Lukas 8 - U Maganda A Baheta Ni Jesu-Cristo

U Bábbey hide a Nagserbi ni Jesus

¹ Nadid, káttapos ni itod ay linebut ni Jesus u banu-banuwan sakay u babaryo hide. Impangaral na u Maganda a Baheta tungkul tu pághare nu Diyos. Kaguman na u sapulo ay ti duwwa a disepulus na,

² sakay u sangan hide a bábbey a pinalaya na tu mágkadukás a ispirito sakay pinagpiyya na tu saket de. Essa ay ti Maria a kákkagiyan de a Magdalena, pitto a mágkadukás a ispirito u napalakad nikuna,

³ sakay ti Juana a kabanga ni Cusa a katiwala ni Herodes, ti Susana sakay makpal pa a agum. Sadile de a pilak i nángtáttustus diyay tu kailangan di Jesus sakay tu disepulus na hide.

U Talinhaga Tungkul tu Mágsabug

⁴ Makpal u nagdemáttan a tolay a gábwat tu agum a banuwan tán umadene ni Jesus. Nikuna a naipun dán u tuna't káppal a tolay ay ingkagi na i talinhagaan iye:

⁵ “Te essa a tolay a angay nagsabug tu bine na. Tu págsabug na ay te netákneg tu dilan, kaya negemmakan sakay kinákkutem nu kamanukan.

⁶ Tehhod be a netákneg tu kabitu-bituwan, nagtubu pero nalanás bila itod dipo malapes u luta.

⁷ Tehhod be a netákneg tu kasaetan. Kimmáppal u kasaetan kaya binuhebáddan na u nagtubu hide a bine.

⁸ Sakay u agum hide a bine ay netákneg tu maganda a luta. Kaya nagtubu sakay nagbunga ti tággi-datos a butil.” Sakay káttapos ay kinagi na ti mabegsák, “Mágsaneg u tehhod a talinga!”

U Kahulugan nu Talinhaga

⁹ Intanung nu disepulus na hide ni ánya u kahulugan nu talinhaga.

¹⁰ Timmábbeg ti Jesus nide, “Inatádden kam nu Diyos ti karunungan tán matukuyan moy u lihim hide tungkul tu pághare na. Pero u agum ay tu pamamag-itan nu talinhaga hide tánni: ‘Maski umileng hide ay awan hide ti ketan; sakay maski mágsaneg hide ay awan hide ti maintendiyan.’ ”

Impaliwanag ni Jesus U Talinhaga

¹¹ “Iye u kahulugen nu talinhaga: u bine ay u upos nu Diyos.

¹² U bine a nesabug tu bihebi nu dilan ay u nágsaneg hide. Pero dimmemát ti Satanas sakay inibutan na tu puso de u upos nu Diyos tánni awan hide maniwala sakay maligtas.

¹³ U nesabug a bine tu bito-bito hide ay u tolay hide a nágsaneg sakay masaya de a tinanggap u upos nu Diyos. Pero awan tatahoden u págtanggap de tu puso de, kaya awan nagnalay u pánnampalataya de. Tu káddemát nu pagsubuk tu biyag de ay pagdaka hide a summina.

¹⁴ U nesabug tu kasaetan ay u tolay hide a nágsaneg tu upos na pero tu kalayan ay dinaig hide nu kákkabalisa de ti biyag, kákkasoh ti kayamanan sakay págsasaya tu magkadukás hide a bagay. Kanya awan hide lummagu tu pánnampalataya de.

¹⁵ Pero u nesabug tu maganda a luta ay u tolay hide a nagsaneg tu upos nu Diyos sakay u náng-asák tu puso de a te katapatan sakay kalinisan. Dipo tu págtiyaga de kaya nagbunga hide.”

U Talinhaga Tungkul tu Simbuwan

¹⁶ Sakay tehhod pa a essa a talinhaga a kinagi ti Jesus, “Awan ti magtab ti simbuwan sakay taklábban na ti banga oni isahok. Nan itupo na itod tu págtupuwan tánni mademlagan u sumáddáp hide tu bilay.

¹⁷ Dipo awan ti netagu a awan lumitaw sakay awan ti sekreto a awan matukuyan.

