Lukas 9 - U Maganda A Baheta Ni Jesu-Cristo

Inutusan ni Jesus u Disepulus na hide a Sapulo ay ti Duwwa

¹ Nadid, dinulaw ni Jesus u sapulo ay ti duwwa a disepulus sakay inatádden na hide ti kapangyariyan a magpalayas ti madukás a ispirito sakay magpapiyya tu tehhod hide a saket.

² Sakay inutusan na hide a angay mangaral tungkul tu pághare nu Diyos sakay magpapiyya tu tehhod hide a saket.

³ Kinagi na nide, “Dyan kam magbilon ti maske ánya man tu angayan moy maske sahukod, hembeg, makan, pilak oni paglewasan.

⁴ Sakay máktulos kam tu bilay a mangtanggap nikam, sakay mágyan kam hod mentaras a awan kam pálla lumakad ti banuwanan itod.

⁵ Ni mara awan dikam be tanggapán ti itona a banuwan ay lumakad kam hod. Bagu kam a humektat ay ipagpag moy pa u alikabuk nu tika-tikád moy, bilang paalaala kontara nide.”

⁶ Kanya naglakad u disepulus na hide sakay nangaral tu babaryo hide tungkul tu Maganda a Baheta sakay pinagpiya de u tehhod hide a saket tu luga-lugar a immangayan de.

Naguluwan ti Herodes

⁷ Nadid, nabaheta ni Herodes a gobernador ti Galilea u atanan a ginággimet ni Jesus. Naguluwan siya, dipo tehhod a sangan a tolay a nagkagi a nabiyag a huway ti Juan a Mágbawtismo.

⁸ Te nagkagi be a, “Pimmeta ti Elias.” Te nagkagi pa a, “Nabiyag kan a huway u essa tu prupeta hide tu itod pa a panahun.”

⁹ Pero kinagi ni Herodes, “Impaputol ku dán ti Juan. Deya wad iye a lállake? Makpalák dán a nabaheta tungkul nikuna.” Kanya pinilit ni Herodes a ketan ti Jesus.

Pinakan ni Jesus u Limma a Libu a Tolay

¹⁰ Kássole nu disepulus hide ni Jesus ay imbaheta de nikuna u atanan a ginimet de. Káttapos ay limmakad ti Jesus kaguman na u disepulus na hide a immangay tu banuwan a Betsaida.

¹¹ Nikuna matukuyan iye nu tolay hide ay timmagubet hide. Sakay masaya be hide a tinanggap ni Jesus sakay nangaral siya nide tungkul tu pághare nu Diyos. Pinagpiya na be u te saket hide.

¹² Nikuna mágsasasahám dán u aldew ay ummadene ni Jesus u sapulo ay ti duwwa na a disepulus sakay kinagi de nikuna, “Palakadán mu dán i tolaye hide tánni makapagehyok hide ti makan sakay te mapátdugan hide tu babaryo tu palebut. Katoy kitam ti parangay a lugar.”

¹³ Pero kinagi na nide, “Hikam u mangatád nide ti makan.” Timmábbeg be u disepulus hide, “Awan kitam ti makan pero tehhod heeh a lilimma a tinapay sakay duduwwa a ikan. Mamale kami beman ti makan para ti tolayan hidenye?”

¹⁴ (Dipo tehhod a manga limma a libu a kalállakeyan u katoy hod). Kinagi na tu disepulus na hide, “Pággetnudán moy i tolaye hide ti tág-lalimmapulo.”

¹⁵ Pinaetnod di ngani hide a atanan.

¹⁶ Inalap ni Jesus u limma a tinapay sakay u duwwa a ikan. Tummangad siya ti langet sakay nagpasalamat tu Diyos. Hinate-hate na itod sakay inyatád na tu disepulus na hide para itagtag tu katolayan.

¹⁷ Nakakan hide a atanan sakay nabássog. Káttapos ay inipun nu disepulus na hide u buhay sakay nakaputat pa hide ti sapulo ay ti duwwa a lákba.

Impakapospos ni Pedro u Tungkul ni Jesus

¹⁸ Nadid, essa aldew, mentaras magdasal ti Jesus a maggisessa ay ummadene nikuna u disepulus na hide. Tinanung na hide, “Ánya i kákkagiyánnay nu tolay hide tungkul nikán? Ti deyaák kan?”

