Yɔhana 10 - Nyaa Shɔɔ Ɓɔɔ Laa a Ɓɛɛ

Ruu ɓɔɔ Yeesɔ rang nɛɛ nyaa vuu jeenang ka yuu jagãng ɓɛɛ

¹ Yeesɔ kɔɔyi tɔɔ, “N kɔɔ nɔɔ ruu ɓɔɔ niizang kɔ nwani, zang ɓɔɔ nɛɛ tù yeti vaa mɛ̀ɛrɛ́ nɛɛ nyaa vàa kpang, nɛɛ sɔɔ nɔng ɓɔɔgn ɓi shɔngɓɔ, a ɓi ti zang ɓɔɔ ta zang vuu nɛɛ ɓangge ɓɛɛ.

² Zang ɓɔɔ nɛɛ sɔɔ nyaa vàa, ɓi wukɔ jagãng mɛ̀ɛrɛ́ niizang.

³ Zang ɓɔɔ gã nyaa vàa, puu wu katɔ. Mɛ̀ɛrɛ́ ɓiɓɛ ri tãa yee ɓiɓɛ katɔ. Ɓaarɛ ri nyaa nɛɛ nung ɓarɛ gbete gbete, wu nwangsɛ ri ka biling.

⁴ Nɛɛ nwangsɛ ri tɔ, wu sɔɔ tĩng a mɛ̀ɛrɛ́ ri dũng wu, ka ruu ɓɔɔ, ri zi yee ɓiɓɛ nung tɔ ɓɛɛ.

⁵ Ri dũ̀ng zang zanti kpang. Ri yuu zang bìí katɔ kɔ jong, ka ruu ɓɔɔ, ri zi yee ɓiɓɛ nung kpang ɓɛɛ.”

⁶ Yeesɔ rang rɛɛ zang Farisi yee keɓe nɛɛ nyaa vuu jeenang, a ri zi dĩiri nyaa vuu jeenang bìí kaa takpang.

Yeesɔ kɔ Jagãng ɓɔɔ tɔ̃ɔ ɓɛɛ

⁷ Ka ruu nɔngkɔ, Yeesɔ kɔɔ tɔkn nɛɛ, “N kɔɔ nɔɔ ruu ɓɔɔ niizang kɔ nwani, nkɔ nyaa vàa mɛ̀ɛrɛ́.

⁸ Zang ɓɔɔ ri á ka tĩng mɛɛ nandon, ri ɓarɛ shɔngɓɔ, a ri ti zang ɓɔɔ ta zang vuu nɛɛ ɓangge ɓɛɛ. Mɛ̀ɛrɛ́ ri ti ɓáa shoo ka nyaa ɓarɛ kpang.

⁹ Nkɔ nyaa vàa. Zang ɓɔɔ nɛɛ tù nɛɛ bii mɛɛ, zang ta yuu ɓiɓɛ katɔ. Ti hãa nyaa, wu nwangnɛ, wu ti walɛ nɔng shaanang ɓɔɔ tɔ̃ɔ ɓɛɛ.

¹⁰ Shɔngɓɔ ri a ɓarɛ nɔng vuu ɓɔɔnang, ri ti nyɔkɔ zang vɔrɔ, a ri lasɛ vuu. N a m nɛɛ tɔ̀ɔ, nɔɔ walɛ suru bii. Tɔ̀ɔ, nɔɔ nwang ningkãari, nɔɔ ti walɛ vuu piti ɓɔɔ nɔɔ kasɛ ɓɛɛ.

¹¹ “Nkɔ jagãng ɓɔɔ tɔ̃ɔ ɓɛɛ. Jagãng ɓɔɔ tɔ̃ɔ mãlɛ́ yuu ɓiɓɛ ka ruu mɛ̀ɛrɛ́ ɓiɓɛ.

¹² Zang ɓɔɔ mɛ̀ɛrɛ́ wu ɓɔɔ ɓiɓɛ kpang, zang shu wu katɔ, wu shaa zang mɛ̀ɛrɛ́. Naa zi zaa wisi arɛ, yuu katɔ wu yaa mɛ̀ɛrɛ́. Zaa wisi yiki mɛ̀ɛrɛ́, wu ti tantɛ ɓɔɔ yaa ɓɛɛ.