¹⁸ Kaya pakasanigán moy i itáttoldu kuwáy, dipo ni maniwala kam tu upos ko ay dagdagan pa nu Diyos u tukoy moy dán. Pero ni awan kam mágsaneg sakay awan kam maniwala tu upos ko ay ibutan pa nu Diyos maski u kabadit-baditan a katoy nikam.”

U Ina sakay tu Wáwwadi ni Jesus

¹⁹ Nadid, dimmemát u ina sakay tu wáwwadi ni Jesus a lállake. Pero awan hide makaadene nikuna dipo tu kakpal nu tolay.

²⁰ Kaya te nángkagi nikuna, “Katoy ti luwase dena mo sakay u wáwwadi mo hide, gusto dika a uhunan.”

²¹ Pero kinagi ni Jesus, “U mágsaneg hide sakay sumunud tu upos nu Diyos ay hide u ina sakay wáwwadi ko.”

Pinaimang ni Jesus u Tribunada

²² Essa aldew ay summakay di Jesus sakay u disepulus na hide tu abeng. Sakay kinagi na nide, “Umahabes kitam dibilew ni minalno wáy.” Kanya immahabes ngane hide.

²³ Nikuna pasiyaan dán hide a máglayag ay netidug ti Jesus. Nagabutan hide ni tribunada sakay naputát dán hide ti limas, kaya ngahi-ngahe dán hide a umállád.

²⁴ Kaya inadeniyan siya nu disepulus na hide sakay linukag, “Panginoon, matay kitamon!” kagi de. Immikat ti Jesus sakay sinaway na u pahás sakay u dalondun. Káttapos ay lummantap u tagmák.

²⁵ Tinanung na hide, “Hádyarán u pánnampalataya moy?” Tu ánteng de sakay tu taka de ay namágtanungan hide, “Deya wád iye a katolay? Maske u pahás sakay u dalondun ay utusan na sakay sumunud be hide nikuna!”

Pinagpiya ni Jesus u Geraseno a Sináddáp ni Madukás a Ispirito

²⁶ Nagpundu hide tu lugar nu Geraseno hide a tapat ni Galilea a kadibilew nu minalno.

²⁷ Káawas ni Jesus tu abeng ay tinagbu siya nu lállake a taga hod a sináddáp ni madukás a ispirito. Nalay dán siya hod a obba sakay mámmágyan dán tu paglábbangngan dipo umád na be a mágyan tu bilay de.

²⁸ Pákketa na ni Jesus ay pimmákhaw siya sakay limmuhud tu atubang na. Sakay kinagi na ti mabegsák, “Jesus a Anak nu Diyos a dakila, ánya pák-alam muway nikán? Kagbiyanák mo ped, dyanák mo parusaan.”

²⁹ Kinagi na iye dipo inutusan ni Jesus u madukás a ispirito a lumakad nikuna. Nalay dán siya a sassaddappan nu madukás a ispirito. Kaya maski ni pakababantayan sakay punguwán ti kadena u tika-tikád na sakay u kama kamát na ay bágsután na la. Sakay iyáangay siya nu madukás a ispirito tu adeyo a lugar.

³⁰ Tinanung siya ni Jesus, “Anya ngahan muway?” “Batalyon,” kagi na, dipo makpál u mágkadukás a ispirito u simmáddáp nikuna.

³¹ Sakay nákkekagbi u mágkadukás hide a ispirito a dyan hide pasegbuwán ni Jesus tu abbut a awan ti kahad.

³² Tehhod a kababuyan a kuman tu bumábbuked a adene hod. Nákkekagbi ni Jesus u mágkadukás hide a ispirito a pasáddáppán na dálla hide tu kababuyan, kaya pinakultadan na hide.

³³ Kanya limmuwas tu tolay u mágkadukás hide a ispirito sakay simmáddáp tu kababuyan. U kababuyan ay bigla a nággaginanán sakay tulos-tulos a nágketákneg tu minalno sakay nágkalimás.

³⁴ Nikuna ketan nu mággalaga hide tu kababuyan u nangyare ay gummággenan hide a immangay tu banuwan ay tu babaryo sakay imbábbaheta de u nangyare hide.

³⁵ Kaya immangay hod u tolay hide para ilingán u nangyare. Tu káddemát de tu kán Jesus ay netan de u tolay a date a sináddáp ni madukás a ispirito. Mággetnod tu atubang ni Jesus a nakabadu sakay matino dán u isip na. Kanya neántingan hide a atanan.

