Lukas 7 - U Maganda A Baheta Ni Jesu-Cristo

Pinagpiya ni Jesus u Alipin nu Kapitan nu Romano hide

¹ Nadid, káttapos a nangaral ni Jesus tu tolay hide ay immangay siya tu banuwan a Capernaum.

² Tehhod hod a essa a kapitan nu Romano a te pinakamamahal a alipin. Nadid tehhod a saket iye a alipin sakay magipepatay dán.

³ Nikuna mabaheta nu kapitan u ginággimet hide ni Jesus ay inutusan na u sangan a puno nu Judio hide a pakpagguhunan de ti Jesus a umangay tu bilay na sakay pagpiyaán u alipin na.

⁴ Káddemát de tu kán Jesus ay nákkekakagbi hide nikuna, kinagi de, “Dapat la a tulungan mo ti kapitan,

⁵ dipo mahal na u bansa tam sakay nangpagimet na kitam pa ngane ti sinagoga.”

⁶ Kanya nákkuyog nide ti Jesus, pero nikuna adene dán siya tu bilay ay inpatagbu siya nu kapitan tu barkada na hide, sakay impekagi na iye ni Jesus, “Panginoon, pekagi ben ni kapitan a dyan ka kan dálla magabala a angay tu bilay na dipo awan kan siya karapat-dapat a angay mo bisitaán.

⁷ Sakay awan kan be siya karapat-dapat a umatubang niko. Pero ni kagiyán mo kalla a magpiyya u alipin na ay tahod a magpiyya siya.

⁸ Dipo essa kál labe siya a sakup nu mas mataas a puno sakay tehhod kál labe siya a sakup a kasundaluwan; ni kagiyán nakan tu essa a, ‘Angay ka hode,’ ay sumunud siya. Ni kagiyán na kan be tu agum a, ‘Karon he,’ ay umadene kan be, sakay ni kagiyán na kan tu alipin na a, ‘gimitán mo iye,’ ay gimitán na kan be itod.”

⁹ Nikuna masaneg iye ni Jesus ay nagtaka siya sakay ummatubang tu katolayan a umunonod nikuna. Kinagi na a, “Maski ti Israel ay awanák palla naketa ti konna he ti kadakál a pánniwala.”

¹⁰ Kássole nu inutusan hide nu kapitan ay dinemáttan de tu bilay a nagpiya ngani dán u utusan.

Biniyag ni Jesus u Ulito a Anak nu Bilo a Bábbey

¹¹ Káttapos hod ay ummangay ti Jesus tu banuwan a dáddulawán de a Nain. Nákkuyog nikuna u disepulus na hide sakay u grabi't kakpal a tolay.

¹² Nikuna adene dán siya tu banuwan ay natagbu na u maglábbáng hide tu kaessa-essa a anak a lállake nu bilo a bábbey. Makpál u mákpaglábbáng.

¹³ Pákketa nu Panginoon tu ina nu natay ay minahabag siya nikuna, kaya kinagi na nikuna, “Dyan ka dán magsanget.”

¹⁴ Immadene siya sakay kinahap na u kabaong, kaya immimang u magusung hide. Kinagi ni Jesus, “Ulito kagiyan ko niko, umikat ka!”

¹⁵ Nabiyag sakay nagupos u ulito. Sakay inyatád siya ni Jesus nena na.

¹⁶ Neántingan hide a atanan sakay nagpure hide tu Diyos. Kinagi de, “Dummemát dán nikitam u dakila a prupeta. Immangay he u Diyos para tulungan na kitam a tolay na hide.”

¹⁷ Kimmalat u baheta tungkul ni Jesus tu buo a Judea sakay tu palebut na hide a banuwan.

U Inutusan hide ni Juan a Magbautismo

¹⁸ Imbaheta nu disepulus hide ni Juan a Magbautismo nikuna u ginággimet ni Jesus,

¹⁹ sakay dinulaw ni Juan u duwwa tu disepulus na hide sakay pinaangay na hide tu Panginoon para magtanung ti konna he, “Hiko dán beman u impananto nu Diyos a dumemát, oni maguhay kame pa ti agum?”

²⁰ Káddemát de tu kán Jesus ay kinagi de, “Pinaangay kame he ni Juan a Magbautismo dipo petanung na, ni hiko kanon beman u impananato nu Diyos a dumemát oni maguhay kame pa ti agum?”

²¹ Ti odasan itod ay makpál u pinagpiyya ni Jesus: a te saket, u hinayup hide sakay u buhák hide ay maketa.

²² Sakay timmábbeg siya nide, “Sole kamon tu kán Juan sakay kagiyán moy nikuna u netan sakay nasaneg moy. Naketa dán u buhák hide, makalakad dán u pilay hide, nagpiyya dán u kinetong hide, makasaneg dán u bángngág hide, nabiyag dán a huway u patay hide sakay nepangaral dán u Maganda a Baheta tu mágkahirap hide.

²³ Pinagpala u tolay a awan magduwwa-duwwa nikán.”

²⁴ Kállakad nu inutusan hide ni Juan ay te kinagi ti Jesus tungkul ni Juan tu tolay hide: “Bakin angay kam tu parang? Ánya u gusto moy a ketan? Essa a kugun a iháhhapay-hapay nu pahás?

²⁵ Ánya beman u gusto moy a ketan? Essa tolay a nakabihis ti mamahalin? U tolay hide a magsulot ti mamahalin ay mágkayaman sakay mámmágyan la tu palasyo nu hare.