¹⁹ Timmábbeg hide, “Te sangan a magkagi a ti Juan a Mágbawtismo ka kan. Pero kagi be nu agum ay ti Elias ka kan, sakay te nagkagi be a essa ka tu prupeta hide tu itod a panahun a nabiyag a huway.”

²⁰ Sakay tinanung na hide a huway, “Ay hikam, ánya be u makagi moy tungkul nikán?” “Hiko u Cristo a inpananto nu Diyos!” Kagi ni Pedro.

²¹ Inpakebibilin ni Jesus a dyan de iye kagi-kagiyán maskin deya.

Impakapospos ni Jesus U Tungkul tu Kákkatay Na

²² Kinagi na pa nide, “Magtiis pa ti dakál a hirap u Anak nu Tolay. Itakwil siya nu puno nu Judio hide, u puno nu saserdote hide sakay u maisto hide nu Kautusan. Ipabuno di siya pero biyagán siya a huway nu Diyos tu katállo a aldew.”

²³ Sakay kinagi na nide a atanan, “Ni deya man u masoh a sumunud nikán ay kailangan a kalimunan na u para tu sadile na. Báklayán na aldew-aldew u kudus na sakay sumunud nikán.

²⁴ Dipo u tolay a masoh a mángligtas tu sadile na a biyag ay siya i mawananay ti biyag a awan ti kahád. Pero ni deya man u máng-alay tu biyag na alang-alang nikán ay magkahod ti biyag a awan ti kahád.

²⁵ Ánya u pakinabang nu tolay ni makao na u atanan a bagay ti munduwáy pero mepahamak labe u biyag na?

²⁶ Ni ikasanikiyák moy sakay u upos ko hide, ay ikasanike kam be nu Anak nu Tolay tu kássole na. A tehhod a kapangyariyan iye ay kapareho nu kapangyariyan nu Ama sakay tu banal hide a anghel.

²⁷ Kagiyán ko nikam u tatahoden: tehhod he nikam a awan matay mentaras a awan de ketan u pághare nu Diyos.”

U Págbagu nu Idsura ni Jesus

²⁸ Nadid, kállipas nu manga walo a aldew, káttapos a kagiyán ni Jesus iye hide a bagay ay ingkuyog na di Pedro, Juan sakay ti Santiago, tu bumábbuked para magdasal.

²⁹ Mentaras a magdasal ti Jesus ay nagbagu u idsura na. Sakay u damit na ay grabit pudew.

³⁰ Káttapos ay bigla dálla a lummitaw u duwwa a lállake a nákpágguhon nikuna, di Moises sakay ti Elias,

³¹ a u hupa de ay makasile be. Pinágguhunan de u tungkul tu adene a kákkatay ni Jesus a mangyare ti Jerusalem.

³² Nadid ay mahimbing a tidug di Pedro sakay tu agum na hide. Pero bigla hide a nalukag sakay netan de ti Jesus a makasile u idsura na sakay te mágtaknág a duwwa a lállake tu adeni na.

³³ Nikuna palakad dán u duwwa a lállake ay kinagi ni Pedro ni Jesus, “Panginoon, maganda bál ta katoy kame he. Maggimet kame ti tállo a sahong: essa para niko, essa para ni Moises, sakay essa be para ni Elias.” Pero u tatahoden ay awan na tukoy u áamet-amitán na.

³⁴ Mentaras a magupos ti Pedro ay tinaklábban hide nu panganurin. Kaya neántingan u disepulus na hide.

³⁵ Sakay te boses a nagupos tu panganurin, “Iye u Anak ko a pinile ko, sanigán moy siya!”

³⁶ Nikuna mawan dán u boses ay netan de a mággisessa dálla ti Jesus. Awan padla kinagi-kagi nu disepulus hide u netan de.

Pinagpiyya ni Jesus u Hinayup a Tolay

³⁷ Tu kadimadimangan na ay nanegson dán hide sakay tinagbu siya nu tunay ti kakpal a tolay.

³⁸ Tu kákpalan nu tolay hide ay tehhod a lállake a pummákhaw, “Maisto,” kagi na, “Kagbiyan mu pay a pagpiyyaán i kaessa-essa kuwáy a anak a lállake!”

³⁹ Sináddáp siya ni madukás a ispirito, kaya bigla dálla siya a mágpapákhawán sakay mágpapágpággán hanggan a maghuho u labi na. Pirme na siya a páppasakitan sakay awan na dán gusto a lakadan.

⁴⁰ Nákkekagbiyák dán be tu disepulus mo hide a palayasán u madukás a ispirito, pero awan di kaya.

