Lukas 22 - U Maganda A Baheta Ni Jesu-Cristo

Intokyon ni Judas ti Jesus

¹ Nadid, adene dán a dumemát u Piyesta nu Tinapay a awan ti Págpaalsa a kákkagiyán di be a Kasayaan nu Aldew nu Págtaleb.

² U puno nu saserdote hide sakay u Maisto hide nu Kautusan ay magileng ti paraan tánni mepabuno de ti Jesus, pero maingat hide dipo manteng hide tu tolay hide.

Nákpagkasundo ti Judas tu Kadima hide ni Jesus

³ Ti itod be ay simmáddáp ti Satanas ni Judas a Iscariote, a essa tu sapulo ay ti duwwa a disepulus na.

⁴ Kanya lummakad siya sakay immangay tu puno nu saserdote hide sakay tu puno nu mágbantay hide tu templo para págguhunan de ni kodya na a metokyon ti Jesus nide.

⁵ Nasaya u puno nu saserdote hide sakay pinanantuwan de ti pilak ti Judas.

⁶ Pimmayag ti Judas tu kasunduwan, kanya sapul hod ay nagehyok dán siya ti pagkakataun a metokyon na ti Jesus, tu paraan a awan matukuyan nu katolayan.

Pághanda ti Pangapon para tu Aldew nu Págtaleb

⁷ Dimmemát dán u Aldew nu Piyesta a kuman u Judio hide ti tinapay a awan ti págpaalsa, sakay págbuno di be tu tupa para tu Kasayaan nu Aldew nu Págtaleb.

⁸ Inutusan ni Jesus ti Pedro sakay ti Juan, kinagi na, “Kammoy dán, maghanda kam ti pangapon tam para tu Aldew nu Págtaleb.”

⁹ Tinanung de siya, “Hadya i gusto muway a paghandaan me?”

¹⁰ Timmábbeg siya, “Angay kam ti Jerusalem. Tehhod kam hod a matagbu a lállake a te sásson a tapayan a te lasán a dinom. Unonudán moy siya tu bilay a sáddáppan na.

¹¹ Sakay kagiyán moy tu makábbilay, ‘Petanung ben nu Maisto ni tehhod kam a kuwarto a maare na a gamitán sakay tu disepulus na hide para tu Aldew nu Págtaleb.’

¹² Kaya ipeta na nikam u tunay a kadakál a kuwarto tu ontok nu bilay a tehhod dán a nakahanda a gamit. He kam hod a maghanda tu pangapon tam.”

¹³ Lummakad u disepulus hide sakay netan de u atanan a ayun tu kinagi ni Jesus. Sakay inhanda de u Pangapon de para tu Aldew nu Págtaleb.

Intatag de u Banal a Pángngapon nu Panginoon

¹⁴ Nikuna dummemát dán u odas nu pángngapon de, ay nákpággatubang ti Jesus tu disepulus na hide.

¹⁵ Káttapos ay kinagi na nide, “Gugusto ko a makaguman takam ti iye a pangapon baguwák a maghirap.

¹⁶ Sanigán moy i kagiyán kuwáy nikam, awanák dán kuman a huway ti iye hanggan a mangyare u kahulugen ni iye tu aldew a maghare u Diyos.”

¹⁷ Sakay inalap na u tasa a te lasán a alak, sakay káttapos na a nagpasalamat tu Diyos ay kinagi na, “Alapán moy iye sakay pamághatiyan moy.

¹⁸ Tandaan moy i kagiyán kuwáy nikam, awanák dán uminom a huway tu tábbug nu ubas mentaras awan palla dumemát u paghare nu Diyos.”

¹⁹ Sakay inalap na u tinapay sakay nagpasalamat tu Diyos, káttapos ay tináppeng-táppeng na itod sakay inyatád na nide. Kinagi na, “Iye u bággi ko a nealay para nikam. Gimitán moy iye a pággalaalaan moy nikán.”

²⁰ Sakay konna bi hod u ginimet na tu tasa a te alak, sakay kinagi na, “I mainuman iye ay tanda nu bigu a kasunduwan nu Diyos a pinatibay nu dige ko a mebuhus dipo nikam.

²¹ Pero kaatubang ku nadid u mángtokyon nikán.

²² U Anak nu Tolay ay dapat a matay sigun tu intakda nu Diyos, pero makaaánteng u sapitán nu tolay a mángtokyon nikuna.”

²³ Kanya namágtanungan u disepulus hide ni ti deya nide u manggimet ti konna hod.

