Yɔhana 11 - Nyaa Shɔɔ Ɓɔɔ Laa a Ɓɛɛ

Naa ɓɔɔ Liyazaru vɔ ɓɛɛ

¹ Yɔɔ ɓɔɔ kagn roo gãa ka Bɛtani, zang ɓaa wu nɛɛ Liyazaru. Vuu pálɛ́ wu katɔ. Bɛtani ɓi gari rɛɛ Marayamu nɛɛ jaa niiɓɛ zang soro ɓɔɔ zang ɓaa wu nɛɛ Mata ɓɛɛ.

² Marayamu keɓe, kɔ tũuru Yeesɔ nung ɓɔɔ pũ̀ngkù tɔ̃ɔ tɔ̃ɔ ka doo, a àlɛ̀ nɛɛ suuyuu ɓiɓɛ. Liyazaru ɓɔɔ vuu palɛ keɓe, jaa niiɓɛ kɔ.

³ Rɛɛ ɓeenaa soro ziti keɓe, ri shòng Yeesɔ nyaa tɔɔ, “Kpanti, vuu palɛ zang ɓɔɔ mɔɔ kasɛ wu dɔɔli ɓɛɛ katɔ.”

⁴ Ɓɔɔ Yeesɔ tãa ruu keɓe, kɔɔyi tɔɔ, “Kɔnang keɓe nyɔ wu vɔrɔ kpang. Vuu keɓe pálɛ̀ nɔngkɔ, tɔ̀ɔ, wu tusu zang bannang Laa, wu ti tusu zang bannang Jaa Laa kaa jong.”

⁵ Yeesɔ kasɛ ruu Mata katɔ nɛɛ jaa niiɓɛ ɓɔɔ soro, a ɓɔɔ Liyazaru.

⁶ Ɓɔɔ wu tãa nyaa nɛɛ vuu palɛ Liyazaru katɔ, nwang doo nɛɛ mani ka nɔng ɓɔɔ bɛ̀ɛ́ wu kagn ɓɛɛ, diki ziti tɔkn.

⁷ A kɔɔ zang ɓɔɔ ri mantɛ vuu ka bii ɓiɓɛ nɛɛ, “Ruu daa nɔɔ tipi Yahudi tɔkn.”

⁸ A ri kasɛ wu nyaa tɔɔ, “Maalang wee dòó naa ɓee, zang Yahudi nɛɛ ri luku mɔɔ nɛɛ tari mɔɔ vɔrɛ, mɔɔ nɛɛ mɔɔ gbãayu ka nɔngkɔ tɔkn ya?”

⁹ Yeesɔ kɔɔ ri tɔɔ, “Laa nɛɛ nwáng tɔ, palɛ saka kopi tu ziti tɔɔ wu hãa nyaa kpang ya? Zang ɓɔɔ rakɛ nɛɛ laagɛ̃, kpaa doo ɓi kpang, ka ruu ɓɔɔ, vuu ɓɔɔ yakɛ koo, yakɛ nɔng katɔ ɓɛɛ.

¹⁰ Naa rakɛ nɛɛ nɔng zĩi, kpaa doo katɔ, ka ruu ɓɔɔ, vuu ɓɔɔ yakɛ wu nɔng kpang ɓɛɛ.”

¹¹ Yeesɔ kɔɔ ruu keɓe tɔ, a gisi ɓɔɔ kagn tɔɔ, “Hingro yi wusang ɓuru Liyazaru tɔ. N daa ditɔ, n daa hingsi wu.”

¹² Zang ɓɔɔ ri mantɛ vuu ka bii ɓiɓɛ, ri kasɛ wu nyaa tɔɔ, “Kpanti, hingro nɛɛ yi wu katɔ, hingsi jĩng ditɔ.”

¹³ A ɓeekpang Yeesɔ gãsɛ ɓi ɓɔɔ Liyazaru vɔ katɔ ɓɛɛ, ri tɔɔ ɓarɛ naa Liyazaru roo ɓi hingro siri.

¹⁴ A Yeesɔ kɔɔ ri kaa faarik, tɔɔ, “Liyazaru vɔ tɔ.

¹⁵ Wee bɛ̀ɛ́ n nɛɛ wu kpang ɓee, wukɔ tɔ̃ɔ, ka ruu manɛ, tɔ̀ɔ, nɔɔ shing danggn kati. Ruu dita bii ɓiɓɛ.”