³⁶ Ingkagi nu tolay hide a naketa tu nangyare tu tolay hide ni kodya a nagpiyya u lállake a sináddáp ni madukás a ispirito.

^37-39 Nákkekagbi u taga Geraseno hide ni Jesus a lumakad dán siya tu banuwan de dipo grabi u ánteng de. Nákkekakagbi ni Jesus u lállake a pinalaya na tu mágkadukás hide a ispirito a ikuyog de siya. Pero kinagi nikuna ni Jesus, “Sole ka dán tu bilay moy sakay ibaheta mo u dakál a bagay a ginimet niko nu Diyos.” Di Jesus sakay tu disepulus na hide, ay simmakay tu abeng sakay limmakad dan hide. Nagsole ngane u lállake sakay imbábbaheta na tu buo banuwan u ginimet nikuna ni Jesus.

Biniyag ni Jesus u Anak ni Jairo sakay Pinagpiyya na u Bábbey a Makándigiyán

⁴⁰ Nikuna nagsole dán ti Jesus tu dibilew nu minalno ay masaya siya a tinanggap nu tolay hide dipo áuhayán di dán siya.

⁴¹ Nadid te dimmemát be a essa a lállake, a Jairo u ngahan na, a tagapangasiwa tu sinagoga. Limmuhud siya tu atubang ni Jesus sakay nákkekakagbi a umangay tu bilay na,

⁴² dipo u kaessa-essa na a anak a bábbey a magsasapulo ay ti duwwa a taon ay magipepatay dán. Mentaras maglakad ti Jesus a patamo tu bilay ni Jairo ay sássánsánnán siya nu katolayan.

⁴³ Katoy bi hod u bábbey a sapulo ay ti duwwa dán a taon a mágdadigiyán. Sakay awan ti makagamot nikuna maskin deya. Naubus dán u atanan a kabiyagan na ti págpapagamot pero awan la nagpipiya.

⁴⁴ Kaya immadene siya tu áadággan ni Jesus sakay kinahap na u garayan nu damit na. Pagdaka a ummimang u págdadigi na.

⁴⁵ Tinanung ni Jesus u disepulus na hide, “Deya u nangkahap tu damit ko?” Nikuna awan ti umamin ay kinagi ni Pedro, “Maisto, napalebutan ka ni tolaye hide sakay sássánsánnán di ka!”

⁴⁶ Pero kinagi ni Jesus, “Tehhod a nangkahap ti damit kuwáy! Nabate ko a tehhod a kapangyariyan a limmuwas nikán.”

⁴⁷ Nikuna matukuyan nu bábbey a awan melihim u ginimet na ay nágpapágpággán siya a immadene ni Jesus sakay limmuhud tu atubang na. Káttapos ay kinagi na tu atanan a katoy hod ni bakin kinahap na u damit ni Jesus sakay ni kodya siya nagpiya a pagdaka.

⁴⁸ Kinagi na nikuna, “Anak, pinagpiyya ka nu pánnampalataya mo. Sole ka dán a tehhod a kapayapaan.”

⁴⁹ Mentaras a magupos ti Jesus ay dimmemát u essa lállake a gábwat tu bilay nu tagapangasiwa. Kinagi na, “Patay dán u anak mo! Dyan mu dán abalaán i maistuwe.” Kagi na ni Jairo.

⁵⁰ Pero tu pákkasaneg ni Jesus ay kinagi na ni Jairo, “Dyan ka mabalisa. Manalig kala a magpiya siya.”

⁵¹ Káddemát ni Jesus tu bilay ni Jairo ay awan na ingkuyog u agum tu sáddáp nan di Pedro, Juan, Santiago, tama na sakay tena na la nu madiket.

⁵² Sangitan dán u atanan a tolay a katoy hod. Pero kinagi ni Jesus, “Dyan kam magsanget dipo awan siya patay, nan tidug la.”

⁵³ Kinatawaan di siya dipo tukoy de a patay dán u madiket.

⁵⁴ Pero tinawiden ni Jesus u kamát na sakay kinagi na, “Umikat ka anak!”

⁵⁵ Ti itod be ay nabiyag u madiket sakay tulos a immikat. Sakay pinapakan ni Jesus.

⁵⁶ Grabi u taka nu dáddakál na hide pero kinagiyan na hide a dyan de kagi-kagiyán maskin deya u nangyare.