Vuu ɓɔɔ zang nwangsɛ Yɔhana 12 - Nyaa Shɔɔ Ɓɔɔ Laa a Ɓɛɛ

Yɔhana zi Jaa soro, a ɓɔɔ sɔkɔ ɓɔɔ ɓaa baabii dɔɔli

¹ A vuu bang ɓɔɔ zang zirɛ zang mã naa ka danggn ɓɛɛ, nwangsɛ bii ka lapa. Vuu keɓe ɓi Jaa soro zuu bii nɛɛ làa, a naa doo ɓiɓɛ ka yuu shala. A kãng lapoo yuu kpanti ɓɔɔ, zang palɛ nɛɛ sàng kopi tu ziti ka yuu ɓiɓɛ.

² Bɛ̀ɛ́ tuu jaa ka yeti, a laa jaa yinang ɓiɓɛ a tɔ, kaa nyaa ka ruu jaa ɓɔɔ kɔng wu ɓɛɛ.

³ A vuu bang ɓɔɔgn ɓɔɔ zang zirɛ zang mã naa ka danggn nwangsɛ bii ka lapa. Vuu keɓe ɓi sɔkɔ nwɛ̃ɛri bang, baabii katɔ, ta yuu manziti nɛɛ jee kopi, ti kãng lapoo yuu kpanti ka yuu manziti nandon.

⁴ Naa zang basɛ sang kɔ ka lapa ɓee tĩng taati. Sɔkɔ keɓe, waarɛ ɓɔɔ tĩng gbete nɛɛ dãng ɓiɓɛ, vang ri ka tipi. A sɔkɔ bìí daa shii ka tĩng jaa soro ɓɔɔ nɛɛ wu yi kaa jaa ɓɛɛ, nɛɛ tɔɔ wu shaa jaa ɓɔɔ jaa soro yi ɓɛɛ kati.

⁵ A jaa soro yi jaa zang varɛ, ɓɔɔ naa roo kpanti ka yuu zang koo nandon ɓɛɛ. Laa ɓɔɔ kpanti yiti ka naa, ɓɔɔ ɓiɓɛ, zang palɛ nɛɛ saka. Ka ɓɔɔ jaa nwang hn, zang tantɛ wu tuunang raayi, zang daa nɛɛ wu ka bii Laa, ka nɔng ɓɔɔ wu nwang ka yuu laa nwannang kpanti ɓɛɛ.

⁶ A jaa soro bìí ti yurɛ daa ka jĩngti, ka nɔng ɓɔɔ Laa gbàrɛ̀ wu ɓɛɛ. Zang gãng jĩng ka wu diki labang gbete tu laa maani dakn ziti a tu laa taati ɓɛɛ.

⁷ A sĩiri yupaa ka lapa. Zang nyaa shonang Laa ɓɔɔ ka lapa ɓɛɛ ɓɔɔ bang, ɓɔɔ zang ɓaa wu nɛɛ Maakel ɓɛɛ, nɛɛ rɛɛ zang nyaa shonang Laa ɓɔɔ ri ka lapa ɓɛɛ, ɓɔɔ ri nɛɛ wu ri ta sĩiri nɛɛ sɔkɔ bang kaɓa. Sɔkɔ bang nɛɛ rɛɛ zang nyaa shonang Laa ɓɔɔ ka lapa, ɓɔɔ ri dũng ɓarɛ kaa sɔkɔ keɓe, ri taarɛ yuu gbãng gbãng.

⁸ A Maakel nɛɛ zang ɓiɓɛ ri shaa ri, a ri zãa rɛɛ sɔkɔ nɛɛ zang ɓiɓɛ nwannang ka lapa.

⁹ A ri nwangsɛ sɔkɔ bang nɛɛ lapa, ri tasɛ wu ka koo nɛɛ rɛɛ zang ɓɔɔ ri dũng wu nandon. Sɔkɔ bang kaɓa zang ɓaa nung ɓiɓɛ nɛɛ Sheetang, wukɔ kpanti rɛɛ suru shi kpang. Wukɔ ti nwãarɛ zang ka koo dɔɔ tɛ̃ɛ tɛ̃ɛ.

