1 Yɔhana 3 - Nyaa Shɔɔ Ɓɔɔ Laa a Ɓɛɛ

Ruu nwang zang tɔ̃ɔ naa Yeesɔ Kirisi

¹ Nɔɔ zi naa ɓɔɔ Daa kasɛ ruu ɓuru ɓɛɛ. Kasɛ ruu ɓuru dɔɔli, ka ruu nɔngkɔ, ɓaa ruu nɛɛ Wujɛ ɓiɓɛ. Ruu ti wujɛ ɓiɓɛ kɔ niizang. Zang ɓɔɔ ri dũ̀ng Laa kpang, ri zi ruu kpang, ka ruu ɓɔɔ, ri zi Laa ɓarɛ kpang ɓɛɛ.

² Rɛɛ masang ɓɔɔ n kasɛ nɔɔ dɔɔli ɓɛɛ, ruu kaa wujɛ Laa. Naa ɓɔɔ ruu naa nwangnɛ, ruu zi gn kpang. Ruu zi tɔ nɛɛ, naa Yeesɔ nwang nyaa, ruu naa nwang kaa naa wukɔ doori. Ka ruu ɓɔɔ, ruu naa zi wu ka naa ɓɔɔ wu nwang ɓɛɛ.

³ Zang ɓɔɔ shing gn nɛɛ wu naa nwang naa Kirisi, a ti shing gn nɛɛ vuu keɓe naa nwang ditɔ nɔngkɔ, wu nwang tɔ̃ɔ tɔ̃ɔ naa ɓɔɔ Yeesɔ nwàng ɓɛɛ.

⁴ Zang ɓɔɔ palɛ vuu shi kpang, ɓa nyaa ɓɔɔ Laa dang ɓɛɛ, ka ruu ɓɔɔ, nyaa ɓɔɔ Laa dangnɛ ɓanang, zang ɓaa wukɔ nɛɛ vuu shi kpang ɓɛɛ.

⁵ Nɔɔ zi tɔ nɛɛ, Yeesɔ arɛ nɛɛ wu naa kɔ̃̀sɔ́ zang vuu shi kpang. Vuu shi kpang ɓi kagn bii ɓiɓɛ kpang.

⁶ Zang ɓɔɔ nwàng nɛɛ Kirisi a ti dũng ruu ɓiɓɛ, huu shoo nɛɛ vuu shi kpang palɛnang kpang. Zang ɓɔɔ huu shoo nɛɛ vuu shi kpang palɛnang, zi wu nung kpang, ti zi wu gn nɛɛ jĩng kpang.

⁷ Wujɛ mɛɛ, zang ɓɔɔ wu nwãarɛ nɔɔ kpang. Zang ɓɔɔ palɛ vuu tɔ̃ɔ, ɓi zang tɔ̃ɔ, naa ɓɔɔ Yeesɔ zang tɔ̃ɔ ɓɛɛ.

⁸ Zang ɓɔɔ palɛ vuu shi kpang sasak, ɓi jaa Sheetang, ka ruu ɓɔɔ, Sheetang pálɛ́ vuu shi kpang ɓi doo ka tĩng ɓɛɛ. Jaa Laa arɛ nɛɛ wu naa jili vuu ɓɔɔ Sheetang pálɛ́ kɔ.

⁹ Zang ɓɔɔ nɛɛ jaa Laa piti, palɛ vuu shi kpang ɓi sasak kpang, ka ruu ɓɔɔ, yeti ɓɔɔ Laa tarɛ kagn yeti ɓiɓɛ ɓɛɛ. Pálɛ̀ vuu shi kpang ɓi jong kpang, ka ruu ɓɔɔ, wu ɓi kaa jaa Laa ɓɛɛ.

¹⁰ Zang ɓɔɔ pálɛ̀ vuu tɔ̃ɔ kpang, ɓi zang Laa kpang. Zang ɓɔɔ ti kasɛ ruu ɓeezung kpang, ɓi doo zang Laa kpang kɔ. Wee naa ɓɔɔ ruu zi zang ɓɔɔ ri wujɛ Laa nɛɛ zang ɓɔɔ ri wujɛ sheetang kagn kɔ.

Rúu kasɛ ruu zɔɔ katɔ

¹¹ Wee ruu ɓɔɔ nɔɔ tãa ka tĩng shɔɔnang kɔ, nɛɛ ruu kasɛ ruu zɔɔ katɔ.

