Vuu ɓɔɔ zang nwangsɛ Yɔhana 15 - Nyaa Shɔɔ Ɓɔɔ Laa a Ɓɛɛ

Zang nyaa shonang Laa ɓɔɔ ri ka lapa manziti, ri atɛ kɔnang manziti

¹ Ka knti vuu keɓe, n zi vuu ɓɔɔgn ɓɔɔ zang zirɛ zang mã naa ka danggn ɓɛɛ ka lapa, daa naa ɓɔɔ zang rang yee ɓiɓɛ kpang. N zi zang nyaa shonang Laa ɓɔɔ ri ka lapa ɓɛɛ, ri manziti, ri yiti kɔnang manziti ka naa. Rɛɛ kɔnang keɓe, rikɔ kɔnang ɓɔɔ Laa di nyaa kɔnang atɛnang kaa gn ɓɛɛ kɔ. Laa hangsɛ nyaa gnvɔ ɓiɓɛ kaa nɛɛ rikɔ.

² A n zi vuu ɓɔɔ nwang waapo ɓɔɔ kɔlɔ naa vĩilaa, a waa ti shaa kagn ɓɛɛ. Zang kaɓa ɓɔɔ ri ɓa yɔpɔ jĩngti kaɓa yuu ɓɛɛ, nɛɛ vuu ɓɔɔ zang palɛ nwang wu, nɛɛ lamba nung ɓiɓɛ piti ɓɛɛ, ri shiiri ka nyaa waapo kaɓa. Ri yi vũngta ɓɔɔ Laa a ri ɓɛɛ kaa naa.

³ Ri gaa soo ɓɔɔ Musa zang nyaa shonang Laa ri gaa ɓɛɛ, a Jaa Mɛ̀ɛrɛ́ ti gáa jong ɓɛɛ, ri kɔɔyi nɛɛ, “Laa ɓɔɔ mɔkɔ kpanti ɓuru ɓɛɛ, ɓɔɔ mɔɔ ɓa zang piti katɔ ɓɛɛ. Shonang ɓaaɓɛ bang dɔɔli, ti shing zang, zang mã naa ka danggn. Mɔkɔ kpanti zang ɓɔɔ ri ka koo nandon Vuu ɓɔɔ mɔɔ palɛ ɓɛɛ, ɓi tɔ̃ɔ, a mɔɔ ti zang ɓɔɔ palɛ vuu ɓɔɔ niizang.

⁴ Ɓu wi kaa vɔrɔ ɓaaɓɛ, wu ti a mɔɔ bannang kpang wiya kpanti Laa? Ɓi mɔkɔ gbete ɓɔɔ shi kpang ka bii ɓaaɓɛ kpang ɓɛɛ. Zɔ̃ng zang tipi piti piti ri naa arɛ ri bang mɔɔ, ka ruu ɓɔɔ, ri zi naa ɓɔɔ mɔɔ dɔng ruu tɔ tɔ̃ɔ ɓɛɛ.”

⁵ Ka knti vuu keɓe, n zirɛ, zang puu nɔng ɓɔɔ shi kpang ɓi kagn kpang ɓɛɛ, nɔng ɓɔɔ zang shĩili vuu ɓɔɔ tusu nyaa ɓɔɔ Laa a ɓɛɛ, ɓɔɔ ka Gãa Laa ka lapa ɓɛɛ.

⁶ Zang nyaa shonang Laa ɓɔɔ ka lapa manziti ɓɔɔ ri atɛ kɔnang manziti kaɓa, ri nwangnɛ yeti Gãa Laa. Ri hãlɛ fɔ̃ɔrɔ puru ɓɔɔ kɔlɔ katɔ ɓɛɛ, ri ti mã guruji ɓɔɔ zang palɛ nɛɛ zinariya ɓɛɛ, ka danggn ɓarɛ.

⁷ Vuu gbete ka teteng vuu dɛ̃ɛti ɓɔɔ suru bii ɓarɛ kagn kaɓa, álɛ́ rɛɛ zang nyaa shonang Laa ɓɔɔ ri ka lapa ɓɛɛ ɓɔɔ ri manziti ɓɛɛ kaɓa, waka ɓɔɔ zang palɛ nɛɛ zinariya gbete gbete. Laa ɓɔɔ nwáng ɓi ningkãari dòndòng ɓɛɛ, gnvɔ ɓiɓɛ yiki nyaa waka katɔ.

⁸ Zĩiri ɓɔɔ nwangnɛ bannang Laa, a ɓɔɔ nɛɛ naa vuu palɛnang ɓiɓɛ, yi nyaa Gãa Laa. Kɔnang manziti ɓɔɔ rɛɛ zang nyaa shonang Laa ɓɔɔ ri ka lapa ɓɛɛ, ri atɛ kaɓa. Ri nɛɛ palɛ tɔ nandon, tɔ̀ɔ, zang ɓɔɔ wu zunung ɓɔɔ wu shɛ̃ɛ yeti Gãa Laa kaɓa ɓɛɛ kati.