¹⁶ A Tooma, ɓɔɔ zang ɓaa wu nɛɛ jaa bãnang ɓɛɛ, kɔɔ rɛɛ zang ɓɔɔ wu mantɛ vuu nɛɛ ri ka bii Yeesɔ ɓɛɛ tɔɔ, “Ruu dita, ruu daa vɔ nɔɔ nɛɛ wu.”

Yeesɔ kɔ wisi zang paa nɛɛ sàa, wukɔ ti a zang suru bii

¹⁷ Yeesɔ naa shɛ̃ɛ nɔng, bɛ̀ɛ́ Liyazaru roo sàá tɔ, daa diki dɛ̃ɛti.

¹⁸ Gari Bɛtani nɛɛ Urushalima daa mɛli ziti kpang,

¹⁹ zang tipi Yahudi dɔɔli ri a tɔ, nɛɛ ri jee Marayamu nɛɛ Mata nyavɔ jaa nàá ɓarɛ.

²⁰ Mata tãa nyaa nɛɛ Yeesɔ a kana, a nwangnɛ, nɛɛ wu daa kpisi wu yuu. Marayamu nwang ɓi kaa yeti gãa.

²¹ Mata kɔɔ wu nɛɛ, “Kpanti, naa mɔɔ nɛɛ ka nihn, jaa nàá mɛɛ nɛɛ vɔ kpang.

²² N ti zi tɔ, naa mɔɔ gàa dòo viya ka naa Laa kãntang, a mɔɔ katɔ.”

²³ Yeesɔ kɔɔ wu tɔɔ, “Jaa nàá ɓaaɓɛ yupaa ditɔ.”

²⁴ Mata kasɛ wu nyaa tɔɔ, “N zi tɔ, naa yupaa ditɔ ka diki ɓɔɔ Laa naa wisi zang paa nɛɛ sàa, ka diki ɓɔɔ koo waa nyaa ɓɛɛ.”

²⁵ Yeesɔ kɔɔ wu tɔɔ, “Nkɔ wisi zang paa nɛɛ sàa, nkɔ ti a zang suru bii. Zang ɓɔɔ nɛɛ shing danggn ka bii mɛɛ, náa vɔ doori, nwáng ningkãari ditɔ tɔkn.

²⁶ Zang ɓɔɔ doo ningkãari, nɛɛ shing danggn ka bii mɛɛ, vɔ kpang dòndòng, mɔɔ shing danggn tɔ kagn nɔngkɔ ya?”

²⁷ Mata kasɛ wu nyaa tɔɔ, “Nn, Kpanti, N shing danggn tɔ nɛɛ, mɔkɔ Kirisi Jaa Laa, ɓɔɔ naa a ka koo ɓɛɛ.”

Yeesɔ kaayi

²⁸ Mata kɔɔ ruu keɓe tɔ, a gbãayu daa yeti gãa, daa ɓaa jaa niiɓɛ Marayamu nyaa dang gbete, a kɔɔ wu nɛɛ, “Maalang a tɔ, hɛ̃ɛ nɔng ɓaaɓɛ.”

²⁹ Ɓɔɔ Marayamu tãa naa weɓe, yupaa pati nwang ka biling, daa ka bii Yeesɔ.

³⁰ Bɛ̀ɛ́ Yeesɔ shɛ̃ɛ yeti gari gn kpang. Bɛ̀ɛ́ dòo ka nɔng ɓɔɔ Mata kpisi wu yuu ɓɛɛ.

³¹ Ɓɔɔ rɛɛ zang Yahudi ɓɔɔ bɛ̀ɛ́ ri nɛɛ Marayamu ka yeti gãa, ri mã wu danggn, ri zi naa ɓɔɔ wu seepaa pati nwáng ka biling, ri dũng wu ka knti. Ri kɔɔ ɓarɛ nɛɛ naa dàa kaa ɓi nyavɔ ka yuu saa.

³² Marayamu naa shɛ̃ɛ nɔng ɓɔɔ Yeesɔ kagn tɔ. Ɓu doo ɓɔɔ zi wu hn, daa tang ka tĩng ɓiɓɛ kɔɔ wu tɔɔ, “Kpanti, naa mɔɔ nɛɛ ka nihn, jaa nàá mɛɛ nɛɛ vɔ kpang.”

