔɔ kɔɔ wu nɛɛ, Wee ruu ɓɔɔ nwang nɛɛ nyaa zang ɓɔɔ wukɔ ka tĩng shɔɔnang wukɔ ti waa nyaa knti ɓɛɛ, ɓɔɔ vɔrɛ, a yupaa tɔkn ningkãari ɓɛɛ.

⁹ N zi jĩng ɓɔɔ nɔɔ dang ɓɛɛ tɔ. N ti zi tɔ, nɔɔ vuu ka naa kpang. A niizang nɔɔ wu vuu ka naa kpang, kpang, nɔɔ manɛ wujɛ ying. N ti zi naa ɓɔɔ zang kaɓa ɓɔɔ ri suu sèé, ri tuu yuu ɓarɛ naa ri zang Yahudi, ri rangkɛ ruu shi kpang ka yuu manɛ tɔ. Ri ɓarɛ zang ɓɔɔ ri dũng Sheetang ɓɛɛ.

¹⁰ Nɔ́ɔ kaa vɔrɔ jĩng dannang ɓɔɔ yaa kaa tɔkɔlɔng nɔɔ dǎng kaa tɔ kaɓa kpang. Nɔɔ ɓaa shoo, Sheetang naa gãsɛ nɔɔ ditɔ, naa shingnɛ zang wu mã zang ɓɔɔ ka teteng manɛ ka sãa. Zang naa dang nɔɔ jĩng diki kopi kɔ nwani. Nɔ́ɔ yaa danggn ɓɔɔ nɔɔ shing ka bii mɛɛ kpang, naa zang nyɔ nɔɔ doo vɔrɔ ɓɛɛ. Tɔ̀ɔ, n a nɔɔ suru bii ɓɔɔ waa nyaa kpang, nɔ́ɔ walɛ bannang kati.

¹¹ Zang ɓɔɔ shoo ɓiɓɛ nɛɛ kagn wu ɓaayi wu tãa vuu ɓɔɔ Suru Laa kɔɔ rɛɛ zang ɓɔɔ dũng Laa ɓɛɛ. Zang ɓɔɔ shii gbãng gbãng nɛɛ ɓa vuu gãsɛnang yuu, vɔrɔ ɓɔɔ zang naa vɔ tɔkn, daa kaa doo ziti, naa palɛ wu vuu ɓɔɔ kpang tingkiring.”

Nyaa ɓɔɔ zang shòng zang ɓɔɔ ri dũng Laa ka gari Pagamu ɓɛɛ

¹² A kɔɔ m tɔkn nɛɛ, “Bèe zang nyaa shonang Laa ɓɔɔ ka lapa ɓɔɔ gãng jĩng ka zang Laa ɓɔɔ ri ka gari Pagamu ɓɛɛ ruu keɓe, mɔɔ kɔɔ wu nɛɛ, Wee ruu ɓɔɔ nwang nɛɛ nyaa zang ɓɔɔ yere bang ɓiɓɛ kagn nyaa ɓiɓɛ ziti, wɔng katɔ kɔ nandon ɓɛɛ.

¹³ N zi nɔng ɓɔɔ nɔɔ nwàng gn ɓɛ̀ɛ́ tɔ, ka nɔng ɓɔɔ Sheetang roo kpanti kagn ɓɛɛ. Nɔɔ yaa kɔɔnang kpang nɛɛ nkɔ kpanti manɛ kpang. Nɔɔ yaa danggn ɓɔɔ nɔɔ shing ka bii mɛɛ kpang doo nɛɛ mani, ka laa ɓɔɔ zang nyɔ Antiba, yɔɔ ɓɔɔ dũng m nɛɛ yeti gbete vɔrɔ ɓɛɛ. Zang nyɔ wu vɔrɔ ka teteng manɛ, ka nɔng ɓɔɔ Sheetang nwang ɓɛɛ, ka ruu ɓɔɔ, kɔɔ ka shoo zang piti nɛɛ wu dũng ɓi nkɔ ɓɛɛ.