U Tatahodan a Mataas a Tolay

²⁴ Namágtábbegan u disepulus hide ni deya nide u tenggiyán a pinakadakila.

²⁵ Kanya kinagi nide ni Jesus, “U hare nu Hentil hide ay amo nu nasakupan na hide, sakay u te kapangyariyan hide ay gusto di a madulaw a, ‘matattulungan tu tolay hide.’

²⁶ Pero bakán a konna hina u dapat moy a gimitan. Nan u pinakadakila u magin pinakamababa sakay u puno u dapat a magin tagapagserbi.

²⁷ Deya beman u dakila, u pagserbiyan oni u magserbi? Awan beman ay u pagserbiyan? Pero kakagumanák moy bilang essa a tagapagserbi.

²⁸ Matapat kam a kumuyoyog nikán maski tu odas nu makpal a pagsubuk a dinanas ko.

²⁹ Ni kodyaák a pinagkaluuben nu Ama ti karapatan a maghare, pagkaluuben takam be ti karapatan a maghare a konna nikán.

³⁰ Kapisan takam a kuman sakay uminom tu kahariyan ko, sakay mággetnod kam tu trono hide para mamahala tu sapulo ay ti duwwa a lahe ni Israel.”

Kinagi ni Jesus a Ipamen Siya ni Pedro

³¹ Kinagi ni Jesus, “Simon, Simon! Magsaneg ka! Inaged ni Satanas a purbaan naka konna tu páng-ibut tu lupás tu trigu.

³² Pero indaddasal taka a awan manghina u pánnampalataya mo. Ipamenák mo pero pagsisiyan mo labe, kaya gusto ko a tulungan mo u kakagumanan mo hide tánni bumegsák u pánnamplataya de.”

³³ Timmábbeg ti Pedro, “Panginoon, nakahandaák a mepireso sakay matay a kaguman mo!”

³⁴ Pero kinagi ni Jesus, “Tandaan mo i kagiyán kuwáy Pedro, bagu magtarakket u tandang ti aldiwan iye ay pumentálluwák mo a ipamen.”

Pághanda para tu Dumemát a Pagsubuk

³⁵ Káttapos ay tinanung hide ni Jesus, “Nikuna a utusan takam a awan ti tawed a pitaka sakay hembeg, oni sapatus, kinulang kam beman?” Timmábbeg hide, “Awan.”

³⁶ Kinagi ni Jesus, “Pero nadid, ni tehhod kam a pitaka oni hembeg ay tawidán moy dán. Ni deyaman u awan ti áttak, ay ilako moy u alikab-kab moy hide sakay mamale kam ti áttak.

³⁷ Sanigán moy kagiyán kuwáy, kailangan a matupad dán nadid u sumássulat tu Kasulatan tungkul nikán, ‘Inbilang de siya a essa tu makasalanan hide.’ Dipo u nesulat tungkul nikán ay matupad dán nadid!”

³⁸ Káttapos ay kinagi nu disepulus na hide, “Panginoon, tehhod heeh a duwwa a áttak.” Tummábbeg ti Jesus, “Tama dán!”

Nagdasal ti Jesus tu Buked nu Olibo hide

³⁹ Konna tu date na a gággimitán, limmakad ti Jesus sakay immangay tu Buked nu Olibo hide kaguman u disepulus na hide.

⁴⁰ Káddemat di hod ay kinagi na nide, “Magdasal kam, tánni awan kam madaig nu tokso.”

⁴¹ Káttapos ay immadeyo siya nide ti sabadit sakay limmuhud sakay nagdasal.

⁴² Kinagi na, “Ama, ni maare ay iyadeyo ped nikán i pághirapan iye. Pero bakán a u kagustuwan ko u masunud nan u kagustuwan mo.”

⁴³ Pimmeta nikuna u essa a anghel a gábwat ti langet sakay pinabegsák na u isip na.

⁴⁴ Dipo tu hirap a áisipán na ay lalo siya a nagdasal ti husto. Timmákták tu luta u inet na a kumán a dáddakkál a tuhog ni dige.

⁴⁵ Káttapos na a nagdasal ay nagsole siya tu disepulus na hide. Dinemáttán na hide a tidug dipo tu grabi a lungkut de.

⁴⁶ Tinanung na hide, “Bakin a mágtatidugán kam? Umikat kam sakay magdasal tánni awan kam madaig nu tokso.”