¹³ Zang keɓe yuu ka ruu ɓɔɔgn mɛ̀ɛrɛ́ kɔng wu kpang, a mɛ̀ɛrɛ́ wu ti ɓɔɔ ɓiɓɛ kpang ɓɛɛ.

^14-15 “Nkɔ jagãng ɓɔɔ tɔ̃ɔ ɓɛɛ. Naa ɓɔɔ Daa zi m nung tɔ, n zi Daa nung tɔ jong. N zi mɛ̀ɛrɛ́ nung doo nɔngkɔ, ri ti zi m nung tɔ jong. N ti mãlɛ́ yuu mɛɛ, zang nyɔ m vɔrɔ ka ruu ɓarɛ.

¹⁶ Mɛ̀ɛrɛ́ mɛɛ ɓɔɔ ti kagn, ɓɔɔ ri ka vaa keɓe kpang ɓɛɛ. N atɛ ri ditɔ jong. Ri naa tã̀á yee mɛɛ ditɔ, tɔ̀ɔ, ri nwang kaa vàa gbete, jagãng ɓarɛ ti gbete.

¹⁷ “Daa kasɛ ruu mɛɛ, ka ruu ɓɔɔ, n kasɛ tɔ nɛɛ, n mãlɛ́ yuu mɛɛ ɓɛɛ. Tɔ̀ɔ, zang naa wisi m paa tɔkn.

¹⁸ Zang ɓɔɔ nyɔ m vɔrɔ kagn gbete kpang. Nkɔ kàsɛ́ zang nyɔ m vɔrɔ, nkɔ ti kàsɛ́ n nwang ningkãari tɔkn. Wee vuu ɓɔɔ Daa mɛɛ kasɛ nɛɛ n palɛ ɓɛɛ kɔ.”

¹⁹ Zang Yahudi ri basɛ zɔɔ tɔkn ka ruu, ruu kɔ Yeesɔ kɔɔ ɓee.

²⁰ Zang dɔɔli ka teteng ɓarɛ ri kɔɔrɔ nɛɛ, “Suru shi kpang kagn bii ɓiɓɛ. Ɓi shoko. Nɔɔ ɓaa shoo ka ruu ɓɔɔ wu kɔɔrɔ ka ruu viya?”

²¹ Zang ɓɔɔ ri ti kɔ̀ɔrɔ́ ɓarɛ nɛɛ, “Zang ɓɔɔ suru shi kpang kagn bii ɓiɓɛ ràng yee naa weɓe kpang. Suru shi kpang palɛ biya wu masɛ zang jĩng ringtang viya?”

Yeesɔ tɔɔ wukɔ Jaa Laa

²² Bɛ̀ɛ́ kaa laa ɓɔɔ zang shaa nyaalaa ɓɔɔ zang kpaa danggn diki ɓɔɔ zang a Gãa Laa tɔkn ɓɛɛ, ka Urushalima ɓɛɛ. Ka làa keɓe pũngku kpaa kana,

²³ a Yeesɔ rakɛ ɓi ka nɔng ɓɔɔ zang nwalɛ gn, ɓɔɔ zang ɓaa ka nung kpanti Sulemanu ɓɛɛ.

²⁴ Rɛɛ zang Yahudi ri kpalɛ zɔɔ ka bii ɓiɓɛ, ri hɛ̃ɛ wu nɛɛ, “Mɔɔ yaa ruu ɓu kaa naa weɓe kɔ sasak, ruu zi mɔɔ nung kpang ya? Mɔkɔ nɛɛ Kirisi, kɔɔ ruu faarik, mɔɔ wàasɛ̀ ruu kpang.”

²⁵ Yeesɔ kasɛ nyaa tɔɔ, “N kɔɔ nɔɔ tɔ, nɔɔ kasɛ kpang. Vuu ɓɔɔ zang zirɛ, zang mã naa ka danggn kɔ n palɛ nɛɛ naa ɓɔɔ Daa mɛɛ a m ɓee, wukɔ kɔɔ ruu ka yuu mɛɛ.

²⁶ Nɔɔ kasɛ danggn shinang ka bìí mɛɛ kpang, ka ruu ɓɔɔ, nɔɔ manɛ mɛ̀ɛrɛ́ mɛɛ kpang ɓɛɛ.

²⁷ Mɛ̀ɛrɛ́ mɛɛ ri tãa yee mɛɛ ɓarɛ katɔ. N zi ri nung tɔ, a ri dũng m katɔ.