¹⁴ A vuu shi kpang ɓɔɔ nɔɔ palɛ kaa gn, ɓɔɔ n kasɛ kpang ɓɛɛ. Zang ɓɔɔ kagn ka teteng manɛ ɓɔɔ ri palɛ vuu ɓɔɔ yɔɔ ɓɔɔ zang ɓaa wu nɛɛ Balamu tusu zang ɓɛɛ. Balamu ɓɔɔ kpɛ̃ɛrɛ Balak naa ɓɔɔ wu shing zang Isirela, ri palɛ vuu shi kpang, nɛɛ ri shaa vuu shaanang ɓɔɔ zang a vaka, nɛɛ ri palɛ dũndũng.

¹⁵ Nɔɔ doo nɔngkɔ, zang ɓɔɔ kagn ka teteng manɛ, ɓɔɔ ri palɛ zɔ̃ng vuu shi kpang, ɓɔɔ zang ɓɔɔ ri dũng Nikola ri palɛ ɓɛɛ.

¹⁶ Ka ruu nɔngkɔ, nɔɔ kɔ̃sɔ yeti ta. Naa nɔngkɔ kpang, n a ditɔ ka bii manɛ, n ta sĩiri nɛɛ ri nɛɛ yere bang ɓɔɔ nwáng nɛɛ nyaa mɛɛ ɓɛɛ.

¹⁷ Zang ɓɔɔ shoo ɓiɓɛ nɛɛ kagn, wu ɓaayi, wu tãa vuu ɓɔɔ Suru Laa kɔɔ rɛɛ zang ɓɔɔ ri dũng Laa ɓɛɛ. Zang piti ɓɔɔ nɛɛ ɓa vuu gãsɛnang yuu, n á wu vuu shaanang ɓɔɔ zang ɓaa nɛɛ maanaa ɓɔɔ zang waasɛ katɔ ɓɛɛ. N ti á wu tari ɓɔɔ kagn puru nɛɛ nung shɔɔ ɓɔɔ zang bee ka yuu tari bìí. Zang ɓɔɔ zi nung bìí kpang ɓi zang ɓɔɔ tarɛ kɔ zi shɛ̃ɛning.”

Nyaa ɓɔɔ zang shòng zang ɓɔɔ ri dũng Laa ka gari Tayatira ɓɛɛ

¹⁸ A kɔɔ m tɔkn nɛɛ, “Bèe zang nyaa shonang Laa ɓɔɔ ka lapa ɓɔɔ gãng jĩng ka zang Laa ɓɔɔ ri ka gari Tayatira ɓɛɛ ruu keɓe, mɔɔ kɔɔ wu nɛɛ: Wee ruu ɓɔɔ nwang nɛɛ nyaa Jaa Laa, ɓɔɔ jĩng ɓiɓɛ yakɛ nɔng naa nyɛlɛ waa ɓɛɛ, doo ɓiɓɛ kɔlɔ naa saka ɓɔɔ zang ɓaa nɛɛ tagula ɓɔɔ zang mɔlɔ bii ɓiɓɛ nɛɛ waa ɓɛɛ.

¹⁹ N zi shonang ɓɔɔ nɔɔ palɛ ɓɛɛ tɔ, nɛɛ naa ɓɔɔ nɔɔ kasɛ zang ɓɛɛ, nɛɛ danggn ɓɔɔ nɔɔ shing ɓɛɛ. Naa ɓɔɔ nɔɔ yi zɔɔ naa ka bii tɔ̃ɔ, nɔɔ ti mã danggn ɓɛɛ. N ti zi tɔ vuu ɓɔɔ nɔɔ palɛ kãntang, ɓa ɓɔɔ nɔɔ pálɛ́ ka tĩng ɓɛɛ katɔ.