¹⁰ A n tãa yee mɛɛ nɛɛ lapa kɔɔyi nɛɛ, “Kãntang keɓe Laa ta yuu ɓuru tɔ, zang ti zi naa vuu palɛnang ɓiɓɛ tɔ, nɛɛ kpanti roonang ɓiɓɛ. A zang ti zi naa vuu palɛnang Kirisi ɓiɓɛ tɔ, ka ruu ɓɔɔ, zang ɓɔɔ bɛ̀ɛ́ shii ka tĩng Laa kɔɔrɔ ruu shi kpang, ka yuu rɛɛ manzung ɓuru diki diki nɛɛ zĩi nɛɛ laagɛ̃, zang hing wu tɔ nɛɛ lapa zang tasɛ wu tɔ ka koo ɓɛɛ.

¹¹ Ri ti ɓa wu yuu tɔ, nɛɛ naa vuu palɛnang zĩi Jaa Mɛ̀ɛrɛ́, a ɓɔɔ ka ruu ruu ɓiɓɛ ɓɔɔ ri kɔɔyi nɛɛ ɓi niizang ɓɛɛ. Ri ti kasɛ tɔ nɛɛ ri vɔrɛ ka ruu ɓiɓɛ.

¹² Ka ruu nɔngkɔ, zang ri tãa tĩnang ta ka lapa. Zang ɓɔɔ ri nwang ka lapa piti ri tãa tĩnang. A ɓɔɔ tipi nɛɛ waapo, jĩng dannang ɓi kagn yuu ɓarɛ, ka ruu ɓɔɔ, Sheetang a tɔ, ka nɔng ɓarɛ ka tipi ɓɛɛ. Gnvɔ shaa wu dɔɔli, ka ruu ɓɔɔ, zi tɔ nɛɛ diki ɓiɓɛ yaa kaa tɔkɔlɔng ɓɛɛ.”

¹³ Ka ɓɔɔ sɔkɔ bang zirɛ zang nwangsɛ wu tɔ nɛɛ lapa, gaayu ɓɔɔ wu hing jaa soro ɓɔɔ yi jaa zang varɛ ɓɛɛ.

¹⁴ A zang a jaa soro nasãng ziti naa ɓɔ̀ɔ́ gangong, ka ruu nɔngkɔ, tãayi yaa sɔkɔ bang. Tãayi daa ka nɔng ɓɔɔ zang gbàrɛ̀ wu ka jĩngti ɓɛɛ. Daa nwang ka nɔngkɔ, zang gãng jĩng ka wu saa taati nɛɛ shala mangbete.

¹⁵ A sɔkɔ bang kaɓa, jeng mii nɛɛ nyaa ɓiɓɛ naa rang, ka knti jaa soro bìí nɛɛ mii wu tuu jaa soro kati.

¹⁶ A tipi yi jaa soro naa ka bii. Tipi puuyi a mii ɓɔɔ sɔkɔ bang jeng nɛɛ nyaa daa kagn nandon.

¹⁷ Ka ruu nɔngkɔ, gnvɔ shaa sɔkɔ bang nɛɛ jaa soro kaɓa dɔɔli. Daayi nɛɛ wu daa ta sĩiri nɛɛ rɛɛ zɔ̃ng jaa soro kaɓa, ɓɔɔ ri nandon ri palɛ ɓarɛ vuu ɓɔɔ Laa kasɛ ɓɛɛ, ɓɔɔ ri ti shing danggn tɔ, ka ruu ɓɔɔ, niizang ɓɔɔ Yeesɔ Kirisi tùsù ri ɓɛɛ.

¹⁸ A sɔkɔ bang kaɓa daa shii ka yuu seseele, ka nyaa waapo.