²⁸ N a ri suru bii ɓɔɔ waa nyaa kpang ɓɛɛ. Ri vɔ ɓarɛ takpang. Zang ɓɔɔ ti zunung ɓɔɔ wu ta ri ka naa mɛɛ nɛɛ kaka kpang.

²⁹ Daa mɛɛ ɓɔɔ wukɔ a m ri, ɓa zang katɔ nandon. Zang ɓɔɔ ta ri nɛɛ naa Daa mɛɛ, nɛɛ kaka kagn gbete kpang.

³⁰ Ɓɔɔ n nɛɛ Daa ruu gbete.”

³¹ A zang Yahudi ri daa yakɛ tari tɔkn, nɛɛ ri luku wu nɛɛ mani.

³² Yeesɔ kɔɔ ri tɔɔ, “N pálɛ́ vuu tɔ̃ɔ tɔ dɔɔli, ɓɔɔ Daa a m naa nɛɛ n palɛ ɓɛɛ. Nɔɔ luku m, ɓu ka ruu wi ka teteng ɓarɛ gbete wiya?”

³³ Zang Yahudi ri kasɛ wu nyaa tɔɔ, “Ruu luku mɔɔ wu ka ruu vuu tɔ̃ɔ ɓɔɔ mɔɔ palɛ ɓɛɛ kpang. Ruu luku mɔɔ, ka ruu ruu shi kpang ɓɔɔ mɔɔ kɔɔ ɓɛɛ. Ka ruu ɓɔɔ mɔɔ shɔnzang waati, mɔɔ kɔɔyi nɛɛ mɔɔ ɓaa Laa ɓɛɛ.”

³⁴ Yeesɔ kɔɔ ri tɔɔ, “Zang bee ka yeti labeenang nyaa dannang manɛ nɛɛ Laa tɔɔ, ‘Nɔɔ nwang manɛ naa Laa.’

³⁵ Ruu zi tɔ nɛɛ vuu ɓɔɔ labeenang Laa kɔɔyi ɓi niizang dòndòng. Laa nɛɛ ɓaa zang ɓɔɔ wu shong ri nɛɛ yee ɓiɓɛ tɛ̃ɛ tɛ̃ɛ nɛɛ ri nwang naa Laa,

³⁶ a zang ɓɔɔ Daa zɔ̃ngnɛ, a shong wu ka koo ɓɛɛ, nɔɔ kɔɔ ka ruu vi nɛɛ n kɔɔrɔ ruu shi kpang ka ruu ɓɔɔ n kɔɔyi nɛɛ n Jaa Laa viya?

³⁷ Nɔ́ɔ shing danggn ka bii mɛɛ kpang, n nɛɛ palɛ vuu ɓɔɔ Daa mɛɛ palɛ kpang ɓɛɛ.

³⁸ N nɛɛ palɛ vuu ɓɔɔ Daa mɛɛ palɛ kɔ, nɔɔ nɛɛ shing danggn doo ka bii mɛɛ kpang, nɔ́ɔ shing danggn ka vuu ɓɔɔ zang zirɛ zang mã naa ka danggn ɓɔɔ n palɛ ɓɛɛ. Tɔ̀ɔ, nɔ́ɔ zi kaa gn dɔ̃ɔ gbete nɛɛ Daa kagn bii mɛɛ, nɛɛ n ti kagn bii Daa.”

³⁹ Ri tɔɔ ri yi wu kaa tɔ tɔkn, a nwangnɛ nwĩiri daayi.

⁴⁰ A Yeesɔ ta rang Urudung tɔkn, daa ka nɔng ɓeleng ɓɔɔ Yɔhana pàlɛ́ zang batizima kagn ɓɛɛ, daa nwang ka nɔngkɔ.

⁴¹ Zang dɔɔli ri a ka bii ɓiɓɛ, ri kɔɔrɔ nɛɛ, “Yɔhana pálɛ́ vuu ɓɔɔ zang zirɛ zang mã naa ka danggn ɓi kpang, vuu ɓɔɔ kɔɔ ka yuu yɔɔ keɓe nandon ɓi niizang kɔ nwani.”

⁴² Zang dɔɔli ri shing danggn ka bii Yeesɔ ka nɔngkɔ.