⁴¹ Timmábbeg ti Jesus, “Lahe a tunay ti dukás sakay awan ti pánnampalataya! Hanggan nikan takam a pagtiisan?” Sakay kinagi na tu lállake, “Iyangay mo he u anak mo.”

⁴² Mentaras a paadene u anak ay inlugmuk sakay pinagpapágpág dámman siya nu madukás a ispirito, pero pinalayas ni Jesus u madukás a ispirito. Pinagpiyya na sakay tulos na a inyatád tu ama na.

⁴³ Sakay nagtaka u katolayan tu netan de a kapangyariyan nu Diyos.

Kinagi a Huway ni Jesus u Tungkul tu Kákkatay na

⁴⁴ “Pakasanigán moy sakay pakatandaan i kagiyán kuwáy: u Anak nu Tolay ay itokyon nu tolay hide sakay masakup nu kapangyariyan nu tolay hide.”

⁴⁵ Pero awan di maintendiyan u kinagi na dipo awan pálla impakapospos nu Diyos nide u kahulugan ni itod. Sakay manteng be hide a magtanung ni ánya u gusto a kagiyán nu kinagi na.

U Pinakadakila

⁴⁶ Sakay namágtábbegan u disepulus hide ni ti deya u pinakadakila nide.

⁴⁷ Pero tukoy ni Jesus ni ánya u katoy tu isip de, kaya dinulawan na u essa a badit a anak sakay pinataknág na tu háhhawisan na.

⁴⁸ Sakay kinagi na nide, “Ni deya man u mangtanggap ti anakan iye alang-alang nikán ay hikán u tinanggap na, sakay ni deya man u mangtanggap nikán ay mangtanggap be tu nangutus nikán a umangay he. U mapagpakumbaba nikam a atanan ay siya u pinakadakila.”

U Umayun nikitam ay Kaguman tam

⁴⁹ Kinagi ni Juan, “Panginoon, naketa kame ti tolay a magpaibut ti dimonyo hide tu ngahan mo. Sinaway me siya dipo bakán tam siya a kaguman.”

⁵⁰ Pero kinagi ni Jesus, “Dyan moy siya sawayán, dipo u awan kontara nikam ay kaguman moy.”

Awan de Tinanggap ti Jesus tu Essa a Baryo ti Samaria

⁵¹ Nikuna adene dán a sumole ti Jesus ti langet ay naisip na a angay ti Jerusalem.

⁵² Kanya pinágdipalongo na u sangan a tolay tán angay de ihanda u tulusan na tu essa a lugar ti Samaria.

⁵³ Pero awan siya tinanggap nu Samaritano hide dipo nakadisisyon dán siya a tamo ti Jerusalem.

⁵⁴ Nikuna matukuyan itod nu disepulus na a di Santiago sakay ti Juan ay kinagi de nikuna, “Panginoon, masoh ka beman a paudinan me ti apoy tánni matutod hide?”

⁵⁵ Pero inatubang hide ni Jesus sakay pinágngállan na hide.

⁵⁶ Sakay immangay hide tu agum a baryo.

U Kássunud ni Jesus

⁵⁷ Nadid, mentaras maglakad hide ay tehhod a lállake a nagkagi ni Jesus, “Mákkuyoyugák niko maskin hádya i angayan muway.”

⁵⁸ Timmábbeg ti Jesus nikuna, “Te ábbut a páppágyanan u mágkatapang hide a hayup sakay te lobun u manok hide. Pero u Anak nu Tolay ay awan ti sadile a bilay a matidugan sakay maimangan.”

⁵⁹ Káttapos ay kinagi ni Jesus tu essa, “Mákkuyog ka nikán, bilang disepulus ko.” Pero tummábbeg siya, “Panginoon, pakultadenak mupa a sole ta angay ku pa pelábbáng tama ko.”

⁶⁰ Pero kinagi na nikuna, “Ipebahala mu dán tu patay hide u páglábbáng tu kasapatay de hide. Pero hiko ay angay mo ibaheta u pághare nu Diyos.”

⁶¹ Te essa be a nagkagi nikuna, “Sumunudák niko Panginoon, pero pakultadenák mu pa a angay iye kagiyán tu pamilya ko.”

⁶² Sakay konna bi he u tábbeg ni Jesus, “U mágsasuleg-sulegán a magaradu ay awan karapat-dapat tu kahariyan nu Diyos.”