Tito 1 - U Maganda A Baheta Ni Jesu-Cristo

¹ Mahal ko a Tito. Hikán iye ti Pablo a alipin nu Diyos sakay apostol ni Jesu-Cristo. Piniliyák na para patatagán u pánnampalataya nu pinile na hide a tolay sakay palawakán u pákkatukoy de tu tatahoden a tungkul tu kakkabiyag a ayun tu kaluuban nu Diyos.

² U pánnampalataya sakay pakkaunawa a iye u mangatád tu pag-asa tam a matanggap tam u biyag a awan ti kahád a inpananto nu Diyos bagu na a linalang i munduwáy. Siya u Diyos a awan mágbule-bule.

³ Sakay tu netakda a panahun ay nepakapospos na dán u upos na. Iye ay nepagkatiwala nikán nu Diyos a Tagapagligtas tam para itoldu ayun tu utus na.

⁴ Magsulaták niko, Tito, a tunay ko a anak ti pánnampalataya. Magkahod kam nakwa ti págpapala sakay kapayapaan a gábwat tu Diyos a Ama sakay ti Jesu-Cristo a Tagapagligtas tam.

U Tungkulin hide ni Tito ti Creta

⁵ Kanya inwahak taka ti Creta ay para tapusan mo u gawain hide a awan palla natapos sakay para mangpili ka ti puno hide tu simbaan nu kada banuwan konna tu inyutus ko niko.

⁶ U pinuno a dapat mo a idátton ay kailangan a awan ti kapintasan, essa la ti kabanga, mánnámpalataya u aanak de, sakay awan hide mágkagulo oni maigát ti págguluwan.

⁷ Dipo u tungkulin nu essa a pinuno nu simbaan ay para tu Diyos, dapat a awan siya ti kapintasan. Dapat a awan siya hambug oni alisto a maiyamut sakay dapat be a awan siya máglasing, awan mággulo oni hupa ni pilak.

⁸ Nan masaya a magpatulos, magággustuwán tu mágkaganda a gimet, mahinahun, matapat siya a mákpággagum tu kapareho na, sumássunud tu Diyos sakay te págpugad ti sadile.

⁹ Kailangan a sumássunud tu adal tungkul ni Jesu-Cristo a ayun tu netoldu nikuna para metoldu na tu agum u maganda a adal sakay metama na u kamaliyan nu kumontra hide tu tama a toldu.

¹⁰ Dipo makpal a tolay lalu dán u sumássunud hide tu kaugaliyan nu Judio hide, u mangkontara ti adalan iye. Dáddayaán de u agum tu pamamag-itan nu toldu hide a awan ti kabuluhan.

¹¹ Kailangan a pugáddán mo hide ti gággimitán diyan iye, dipo sássidaán de u bawat pamilya tu pamamag-itan nu itattoldu de a awan dapat a itoldu. Gággimitán di iye para la a magkahod hide ti pilak.

¹² Kinagi mismo nu essa a kákkagiyán de a prupeta a taga-Creta, “U taga-Creta hide ay mágkabule, kumán a hayup u ugali de, tamad sakay mágkaunas hide.”

¹³ Tama u kinagi na, kanya pagkagiyan mo hide ti mahigpit tánni mabiyag hide ti tama ayun tu pánnampalataya de,

¹⁴ sakay dyan dán hide mágsaneg tu bida nu Judio hide a awan ti pinagseserbiyan oni tu toldu nu tolay hide a immadág tu tatahoden.

¹⁵ Malinis u atanan a bagay tu tehhod a malinis a isip, pero tu mágkadukás sakay tu awan mánnampalataya ay awan ti bagay a malinis dipo madangát u konsensiya sakay u pággisipan de hide.

¹⁶ Kákkagiyán de a tukoy de u Diyos, pero awan labe ketan tu gimet de. Awan hide ti pinagseserbiyan a tolay sakay masássuwayán hide, kaya awan de tukoy a maggimet ti maganda.