²⁰ A vuu ɓɔɔ nɔɔ palɛ kaa gn gbete ɓɔɔ n kasɛ kpang ɓɛɛ. Naa ɓɔɔ nɔɔ yaa jaa soro kaɓa, ɓɔɔ zang ɓaa wu nɛɛ Jezebel, nwàng ka teteng manɛ ɓɛɛ. A kpɛ̃ɛrɛ zang mɛɛ, nwãarɛ ri nɛɛ ri palɛ dũndũng, nɛɛ ri ti shaa vuu shaanang ɓɔɔ zang a vaka ɓɛɛ.

²¹ N yaa wu gbalang wu kɔ̃sɔ yeti ɓiɓɛ, a bɛ̃ɛ yeti kɔ̃sɔnang, wu yaa dũndũng palɛnang.

²² Ka ruu nɔngkɔ, n shing wu ditɔ, wu roo kɔnang, wu roo ka latãng wu dang jĩng. Zang ɓɔɔ ri palɛ dũndũng nɛɛ wu, ri roo kɔnang jong. N shingnɛ ri dang jĩng gbãng gbãng, naa ri kɔ̃̀sɔ̀ yeti, ri yaa zɔ̃ng vuu shi kpang ɓɔɔ wu palɛ kaɓa kpang ɓɛɛ.

²³ N naa nyɔkɔ zang ɓɔɔ ri dũng wu vɔrɔ nandon. Tɔ̀ɔ, zang ɓɔɔ ri dũng Laa ka nɔng piti, ri zi kati nɛɛ nkɔ zang ɓɔɔ zi rɛ̃rɛnang zang tɔ nɛɛ yeti ɓarɛ piti ɓɛɛ. N a zang ɓu vuu ka doo shonang ɓɔɔ wu palɛ ɓɛɛ.

²⁴ Ɓɔɔ zang ɓɔɔ ri yaa ka Tayatira ɓɛɛ, ɓɔɔ nɔɔ dũng vuu ɓɔɔ Jezebel kpɛ̃ɛrɛ zang ɓɛɛ manɛ kpang, nɔɔ ti zi rɛɛ vuu shi kpang ɓɔɔ zang ri ɓaa nɛɛ vuu Sheetang ɓɔɔ hãa bii dɔɔli ɓɛɛ manɛ kpang ɓɛɛ. N kɔɔ nɔɔ, wu vuu ɓɔɔgn nɛɛ nɔɔ palɛ kpang.

²⁵ Nɔɔ yiti vuu ɓɔɔ ka naa manɛ gbãng gbãng, n gbãayu nɛɛ mani.

²⁶ Zang piti ɓɔɔ nɛɛ ɓa yuu vuu gãsɛnang, nɛɛ ti palɛ vuu ɓɔɔ n tãa tĩnang, diki ɓɔɔ n a kagn wu a nɛɛ mani. N naa a wu naa, wu roo kpanti ka yuu rɛɛ zang tipi ɓɔɔ ka koo keɓe ɓɛɛ.

²⁷ Naa ɓɔɔ Daa mɛɛ a m naa ka yuu ɓarɛ ɓɛɛ. Naa tuu labalang kpanti ɓɔɔ zang palɛ nɛɛ saka ɓɛɛ, wu roo kpanti ka yuu rɛɛ tipi kaɓa. Wu naa sãlɛ ri pũusi pũusi naa ɓɔɔ zang sãlɛ ɓari tapɔng ɓɛɛ.

²⁸ N ti naa a zang ɓɔɔ ɓa vuu gãsɛnang yuu, sang ɓɔɔ yakɛ nɔng nɛɛ yuu gãndi ɓɛɛ.

²⁹ Zang ɓɔɔ shoo ɓiɓɛ nɛɛ kagn, wu ɓaayi wu tãa ruu kɔ Suru kɔɔrɔ rɛɛ zang Laa ɓee.”