U Pángdakáp de ni Jesus

⁴⁷ Pasiyaan palla a magupos ti Jesus nikuna a dumemát u makpal a tolay a págdidipalonguwan ni Judas. Siya u essa tu sapulo ay ti duwwa a disepulus. Inadeniyan na ti Jesus sakay inámmuwan,

⁴⁸ pero tinanung siya ni Jesus, “Judas, itokyon mo beman u Anak nu Tolay tu pamamag-itan nu ámmo?”

⁴⁹ Pákketa nu disepulus na hide ti itod ay kinagi de, “Panginoon, tegpasan mi dán beman hide”

⁵⁰ Tinegpas ngane nu essa a disepulus u kawanan a talinga nu alipin nu pinakapuno nu saserdote, kaya nahipang u talinga na.

⁵¹ Pero kinagi ni Jesus, “Tama dan!” Sakay kinahap na u talinga nu alipin kaya nagpiyya.

⁵² Káttapos ay kinagi ni Jesus tu puno nu saserdote hide sakay tu puno nu mágbantay hide tu templo sakay tu ama-amaan hide nu banuwan a immangay hod para dakáppán siya, “Madukássák beman a tolay, kanya kam he a immangay a te átták hide sakay gahote hide?

⁵³ Aldew-aldiwák a magtoldu tu Templo sakay katoy kam bi hod, pero awanák moy dinakáp. Pero nadid ay panahun moy dán sakay panahon dambe nu paghare nu kapangyariyan ni Satanas.”

Inpamen ni Pedro ti Jesus

⁵⁴ Dinakáp di ngane ti Jesus sakay inyangay de tu bilay nu pinakapuno a saserdote. Immunonod nide ti Pedro pero adeyo la.

⁵⁵ Nagnamo u tolay hide tu laguwerta nu bilay sakay nagendu, nákpággetnod be hod ti Pedro.

⁵⁶ Nikuna ketan siya nu utusan a bábbey a magendu ay minámmalas na siya. Sakay kinagi na, “Kaguman be ni Jesus i tolayan iye!”

⁵⁷ Pero impamen ni Pedro, kinagi na, “Aha! Awan ko siya matengge!”

⁵⁸ Maya-maya ay te nakaino nikuna a huway sakay tinanung na, “Awan beman essa ka be tu kakagumanan na hide?” Pero timmábbeg ti Pedro, “Aha! Awanáng.”

⁵⁹ Kállipas nu essa a odas ay inpagpumilit be nu essa a katoy hod, “Kaguman ngani ni Jesus i tolayan itona, dipo essa be siya a taga-Galilea.”

⁶⁰ Pero timmábbeg ti Pedro, “Awan ko tukoy tumo i kákkagiyán muwe!” Pasiyaan palla siya a magupos ay bigla a nagtarákket u tandang.

⁶¹ Simmuleg u Panginoon ni Pedro sakay lináttángngan na siya. Kaya naisip ni Pedro u kinagi nu Panginoon a, “Bagu a magtarákket u tandang ti aldiwan iye ay pumentálluwák mo a ipamen.”

⁶² Kanya limmuwas ti Pedro sakay nágsasangitán.

Sineste sakay Binálbág de ti Jesus

⁶³ Nadid, sinásseste sakay binábbálbág nu magbantay hide ti Jesus.

⁶⁴ Pinángngássan di siya sakay tinanung, “Nay, tukuyan pay ni ti deya u nangsuntuk niko?”

⁶⁵ Sakay makpal pa hide a kinákkagi a madukás nikuna.

Inyatubang de ti Jesus tu Sanedrin

⁶⁶ Tukadimadimangan na ay namággipun u ama-amaan hide nu banuwan, u puno nu saserdote hide sakay u maisto hide nu Kautusan. Inyatubang di nide ti Jesus sakay tinanung de,

⁶⁷ Kinagi de, “Kagiyán mo nikame ni hiko beman u Mesias.” Timmábbeg ti Jesus, “Maski kagiyán ko nikam ay awan kam labe maniwala.

⁶⁸ Sakay ni tanungán takam be ay awan kam labe tumábbeg.

⁶⁹ Pero sapul nadid ay mággetnod dán u Anak nu Tolay tu kawanan nu makapangyariyan a Diyos.”

⁷⁰ Sakay kinagi de a atanan, “Gusto muway a kagiyán ay hiko u Anak nu Diyos?” Timmábbeg siya, “Hikamon nagkagiyay a hikán ngane.”

⁷¹ Sakay kinagi de, “Ánya pa beman a patunay i kailangan tamay? Nasaneg tamon a mismo tu sadile na a labi.”