³³ Yeesɔ zi naa ɓɔɔ wu kaayi, a zang Yahudi ɓɔɔ ri a nɛɛ wu ri kaa jong ɓɛɛ. Vuu bìí kpãa wu ka yeti dɔɔli, a gn ti kɔng wu dɔɔli.

³⁴ A Yeesɔ hɛ̃ɛ ri nɛɛ, “Nɔɔ gbãa wu ka niya?” Ri kɔɔ wu nɛɛ, “Arɛ mɔ́ɔ dàa zirɛ, Kpanti.”

³⁵ Yeesɔ kaayi nɛɛ miiri ka jĩng.

³⁶ Zang Yahudi ri kɔɔyi nɛɛ, “Nɔɔ zi naa ɓɔɔ kasɛ ruu ɓiɓɛ ɓɛɛ.”

³⁷ A zang ɓɔɔ ri kɔɔ ɓarɛ nɛɛ, “Zang ɓɔɔ másɛ̀ jĩng zang ɓɔɔ jĩng ringtang, zunung ɓɔɔ wu zãa Liyazaru vɔnang kpang ya?”

Yeesɔ wisi Liyazaru paa nɛɛ saa

³⁸ Gn kɔng Yeesɔ tɔkn, a daa ka yuu sàa. Sàa bii ɓi yeng puru ɓɔɔ zang ku nyaa nɛɛ tari ɓɛɛ.

³⁹ Yeesɔ kɔɔ ri tɔɔ, “Nɔɔ dɔ̃ tari, nɔɔ yaa nɔng.” A Mata jaa nàá Liyazaru kasɛ wu nyaa tɔɔ, “Kpanti, wee diki ɓiɓɛ daa tɔ dɛ̃ɛti ka saa ɓee, pũng tɔ, pũngku kaa tɔ.”

⁴⁰ Yeesɔ kɔɔ wu tɔɔ, “N kɔɔ mɔɔ kpang nɛɛ, naa mɔɔ shing danggn mɔɔ zi bannang Laa katɔ kpang ya?”

⁴¹ Ka ruu nɔngkɔ, ri dɔ̃ tari ri yaa nɔng. A Yeesɔ tuu jĩng ka lapa kɔɔyi tɔɔ, “Daa mɛɛ, n zãa mɔɔ tɔ, ka ruu ɓɔɔ, mɔɔ tãa m tɔ ɓɛɛ.

⁴² N zi tɔ, mɔɔ tãarɛ m katɔ diki diki. N kɔɔ vuu keɓe ka ruu zang kɔ ri shiiri ka nihn ɓee, tɔ̀ɔ, ri shing danggn kati nɛɛ mɔkɔ shong m.”

⁴³ Kɔɔ tɔ naa weɓe, a ɓaa nyaa kaa nabm nɛɛ, “Liyazaru, nwáng ta, mɔɔ a ka biling.”

⁴⁴ Liyazaru nwangnɛ, doo naa ɓɔɔ zang dang wu nɛɛ fɔ̃ɔrɔ ɓɔɔ zang gbãa vɔrɔ nɛɛ mani ɓɛɛ. Zang ti mã wu jĩng katɔ nɛɛ sɛ̃ɛ fɔ̃ɔrɔ. Yeesɔ kɔɔ zang tɔɔ, “Nɔɔ kãlɛ wu ta, nɔɔ yaa wu, wu daayi.”

Zang Farisi ri kãa gbalang nɛɛ ri nyɔ Yeesɔ vɔrɔ

⁴⁵ A zang Yahudi dɔɔli ɓɔɔ ri arɛ nɛɛ ri jee Marayamu nyaa ɓɛɛ. Ri zi vuu ɓɔɔ Yeesɔ palɛ, a ri shing danggn ka bii ɓiɓɛ.

⁴⁶ Zang ɓɔɔ ri daa ɓarɛ ka bii zang Farisi ri daa kɔɔ ri vuu ɓɔɔ Yeesɔ palɛ ɓɛɛ.