¹² Rúu nwàng naa Kayinu kpang. Kayinu zang Sheetang ɓɔɔ nyɔ jaa niiɓɛ vɔrɔ ɓɛɛ. Nyɔ jaa niiɓɛ vɔrɔ ɓu ka ruu viya? Nyɔ wu ka ruu ɓɔɔ, vuu ɓɔɔ wu palɛ ɓi vuu shi kpang, a ɓɔɔ ɓeezung ɓi kaa ɓɔɔ tɔ̃ɔ ɓɛɛ.

¹³ Manzung, zang ɓɔɔ koo keɓe nɛɛ kasɛ ruu manɛ kpang, nɔɔ mã naa ka danggn kpang.

¹⁴ Ruu zi tɔ nɛɛ ruu ɓuru tɔ̀ɔ́ ka naa vɔrɔ kpang. Ruu ɓuru kaa zang ningkãari, ka ruu ɓɔɔ, ruu kasɛ ruu zɔɔ ɓuru katɔ ɓɛɛ. Zang ɓɔɔ kasɛ ruu ɓeezung kpang, ɓi dòo ka naa vɔrɔ.

¹⁵ Zang ɓɔɔ kasɛ ruu ɓeezung kpang, wukɔ zang ɓɔɔ nyɔ zang vɔrɔ ɓɛɛ. Nɔɔ ti zi tɔ nɛɛ, suru bii ɓɔɔ waa nyaa kpang, ɓi kagn bii zang ɓɔɔ nyɔ zang vɔrɔ ɓɛɛ kpang.

¹⁶ Yeesɔ Kirisi tusu ruu, rúu zang kasɛnang ka ɓɔɔ wu mãlɛ́ bii ɓiɓɛ ka ruu ɓuru ɓɛɛ. Ka ruu nɔngkɔ, ruu mãlɛ́ bii ɓuru ta jong ka ruu manzung ɓuru.

¹⁷ Naa zang ɓɔɔ vuu naa ɓiɓɛ dɔɔli, zi ɓeezung ɓɔɔ dang jĩng, a raa wu yuu knti, ruu zang kasɛnang ɓɔɔ Laa a shɔnzang, kagn yeti ɓiɓɛ ya?

¹⁸ Wujɛ mɛɛ, ruu kasɛ nɔɔ zang, wu nɛɛ nyaa waati kpang. Zang kasɛnang ɓuru wu nwang ɓɔɔ niizang, ka vuu ɓɔɔ ruu pálɛ̀ ɓɛɛ ning.

Rùu kaa vɔrɔ Shiinang ka tĩng Laa kpang

¹⁹ Ruu zi ka wukɔ nɛɛ, ruu ɓuru kaa zang Laa ɓɔɔ ruu palɛ vuu ɓɔɔ niizang ɓɛɛ. Rùu kaa vɔrɔ shiinang ka tĩng Laa kpang.

²⁰ Ka ruu nɔngkɔ, naa rɛ̃rɛnang ɓuru tusu ruu nɛɛ ruu palɛ vuu shi kpang, Laa ɓɔɔ ɓa rɛ̃rɛnang ɓuru katɔ, zi vuu piti ɓi tɔ.

²¹ Masang ɓɔɔ n kasɛ nɔɔ dɔɔli ɓɛɛ, naa rɛ̃rɛnang ɓuru tusu ruu nɛɛ, ruu pálɛ̀ vuu ɓɔɔ shi kpang, kpàng, rùu kaa vɔrɔ ka tĩng Laa kpang.

²² Laa a ruu vuu piti ɓɔɔ ruu gaa ka naa ɓiɓɛ katɔ, ka ruu ɓɔɔ, ruu ɓaa shoo ka nyaa ɓɔɔ wu dang ɓɛɛ. Ruu ti pálɛ́ vuu ɓɔɔ yeti ɓiɓɛ kasɛ ɓɛɛ.

²³ Laa dang nyaa tɔ nɛɛ ruu shing danggn ka bii Jaa ɓiɓɛ Yeesɔ Kirisi. Nɛɛ ruu ti kasɛ ruu zɔɔ katɔ naa ɓɔɔ wu dang ruu nyaa ɓɛɛ.

²⁴ Zang ɓɔɔ nɛɛ ɓaa shoo ka nyaa ɓɔɔ Laa dangnɛ wukɔ nwàng ɓi nɛɛ Laa. Laa ti nwàng nɛɛ wu. Ruu zirɛ nɛɛ Laa nwàng nɛɛ ruu, ka suru bii ɓɔɔ wu a ruu ɓɛɛ.