²⁶ Ánya u gusto moy a ketan? Essa a prupeta? Tatahodan ina, sakay kagiyán ko nikam a mas higit pa siya tu essa a propeta.

²⁷ Dipo ti Juan u tumbukan nu Kasulatan: ‘Siya u inutusan ko a magdipalongo niko. Tán mánghanda tu paglakaden mo.’

²⁸ Kagiyán ko nikam, awan palla ti neenak a mas dakila nikuna. Pero mas dakila ni Juan u pinakamababa hide a pinaghariyan nu Diyos.”

²⁹ U atanan a tolay a nakasaneg nikuna, maske u mágsingeh hide ti buwes ay nagpure tu Diyos. Binawtismuwan iye hide ni Juan.

³⁰ Pero u Pariseo hide sakay u maisto hide nu Kautusan ay timmanggi tu kagustuwan nu Diyos tu biya-biyag de, dipo umád de a nagpabawtismo ni Juan.

³¹ Kinagi pa ni Jesus, “Deya wád u maare ko a pángparehuwan tu tolay hide nadid? Sakay deya u kapareho de hide?

³² Kumán hide a anak a mággetnod tu páglakuwan sakay mamágdulawan tu kaayam de hide, ‘Tinogtugán mi kam ti plawta, pero awan kam nagsayaw! Nasaneg moy kame a nagsanget, pero awan kam nákpagsanget!’

³³ Dipo nikuna immangay he ti Juan a Magbautismo ay nagkulasyon sakay awan umminom ti alak, pero kinagi moy a hinayup siya.

³⁴ Nikuna dimmemát be u Anak nu Tolay a kuman sakay uminom ay kinagi moy, ‘Ilingán moy tolaye a maunas, máglalasing sakay barkada nu mágsingeh hide ti buwes sakay u agum hide a makasalanan!’

³⁵ Pero u karunungan nu Diyos ay napatunayan a tama tu pamamag-itan nu maganda a kakkabiyag nu tagasunod na hide.”

Ti Jesus tu Bilay ni Simon a Pariseo

³⁶ Nadid, inimbitaan nu essa a Pariseo ti Jesus a angay kuman tu bilay na. Kanya ummangay ti Jesus sakay nákpággatubang a kimman.

³⁷ Ti itod be a banuwan ay te bábbey a makasalanan. Nikuna mabaheta na a pasiyaan a kuman ti Jesus tu bilay nu Pariseo ay immangay hod siya sakay nagtawed ti pasáppot a katoy tu págdattonan a alabastro.

³⁸ Káddemát na hod ay ummadene siya tu tattikádden ni Jesus. Sakay nagsanget, binisa na tu luwa na u tikád ni Jesus. Pinahidan na itod tu buuk na sakay inámmuwan na sakay dináttonan na ti pasáppot.

³⁹ Nikuna ketan itod nu Pariseo a nangakit nikuna ay nakagi na tu sadile na, “Ni talaga a prupeta i tolayan iye ay dapat tukoy na ni ti deya mangkákkahapáy nikuna sakay ni ánya i pagkatolayay ni iye a bábbey. Essa siya a makasalanan!”

⁴⁰ Tukoy ni Jesus u katoy tu isip ni Simon, kaya kinagi na, “Simon, tehhodák a kagiyán niko.” “Ánya itod, maisto?” kagi ni Simon.

⁴¹ Kinagi ni Jesus, “Te duwwa a tolay a nangáddem ti pilak tu essa a mágpautang; Nangáddem u essa ti limma a datos a dinaryo, sakay u essa be ay limma a pulo a dinaryo.

⁴² Nikuna awan hide makabayad ay pareho hide a pinatawad nu nangutangan de. Nadid, deya nide u mas mangmahal tu nagpautang?”

⁴³ Timmábbeg ti Simon, “Tu palagay ko ay u dakál ti utang u pinatawad na.” “Tahod ka,” kagi ni Jesus.

⁴⁴ Káttapos ay sinuleg na u bábbey sakay kinagi na ni Simon, “Netan mo i bábbiyáy? Summáddáppák ti bilay muwáy, pero awanák mo inatádden ti dinom a panguges ko ti tikád kuwáy. Pero siya ay binisa na ti luwa i tikád kuwáy sakay pinahidan na pa tu buuk na.

⁴⁵ Awanák mo inámmuwan bilang pagtanggap mo nikan, pero siya ay awan ummimang a mággaámmuwán ti tikád kuwáy sapul tu kássáddáp ko.

⁴⁶ Awanák mo linangisan ti ulo, pero pinahidan na ti pasáppot i tikád kuwáy.

⁴⁷ Kaya kagiyán ko niko, napatawad dan u dakal a kasalanan ni babbiyay a pinatunayan nu dakal a pagmahal a impeta na nikan. Pero u tolay a mangisip a badit la u napatawad a kasalanan ay badit labe u impeta na a págmahal.”

⁴⁸ Sakay kinagi na tu bábbey, “Napatawad ka dán tu kasalanan mo hide.”

⁴⁹ Kanya u kaguman na hide a kuman ay namágtanungan tu sadi-sadile de, “Deya wád iye a tolay, pate u págpatawad ti kasalanan ay pangahasan na?”

⁵⁰ Sakay kinagi na tu bábbey, “Inligtas ka nu pánnampalataya mo, lumakad ka a mapayapa.”