⁴⁷ A rɛɛ kpanti zang ɓɔɔ ri dɔɔ vuu ka Gãa Laa nɛɛ rɛɛ zang Farisi, ri ɓaa nyaa ka rɛɛ zang ɓɔɔ ri jɛ̃ɛ zang doo ruu kɔ, ɓɔɔ nimbang, a ri hɛ̃ɛ ri tɔɔ, “Ruu pálɛ̀ nɔɔ ɓu kaa viya? Yɔɔ keɓe pálɛ̀ vuu ɓɔɔ zang zirɛ, zang mã naa ka danggn ka naa dɔɔli.

⁴⁸ Naa ruu yaa yɔɔ keɓe, zang ri shing danggn katɔ bii ɓiɓɛ nandon. Zang tipi Rooma ri a katɔ ri jili Gãa Laa ɓuru, ri ti see zang tipi ɓuru nandon.”

⁴⁹ Zang gbete ka teteng ɓarɛ, ɓɔɔ zang ɓaa wu nɛɛ Kayifa, ɓɔɔ wukɔ kpanti zang ɓɔɔ ri dɔɔ vuu ka Gãa Laa ka sáa kaɓa, kɔɔ ri tɔɔ, “Nɔɔ zi vuu manɛ kpang.

⁵⁰ Nɔɔ zi kpang nɛɛ ɓɔɔ zang gbete vɔ ka nung zang dɔɔli wukɔ tɔ̃ɔ jong, ka nung ɓɔɔ zang tipi ɓuru nɛɛ vɔ nandon ɓɛɛ kpang ya?”

⁵¹ Kayifa zɔ̃ng wu nɛɛ yeti ɓiɓɛ, nɛɛ wu kɔɔ vuu keɓe kpang. Kɔɔ nɔngkɔ, ka ruu ɓɔɔ, Laa shing wu nɛɛ wu kɔɔyi. Kayifa kɔ kpanti zang ɓɔɔ ri dɔɔ vuu ka Gãa Laa ka sáa kaɓa, ka ruu nɔngkɔ, kɔɔ zang vuu ɓɔɔ naa a ɓɛɛ. Kɔɔyi nɛɛ Yeesɔ naa vɔ ka ruu zang Yahudi.

⁵² Wu ti ka ruu ɓarɛ kɔ shɛ̃ɛning kpang. Vɔrɛ nɛɛ tɔɔ wu kpalɛ zang Laa ɓɔɔ zang tantɛ ri ka koolaa kaa jong nɔng gbete.

⁵³ Rɛɛ zang bang bang zang Yahudi ri gaayu gbalang ɓɔɔ ri nyɔ wu vɔrɔ kãanang nɛɛ diki keɓe kɔ.

⁵⁴ Ka ruu nɔngkɔ, Yeesɔ rakɛ tɔ̀ɔ́ waati ka dalɛ ka tipi Yahudi kpang. Yupaa daa ka gari ɓɔɔ zang ɓaa nɛɛ Ifuremu ɓɔɔ naabm nɛɛ waala ɓɛɛ. Daa nwang ka nɔngkɔ nɛɛ zang ɓɔɔ ri mantɛ vuu ka bii ɓiɓɛ ɓɛɛ.

⁵⁵ Diki nyaalaa ɓɔɔ zang kpaa danggn diki ɓɔɔ Laa tɛɛ ɓɛɛ a naabm kana. Zang yùkú paa kana nɛɛ jaa gari, zang daarɛ ka gari Urushalima nɛɛ zang daa palɛ vuu ɓɔɔ zang dang nyaa nɛɛ zang palɛ, nɛɛ tɔɔ Laa wu yaa zang gbalang vuu shi kpang ɓɛɛ. Ri pálɛ̀ vuu keɓe ka gbongkarɛ, tɔ̀ɔ, diki nyaalaa wu a kati.

⁵⁶ Ri kãa nɔng Yeesɔ ka ɓɔɔ ri kpalɛ zɔɔ tɔ, ka Gãa Laa ɓɛɛ. Ri hɛ̃ɛlɛ zɔɔ nɛɛ, “Ɓɔɔ nɔɔ zìrɛ naa yɔɔ keɓe a nɔng nyaalaa keɓe ɓu katɔ ya?”

⁵⁷ Rɛɛ zang bang bang zang ɓɔɔ ri dɔɔ vuu ka Gãa Laa nɛɛ rɛɛ zang Farisi, ri kɔɔ zang nɛɛ, zang ɓɔɔ nɛɛ zi nɔng ɓɔɔ Yeesɔ kagn tɔ, wu naa kɔɔ ri, ri daa yi wu.